| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
তিরচ্ছানগতৰত্থুকথা
Tiracchānagatavatthukathā
১১১. নাগযোনিযা অট্টীযতীতি এত্থ কিঞ্চাপি সো পৰত্তিযং কুসলৰিপাকেন দেৰসম্পত্তিসদিসং ইস্সরিযসম্পত্তিং অনুভোতি, অকুসলৰিপাকপটিসন্ধিকস্স পন তস্স সজাতিযা মেথুনপটিসেৰনে চ ৰিস্সট্ঠনিদ্দোক্কমনে চ নাগসরীরং পাতুভৰতি উদকসঞ্চারিকং মণ্ডূকভক্খং, তস্মা সো তায নাগযোনিযা অট্টীযতি। হরাযতীতি লজ্জতি। জিগুচ্ছতীতি অত্তভাৰং জিগুচ্ছতি। তস্স ভিক্খুনো নিক্খন্তেতি তস্মিং ভিক্খুস্মিং নিক্খন্তে। অথ ৰা তস্স ভিক্খুনো নিক্খমনেতি অত্থো। ৰিস্সট্ঠো নিদ্দং ওক্কমীতি তস্মিং অনিক্খন্তে ৰিস্সরভযেন সতিং অৰিস্সজ্জিত্ৰা কপিমিদ্ধৰসেনেৰ নিদ্দাযন্তো নিক্খন্তে সতিং ৰিস্সজ্জিত্ৰা ৰিস্সট্ঠো নিরাসঙ্কো মহানিদ্দং পটিপজ্জি। ৰিস্সরমকাসীতি ভযৰসেন সমণসঞ্ঞং পহায ৰিরূপং মহাসদ্দমকাসি।
111.Nāgayoniyāaṭṭīyatīti ettha kiñcāpi so pavattiyaṃ kusalavipākena devasampattisadisaṃ issariyasampattiṃ anubhoti, akusalavipākapaṭisandhikassa pana tassa sajātiyā methunapaṭisevane ca vissaṭṭhaniddokkamane ca nāgasarīraṃ pātubhavati udakasañcārikaṃ maṇḍūkabhakkhaṃ, tasmā so tāya nāgayoniyā aṭṭīyati. Harāyatīti lajjati. Jigucchatīti attabhāvaṃ jigucchati. Tassa bhikkhuno nikkhanteti tasmiṃ bhikkhusmiṃ nikkhante. Atha vā tassa bhikkhuno nikkhamaneti attho. Vissaṭṭho niddaṃ okkamīti tasmiṃ anikkhante vissarabhayena satiṃ avissajjitvā kapimiddhavaseneva niddāyanto nikkhante satiṃ vissajjitvā vissaṭṭho nirāsaṅko mahāniddaṃ paṭipajji. Vissaramakāsīti bhayavasena samaṇasaññaṃ pahāya virūpaṃ mahāsaddamakāsi.
তুম্হে খোত্থাতি তুম্হে খো অত্থ; অকারস্স লোপং কত্ৰা ৰুত্তং। তুম্হে খো নাগা ঝানৰিপস্সনামগ্গফলানং অভব্বত্তা ইমস্মিং ধম্মৰিনযে অৰিরুল়্হিধম্মা অত্থ, ৰিরুল়্হিধম্মা ন ভৰথাতি অযমেত্থ সঙ্খেপত্থো। সজাতিযাতি নাগিযা এৰ। যদা পন মনুস্সিত্থিআদিভেদায অঞ্ঞজাতিযা পটিসেৰতি, তদা দেৰপুত্তো ৰিয হোতি। এত্থ চ পৰত্তিযং অভিণ্হং সভাৰপাতুকম্মদস্সনৰসেন ‘‘দ্ৰে পচ্চযা’’তি ৰুত্তং। নাগস্স পন পঞ্চসু কালেসু সভাৰপাতুকম্মং হোতি – পটিসন্ধিকালে, তচজহনকালে, সজাতিযা মেথুনকালে, ৰিস্সট্ঠনিদ্দোক্কমনকালে, চুতিকালেতি।
Tumhe khotthāti tumhe kho attha; akārassa lopaṃ katvā vuttaṃ. Tumhe kho nāgā jhānavipassanāmaggaphalānaṃ abhabbattā imasmiṃ dhammavinaye aviruḷhidhammā attha, viruḷhidhammā na bhavathāti ayamettha saṅkhepattho. Sajātiyāti nāgiyā eva. Yadā pana manussitthiādibhedāya aññajātiyā paṭisevati, tadā devaputto viya hoti. Ettha ca pavattiyaṃ abhiṇhaṃ sabhāvapātukammadassanavasena ‘‘dve paccayā’’ti vuttaṃ. Nāgassa pana pañcasu kālesu sabhāvapātukammaṃ hoti – paṭisandhikāle, tacajahanakāle, sajātiyā methunakāle, vissaṭṭhaniddokkamanakāle, cutikāleti.
তিরচ্ছানগতো ভিক্খৰেতি এত্থ নাগো ৰা হোতু সুপণ্ণমাণৰকাদীনং ৰা অঞ্ঞতরো, অন্তমসো সক্কং দেৰরাজানং উপাদায যো কোচি অমনুস্সজাতিযো, সব্বোৰ ইমস্মিং অত্থে তিরচ্ছানগতোতি ৰেদিতব্বো। সো নেৰ উপসম্পাদেতব্বো, ন পব্বাজেতব্বো, উপসম্পন্নোপি নাসেতব্বোতি।
Tiracchānagato bhikkhaveti ettha nāgo vā hotu supaṇṇamāṇavakādīnaṃ vā aññataro, antamaso sakkaṃ devarājānaṃ upādāya yo koci amanussajātiyo, sabbova imasmiṃ atthe tiracchānagatoti veditabbo. So neva upasampādetabbo, na pabbājetabbo, upasampannopi nāsetabboti.
তিরচ্ছানগতৰত্থুকথা নিট্ঠিতা।
Tiracchānagatavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৪৯. তিরচ্ছানগতৰত্থু • 49. Tiracchānagatavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / তিত্থিযপক্কন্তককথাৰণ্ণনা • Titthiyapakkantakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / তিরচ্ছানগতৰত্থুকথাৰণ্ণনা • Tiracchānagatavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / তিরচ্ছানৰত্থুকথাৰণ্ণনা • Tiracchānavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪৯. তিরচ্ছানগতৰত্থু • 49. Tiracchānagatavatthu
