| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. තිරච්‌ඡානකථාසුත්‌තං
10. Tiracchānakathāsuttaṃ
1080. ‘‘මා , භික්‌ඛවෙ, අනෙකවිහිතං තිරච්‌ඡානකථං කථෙය්‍යාථ, සෙය්‍යථිදං – රාජකථං චොරකථං මහාමත්‌තකථං සෙනාකථං, භයකථං යුද්‌ධකථං, අන්‌නකථං පානකථං වත්‌ථකථං සයනකථං මාලාකථං ගන්‌ධකථං, ඤාතිකථං යානකථං ගාමකථං නිගමකථං නගරකථං ජනපදකථං ඉත්‌ථිකථං 1 සූරකථං විසිඛාකථං කුම්‌භට්‌ඨානකථං, පුබ්‌බපෙතකථං නානත්‌තකථං, ලොකක්‌ඛායිකං සමුද්‌දක්‌ඛායිකං ඉතිභවාභවකථං ඉති වා. තං කිස්‌ස හෙතු? නෙසා, භික්‌ඛවෙ, කථා අත්‌ථසංහිතා නාදිබ්‍රහ්‌මචරියකා න නිබ්‌බිදාය න විරාගාය න නිරොධාය න උපසමාය න අභිඤ්‌ඤාය න සම්‌බොධාය න නිබ්‌බානාය සංවත්‌තති.
1080. ‘‘Mā , bhikkhave, anekavihitaṃ tiracchānakathaṃ katheyyātha, seyyathidaṃ – rājakathaṃ corakathaṃ mahāmattakathaṃ senākathaṃ, bhayakathaṃ yuddhakathaṃ, annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ, ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthikathaṃ 2 sūrakathaṃ visikhākathaṃ kumbhaṭṭhānakathaṃ, pubbapetakathaṃ nānattakathaṃ, lokakkhāyikaṃ samuddakkhāyikaṃ itibhavābhavakathaṃ iti vā. Taṃ kissa hetu? Nesā, bhikkhave, kathā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati.
‘‘කථෙන්‌තා ච ඛො තුම්‌හෙ, භික්‌ඛවෙ, ‘ඉදං දුක්‌ඛ’න්‌ති කථෙය්‍යාථ, ‘අයං දුක්‌ඛසමුදයො’ති කථෙය්‍යාථ, ‘අයං දුක්‌ඛනිරොධො’ති කථෙය්‍යාථ, ‘අයං දුක්‌ඛනිරොධගාමිනී පටිපදා’ති කථෙය්‍යාථ. තං කිස්‌ස හෙතු? එසා, භික්‌ඛවෙ, කථා අත්‌ථසංහිතා, එසා ආදිබ්‍රහ්‌මචරියකා, එසා නිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති.
‘‘Kathentā ca kho tumhe, bhikkhave, ‘idaṃ dukkha’nti katheyyātha, ‘ayaṃ dukkhasamudayo’ti katheyyātha, ‘ayaṃ dukkhanirodho’ti katheyyātha, ‘ayaṃ dukkhanirodhagāminī paṭipadā’ti katheyyātha. Taṃ kissa hetu? Esā, bhikkhave, kathā atthasaṃhitā, esā ādibrahmacariyakā, esā nibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘තස්‌මාතිහ , භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. දසමං.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
සමාධිවග්‌ගො පඨමො.
Samādhivaggo paṭhamo.
තස්‌සුද්‌දානං –
Tassuddānaṃ –
සමාධි පටිසල්‌ලානා, කුලපුත්‌තා අපරෙ දුවෙ;
Samādhi paṭisallānā, kulaputtā apare duve;
සමණබ්‍රාහ්‌මණා විතක්‌කං, චින්‌තා විග්‌ගාහිකා කථාති.
Samaṇabrāhmaṇā vitakkaṃ, cintā viggāhikā kathāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. තිරච්‌ඡානකථාසුත්‌තවණ්‌ණනා • 10. Tiracchānakathāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. තිරච්‌ඡානකථාසුත්‌තවණ්‌ණනා • 10. Tiracchānakathāsuttavaṇṇanā
