| Library / Tipiṭaka / තිපිටක • Tipiṭaka / අපදානපාළි • Apadānapāḷi |
3. තීණුප්‌පලමාලියත්‌ථෙරඅපදානං
3. Tīṇuppalamāliyattheraapadānaṃ
13.
13.
‘‘චන්‌දභාගානදීතීරෙ , අහොසිං වානරො තදා;
‘‘Candabhāgānadītīre , ahosiṃ vānaro tadā;
අද්‌දසං විරජං බුද්‌ධං, නිසින්‌නං පබ්‌බතන්‌තරෙ.
Addasaṃ virajaṃ buddhaṃ, nisinnaṃ pabbatantare.
14.
14.
‘‘ඔභාසෙන්‌තං දිසා සබ්‌බා, සාලරාජංව ඵුල්‌ලිතං;
‘‘Obhāsentaṃ disā sabbā, sālarājaṃva phullitaṃ;
ලක්‌ඛණබ්‍යඤ්‌ජනූපෙතං, දිස්‌වානත්‌තමනො අහං.
Lakkhaṇabyañjanūpetaṃ, disvānattamano ahaṃ.
15.
15.
‘‘උදග්‌ගචිත්‌තො සුමනො, පීතියා හට්‌ඨමානසො;
‘‘Udaggacitto sumano, pītiyā haṭṭhamānaso;
තීණි උප්‌පලපුප්‌ඵානි, මත්‌ථකෙ අභිරොපයිං.
Tīṇi uppalapupphāni, matthake abhiropayiṃ.
16.
16.
‘‘පූජයිත්‌වාන පුප්‌ඵානි, ඵුස්‌සස්‌සාහං මහෙසිනො;
‘‘Pūjayitvāna pupphāni, phussassāhaṃ mahesino;
සගාරවො භවිත්‌වාන, පක්‌කාමිං උත්‌තරාමුඛො.
Sagāravo bhavitvāna, pakkāmiṃ uttarāmukho.
17.
17.
‘‘ගච්‌ඡන්‌තො පටිකුටිකො, විප්‌පසන්‌නෙන චෙතසා;
‘‘Gacchanto paṭikuṭiko, vippasannena cetasā;
සෙලන්‌තරෙ පතිත්‌වාන, පාපුණිං ජීවිතක්‌ඛයං.
Selantare patitvāna, pāpuṇiṃ jīvitakkhayaṃ.
18.
18.
‘‘තෙන කම්‌මෙන සුකතෙන, චෙතනාපණිධීහි ච;
‘‘Tena kammena sukatena, cetanāpaṇidhīhi ca;
ජහිත්‌වා පුරිමං ජාතිං, තාවතිංසමගච්‌ඡහං.
Jahitvā purimaṃ jātiṃ, tāvatiṃsamagacchahaṃ.
19.
19.
‘‘සතානං තීණික්‌ඛත්‌තුඤ්‌ච, දෙවරජ්‌ජමකාරයිං;
‘‘Satānaṃ tīṇikkhattuñca, devarajjamakārayiṃ;
සතානං පඤ්‌චක්‌ඛත්‌තුඤ්‌ච, චක්‌කවත්‌තී අහොසහං.
Satānaṃ pañcakkhattuñca, cakkavattī ahosahaṃ.
20.
20.
‘‘ද්‌වෙනවුතෙ ඉතො කප්‌පෙ, යං පුප්‌ඵමභිපූජයිං;
‘‘Dvenavute ito kappe, yaṃ pupphamabhipūjayiṃ;
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
21.
21.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා තීණුප්‌පලමාලියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā tīṇuppalamāliyo thero imā gāthāyo abhāsitthāti.
තීණුප්‌පලමාලියත්‌ථෙරස්‌සාපදානං තතියං.
Tīṇuppalamāliyattherassāpadānaṃ tatiyaṃ.
