| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
6. д̇ибубпияад̇т̇зраабад̣̇аанаван̣н̣анаа
6. Tipupphiyattheraapadānavaṇṇanā
миг̇алуд̣̇д̣̇о бурз аасинд̇иаад̣̇игам̣ ааяасмад̇о д̇ибубпияад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро анд̇араа гзнажи агусалажчид̣̇д̣̇зна вибассисса бхаг̇авад̇о гаалз нзсаад̣̇агулз ниб̣б̣ад̇д̇о миг̇алуд̣̇д̣̇о худ̇ваа аран̃н̃з вихарад̇и. д̇ад̣̇аа вибассисса бхаг̇авад̇о баадалиб̣од̇хим̣ самбун̣н̣абад̇д̇абаллавам̣ харид̇аван̣н̣ам̣ нийлобхаасам̣ манорамам̣ д̣̇исваа д̇ийхи бубпзхи бууж̇зд̇ваа бураан̣абад̇д̇ам̣ чад̣д̣зд̇ваа бхаг̇авад̇о саммукаа вияа баадалимахааб̣од̇хим̣ ванд̣̇и. со д̇зна бун̃н̃зна д̇ад̇о жуд̇о д̣̇звалогз уббанно д̇ад̇т̇а д̣̇иб̣б̣асамбад̇д̇им̣ абараабарам̣ анубхавид̇ваа д̇ад̇о жуд̇о мануссзсу ж̇аад̇о д̇ад̇т̇а жаггавад̇д̇исамбад̇д̇иаад̣̇аяо анубхавид̇ваа имасмим̣ б̣уд̣̇д̇хуббаад̣̇з згасмим̣ гулаг̇зхз ниб̣б̣ад̇д̇о вуд̣̇д̇химанвааяа сад̇т̇у д̇хаммад̣̇зсанам̣ суд̇ваа бадилад̣̇д̇хасоманассахад̣̇аяо г̇зхам̣ бахааяа баб̣б̣аж̇ид̇ваа нажирассзва арахаа ахоси.
Migaluddo pure āsintiādikaṃ āyasmato tipupphiyattherassa apadānaṃ. Ayampi purimabuddhesu katādhikāro antarā kenaci akusalacchiddena vipassissa bhagavato kāle nesādakule nibbatto migaluddo hutvā araññe viharati. Tadā vipassissa bhagavato pāṭalibodhiṃ sampuṇṇapattapallavaṃ haritavaṇṇaṃ nīlobhāsaṃ manoramaṃ disvā tīhi pupphehi pūjetvā purāṇapattaṃ chaḍḍetvā bhagavato sammukhā viya pāṭalimahābodhiṃ vandi. So tena puññena tato cuto devaloke uppanno tattha dibbasampattiṃ aparāparaṃ anubhavitvā tato cuto manussesu jāto tattha cakkavattisampattiādayo anubhavitvā imasmiṃ buddhuppāde ekasmiṃ kulagehe nibbatto vuddhimanvāya satthu dhammadesanaṃ sutvā paṭiladdhasomanassahadayo gehaṃ pahāya pabbajitvā nacirasseva arahā ahosi.
31. со звам̣ сид̣̇д̇хиббад̇д̇о ад̇д̇ано буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о миг̇алуд̣̇д̣̇о бурз аасинд̇иаад̣̇имааха. д̇ад̇т̇а маран̣ааяа г̇ажчад̇и баабун̣аад̇ийд̇и миг̇о, ат̇а ваа маг̇аяамаано ихад̇и бавад̇д̇ад̇ийд̇и миг̇о, миг̇аанам̣ мааран̣з луд̣̇д̣̇о лобхий г̇зд̇ход̇и миг̇алуд̣̇д̣̇о, бурз маяхам̣ бун̃н̃агаран̣асамаяз гаананасан̇каад̇з махаааран̃н̃з миг̇алуд̣̇д̣̇о аасинд̇и самб̣анд̇хо. баадалим̣ харид̇ам̣ д̣̇исваад̇и д̇ад̇т̇а багаарзна д̇алзна рад̇д̇аван̣н̣зна бхавад̇ийд̇и баадали , бубпаанам̣ рад̇д̇аван̣н̣ад̇ааяа баадалийд̇и вохааро, бад̇д̇аанам̣ харид̇ад̇ааяа харид̇ам̣ нийлаван̣н̣ам̣ баадалиб̣од̇хим̣ д̣̇исваад̇и ад̇т̇о. сзсам̣ саб̣б̣ад̇т̇а уд̇д̇аанад̇т̇амзваад̇и.
31. So evaṃ siddhippatto attano pubbakammaṃ saritvā somanassajāto pubbacaritāpadānaṃ pakāsento migaluddo pure āsintiādimāha. Tattha maraṇāya gacchati pāpuṇātīti migo, atha vā magayamāno ihati pavattatīti migo, migānaṃ māraṇe luddo lobhī gedhoti migaluddo, pure mayhaṃ puññakaraṇasamaye kānanasaṅkhāte mahāaraññe migaluddo āsinti sambandho. Pāṭaliṃ haritaṃ disvāti tattha pakārena talena rattavaṇṇena bhavatīti pāṭali , pupphānaṃ rattavaṇṇatāya pāṭalīti vohāro, pattānaṃ haritatāya haritaṃ nīlavaṇṇaṃ pāṭalibodhiṃ disvāti attho. Sesaṃ sabbattha uttānatthamevāti.
д̇ибубпияад̇т̇зраабад̣̇аанаван̣н̣анаа самад̇д̇аа.
Tipupphiyattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 6. д̇ибубпияад̇т̇зраабад̣̇аанам̣ • 6. Tipupphiyattheraapadānaṃ
