| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
20. වීසතිමවග්‌ගො
20. Vīsatimavaggo
(197) 4. තිරච්‌ඡානකථා
(197) 4. Tiracchānakathā
869. අත්‌ථි දෙවෙසු තිරච්‌ඡානගතාති? ආමන්‌තා. අත්‌ථි තිරච්‌ඡානගතෙසු දෙවාති? න හෙවං වත්‌තබ්‌බෙ…පෙ.… අත්‌ථි දෙවෙසු තිරච්‌ඡානගතාති? ආමන්‌තා . දෙවලොකො තිරච්‌ඡානයොනීති? න හෙවං වත්‌තබ්‌බෙ…පෙ.… අත්‌ථි දෙවෙසු තිරච්‌ඡානගතාති? ආමන්‌තා. අත්‌ථි තත්‌ථ කීටා පටඞ්‌ගා මකසා මක්‌ඛිකා අහී විච්‌ඡිකා සතපදී ගණ්‌ඩුප්‌පාදාති 1? න හෙවං වත්‌තබ්‌බෙ…පෙ.….
869. Atthi devesu tiracchānagatāti? Āmantā. Atthi tiracchānagatesu devāti? Na hevaṃ vattabbe…pe… atthi devesu tiracchānagatāti? Āmantā . Devaloko tiracchānayonīti? Na hevaṃ vattabbe…pe… atthi devesu tiracchānagatāti? Āmantā. Atthi tattha kīṭā paṭaṅgā makasā makkhikā ahī vicchikā satapadī gaṇḍuppādāti 2? Na hevaṃ vattabbe…pe….
870. නත්‌ථි දෙවෙසු තිරච්‌ඡානගතාති? ආමන්‌තා. නනු අත්‌ථි තත්‌ථ එරාවණො නාම හත්‌ථිනාගො සහස්‌සයුත්‌තං දිබ්‌බං යානන්‌ති? ආමන්‌තා. හඤ්‌චි අත්‌ථි තත්‌ථ එරාවණො නාම හත්‌ථිනාගො සහස්‌සයුත්‌තං දිබ්‌බං යානං, තෙන වත රෙ වත්‌තබ්‌බෙ – ‘‘අත්‌ථි දෙවෙසු තිරච්‌ඡානගතා’’ති.
870. Natthi devesu tiracchānagatāti? Āmantā. Nanu atthi tattha erāvaṇo nāma hatthināgo sahassayuttaṃ dibbaṃ yānanti? Āmantā. Hañci atthi tattha erāvaṇo nāma hatthināgo sahassayuttaṃ dibbaṃ yānaṃ, tena vata re vattabbe – ‘‘atthi devesu tiracchānagatā’’ti.
871. අත්‌ථි දෙවෙසු තිරච්‌ඡානගතාති? ආමන්‌තා. අත්‌ථි තත්‌ථ හත්‌ථිබන්‌ධා අස්‌සබන්‌ධා 3 යාවසිකා කාරණිකා භත්‌තකාරකාති? න හෙවං වත්‌තබ්‌බෙ. තෙන හි නත්‌ථි දෙවෙසු තිරච්‌ඡානගතාති.
871. Atthi devesu tiracchānagatāti? Āmantā. Atthi tattha hatthibandhā assabandhā 4 yāvasikā kāraṇikā bhattakārakāti? Na hevaṃ vattabbe. Tena hi natthi devesu tiracchānagatāti.
තිරච්‌ඡානකථා නිට්‌ඨිතා.
Tiracchānakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 4. තිරච්‌ඡානකථාවණ්‌ණනා • 4. Tiracchānakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. තිරච්‌ඡානකථාවණ්‌ණනා • 4. Tiracchānakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. තිරච්‌ඡානකථාවණ්‌ණනා • 4. Tiracchānakathāvaṇṇanā
