| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
திரச்சா²னக³தவத்து²கதா²
Tiracchānagatavatthukathā
111. நாக³யோனியா அட்டீயதீதி எத்த² கிஞ்சாபி ஸோ பவத்தியங் குஸலவிபாகேன தே³வஸம்பத்திஸதி³ஸங் இஸ்ஸரியஸம்பத்திங் அனுபோ⁴தி, அகுஸலவிபாகபடிஸந்தி⁴கஸ்ஸ பன தஸ்ஸ ஸஜாதியா மேது²னபடிஸேவனே ச விஸ்ஸட்ட²னித்³தோ³க்கமனே ச நாக³ஸரீரங் பாதுப⁴வதி உத³கஸஞ்சாரிகங் மண்டூ³கப⁴க்க²ங், தஸ்மா ஸோ தாய நாக³யோனியா அட்டீயதி. ஹராயதீதி லஜ்ஜதி. ஜிகு³ச்ச²தீதி அத்தபா⁴வங் ஜிகு³ச்ச²தி. தஸ்ஸ பி⁴க்கு²னோ நிக்க²ந்தேதி தஸ்மிங் பி⁴க்கு²ஸ்மிங் நிக்க²ந்தே. அத² வா தஸ்ஸ பி⁴க்கு²னோ நிக்க²மனேதி அத்தோ². விஸ்ஸட்டோ² நித்³த³ங் ஓக்கமீதி தஸ்மிங் அனிக்க²ந்தே விஸ்ஸரப⁴யேன ஸதிங் அவிஸ்ஸஜ்ஜித்வா கபிமித்³த⁴வஸேனேவ நித்³தா³யந்தோ நிக்க²ந்தே ஸதிங் விஸ்ஸஜ்ஜித்வா விஸ்ஸட்டோ² நிராஸங்கோ மஹானித்³த³ங் படிபஜ்ஜி. விஸ்ஸரமகாஸீதி ப⁴யவஸேன ஸமணஸஞ்ஞங் பஹாய விரூபங் மஹாஸத்³த³மகாஸி.
111.Nāgayoniyāaṭṭīyatīti ettha kiñcāpi so pavattiyaṃ kusalavipākena devasampattisadisaṃ issariyasampattiṃ anubhoti, akusalavipākapaṭisandhikassa pana tassa sajātiyā methunapaṭisevane ca vissaṭṭhaniddokkamane ca nāgasarīraṃ pātubhavati udakasañcārikaṃ maṇḍūkabhakkhaṃ, tasmā so tāya nāgayoniyā aṭṭīyati. Harāyatīti lajjati. Jigucchatīti attabhāvaṃ jigucchati. Tassa bhikkhuno nikkhanteti tasmiṃ bhikkhusmiṃ nikkhante. Atha vā tassa bhikkhuno nikkhamaneti attho. Vissaṭṭho niddaṃ okkamīti tasmiṃ anikkhante vissarabhayena satiṃ avissajjitvā kapimiddhavaseneva niddāyanto nikkhante satiṃ vissajjitvā vissaṭṭho nirāsaṅko mahāniddaṃ paṭipajji. Vissaramakāsīti bhayavasena samaṇasaññaṃ pahāya virūpaṃ mahāsaddamakāsi.
தும்ஹே கொ²த்தா²தி தும்ஹே கோ² அத்த²; அகாரஸ்ஸ லோபங் கத்வா வுத்தங். தும்ஹே கோ² நாகா³ ஜா²னவிபஸ்ஸனாமக்³க³ப²லானங் அப⁴ப்³ப³த்தா இமஸ்மிங் த⁴ம்மவினயே அவிருள்ஹித⁴ம்மா அத்த², விருள்ஹித⁴ம்மா ந ப⁴வதா²தி அயமெத்த² ஸங்கே²பத்தோ². ஸஜாதியாதி நாகி³யா ஏவ. யதா³ பன மனுஸ்ஸித்தி²ஆதி³பே⁴தா³ய அஞ்ஞஜாதியா படிஸேவதி, ததா³ தே³வபுத்தோ விய ஹோதி. எத்த² ச பவத்தியங் அபி⁴ண்ஹங் ஸபா⁴வபாதுகம்மத³ஸ்ஸனவஸேன ‘‘த்³வே பச்சயா’’தி வுத்தங். நாக³ஸ்ஸ பன பஞ்சஸு காலேஸு ஸபா⁴வபாதுகம்மங் ஹோதி – படிஸந்தி⁴காலே, தசஜஹனகாலே, ஸஜாதியா மேது²னகாலே, விஸ்ஸட்ட²னித்³தோ³க்கமனகாலே, சுதிகாலேதி.
Tumhe khotthāti tumhe kho attha; akārassa lopaṃ katvā vuttaṃ. Tumhe kho nāgā jhānavipassanāmaggaphalānaṃ abhabbattā imasmiṃ dhammavinaye aviruḷhidhammā attha, viruḷhidhammā na bhavathāti ayamettha saṅkhepattho. Sajātiyāti nāgiyā eva. Yadā pana manussitthiādibhedāya aññajātiyā paṭisevati, tadā devaputto viya hoti. Ettha ca pavattiyaṃ abhiṇhaṃ sabhāvapātukammadassanavasena ‘‘dve paccayā’’ti vuttaṃ. Nāgassa pana pañcasu kālesu sabhāvapātukammaṃ hoti – paṭisandhikāle, tacajahanakāle, sajātiyā methunakāle, vissaṭṭhaniddokkamanakāle, cutikāleti.
திரச்சா²னக³தோ பி⁴க்க²வேதி எத்த² நாகோ³ வா ஹோது ஸுபண்ணமாணவகாதீ³னங் வா அஞ்ஞதரோ, அந்தமஸோ ஸக்கங் தே³வராஜானங் உபாதா³ய யோ கோசி அமனுஸ்ஸஜாதியோ, ஸப்³போ³வ இமஸ்மிங் அத்தே² திரச்சா²னக³தோதி வேதி³தப்³போ³. ஸோ நேவ உபஸம்பாதே³தப்³போ³, ந பப்³பா³ஜேதப்³போ³, உபஸம்பன்னோபி நாஸேதப்³போ³தி.
Tiracchānagato bhikkhaveti ettha nāgo vā hotu supaṇṇamāṇavakādīnaṃ vā aññataro, antamaso sakkaṃ devarājānaṃ upādāya yo koci amanussajātiyo, sabbova imasmiṃ atthe tiracchānagatoti veditabbo. So neva upasampādetabbo, na pabbājetabbo, upasampannopi nāsetabboti.
திரச்சா²னக³தவத்து²கதா² நிட்டி²தா.
Tiracchānagatavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 49. திரச்சா²னக³தவத்து² • 49. Tiracchānagatavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தித்தி²யபக்கந்தககதா²வண்ணனா • Titthiyapakkantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திரச்சா²னக³தவத்து²கதா²வண்ணனா • Tiracchānagatavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / திரச்சா²னவத்து²கதா²வண்ணனா • Tiracchānavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 49. திரச்சா²னக³தவத்து² • 49. Tiracchānagatavatthu
