| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
49. திரச்சா²னக³தவத்து²
49. Tiracchānagatavatthu
111. தே³வஸம்பத்திஸதி³ஸங் இஸ்ஸரியஸம்பத்திங் அனுப⁴வந்தோபி ஸோ நாகோ³ கஸ்மா நாக³யோனியா அட்டீயதீதி ஆஹ ‘‘கிஞ்சாபீ’’திஆதி³.
111. Devasampattisadisaṃ issariyasampattiṃ anubhavantopi so nāgo kasmā nāgayoniyā aṭṭīyatīti āha ‘‘kiñcāpī’’tiādi.
தத்த² கிஞ்சாபி அனுபோ⁴தீதி ஸம்ப³ந்தோ⁴. கிஞ்சாபிஸத்³தோ³ ஹெத்த² ஸம்பா⁴வனாஜோதகோ, பனஸத்³தோ³ க³ரஹத்த²ஜோதகோ. குஸலவிபாகேனாதி அஹேதுககுஸலவிபாகேன. தஸ்ஸாதி நாக³ஸ்ஸ. ஸஜாதியாதி ஸமானஜாதியா நாகி³யா. உத³கஸஞ்சாரிமண்டூ³கப⁴க்க²ந்தி உத³கே ஸஞ்சரணஸீலங் மண்டூ³கஸங்கா²தங் ப⁴க்க²ங் பாதுப⁴வதீதி யோஜனா. ஸோதி நாகோ³. அட்டீயதீதி அரமணங் பீளியதி. ஹராயதீதி எத்த² ஹரேதா⁴து லஜ்ஜனத்தோ²தி ஆஹ ‘‘லஜ்ஜதீ’’தி. ஏகாரந்தோ தா⁴து பூ⁴வாதி³க³ணிகோ (ஸத்³த³னீதிதா⁴துமாலாயங் 16 ரகாரந்ததா⁴து). ஜிகு³ச்ச²தீதி எத்த² கு³பதா⁴துயா கம்மங் த³ஸ்ஸெந்தோ ஆஹ ‘‘அத்தபா⁴வ’’ந்தி. ‘‘தஸ்ஸ பி⁴க்கு²னோ’’திபத³ஸ்ஸ ‘‘நிக்க²ந்தே’’திபதே³ன யோஜிதப்³ப³த்தா பு⁴ம்மத்தே² ஸாமிவசனந்தி ஆஹ ‘‘தஸ்மிங் பி⁴க்கு²ஸ்மி’’ந்தி. அத² வா தஸ்ஸ பி⁴க்கு²னோதி ஸாமியோக³த்தா ‘‘நிக்க²ந்தே’’தி எத்த² பா⁴வத்தே² மானபச்சயோதி ஆஹ ‘‘நிக்க²மனே’’தி. இமினா நிக்க²ந்தேதி எத்த² ந அந்தபச்சயோ, மானபச்சயஸ்ஸேவ அந்தபா⁴வங் கத்வா வுத்தோதி த³ஸ்ஸேதி. விஸ்ஸட்டோ²தி ஸதிவிஸ்ஸஜ்ஜிதோ. தஸ்மிந்தி பி⁴க்கு²ம்ஹி. கபிமித்³த⁴வஸேனேவாதி கபினோ மித்³த⁴வஸேன ஏவ. அத² வா கபிமித்³த⁴வஸேன நித்³தா³யந்தோ இவ நித்³தா³யந்தோதி யோஜனா. படினிபஜ்ஜீதி புன நிபஜ்ஜி. விஸ்ஸரமகாஸீதி எத்த² விஸத்³தோ³ விரூபத்த²ஜோதகோ, ஸரஸத்³தோ³ ஸத்³த³வாசகோதி த³ஸ்ஸெந்தோ ஆஹ ‘‘விரூபங் மஹாஸத்³த³மகாஸீ’’தி.
Tattha kiñcāpi anubhotīti sambandho. Kiñcāpisaddo hettha sambhāvanājotako, panasaddo garahatthajotako. Kusalavipākenāti ahetukakusalavipākena. Tassāti nāgassa. Sajātiyāti samānajātiyā nāgiyā. Udakasañcārimaṇḍūkabhakkhanti udake sañcaraṇasīlaṃ maṇḍūkasaṅkhātaṃ bhakkhaṃ pātubhavatīti yojanā. Soti nāgo. Aṭṭīyatīti aramaṇaṃ pīḷiyati. Harāyatīti ettha haredhātu lajjanatthoti āha ‘‘lajjatī’’ti. Ekāranto dhātu bhūvādigaṇiko (saddanītidhātumālāyaṃ 16 rakārantadhātu). Jigucchatīti ettha gupadhātuyā kammaṃ dassento āha ‘‘attabhāva’’nti. ‘‘Tassa bhikkhuno’’tipadassa ‘‘nikkhante’’tipadena yojitabbattā bhummatthe sāmivacananti āha ‘‘tasmiṃ bhikkhusmi’’nti. Atha vā tassa bhikkhunoti sāmiyogattā ‘‘nikkhante’’ti ettha bhāvatthe mānapaccayoti āha ‘‘nikkhamane’’ti. Iminā nikkhanteti ettha na antapaccayo, mānapaccayasseva antabhāvaṃ katvā vuttoti dasseti. Vissaṭṭhoti sativissajjito. Tasminti bhikkhumhi. Kapimiddhavasenevāti kapino middhavasena eva. Atha vā kapimiddhavasena niddāyanto iva niddāyantoti yojanā. Paṭinipajjīti puna nipajji. Vissaramakāsīti ettha visaddo virūpatthajotako, sarasaddo saddavācakoti dassento āha ‘‘virūpaṃ mahāsaddamakāsī’’ti.
‘‘அகாரஸ்ஸ லோபங் கத்வா’’தி இமினா தும்ஹே கொ²த்தா²தி எத்த² ‘‘தும்ஹே கோ² அத்தா²’’தி பத³விபா⁴க³ங் கத்வா ஓகாரதோ பரஸ்ஸ அகாரஸ்ஸ லோபங் த³ஸ்ஸேதி. ‘‘அகாரஸ்ஸாலோப’’ந்திபி பாடோ². ஏவஞ்ஹி ஸதி அகாரஸ்ஸ அலோபங் கத்வாதி அத்தோ² த³ட்ட²ப்³போ³. இமினா ‘‘தும்ஹே கோ² அத்தா²’’தி பத³ச்சே²த³ங் கத்வா அகாரே பரே ஓகாரஸ்ஸ வகாரங் கத்வா தும்ஹே க்²வத்தா²’’தி பாடோ² த³ஸ்ஸிதோ. கஸ்மா இமஸ்மிங் த⁴ம்மவினயே அவிரூள்ஹித⁴ம்மாதி ஆஹ ‘‘ஜா²ன…பே॰… அப⁴ப்³ப³த்தா’’தி. ‘‘ப⁴வதா²’’தி இமினா அத்தா²தி எத்த² அஸதா⁴து ஸத்தத்த²வாசகோ த²விப⁴த்தீதி த³ஸ்ஸேதி. ஸஜாதியாதி எத்த² ஸமானா ஜாதி ஏதிஸ்ஸாதி ஸஜாதீதி வுத்தே நாகீ³ ஏவாதி ஆஹ ‘‘நாகி³யா ஏவா’’தி. மனுஸ்ஸித்தி²ஆதீ³தி எத்த² ஆதி³ஸத்³தே³ன திரச்சா²னக³தித்தீ²பேதித்தீ²தே³வித்தி²யோ ஸங்க³ண்ஹாதி. ‘‘த்³வேமே பி⁴க்க²வே பச்சயா’’தி தே³ஸனா ஸாவஸேஸதே³ஸனாதி த³ஸ்ஸெந்தோ ஆஹ ‘‘எத்த² சா’’தி. எத்தா²தி திரச்சா²னக³தவத்து²ம்ஹி. அபி⁴ண்ஹந்தி அபி⁴க்க²ணங் புனப்புனந்தி அத்தோ².
‘‘Akārassa lopaṃ katvā’’ti iminā tumhe khotthāti ettha ‘‘tumhe kho atthā’’ti padavibhāgaṃ katvā okārato parassa akārassa lopaṃ dasseti. ‘‘Akārassālopa’’ntipi pāṭho. Evañhi sati akārassa alopaṃ katvāti attho daṭṭhabbo. Iminā ‘‘tumhe kho atthā’’ti padacchedaṃ katvā akāre pare okārassa vakāraṃ katvā tumhe khvatthā’’ti pāṭho dassito. Kasmā imasmiṃ dhammavinaye avirūḷhidhammāti āha ‘‘jhāna…pe… abhabbattā’’ti. ‘‘Bhavathā’’ti iminā atthāti ettha asadhātu sattatthavācako thavibhattīti dasseti. Sajātiyāti ettha samānā jāti etissāti sajātīti vutte nāgī evāti āha ‘‘nāgiyā evā’’ti. Manussitthiādīti ettha ādisaddena tiracchānagatitthīpetitthīdevitthiyo saṅgaṇhāti. ‘‘Dveme bhikkhave paccayā’’ti desanā sāvasesadesanāti dassento āha ‘‘ettha cā’’ti. Etthāti tiracchānagatavatthumhi. Abhiṇhanti abhikkhaṇaṃ punappunanti attho.
திரச்சா²னக³தோதி எத்த² கிங் அபாயபரியாபன்னோ து³க்³க³திஅஹேதுகபடிஸந்தி⁴கோவாதி⁴ப்பேதோதி ஆஹ ‘‘நாகோ³ வா ஹோதூ’’திஆதி³.
Tiracchānagatoti ettha kiṃ apāyapariyāpanno duggatiahetukapaṭisandhikovādhippetoti āha ‘‘nāgo vā hotū’’tiādi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 49. திரச்சா²னக³தவத்து² • 49. Tiracchānagatavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / திரச்சா²னக³தவத்து²கதா² • Tiracchānagatavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தித்தி²யபக்கந்தககதா²வண்ணனா • Titthiyapakkantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திரச்சா²னக³தவத்து²கதா²வண்ணனா • Tiracchānagatavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / திரச்சா²னவத்து²கதா²வண்ணனா • Tiracchānavatthukathāvaṇṇanā
