| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. திபது³மியத்தே²ரஅபதா³னவண்ணனா
10. Tipadumiyattheraapadānavaṇṇanā
பது³முத்தரோ நாம ஜினோதிஆதி³கங் ஆயஸ்மதோ திபது³மியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதியங் மாலாகாரகுலகே³ஹே நிப்³ப³த்தோ வுத்³தி⁴ப்பத்தோ மாலாகாரகம்மங் கத்வா வஸந்தோ ஏகதி³வஸங் அனேகவிதா⁴னி ஜலஜத²லஜபுப்பா²னி க³ஹெத்வா ரஞ்ஞோ ஸந்திகங் க³ந்துகாமோ ஏவங் சிந்தேஸி – ‘‘ராஜா இமானி தாவ புப்பா²னி தி³ஸ்வா பஸன்னோ ஸஹஸ்ஸங் வா த⁴னங் கா³மாதி³கங் வா த³தெ³ய்ய, லோகனாத²ங் பன பூஜெத்வா நிப்³பா³னாமதத⁴னங் லபா⁴மி, கிங் மே ஏதேஸு ஸுந்த³ர’’ந்தி தேன ‘‘ப⁴க³வந்தங் பூஜெத்வா ஸக்³க³மொக்க²ஸம்பத்தியோ நிப்பா²தே³துங் வட்டதீ’’தி சிந்தெத்வா வண்ணவந்தங் அதீவ ரத்தபுப்ப²த்தயங் க³ஹெத்வா பூஜேஸி. தானி க³ந்த்வா ஆகாஸங் சா²தெ³த்வா பத்த²ரித்வா அட்ட²ங்ஸு. நக³ரவாஸினோ அச்ச²ரியப்³பு⁴தசித்தஜாதா சேலுக்கே²பஸஹஸ்ஸானி பவத்தயிங்ஸு. தங் தி³ஸ்வா ப⁴க³வா அனுமோத³னங் அகாஸி. ஸோ தேன புஞ்ஞேன தே³வமனுஸ்ஸேஸு ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ க³ஹபதிகுலே நிப்³ப³த்தோ வுத்³தி⁴மன்வாய ஸத்த²ரி பஸீதி³த்வா த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா நசிரஸ்ஸேவ அரஹா அஹோஸி.
Padumuttaro nāma jinotiādikaṃ āyasmato tipadumiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatiyaṃ mālākārakulagehe nibbatto vuddhippatto mālākārakammaṃ katvā vasanto ekadivasaṃ anekavidhāni jalajathalajapupphāni gahetvā rañño santikaṃ gantukāmo evaṃ cintesi – ‘‘rājā imāni tāva pupphāni disvā pasanno sahassaṃ vā dhanaṃ gāmādikaṃ vā dadeyya, lokanāthaṃ pana pūjetvā nibbānāmatadhanaṃ labhāmi, kiṃ me etesu sundara’’nti tena ‘‘bhagavantaṃ pūjetvā saggamokkhasampattiyo nipphādetuṃ vaṭṭatī’’ti cintetvā vaṇṇavantaṃ atīva rattapupphattayaṃ gahetvā pūjesi. Tāni gantvā ākāsaṃ chādetvā pattharitvā aṭṭhaṃsu. Nagaravāsino acchariyabbhutacittajātā celukkhepasahassāni pavattayiṃsu. Taṃ disvā bhagavā anumodanaṃ akāsi. So tena puññena devamanussesu sampattiyo anubhavitvā imasmiṃ buddhuppāde gahapatikule nibbatto vuddhimanvāya satthari pasīditvā dhammaṃ sutvā paṭiladdhasaddho pabbajitvā nacirasseva arahā ahosi.
48. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரோ நாம ஜினோதிஆதி³மாஹ. தஸ்ஸத்தோ² ஹெட்டா² வுத்தோவ. ஸப்³ப³த⁴ம்மான பாரகூ³தி ஸப்³பே³ஸங் நவலோகுத்தரத⁴ம்மானங் பாரங் நிப்³பா³னங் க³தோ பச்சக்க²ங் கதோதி அத்தோ². த³ந்தோ த³ந்தபரிவுதோதி ஸயங் காயவாசாதீ³ஹி த³ந்தோ ஏதத³க்³கே³ ட²பிதேஹி ஸாவகேஹி பரிவுதோதி அத்தோ². ஸேஸங் ஸப்³ப³த்த² ஸம்ப³ந்த⁴வஸேன உத்தானத்த²மேவாதி.
48. So attano pubbakammaṃ saritvā somanassajāto pubbacaritāpadānaṃ pakāsento padumuttaronāma jinotiādimāha. Tassattho heṭṭhā vuttova. Sabbadhammāna pāragūti sabbesaṃ navalokuttaradhammānaṃ pāraṃ nibbānaṃ gato paccakkhaṃ katoti attho. Danto dantaparivutoti sayaṃ kāyavācādīhi danto etadagge ṭhapitehi sāvakehi parivutoti attho. Sesaṃ sabbattha sambandhavasena uttānatthamevāti.
திபது³மியத்தே²ரஅபதா³னவண்ணனா ஸமத்தா.
Tipadumiyattheraapadānavaṇṇanā samattā.
அட்ட²மவக்³க³வண்ணனா ஸமத்தா.
Aṭṭhamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. திபது³மியத்தே²ரஅபதா³னங் • 10. Tipadumiyattheraapadānaṃ
