| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
४. तिरच्छानकथावण्णना
4. Tiracchānakathāvaṇṇanā
८६९-८७१. इदानि तिरच्छानकथा नाम होति। तत्थ देवेसु एरावणादयो देवपुत्ता हत्थिवण्णं अस्सवण्णं विकुब्बन्ति, नत्थि तत्थ तिरच्छानगता। येसं पन तिरच्छानवण्णिनो देवपुत्ते दिस्वा ‘‘अत्थि देवेसु तिरच्छानगता’’ति लद्धि, सेय्यथापि अन्धकानं ; ते सन्धाय पुच्छा सकवादिस्स, पटिञ्ञा इतरस्स। अथ नं ‘‘यदि देवयोनियं तिरच्छानगता सियुं, तिरच्छानयोनियम्पि देवा सियु’’न्ति चोदेतुं अत्थि तिरच्छानगतेसूतिआदिमाह। कीटातिआदि येसं सो अभावं इच्छति, ते दस्सेतुं वुत्तं। एरावणोति पञ्हे तस्स अत्थिताय पटिञ्ञा सकवादिस्स , न तिरच्छानगतस्स। हत्थिबन्धातिआदि ‘‘यदि तत्थ हत्थिआदयो सियुं, हत्थिबन्धादयोपि सियु’’न्ति चोदनत्थं वुत्तं। तत्थ यावसिकाति यवस्स दायका। कारणिकाति हत्थाचरियादयो, येहि ते नानाविधं कारणं करेय्युं। भत्तकारकाति हत्थिआदीनं भत्तरन्धका। न हेवन्ति तथा अनिच्छन्तो पटिक्खिपतीति।
869-871. Idāni tiracchānakathā nāma hoti. Tattha devesu erāvaṇādayo devaputtā hatthivaṇṇaṃ assavaṇṇaṃ vikubbanti, natthi tattha tiracchānagatā. Yesaṃ pana tiracchānavaṇṇino devaputte disvā ‘‘atthi devesu tiracchānagatā’’ti laddhi, seyyathāpi andhakānaṃ ; te sandhāya pucchā sakavādissa, paṭiññā itarassa. Atha naṃ ‘‘yadi devayoniyaṃ tiracchānagatā siyuṃ, tiracchānayoniyampi devā siyu’’nti codetuṃ atthi tiracchānagatesūtiādimāha. Kīṭātiādi yesaṃ so abhāvaṃ icchati, te dassetuṃ vuttaṃ. Erāvaṇoti pañhe tassa atthitāya paṭiññā sakavādissa , na tiracchānagatassa. Hatthibandhātiādi ‘‘yadi tattha hatthiādayo siyuṃ, hatthibandhādayopi siyu’’nti codanatthaṃ vuttaṃ. Tattha yāvasikāti yavassa dāyakā. Kāraṇikāti hatthācariyādayo, yehi te nānāvidhaṃ kāraṇaṃ kareyyuṃ. Bhattakārakāti hatthiādīnaṃ bhattarandhakā. Na hevanti tathā anicchanto paṭikkhipatīti.
तिरच्छानकथावण्णना।
Tiracchānakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१९७) ४. तिरच्छानकथा • (197) 4. Tiracchānakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ४. तिरच्छानकथावण्णना • 4. Tiracchānakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ४. तिरच्छानकथावण्णना • 4. Tiracchānakathāvaṇṇanā
