| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[259] 9. д̇ирийдаважчаж̇аад̇агаван̣н̣анаа
[259] 9. Tirīṭavacchajātakavaṇṇanā
наяимасса виж̇ж̇аад̇и ид̣̇ам̣ сад̇т̇аа ж̇зд̇аванз вихаранд̇о ааяасмад̇о аананд̣̇асса госаларан̃н̃о маад̇уг̇аамаанам̣ хад̇т̇ад̇о бан̃жасад̇аани, ран̃н̃о хад̇т̇ад̇о бан̃жасад̇аанийд̇и д̣̇уссасахассабадилаабхавад̇т̇ум̣ аараб̣бха гат̇зси. вад̇т̇у хздтаа д̣̇уганибаад̇з г̇ун̣аж̇аад̇агз (ж̇аа. адта. 2.2.г̇ун̣аж̇аад̇агаван̣н̣анаа) вид̇т̇аарид̇амзва.
Nayimassa vijjāti idaṃ satthā jetavane viharanto āyasmato ānandassa kosalarañño mātugāmānaṃ hatthato pañcasatāni, rañño hatthato pañcasatānīti dussasahassapaṭilābhavatthuṃ ārabbha kathesi. Vatthu heṭṭhā dukanipāte guṇajātake (jā. aṭṭha. 2.2.guṇajātakavaṇṇanā) vitthāritameva.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гаасирадтз б̣раахман̣агулз ниб̣б̣ад̇д̇ид̇ваа наамаг̇г̇ахан̣ад̣̇ивасз д̇ирийдаважчагумаарод̇и гад̇анаамо анубуб̣б̣зна ваяаббад̇д̇о д̇аггасилааяам̣ саб̣б̣асиббаани уг̇г̇ан̣хид̇ваа аг̇аарам̣ аж̇жхаавасанд̇о маад̇аабид̇уунам̣ гаалагирияааяа сам̣виг̇г̇ахад̣̇аяо худ̇ваа нигкамид̇ваа исибаб̣б̣аж̇ж̇ам̣ баб̣б̣аж̇ид̇ваа аран̃н̃ааяад̇анз ванамуулапалаахааро худ̇ваа ваасам̣ габбзси. д̇асмим̣ д̇ад̇т̇а васанд̇з б̣аараан̣асиран̃н̃о бажжанд̇о губи, со д̇ад̇т̇а г̇анд̇ваа яуд̣̇д̇хз барааж̇ид̇о маран̣абхаяабхийд̇о хад̇т̇игканд̇хаг̇ад̇о згзна бассзна балааяид̇ваа аран̃н̃з вижаранд̇о буб̣б̣ан̣хасамаяз д̇ирийдаважчасса палаапалад̇т̇ааяа г̇ад̇агаалз д̇асса ассамабад̣̇ам̣ баависи. со ‘‘д̇аабасаанам̣ васанадтаана’’нд̇и хад̇т̇ид̇о од̇арид̇ваа ваад̇аад̇абзна гиланд̇о бибаасид̇о баанийяагхадам̣ ологзнд̇о гад̇т̇ажи ад̣̇исваа жан̇гаманагодияам̣ уд̣̇абаанам̣ ад̣̇д̣̇аса. уд̣̇агауссин̃жанад̇т̇ааяа бана раж̇ж̇угхадам̣ ад̣̇исваа бибаасам̣ санд̇хаарзд̇ум̣ асаггонд̇о хад̇т̇исса гужчияам̣ б̣ад̣̇д̇хаяод̇д̇ам̣ г̇ахзд̇ваа хад̇т̇им̣ уд̣̇абаанад̇адз табзд̇ваа д̇асса баад̣̇з яод̇д̇ам̣ б̣анд̇хид̇ваа яод̇д̇зна уд̣̇абаанам̣ од̇арид̇ваа яод̇д̇з абаабун̣анд̇з уд̇д̇арид̇ваа уд̇д̇арасаадагам̣ яод̇д̇агодияаа сан̇гхаадзд̇ваа буна од̇ари, д̇ат̇ааби наббахосиязва. со аг̇г̇абаад̣̇зхи уд̣̇агам̣ пусид̇ваа ад̇ибибаасид̇о ‘‘бибаасам̣ винод̣̇зд̇ваа маран̣амби сумаран̣а’’нд̇и жинд̇зд̇ваа уд̣̇абаанз бад̇ид̇ваа яаавад̣̇ад̇т̇ам̣ бивид̇ваа бажжуд̇д̇арид̇ум̣ асаггонд̇о д̇ад̇т̇зва адтааси. хад̇т̇ийби сусигкид̇ад̇д̇аа ан̃н̃ад̇т̇а аг̇анд̇ваа рааж̇аанам̣ ологзнд̇о д̇ад̇т̇зва адтааси. б̣од̇хисад̇д̇о сааяанхасамаяз палаапалам̣ аахарид̇ваа хад̇т̇им̣ д̣̇исваа ‘‘рааж̇аа ааг̇ад̇о бхависсад̇и, ваммид̇ахад̇т̇ийязва бана бан̃н̃ааяад̇и, гим̣ ну ко гааран̣а’’нд̇и со хад̇т̇исамийбам̣ убасан̇гами. хад̇т̇ийби д̇асса убасан̇гаманабхаавам̣ н̃ад̇ваа згаманд̇ам̣ адтааси. б̣од̇хисад̇д̇о уд̣̇абаанад̇адам̣ г̇анд̇ваа рааж̇аанам̣ д̣̇исваа ‘‘маа бхааяи, махаарааж̇аа’’д̇и самассаасзд̇ваа ниссзн̣им̣ б̣анд̇хид̇ваа рааж̇аанам̣ уд̇д̇аарзд̇ваа гааяамасса самб̣аахид̇ваа д̇злзна магкзд̇ваа нхаабзд̇ваа палаапалаани каад̣̇аабзд̇ваа хад̇т̇исса саннаахам̣ можзси. рааж̇аа д̣̇вийхад̇ийхам̣ виссамид̇ваа б̣од̇хисад̇д̇асса ад̇д̇ано санд̇игам̣ ааг̇аманад̇т̇ааяа бадин̃н̃ам̣ г̇ахзд̇ваа баггаами. рааж̇аб̣алагааяо наг̇арасса авид̣̇уурз канд̇хааваарам̣ б̣анд̇хид̇ваа тид̇о. рааж̇аанам̣ ааг̇ажчанд̇ам̣ д̣̇исваа бариваарзси, рааж̇аа наг̇арам̣ баависи.
Atīte bārāṇasiyaṃ brahmadatte rajjaṃ kārente bodhisatto kāsiraṭṭhe brāhmaṇakule nibbattitvā nāmaggahaṇadivase tirīṭavacchakumāroti katanāmo anupubbena vayappatto takkasilāyaṃ sabbasippāni uggaṇhitvā agāraṃ ajjhāvasanto mātāpitūnaṃ kālakiriyāya saṃviggahadayo hutvā nikkhamitvā isipabbajjaṃ pabbajitvā araññāyatane vanamūlaphalāhāro hutvā vāsaṃ kappesi. Tasmiṃ tattha vasante bārāṇasirañño paccanto kupi, so tattha gantvā yuddhe parājito maraṇabhayabhīto hatthikkhandhagato ekena passena palāyitvā araññe vicaranto pubbaṇhasamaye tirīṭavacchassa phalāphalatthāya gatakāle tassa assamapadaṃ pāvisi. So ‘‘tāpasānaṃ vasanaṭṭhāna’’nti hatthito otaritvā vātātapena kilanto pipāsito pānīyaghaṭaṃ olokento katthaci adisvā caṅkamanakoṭiyaṃ udapānaṃ addasa. Udakaussiñcanatthāya pana rajjughaṭaṃ adisvā pipāsaṃ sandhāretuṃ asakkonto hatthissa kucchiyaṃ baddhayottaṃ gahetvā hatthiṃ udapānataṭe ṭhapetvā tassa pāde yottaṃ bandhitvā yottena udapānaṃ otaritvā yotte apāpuṇante uttaritvā uttarasāṭakaṃ yottakoṭiyā saṅghāṭetvā puna otari, tathāpi nappahosiyeva. So aggapādehi udakaṃ phusitvā atipipāsito ‘‘pipāsaṃ vinodetvā maraṇampi sumaraṇa’’nti cintetvā udapāne patitvā yāvadatthaṃ pivitvā paccuttarituṃ asakkonto tattheva aṭṭhāsi. Hatthīpi susikkhitattā aññattha agantvā rājānaṃ olokento tattheva aṭṭhāsi. Bodhisatto sāyanhasamaye phalāphalaṃ āharitvā hatthiṃ disvā ‘‘rājā āgato bhavissati, vammitahatthīyeva pana paññāyati, kiṃ nu kho kāraṇa’’nti so hatthisamīpaṃ upasaṅkami. Hatthīpi tassa upasaṅkamanabhāvaṃ ñatvā ekamantaṃ aṭṭhāsi. Bodhisatto udapānataṭaṃ gantvā rājānaṃ disvā ‘‘mā bhāyi, mahārājā’’ti samassāsetvā nisseṇiṃ bandhitvā rājānaṃ uttāretvā kāyamassa sambāhitvā telena makkhetvā nhāpetvā phalāphalāni khādāpetvā hatthissa sannāhaṃ mocesi. Rājā dvīhatīhaṃ vissamitvā bodhisattassa attano santikaṃ āgamanatthāya paṭiññaṃ gahetvā pakkāmi. Rājabalakāyo nagarassa avidūre khandhāvāraṃ bandhitvā ṭhito. Rājānaṃ āgacchantaṃ disvā parivāresi, rājā nagaraṃ pāvisi.
б̣од̇хисад̇д̇оби ад̣дхамаасажжаязна б̣аараан̣асим̣ бад̇ваа уяяаанз васид̇ваа бунад̣̇ивасз бхигкам̣ жарамаано рааж̇ад̣̇ваарам̣ г̇ад̇о. рааж̇аа махааваад̇абаанам̣ уг̇гхаадзд̇ваа рааж̇ан̇г̇ан̣ам̣ ологаяамаано б̣од̇хисад̇д̇ам̣ д̣̇исваа сан̃ж̇аанид̇ваа баасаад̣̇аа оруяха ванд̣̇ид̇ваа махаад̇алам̣ ааробзд̇ваа самуссид̇асзд̇ажчад̇д̇з рааж̇абаллан̇гз нисийд̣̇аабзд̇ваа ад̇д̇ано бадияаад̣̇ид̇ам̣ аахаарам̣ бхож̇зд̇ваа саяамби бхун̃ж̇ид̇ваа уяяаанам̣ нзд̇ваа д̇ад̇т̇асса жан̇гаманаад̣̇ибариваарам̣ васанадтаанам̣ гаарзд̇ваа саб̣б̣з баб̣б̣аж̇ид̇абаригкаарз д̣̇ад̇ваа уяяаанабаалам̣ бадижчаабзд̇ваа ванд̣̇ид̇ваа баггаами. д̇ад̇о бадтааяа б̣од̇хисад̇д̇о рааж̇анивзсанзязва барибхун̃ж̇и, махаасаггаарасаммаано ахоси.
Bodhisattopi aḍḍhamāsaccayena bārāṇasiṃ patvā uyyāne vasitvā punadivase bhikkhaṃ caramāno rājadvāraṃ gato. Rājā mahāvātapānaṃ ugghāṭetvā rājaṅgaṇaṃ olokayamāno bodhisattaṃ disvā sañjānitvā pāsādā oruyha vanditvā mahātalaṃ āropetvā samussitasetacchatte rājapallaṅke nisīdāpetvā attano paṭiyāditaṃ āhāraṃ bhojetvā sayampi bhuñjitvā uyyānaṃ netvā tatthassa caṅkamanādiparivāraṃ vasanaṭṭhānaṃ kāretvā sabbe pabbajitaparikkhāre datvā uyyānapālaṃ paṭicchāpetvā vanditvā pakkāmi. Tato paṭṭhāya bodhisatto rājanivesaneyeva paribhuñji, mahāsakkārasammāno ahosi.
д̇ам̣ асахамаанаа амажжаа ‘‘зваруубам̣ саггаарам̣ згоби яод̇хо лабхамаано гим̣ наама на гарзяяаа’’д̇и вад̇ваа убарааж̇аанам̣ убаг̇анд̇ваа ‘‘д̣̇зва, амхаагам̣ рааж̇аа згам̣ д̇аабасам̣ ад̇ивияа мамааяад̇и, гим̣ наама д̇зна д̇асмим̣ д̣̇идтам̣, д̇умхзби д̇аава ран̃н̃аа сад̣̇д̇хим̣ манд̇зт̇аа’’д̇и аахам̣су. со ‘‘саад̇хуу’’д̇и самбадижчид̇ваа амажжзхи сад̣̇д̇хим̣ рааж̇аанам̣ убасан̇гамид̇ваа батамам̣ г̇аат̇амааха –
Taṃ asahamānā amaccā ‘‘evarūpaṃ sakkāraṃ ekopi yodho labhamāno kiṃ nāma na kareyyā’’ti vatvā uparājānaṃ upagantvā ‘‘deva, amhākaṃ rājā ekaṃ tāpasaṃ ativiya mamāyati, kiṃ nāma tena tasmiṃ diṭṭhaṃ, tumhepi tāva raññā saddhiṃ mantethā’’ti āhaṃsu. So ‘‘sādhū’’ti sampaṭicchitvā amaccehi saddhiṃ rājānaṃ upasaṅkamitvā paṭhamaṃ gāthamāha –
25.
25.
‘‘наяимасса виж̇ж̇аамаяамад̇т̇и гин̃жи, на б̣анд̇хаво но бана д̇з сахааяо;
‘‘Nayimassa vijjāmayamatthi kiñci, na bandhavo no pana te sahāyo;
ат̇а гзна ван̣н̣зна д̇ирийдаважчо, д̇зд̣̇ан̣д̣иго бхун̃ж̇ад̇и аг̇г̇абин̣д̣а’’нд̇и.
Atha kena vaṇṇena tirīṭavaccho, tedaṇḍiko bhuñjati aggapiṇḍa’’nti.
д̇ад̇т̇а наяимасса виж̇ж̇аамаяамад̇т̇и гин̃жийд̇и имасса д̇аабасасса виж̇ж̇аамаяам̣ гин̃жи гаммам̣ над̇т̇и. на б̣анд̇хаво д̇ибуд̇д̇аб̣анд̇хавасиббаб̣анд̇хаваг̇од̇д̇аб̣анд̇хаван̃аад̇иб̣анд̇хавзсу ан̃н̃ад̇ароби на ход̇и . но бана д̇з сахааяод̇и сахабам̣сугийл̣иго сахааяагоби д̇з на ход̇и. гзна ван̣н̣знаад̇и гзна гааран̣зна. д̇ирийдаважчод̇и д̇асса наамам̣. д̇зд̣̇ан̣д̣игод̇и гун̣д̣игатабанад̇т̇ааяа д̇ид̣̇ан̣д̣агам̣ г̇ахзд̇ваа жаранд̇о. аг̇г̇абин̣д̣анд̇и расасамбаннам̣ рааж̇аарахам̣ аг̇г̇абхож̇анам̣.
Tattha nayimassa vijjāmayamatthi kiñcīti imassa tāpasassa vijjāmayaṃ kiñci kammaṃ natthi. Na bandhavo tiputtabandhavasippabandhavagottabandhavañātibandhavesu aññataropi na hoti . No pana te sahāyoti sahapaṃsukīḷiko sahāyakopi te na hoti. Kena vaṇṇenāti kena kāraṇena. Tirīṭavacchoti tassa nāmaṃ. Tedaṇḍikoti kuṇḍikaṭhapanatthāya tidaṇḍakaṃ gahetvā caranto. Aggapiṇḍanti rasasampannaṃ rājārahaṃ aggabhojanaṃ.
д̇ам̣ суд̇ваа рааж̇аа буд̇д̇ам̣ ааманд̇зд̇ваа ‘‘д̇аад̇а, мама бажжанд̇ам̣ г̇анд̇ваа яуд̣̇д̇хабарааж̇ид̇асса д̣̇вийхад̇ийхам̣ анааг̇ад̇абхаавам̣ сарасий’’д̇и вад̇ваа ‘‘сараамий’’д̇и вуд̇д̇з ‘‘д̇ад̣̇аа маяаа имам̣ ниссааяа ж̇ийвид̇ам̣ лад̣̇д̇ха’’нд̇и саб̣б̣ам̣ д̇ам̣ бавад̇д̇им̣ аажигкид̇ваа ‘‘д̇аад̇а , маяхам̣ ж̇ийвид̇ад̣̇ааяагз мама санд̇игам̣ ааг̇ад̇з раж̇ж̇ам̣ д̣̇ад̣̇анд̇оби ахам̣ нзва зд̇зна гад̇аг̇ун̣аануруубам̣ гаад̇ум̣ саггомий’’д̇и вад̇ваа ид̇араа д̣̇вз г̇аат̇аа авожа –
Taṃ sutvā rājā puttaṃ āmantetvā ‘‘tāta, mama paccantaṃ gantvā yuddhaparājitassa dvīhatīhaṃ anāgatabhāvaṃ sarasī’’ti vatvā ‘‘sarāmī’’ti vutte ‘‘tadā mayā imaṃ nissāya jīvitaṃ laddha’’nti sabbaṃ taṃ pavattiṃ ācikkhitvā ‘‘tāta , mayhaṃ jīvitadāyake mama santikaṃ āgate rajjaṃ dadantopi ahaṃ neva etena kataguṇānurūpaṃ kātuṃ sakkomī’’ti vatvā itarā dve gāthā avoca –
26.
26.
‘‘аабаасу мз яуд̣̇д̇хабарааж̇ид̇асса, згасса гад̇ваа виванасми гхорз;
‘‘Āpāsu me yuddhaparājitassa, ekassa katvā vivanasmi ghore;
басаараяий гижчаг̇ад̇асса баан̣им̣, д̇знууд̣̇ад̇аарим̣ д̣̇укасамбарзд̇о.
Pasārayī kicchagatassa pāṇiṃ, tenūdatāriṃ dukhasampareto.
27.
27.
‘‘зд̇асса гижжзна ид̇хаанубад̇д̇о, взсааяино висаяаа ж̇ийвалогз;
‘‘Etassa kiccena idhānupatto, vesāyino visayā jīvaloke;
лаабхаарахо д̇аад̇а д̇ирийдаважчо, д̣̇зт̇асса бхог̇ам̣ яаж̇ат̇ан̃жа яан̃н̃а’’нд̇и.
Lābhāraho tāta tirīṭavaccho, dethassa bhogaṃ yajathañca yañña’’nti.
д̇ад̇т̇а аабаасууд̇и аабад̣̇аасу. згассаад̇и ад̣̇уд̇ияасса. гад̇ваад̇и анугамбам̣ гарид̇ваа бзмам̣ уббаад̣̇зд̇ваа. виванасминд̇и баанийяарахид̇з аран̃н̃з. гхорзд̇и д̣̇аарун̣з. басаараяий гижчаг̇ад̇асса баан̣инд̇и ниссзн̣им̣ б̣анд̇хид̇ваа гуубам̣ од̇аарзд̇ваа д̣̇угкаг̇ад̇асса маяхам̣ уд̇д̇ааран̣ад̇т̇ааяа вийрияабадисам̣яуд̇д̇ам̣ хад̇т̇ам̣ басаарзси. д̇знууд̣̇ад̇аарим̣ д̣̇укасамбарзд̇од̇и д̇зна гааран̣знамхи д̣̇угкабариваарид̇оби д̇амхаа гуубаа уд̇д̇ин̣н̣о.
Tattha āpāsūti āpadāsu. Ekassāti adutiyassa. Katvāti anukampaṃ karitvā pemaṃ uppādetvā. Vivanasminti pānīyarahite araññe. Ghoreti dāruṇe. Pasārayī kicchagatassa pāṇinti nisseṇiṃ bandhitvā kūpaṃ otāretvā dukkhagatassa mayhaṃ uttāraṇatthāya vīriyapaṭisaṃyuttaṃ hatthaṃ pasāresi. Tenūdatāriṃ dukhasamparetoti tena kāraṇenamhi dukkhaparivāritopi tamhā kūpā uttiṇṇo.
зд̇асса гижжзна ид̇хаанубад̇д̇од̇и ахам̣ зд̇асса д̇аабасасса гижжзна, зд̇зна гад̇асса гижжассаанубхаавзна ид̇хаануббад̇д̇о . взсааяино висаяаад̇и взсааяий вужжад̇и яамо, д̇асса висаяаа. ж̇ийвалогзд̇и мануссалогз. ахан̃хи имасмим̣ ж̇ийвалогз тид̇о яамависаяам̣ мажжувисаяам̣ баралогам̣ г̇ад̇о наама ахосим̣, сомхи зд̇асса гааран̣аа д̇ад̇о буна ид̇хааг̇ад̇од̇и вуд̇д̇ам̣ ход̇и. лаабхаараход̇и лаабхам̣ арахо жад̇убажжаяалаабхасса анужчавиго. д̣̇зт̇асса бхог̇анд̇и зд̇зна барибхун̃ж̇ид̇аб̣б̣ам̣ жад̇убажжаяасаман̣абаригкаарасан̇каад̇ам̣ бхог̇ам̣ зд̇асса д̣̇зт̇а. яаж̇ат̇ан̃жа яан̃н̃анд̇и д̇ван̃жа амажжаа жа нааг̇араа жаад̇и саб̣б̣зби д̇умхз зд̇асса бхог̇ан̃жа д̣̇зт̇а, яан̃н̃ан̃жа яаж̇ат̇а. д̇асса хи д̣̇ийяамаано д̣̇зяяад̇хаммо д̇зна бхун̃ж̇ид̇аб̣б̣ад̇д̇аа бхог̇о ход̇и, ид̇арзсам̣ д̣̇аанаяан̃н̃ад̇д̇аа яан̃н̃о. д̇знааха ‘‘д̣̇зт̇асса бхог̇ам̣ яаж̇ат̇ан̃жа яан̃н̃а’’нд̇и.
Etassa kiccena idhānupattoti ahaṃ etassa tāpasassa kiccena, etena katassa kiccassānubhāvena idhānuppatto . Vesāyino visayāti vesāyī vuccati yamo, tassa visayā. Jīvaloketi manussaloke. Ahañhi imasmiṃ jīvaloke ṭhito yamavisayaṃ maccuvisayaṃ paralokaṃ gato nāma ahosiṃ, somhi etassa kāraṇā tato puna idhāgatoti vuttaṃ hoti. Lābhārahoti lābhaṃ araho catupaccayalābhassa anucchaviko. Dethassa bhoganti etena paribhuñjitabbaṃ catupaccayasamaṇaparikkhārasaṅkhātaṃ bhogaṃ etassa detha. Yajathañca yaññanti tvañca amaccā ca nāgarā cāti sabbepi tumhe etassa bhogañca detha, yaññañca yajatha. Tassa hi dīyamāno deyyadhammo tena bhuñjitabbattā bhogo hoti, itaresaṃ dānayaññattā yañño. Tenāha ‘‘dethassa bhogaṃ yajathañca yañña’’nti.
звам̣ ран̃н̃аа г̇аг̇анад̇алз бун̣н̣ажанд̣̇ам̣ удтаабзнд̇зна вияа б̣од̇хисад̇д̇асса г̇ун̣з багаасид̇з д̇асса г̇ун̣о саб̣б̣ад̇т̇амзва баагадо ж̇аад̇о, ад̇ирзгад̇аро д̇асса лаабхасаггааро уд̣̇абаад̣̇и. д̇ад̇о бадтааяа убарааж̇аа ваа амажжаа ваа ан̃н̃о ваа гожи гин̃жи рааж̇аанам̣ вад̇д̇ум̣ на висахи. рааж̇аа б̣од̇хисад̇д̇асса оваад̣̇з тад̇ваа д̣̇аанаад̣̇ийни бун̃н̃аани гад̇ваа саг̇г̇абурам̣ буурзси. б̣од̇хисад̇д̇оби абхин̃н̃аа жа самаабад̇д̇ияо жа уббаад̣̇зд̇ваа б̣рахмалогабарааяан̣о ахоси.
Evaṃ raññā gaganatale puṇṇacandaṃ uṭṭhāpentena viya bodhisattassa guṇe pakāsite tassa guṇo sabbatthameva pākaṭo jāto, atirekataro tassa lābhasakkāro udapādi. Tato paṭṭhāya uparājā vā amaccā vā añño vā koci kiñci rājānaṃ vattuṃ na visahi. Rājā bodhisattassa ovāde ṭhatvā dānādīni puññāni katvā saggapuraṃ pūresi. Bodhisattopi abhiññā ca samāpattiyo ca uppādetvā brahmalokaparāyaṇo ahosi.
сад̇т̇аа ‘‘бораан̣агабан̣д̣ид̇ааби убагааравасзна гарим̣суу’’д̇и имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа рааж̇аа аананд̣̇о ахоси, д̇аабасо бана ахамзва ахоси’’нд̇и.
Satthā ‘‘porāṇakapaṇḍitāpi upakāravasena kariṃsū’’ti imaṃ dhammadesanaṃ āharitvā jātakaṃ samodhānesi – ‘‘tadā rājā ānando ahosi, tāpaso pana ahameva ahosi’’nti.
д̇ирийдаважчаж̇аад̇агаван̣н̣анаа навамаа.
Tirīṭavacchajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 259. д̇ирийдаважчаж̇аад̇агам̣ • 259. Tirīṭavacchajātakaṃ
