| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. တိရစ္ဆာနကထာသုတ္တဝဏ္ဏနာ
10. Tiracchānakathāsuttavaṇṇanā
၁၀၈၀. ဒုဂ္ဂတိတော သံသာရတော စ နိယ္ယာတိ ဧတေနာတိ နိယ္ယာနံ, သဂ္ဂမဂ္ဂော မောက္ခမဂ္ဂော စ။ တသ္မိံ နိယ္ယာနေ နိယုတ္တာ, တံ ဧတ္ထ အတ္ထီတိ နိယ္ယာနိကာ။ ဝစီဒုစ္စရိတသံကိလေသတော ဝာ နိယ္ယာတီတိ ဤ-ကာရသ္သ ရသ္သတ္တံ ယ-ကာရသ္သ က-ကာရံ ကတ္ဝာ နိယ္ယာနိကာ။ စေတနာယ သဒ္ဓိံ သမ္ဖပ္ပလာပာ ဝေရမဏိ။ တပ္ပဋိပက္ခတော အနိယ္ယာနိကာ, တသ္သ ဘာဝော အနိယ္ယာနိကတ္တံ။ တိရစ္ဆာနဘူတန္တိ တိရောကရဏဘူတံ။ ကမ္မဋ္ဌာနဘာဝေတိ အနိစ္စတာပဋိသံယုတ္တစတုသစ္စကမ္မဋ္ဌာနဘာဝေ။ သာတ္ထကန္တိ ဒာနသီလာဒိနိသ္သိတတ္တာ ဟိတပဋိသံယုတ္တံ။
1080. Duggatito saṃsārato ca niyyāti etenāti niyyānaṃ, saggamaggo mokkhamaggo ca. Tasmiṃ niyyāne niyuttā, taṃ ettha atthīti niyyānikā. Vacīduccaritasaṃkilesato vā niyyātīti ī-kārassa rassattaṃ ya-kārassa ka-kāraṃ katvā niyyānikā. Cetanāya saddhiṃ samphappalāpā veramaṇi. Tappaṭipakkhato aniyyānikā, tassa bhāvo aniyyānikattaṃ. Tiracchānabhūtanti tirokaraṇabhūtaṃ. Kammaṭṭhānabhāveti aniccatāpaṭisaṃyuttacatusaccakammaṭṭhānabhāve. Sātthakanti dānasīlādinissitattā hitapaṭisaṃyuttaṃ.
ဝိသိခာတိ ဃရသန္နိဝေသော။ ဝိသိခာဂဟဏေန စ ဂာမာဒိဂဟဏေ ဝိယ တန္နိဝာသိနော ဝိသေသတော ဂဟိတာ ‘‘အာဂတော ဂာမော’’တိအာဒီသု ဝိယ ။ တေနာဟ ‘‘သူရာ သမတ္ထာ’’တိ။ ကုမ္ဘဋ္ဌာနာပဒေသေန ကုမ္ဘဒာသိယော ဝုတ္တာတိ အာဟ – ‘‘ကုမ္ဘဒာသိကထာ’’တိ။ အယာထာဝတော ဥပ္ပတ္တိဋ္ဌိတိသံဟာရာဒိဝသေန လောကော အက္ခာယတိ ဧတေနာတိ လောကက္ခာယိကာ။ ဣတိ ဣမိနာ ပကာရေန ဘဝော, ဣမိနာ အဘဝောတိ ဧဝံ ပဝတ္တာယ ဣတိဘဝာဘဝကထာယ သဒ္ဓိံ။
Visikhāti gharasanniveso. Visikhāgahaṇena ca gāmādigahaṇe viya tannivāsino visesato gahitā ‘‘āgato gāmo’’tiādīsu viya . Tenāha ‘‘sūrā samatthā’’ti. Kumbhaṭṭhānāpadesena kumbhadāsiyo vuttāti āha – ‘‘kumbhadāsikathā’’ti. Ayāthāvato uppattiṭṭhitisaṃhārādivasena loko akkhāyati etenāti lokakkhāyikā. Iti iminā pakārena bhavo, iminā abhavoti evaṃ pavattāya itibhavābhavakathāya saddhiṃ.
သမာဓိဝဂ္ဂဝဏ္ဏနာ နိဋ္ဌိတာ။
Samādhivaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. တိရစ္ဆာနကထာသုတ္တံ • 10. Tiracchānakathāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. တိရစ္ဆာနကထာသုတ္တဝဏ္ဏနာ • 10. Tiracchānakathāsuttavaṇṇanā
