| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
တိရစ္ဆာနဂတဝတ္ထုကထာ
Tiracchānagatavatthukathā
၁၁၁. နာဂယောနိယာ အဋ္ဋီယတီတိ ဧတ္ထ ကိဉ္စာပိ သော ပဝတ္တိယံ ကုသလဝိပာကေန ဒေဝသမ္ပတ္တိသဒိသံ ဣသ္သရိယသမ္ပတ္တိံ အနုဘောတိ, အကုသလဝိပာကပဋိသန္ဓိကသ္သ ပန တသ္သ သဇာတိယာ မေထုနပဋိသေဝနေ စ ဝိသ္သဋ္ဌနိဒ္ဒောက္ကမနေ စ နာဂသရီရံ ပာတုဘဝတိ ဥဒကသဉ္စာရိကံ မဏ္ဍူကဘက္ခံ, တသ္မာ သော တာယ နာဂယောနိယာ အဋ္ဋီယတိ။ ဟရာယတီတိ လဇ္ဇတိ။ ဇိဂုစ္ဆတီတိ အတ္တဘာဝံ ဇိဂုစ္ဆတိ။ တသ္သ ဘိက္ခုနော နိက္ခန္တေတိ တသ္မိံ ဘိက္ခုသ္မိံ နိက္ခန္တေ။ အထ ဝာ တသ္သ ဘိက္ခုနော နိက္ခမနေတိ အတ္ထော။ ဝိသ္သဋ္ဌော နိဒ္ဒံ ဩက္ကမီတိ တသ္မိံ အနိက္ခန္တေ ဝိသ္သရဘယေန သတိံ အဝိသ္သဇ္ဇိတ္ဝာ ကပိမိဒ္ဓဝသေနေဝ နိဒ္ဒာယန္တော နိက္ခန္တေ သတိံ ဝိသ္သဇ္ဇိတ္ဝာ ဝိသ္သဋ္ဌော နိရာသင္ကော မဟာနိဒ္ဒံ ပဋိပဇ္ဇိ။ ဝိသ္သရမကာသီတိ ဘယဝသေန သမဏသညံ ပဟာယ ဝိရူပံ မဟာသဒ္ဒမကာသိ။
111.Nāgayoniyāaṭṭīyatīti ettha kiñcāpi so pavattiyaṃ kusalavipākena devasampattisadisaṃ issariyasampattiṃ anubhoti, akusalavipākapaṭisandhikassa pana tassa sajātiyā methunapaṭisevane ca vissaṭṭhaniddokkamane ca nāgasarīraṃ pātubhavati udakasañcārikaṃ maṇḍūkabhakkhaṃ, tasmā so tāya nāgayoniyā aṭṭīyati. Harāyatīti lajjati. Jigucchatīti attabhāvaṃ jigucchati. Tassa bhikkhuno nikkhanteti tasmiṃ bhikkhusmiṃ nikkhante. Atha vā tassa bhikkhuno nikkhamaneti attho. Vissaṭṭho niddaṃ okkamīti tasmiṃ anikkhante vissarabhayena satiṃ avissajjitvā kapimiddhavaseneva niddāyanto nikkhante satiṃ vissajjitvā vissaṭṭho nirāsaṅko mahāniddaṃ paṭipajji. Vissaramakāsīti bhayavasena samaṇasaññaṃ pahāya virūpaṃ mahāsaddamakāsi.
တုမ္ဟေ ခောတ္ထာတိ တုမ္ဟေ ခော အတ္ထ; အကာရသ္သ လောပံ ကတ္ဝာ ဝုတ္တံ။ တုမ္ဟေ ခော နာဂာ ဈာနဝိပသ္သနာမဂ္ဂဖလာနံ အဘဗ္ဗတ္တာ ဣမသ္မိံ ဓမ္မဝိနယေ အဝိရုဠ္ဟိဓမ္မာ အတ္ထ, ဝိရုဠ္ဟိဓမ္မာ န ဘဝထာတိ အယမေတ္ထ သင္ခေပတ္ထော။ သဇာတိယာတိ နာဂိယာ ဧဝ။ ယဒာ ပန မနုသ္သိတ္ထိအာဒိဘေဒာယ အညဇာတိယာ ပဋိသေဝတိ, တဒာ ဒေဝပုတ္တော ဝိယ ဟောတိ။ ဧတ္ထ စ ပဝတ္တိယံ အဘိဏ္ဟံ သဘာဝပာတုကမ္မဒသ္သနဝသေန ‘‘ဒ္ဝေ ပစ္စယာ’’တိ ဝုတ္တံ။ နာဂသ္သ ပန ပဉ္စသု ကာလေသု သဘာဝပာတုကမ္မံ ဟောတိ – ပဋိသန္ဓိကာလေ, တစဇဟနကာလေ, သဇာတိယာ မေထုနကာလေ, ဝိသ္သဋ္ဌနိဒ္ဒောက္ကမနကာလေ, စုတိကာလေတိ။
Tumhe khotthāti tumhe kho attha; akārassa lopaṃ katvā vuttaṃ. Tumhe kho nāgā jhānavipassanāmaggaphalānaṃ abhabbattā imasmiṃ dhammavinaye aviruḷhidhammā attha, viruḷhidhammā na bhavathāti ayamettha saṅkhepattho. Sajātiyāti nāgiyā eva. Yadā pana manussitthiādibhedāya aññajātiyā paṭisevati, tadā devaputto viya hoti. Ettha ca pavattiyaṃ abhiṇhaṃ sabhāvapātukammadassanavasena ‘‘dve paccayā’’ti vuttaṃ. Nāgassa pana pañcasu kālesu sabhāvapātukammaṃ hoti – paṭisandhikāle, tacajahanakāle, sajātiyā methunakāle, vissaṭṭhaniddokkamanakāle, cutikāleti.
တိရစ္ဆာနဂတော ဘိက္ခဝေတိ ဧတ္ထ နာဂော ဝာ ဟောတု သုပဏ္ဏမာဏဝကာဒီနံ ဝာ အညတရော, အန္တမသော သက္ကံ ဒေဝရာဇာနံ ဥပာဒာယ ယော ကောစိ အမနုသ္သဇာတိယော, သဗ္ဗောဝ ဣမသ္မိံ အတ္ထေ တိရစ္ဆာနဂတောတိ ဝေဒိတဗ္ဗော။ သော နေဝ ဥပသမ္ပာဒေတဗ္ဗော, န ပဗ္ဗာဇေတဗ္ဗော, ဥပသမ္ပန္နောပိ နာသေတဗ္ဗောတိ။
Tiracchānagato bhikkhaveti ettha nāgo vā hotu supaṇṇamāṇavakādīnaṃ vā aññataro, antamaso sakkaṃ devarājānaṃ upādāya yo koci amanussajātiyo, sabbova imasmiṃ atthe tiracchānagatoti veditabbo. So neva upasampādetabbo, na pabbājetabbo, upasampannopi nāsetabboti.
တိရစ္ဆာနဂတဝတ္ထုကထာ နိဋ္ဌိတာ။
Tiracchānagatavatthukathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၄၉. တိရစ္ဆာနဂတဝတ္ထု • 49. Tiracchānagatavatthu
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / တိတ္ထိယပက္ကန္တကကထာဝဏ္ဏနာ • Titthiyapakkantakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / တိရစ္ဆာနဂတဝတ္ထုကထာဝဏ္ဏနာ • Tiracchānagatavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / တိရစ္ဆာနဝတ္ထုကထာဝဏ္ဏနာ • Tiracchānavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၄၉. တိရစ္ဆာနဂတဝတ္ထု • 49. Tiracchānagatavatthu
