| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓. ตีณุปฺปลมาลิยเตฺถรอปทานํ
3. Tīṇuppalamāliyattheraapadānaṃ
๑๓.
13.
‘‘จนฺทภาคานทีตีเร , อโหสิํ วานโร ตทา;
‘‘Candabhāgānadītīre , ahosiṃ vānaro tadā;
อทฺทสํ วิรชํ พุทฺธํ, นิสินฺนํ ปพฺพตนฺตเรฯ
Addasaṃ virajaṃ buddhaṃ, nisinnaṃ pabbatantare.
๑๔.
14.
‘‘โอภาเสนฺตํ ทิสา สพฺพา, สาลราชํว ผุลฺลิตํ;
‘‘Obhāsentaṃ disā sabbā, sālarājaṃva phullitaṃ;
ลกฺขณพฺยญฺชนูเปตํ, ทิสฺวานตฺตมโน อหํฯ
Lakkhaṇabyañjanūpetaṃ, disvānattamano ahaṃ.
๑๕.
15.
‘‘อุทคฺคจิโตฺต สุมโน, ปีติยา หฎฺฐมานโส;
‘‘Udaggacitto sumano, pītiyā haṭṭhamānaso;
ตีณิ อุปฺปลปุปฺผานิ, มตฺถเก อภิโรปยิํฯ
Tīṇi uppalapupphāni, matthake abhiropayiṃ.
๑๖.
16.
‘‘ปูชยิตฺวาน ปุปฺผานิ, ผุสฺสสฺสาหํ มเหสิโน;
‘‘Pūjayitvāna pupphāni, phussassāhaṃ mahesino;
สคารโว ภวิตฺวาน, ปกฺกามิํ อุตฺตรามุโขฯ
Sagāravo bhavitvāna, pakkāmiṃ uttarāmukho.
๑๗.
17.
‘‘คจฺฉโนฺต ปฎิกุฎิโก, วิปฺปสเนฺนน เจตสา;
‘‘Gacchanto paṭikuṭiko, vippasannena cetasā;
เสลนฺตเร ปติตฺวาน, ปาปุณิํ ชีวิตกฺขยํฯ
Selantare patitvāna, pāpuṇiṃ jīvitakkhayaṃ.
๑๘.
18.
‘‘เตน กเมฺมน สุกเตน, เจตนาปณิธีหิ จ;
‘‘Tena kammena sukatena, cetanāpaṇidhīhi ca;
ชหิตฺวา ปุริมํ ชาติํ, ตาวติํสมคจฺฉหํฯ
Jahitvā purimaṃ jātiṃ, tāvatiṃsamagacchahaṃ.
๑๙.
19.
‘‘สตานํ ตีณิกฺขตฺตุญฺจ, เทวรชฺชมการยิํ;
‘‘Satānaṃ tīṇikkhattuñca, devarajjamakārayiṃ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
Satānaṃ pañcakkhattuñca, cakkavattī ahosahaṃ.
๒๐.
20.
‘‘เทฺวนวุเต อิโต กเปฺป, ยํ ปุปฺผมภิปูชยิํ;
‘‘Dvenavute ito kappe, yaṃ pupphamabhipūjayiṃ;
ทุคฺคติํ นาภิชานามิ, พุทฺธปูชายิทํ ผลํฯ
Duggatiṃ nābhijānāmi, buddhapūjāyidaṃ phalaṃ.
๒๑.
21.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา ตีณุปฺปลมาลิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā tīṇuppalamāliyo thero imā gāthāyo abhāsitthāti.
ตีณุปฺปลมาลิยเตฺถรสฺสาปทานํ ตติยํฯ
Tīṇuppalamāliyattherassāpadānaṃ tatiyaṃ.
