| Library / Tipiṭaka / তিপিটক • Tipiṭaka / খুদ্দকপাঠ-অট্ঠকথা • Khuddakapāṭha-aṭṭhakathā |
৭. তিরোকুট্টসুত্তৰণ্ণনা
7. Tirokuṭṭasuttavaṇṇanā
নিক্খেপপ্পযোজনং
Nikkhepappayojanaṃ
ইদানি ‘‘তিরোকুট্টেসু তিট্ঠন্তী’’তিআদিনা রতনসুত্তানন্তরং নিক্খিত্তস্স তিরোকুট্টসুত্তস্স অত্থৰণ্ণনাক্কমো অনুপ্পত্তো, তস্স ইধ নিক্খেপপ্পযোজনং ৰত্ৰা অত্থৰণ্ণনং করিস্সাম।
Idāni ‘‘tirokuṭṭesu tiṭṭhantī’’tiādinā ratanasuttānantaraṃ nikkhittassa tirokuṭṭasuttassa atthavaṇṇanākkamo anuppatto, tassa idha nikkhepappayojanaṃ vatvā atthavaṇṇanaṃ karissāma.
তত্থ ইদঞ্হি তিরোকুট্টং ইমিনা অনুক্কমেন ভগৰতা অৰুত্তম্পি যাযং ইতো পুব্বে নানপ্পকারেন কুসলকম্মপটিপত্তি দস্সিতা, তত্থ পমাদং আপজ্জমানো নিরযতিরচ্ছানযোনীহি ৰিসিট্ঠতরেপি ঠানে উপ্পজ্জমানো যস্মা এৰরূপেসু পেতেসু উপ্পজ্জতি, তস্মা ন এত্থ পমাদো করণীযোতি দস্সনত্থং, যেহি চ ভূতেহি উপদ্দুতায ৰেসালিযা উপদ্দৰৰূপসমনত্থং রতনসুত্তং ৰুত্তং, তেসু একচ্চানি এৰরূপানীতি দস্সনত্থং ৰা ৰুত্তন্তি।
Tattha idañhi tirokuṭṭaṃ iminā anukkamena bhagavatā avuttampi yāyaṃ ito pubbe nānappakārena kusalakammapaṭipatti dassitā, tattha pamādaṃ āpajjamāno nirayatiracchānayonīhi visiṭṭhatarepi ṭhāne uppajjamāno yasmā evarūpesu petesu uppajjati, tasmā na ettha pamādo karaṇīyoti dassanatthaṃ, yehi ca bhūtehi upaddutāya vesāliyā upaddavavūpasamanatthaṃ ratanasuttaṃ vuttaṃ, tesu ekaccāni evarūpānīti dassanatthaṃ vā vuttanti.
ইদমস্স ইধ নিক্খেপপ্পযোজনং ৰেদিতব্বং।
Idamassa idha nikkhepappayojanaṃ veditabbaṃ.
অনুমোদনাকথা
Anumodanākathā
যস্মা পনস্স অত্থৰণ্ণনা –
Yasmā panassa atthavaṇṇanā –
‘‘যেন যত্থ যদা যস্মা, তিরোকুট্টং পকাসিতং।
‘‘Yena yattha yadā yasmā, tirokuṭṭaṃ pakāsitaṃ;
পকাসেত্ৰান তং সব্বং, কযিরমানা যথাক্কমং।
Pakāsetvāna taṃ sabbaṃ, kayiramānā yathākkamaṃ;
সুকতা হোতি তস্মাহং, করিস্সামি তথেৰ তং’’॥
Sukatā hoti tasmāhaṃ, karissāmi tatheva taṃ’’.
কেন পনেতং পকাসিতং, কত্থ কদা কস্মা চাতি? ৰুচ্চতে – ভগৰতা পকাসিতং, তং খো পন রাজগহে দুতিযদিৰসে রঞ্ঞো মাগধস্স অনুমোদনত্থং। ইমস্স চত্থস্স ৰিভাৰনত্থং অযমেত্থ ৰিত্থারকথা কথেতব্বা –
Kena panetaṃ pakāsitaṃ, kattha kadā kasmā cāti? Vuccate – bhagavatā pakāsitaṃ, taṃ kho pana rājagahe dutiyadivase rañño māgadhassa anumodanatthaṃ. Imassa catthassa vibhāvanatthaṃ ayamettha vitthārakathā kathetabbā –
ইতো দ্ৰানৰুতিকপ্পে কাসি নাম নগরং অহোসি। তত্থ জযসেনো নাম রাজা। তস্স সিরিমা নাম দেৰী, তস্সা কুচ্ছিযং ফুস্সো নাম বোধিসত্তো নিব্বত্তিত্ৰা অনুপুব্বেন সম্মাসম্বোধিং অভিসম্বুজ্ঝি। জযসেনো রাজা ‘‘মম পুত্তো অভিনিক্খমিত্ৰা বুদ্ধো জাতো, ময্হমেৰ বুদ্ধো, ময্হং ধম্মো, ময্হং সঙ্ঘো’’তি মমত্তং উপ্পাদেত্ৰা সব্বকালং সযমেৰ উপট্ঠহতি, ন অঞ্ঞেসং ওকাসং দেতি।
Ito dvānavutikappe kāsi nāma nagaraṃ ahosi. Tattha jayaseno nāma rājā. Tassa sirimā nāma devī, tassā kucchiyaṃ phusso nāma bodhisatto nibbattitvā anupubbena sammāsambodhiṃ abhisambujjhi. Jayaseno rājā ‘‘mama putto abhinikkhamitvā buddho jāto, mayhameva buddho, mayhaṃ dhammo, mayhaṃ saṅgho’’ti mamattaṃ uppādetvā sabbakālaṃ sayameva upaṭṭhahati, na aññesaṃ okāsaṃ deti.
ভগৰতো কনিট্ঠভাতরো ৰেমাতিকা তযো ভাতরো চিন্তেসুং – ‘‘বুদ্ধা নাম সব্বলোকহিতায উপ্পজ্জন্তি, ন চেকস্সেৰত্থায, অম্হাকঞ্চ পিতা অঞ্ঞেসং ওকাসং ন দেতি, কথং নু মযং লভেয্যাম ভগৰন্তং উপট্ঠাতু’’ন্তি। তেসং এতদহোসি – ‘‘হন্দ মযং কিঞ্চি উপাযং করোমা’’তি। তে পচ্চন্তং কুপিতং ৰিয কারাপেসুং। ততো রাজা ‘‘পচ্চন্তো কুপিতো’’তি সুত্ৰা তযোপি পুত্তে পচ্চন্তৰূপসমনত্থং পেসেসি। তে ৰূপসমেত্ৰা আগতা, রাজা তুট্ঠো ৰরং অদাসি ‘‘যং ইচ্ছথ, তং গণ্হথা’’তি। তে ‘‘মযং ভগৰন্তং উপট্ঠাতুং ইচ্ছামা’’তি আহংসু। রাজা ‘‘এতং ঠপেত্ৰা অঞ্ঞং গণ্হথা’’তি আহ। তে ‘‘মযং অঞ্ঞেন অনত্থিকা’’তি আহংসু। তেন হি পরিচ্ছেদং কত্ৰা গণ্হথাতি। তে সত্ত ৰস্সানি যাচিংসু, রাজা ন অদাসি। এৰং ছ, পঞ্চ, চত্তারি, তীণি, দ্ৰে, একং, সত্ত মাসানি, ছ, পঞ্চ, চত্তারীতি যাৰ তেমাসং যাচিংসু। রাজা ‘‘গণ্হথা’’তি অদাসি।
Bhagavato kaniṭṭhabhātaro vemātikā tayo bhātaro cintesuṃ – ‘‘buddhā nāma sabbalokahitāya uppajjanti, na cekassevatthāya, amhākañca pitā aññesaṃ okāsaṃ na deti, kathaṃ nu mayaṃ labheyyāma bhagavantaṃ upaṭṭhātu’’nti. Tesaṃ etadahosi – ‘‘handa mayaṃ kiñci upāyaṃ karomā’’ti. Te paccantaṃ kupitaṃ viya kārāpesuṃ. Tato rājā ‘‘paccanto kupito’’ti sutvā tayopi putte paccantavūpasamanatthaṃ pesesi. Te vūpasametvā āgatā, rājā tuṭṭho varaṃ adāsi ‘‘yaṃ icchatha, taṃ gaṇhathā’’ti. Te ‘‘mayaṃ bhagavantaṃ upaṭṭhātuṃ icchāmā’’ti āhaṃsu. Rājā ‘‘etaṃ ṭhapetvā aññaṃ gaṇhathā’’ti āha. Te ‘‘mayaṃ aññena anatthikā’’ti āhaṃsu. Tena hi paricchedaṃ katvā gaṇhathāti. Te satta vassāni yāciṃsu, rājā na adāsi. Evaṃ cha, pañca, cattāri, tīṇi, dve, ekaṃ, satta māsāni, cha, pañca, cattārīti yāva temāsaṃ yāciṃsu. Rājā ‘‘gaṇhathā’’ti adāsi.
তে ৰরং লভিত্ৰা পরমতুট্ঠা ভগৰন্তং উপসঙ্কমিত্ৰা ৰন্দিত্ৰা আহংসু – ‘‘ইচ্ছাম মযং, ভন্তে, ভগৰন্তং তেমাসং উপট্ঠাতুং, অধিৰাসেতু নো, ভন্তে , ভগৰা ইমং তেমাসং ৰস্সাৰাস’’ন্তি। অধিৰাসেসি ভগৰা তুণ্হীভাৰেন। ততো তে অত্তনো জনপদে নিযুত্তকপুরিসস্স লেখং পেসেসুং ‘‘ইমং তেমাসং অম্হেহি ভগৰা উপট্ঠাতব্বো, ৰিহারং আদিং কত্ৰা সব্বং ভগৰতো উপট্ঠানসম্ভারং করোহী’’তি। সো তং সব্বং সম্পাদেত্ৰা পটিনিৰেদেসি। তে কাসাযৰত্থনিৰত্থা হুত্ৰা অড্ঢতেয্যেহি পুরিসসহস্সেহি ৰেয্যাৰচ্চকরেহি ভগৰন্তং সক্কচ্চং উপট্ঠহমানা জনপদং নেত্ৰা ৰিহারং নিয্যাতেত্ৰা ৰসাপেসুং।
Te varaṃ labhitvā paramatuṭṭhā bhagavantaṃ upasaṅkamitvā vanditvā āhaṃsu – ‘‘icchāma mayaṃ, bhante, bhagavantaṃ temāsaṃ upaṭṭhātuṃ, adhivāsetu no, bhante , bhagavā imaṃ temāsaṃ vassāvāsa’’nti. Adhivāsesi bhagavā tuṇhībhāvena. Tato te attano janapade niyuttakapurisassa lekhaṃ pesesuṃ ‘‘imaṃ temāsaṃ amhehi bhagavā upaṭṭhātabbo, vihāraṃ ādiṃ katvā sabbaṃ bhagavato upaṭṭhānasambhāraṃ karohī’’ti. So taṃ sabbaṃ sampādetvā paṭinivedesi. Te kāsāyavatthanivatthā hutvā aḍḍhateyyehi purisasahassehi veyyāvaccakarehi bhagavantaṃ sakkaccaṃ upaṭṭhahamānā janapadaṃ netvā vihāraṃ niyyātetvā vasāpesuṃ.
তেসং ভণ্ডাগারিকো একো গহপতিপুত্তো সপজাপতিকো সদ্ধো অহোসি পসন্নো। সো বুদ্ধপ্পমুখস্স সঙ্ঘস্স দানৰত্তং সক্কচ্চং অদাসি। জনপদে নিযুত্তকপুরিসো তং গহেত্ৰা জানপদেহি একাদসমত্তেহি পুরিসসহস্সেহি সদ্ধিং সক্কচ্চমেৰ দানং পৰত্তাপেসি। তত্থ কেচি জানপদা পটিহতচিত্তা অহেসুং। তে দানস্স অন্তরাযং কত্ৰা দেয্যধম্মে অত্তনা খাদিংসু, ভত্তসালঞ্চ অগ্গিনা দহিংসু। পৰারিতে রাজপুত্তা ভগৰতো মহন্তং সক্কারং কত্ৰা ভগৰন্তং পুরক্খত্ৰা পিতুনো সকাসমেৰ অগমংসু। তত্থ গন্ত্ৰা এৰ ভগৰা পরিনিব্বাযি। রাজা চ রাজপুত্তা চ জনপদে নিযুত্তকপুরিসো চ ভণ্ডাগারিকো চ অনুপুব্বেন কালং কত্ৰা সদ্ধিং পরিসায সগ্গে উপ্পজ্জিংসু, পটিহতচিত্তজনা নিরযেসু নিব্বত্তিংসু। এৰং তেসং দ্ৰিন্নং গণানং সগ্গতো সগ্গং, নিরযতো নিরযং উপপজ্জন্তানং দ্ৰানৰুতিকপ্পা ৰীতিৰত্তা।
Tesaṃ bhaṇḍāgāriko eko gahapatiputto sapajāpatiko saddho ahosi pasanno. So buddhappamukhassa saṅghassa dānavattaṃ sakkaccaṃ adāsi. Janapade niyuttakapuriso taṃ gahetvā jānapadehi ekādasamattehi purisasahassehi saddhiṃ sakkaccameva dānaṃ pavattāpesi. Tattha keci jānapadā paṭihatacittā ahesuṃ. Te dānassa antarāyaṃ katvā deyyadhamme attanā khādiṃsu, bhattasālañca agginā dahiṃsu. Pavārite rājaputtā bhagavato mahantaṃ sakkāraṃ katvā bhagavantaṃ purakkhatvā pituno sakāsameva agamaṃsu. Tattha gantvā eva bhagavā parinibbāyi. Rājā ca rājaputtā ca janapade niyuttakapuriso ca bhaṇḍāgāriko ca anupubbena kālaṃ katvā saddhiṃ parisāya sagge uppajjiṃsu, paṭihatacittajanā nirayesu nibbattiṃsu. Evaṃ tesaṃ dvinnaṃ gaṇānaṃ saggato saggaṃ, nirayato nirayaṃ upapajjantānaṃ dvānavutikappā vītivattā.
অথ ইমস্মিং ভদ্দকপ্পে কস্সপবুদ্ধস্স কালে তে পটিহতচিত্তজনা পেতেসু উপ্পন্না। তদা মনুস্সা অত্তনো ঞাতকানং পেতানং অত্থায দানং দত্ৰা উদ্দিসন্তি ‘‘ইদং অম্হাকং ঞাতীনং হোতূ’’তি। তে সম্পত্তিং লভন্তি। অথ ইমেপি পেতা তং দিস্ৰা ভগৰন্তং কস্সপং উপসঙ্কমিত্ৰা পুচ্ছিংসু – ‘‘কিং নু খো, ভন্তে, মযম্পি এৰরূপং সম্পত্তিং লভেয্যামা’’তি? ভগৰা আহ – ‘‘ইদানি ন লভথ , অপিচ অনাগতে গোতমো নাম বুদ্ধো ভৰিস্সতি, তস্স ভগৰতো কালে বিম্বিসারো নাম রাজা ভৰিস্সতি, সো তুম্হাকং ইতো দ্ৰানৰুতিকপ্পে ঞাতি অহোসি, সো বুদ্ধস্স দানং দত্ৰা তুম্হাকং উদ্দিসিস্সতি, তদা লভিস্সথা’’তি। এৰং ৰুত্তে কির তেসং পেতানং তং ৰচনং ‘‘স্ৰে লভিস্সথা’’তি ৰুত্তং ৰিয অহোসি।
Atha imasmiṃ bhaddakappe kassapabuddhassa kāle te paṭihatacittajanā petesu uppannā. Tadā manussā attano ñātakānaṃ petānaṃ atthāya dānaṃ datvā uddisanti ‘‘idaṃ amhākaṃ ñātīnaṃ hotū’’ti. Te sampattiṃ labhanti. Atha imepi petā taṃ disvā bhagavantaṃ kassapaṃ upasaṅkamitvā pucchiṃsu – ‘‘kiṃ nu kho, bhante, mayampi evarūpaṃ sampattiṃ labheyyāmā’’ti? Bhagavā āha – ‘‘idāni na labhatha , apica anāgate gotamo nāma buddho bhavissati, tassa bhagavato kāle bimbisāro nāma rājā bhavissati, so tumhākaṃ ito dvānavutikappe ñāti ahosi, so buddhassa dānaṃ datvā tumhākaṃ uddisissati, tadā labhissathā’’ti. Evaṃ vutte kira tesaṃ petānaṃ taṃ vacanaṃ ‘‘sve labhissathā’’ti vuttaṃ viya ahosi.
অথ একস্মিং বুদ্ধন্তরে ৰীতিৰত্তে অম্হাকং ভগৰা লোকে উপ্পজ্জি। তেপি তযো রাজপুত্তা তেহি অড্ঢতেয্যেহি পুরিসসহস্সেহি সদ্ধিং দেৰলোকা চৰিত্ৰা মগধরট্ঠে ব্রাহ্মণকুলে উপ্পজ্জিত্ৰা অনুপুব্বেন ইসিপব্বজ্জং পব্বজিত্ৰা গযাসীসে তযো জটিলা অহেসুং, জনপদে নিযুত্তকপুরিসো, রাজা অহোসি বিম্বিসারো, ভণ্ডাগারিকো, গহপতি ৰিসাখো নাম মহাসেট্ঠি অহোসি, তস্স পজাপতি ধম্মদিন্না নাম সেট্ঠিধীতা অহোসি। এৰং সব্বাপি অৰসেসা পরিসা রঞ্ঞো এৰ পরিৰারা হুত্ৰা নিব্বত্তা।
Atha ekasmiṃ buddhantare vītivatte amhākaṃ bhagavā loke uppajji. Tepi tayo rājaputtā tehi aḍḍhateyyehi purisasahassehi saddhiṃ devalokā cavitvā magadharaṭṭhe brāhmaṇakule uppajjitvā anupubbena isipabbajjaṃ pabbajitvā gayāsīse tayo jaṭilā ahesuṃ, janapade niyuttakapuriso, rājā ahosi bimbisāro, bhaṇḍāgāriko, gahapati visākho nāma mahāseṭṭhi ahosi, tassa pajāpati dhammadinnā nāma seṭṭhidhītā ahosi. Evaṃ sabbāpi avasesā parisā rañño eva parivārā hutvā nibbattā.
অম্হাকং ভগৰা লোকে উপ্পজ্জিত্ৰা সত্তসত্তাহং অতিক্কমিত্ৰা অনুপুব্বেন বারাণসিং আগম্ম ধম্মচক্কং পৰত্তেত্ৰা পঞ্চৰগ্গিযে আদিং কত্ৰা যাৰ অড্ঢতেয্যসহস্সপরিৰারে তযো জটিলে ৰিনেত্ৰা রাজগহং অগমাসি। তত্থ চ তদহুপসঙ্কমন্তংযেৰ রাজানং বিম্বিসারং সোতাপত্তিফলে পতিট্ঠাপেসি একাদসনৰুতেহি মাগধকেহি ব্রাহ্মণগহপতিকেহি সদ্ধিং। অথ রঞ্ঞা স্ৰাতনায ভত্তেন নিমন্তিতো ভগৰা অধিৰাসেত্ৰা দুতিযদিৰসে সক্কেন দেৰানমিন্দেন পুরতো পুরতো গচ্ছন্তেন –
Amhākaṃ bhagavā loke uppajjitvā sattasattāhaṃ atikkamitvā anupubbena bārāṇasiṃ āgamma dhammacakkaṃ pavattetvā pañcavaggiye ādiṃ katvā yāva aḍḍhateyyasahassaparivāre tayo jaṭile vinetvā rājagahaṃ agamāsi. Tattha ca tadahupasaṅkamantaṃyeva rājānaṃ bimbisāraṃ sotāpattiphale patiṭṭhāpesi ekādasanavutehi māgadhakehi brāhmaṇagahapatikehi saddhiṃ. Atha raññā svātanāya bhattena nimantito bhagavā adhivāsetvā dutiyadivase sakkena devānamindena purato purato gacchantena –
‘‘দন্তো দন্তেহি সহ পুরাণজটিলেহি, ৰিপ্পমুত্তো ৰিপ্পমুত্তেহি।
‘‘Danto dantehi saha purāṇajaṭilehi, vippamutto vippamuttehi;
সিঙ্গীনিক্খসৰণ্ণো, রাজগহং পাৰিসি ভগৰা’’তি॥ (মহাৰ॰ ৫৮) –
Siṅgīnikkhasavaṇṇo, rājagahaṃ pāvisi bhagavā’’ti. (mahāva. 58) –
এৰমাদীহি গাথাহি অভিত্থৰিযমানো রাজগহং পৰিসিত্ৰা রঞ্ঞো নিৰেসনে মহাদানং সম্পটিচ্ছি। তে পেতা ‘‘ইদানি রাজা অম্হাকং দানং উদ্দিসিস্সতি, ইদানি উদ্দিসিস্সতী’’তি আসায পরিৰারেত্ৰা অট্ঠংসু।
Evamādīhi gāthāhi abhitthaviyamāno rājagahaṃ pavisitvā rañño nivesane mahādānaṃ sampaṭicchi. Te petā ‘‘idāni rājā amhākaṃ dānaṃ uddisissati, idāni uddisissatī’’ti āsāya parivāretvā aṭṭhaṃsu.
রাজা দানং দত্ৰা ‘‘কত্থ নু খো ভগৰা ৰিহরেয্যা’’তি ভগৰতো ৰিহারট্ঠানমেৰ চিন্তেসি, ন তং দানং কস্সচি উদ্দিসি। পেতা ছিন্নাসা হুত্ৰা রত্তিং রঞ্ঞো নিৰেসনে অতিৰিয ভিংসনকং ৰিস্সরমকংসু। রাজা ভযসংৰেগসন্তাসমাপজ্জি, ততো পভাতায রত্তিযা ভগৰতো আরোচেসি – ‘‘এৰরূপং সদ্দমস্সোসিং, কিং নু খো মে, ভন্তে, ভৰিস্সতী’’তি। ভগৰা আহ – ‘‘মা ভাযি, মহারাজ, ন তে কিঞ্চি পাপকং ভৰিস্সতি, অপিচ খো তে পুরাণঞাতকা পেতেসু উপ্পন্না সন্তি, তে একং বুদ্ধন্তরং তমেৰ পচ্চাসীসমানা ৰিচরন্তি ‘বুদ্ধস্স দানং দত্ৰা অম্হাকং উদ্দিসিস্সতী’তি , ন তেসং ত্ৰং হিয্যো উদ্দিসি, তে ছিন্নাসা তথারূপং ৰিস্সরমকংসূ’’তি।
Rājā dānaṃ datvā ‘‘kattha nu kho bhagavā vihareyyā’’ti bhagavato vihāraṭṭhānameva cintesi, na taṃ dānaṃ kassaci uddisi. Petā chinnāsā hutvā rattiṃ rañño nivesane ativiya bhiṃsanakaṃ vissaramakaṃsu. Rājā bhayasaṃvegasantāsamāpajji, tato pabhātāya rattiyā bhagavato ārocesi – ‘‘evarūpaṃ saddamassosiṃ, kiṃ nu kho me, bhante, bhavissatī’’ti. Bhagavā āha – ‘‘mā bhāyi, mahārāja, na te kiñci pāpakaṃ bhavissati, apica kho te purāṇañātakā petesu uppannā santi, te ekaṃ buddhantaraṃ tameva paccāsīsamānā vicaranti ‘buddhassa dānaṃ datvā amhākaṃ uddisissatī’ti , na tesaṃ tvaṃ hiyyo uddisi, te chinnāsā tathārūpaṃ vissaramakaṃsū’’ti.
সো আহ ‘‘ইদানি পন, ভন্তে, দিন্নে লভেয্যু’’ন্তি? ‘‘আম, মহারাজা’’তি। ‘‘তেন হি মে, ভন্তে, অধিৰাসেতু ভগৰা অজ্জতনায দানং, তেসং উদ্দিসিস্সামী’’তি? ভগৰা অধিৰাসেসি। রাজা নিৰেসনং গন্ত্ৰা মহাদানং পটিযাদেত্ৰা ভগৰতো কালং আরোচাপেসি। ভগৰা রাজন্তেপুরং গন্ত্ৰা পঞ্ঞত্তে আসনে নিসীদি সদ্ধিং ভিক্খুসঙ্ঘেন। তেপি খো পেতা ‘‘অপি নাম অজ্জ লভেয্যামা’’তি গন্ত্ৰা তিরোকুট্টাদীসু অট্ঠংসু। ভগৰা তথা অকাসি, যথা তে সব্বেৰ রঞ্ঞো পাকটা অহেসুং। রাজা দক্খিণোদকং দেন্তো ‘‘ইদং মে ঞাতীনং হোতূ’’তি উদ্দিসি, তঙ্খণঞ্ঞেৰ তেসং পেতানং পদুমসঞ্ছন্না পোক্খরণিযো নিব্বত্তিংসু। তে তত্থ ন্হত্ৰা চ পিৰিত্ৰা চ পটিপ্পস্সদ্ধদরথকিলমথপিপাসা সুৰণ্ণৰণ্ণা অহেসুং। রাজা যাগুখজ্জকভোজনানি দত্ৰা উদ্দিসি, তঙ্খণঞ্ঞেৰ তেসং দিব্বযাগুখজ্জকভোজনানি নিব্বত্তিংসু। তে তানি পরিভুঞ্জিত্ৰা পীণিন্দ্রিযা অহেসুং। অথ ৰত্থসেনাসনানি দত্ৰা উদ্দিসি। তেসং দিব্বৰত্থদিব্বযানদিব্বপাসাদদিব্বপচ্চত্থরণদিব্বসেয্যাদিঅলঙ্কারৰিধযো নিব্বত্তিংসু। সাপি তেসং সম্পত্তি যথা সব্বাৰ পাকটা হোতি, তথা ভগৰা অধিট্ঠাসি। রাজা অতিৰিয অত্তমনো অহোসি। ততো ভগৰা ভুত্তাৰী পৰারিতো রঞ্ঞো মাগধস্স অনুমোদনত্থং ‘‘তিরোকুট্টেসু তিট্ঠন্তী’’তি ইমা গাথা অভাসি।
So āha ‘‘idāni pana, bhante, dinne labheyyu’’nti? ‘‘Āma, mahārājā’’ti. ‘‘Tena hi me, bhante, adhivāsetu bhagavā ajjatanāya dānaṃ, tesaṃ uddisissāmī’’ti? Bhagavā adhivāsesi. Rājā nivesanaṃ gantvā mahādānaṃ paṭiyādetvā bhagavato kālaṃ ārocāpesi. Bhagavā rājantepuraṃ gantvā paññatte āsane nisīdi saddhiṃ bhikkhusaṅghena. Tepi kho petā ‘‘api nāma ajja labheyyāmā’’ti gantvā tirokuṭṭādīsu aṭṭhaṃsu. Bhagavā tathā akāsi, yathā te sabbeva rañño pākaṭā ahesuṃ. Rājā dakkhiṇodakaṃ dento ‘‘idaṃ me ñātīnaṃ hotū’’ti uddisi, taṅkhaṇaññeva tesaṃ petānaṃ padumasañchannā pokkharaṇiyo nibbattiṃsu. Te tattha nhatvā ca pivitvā ca paṭippassaddhadarathakilamathapipāsā suvaṇṇavaṇṇā ahesuṃ. Rājā yāgukhajjakabhojanāni datvā uddisi, taṅkhaṇaññeva tesaṃ dibbayāgukhajjakabhojanāni nibbattiṃsu. Te tāni paribhuñjitvā pīṇindriyā ahesuṃ. Atha vatthasenāsanāni datvā uddisi. Tesaṃ dibbavatthadibbayānadibbapāsādadibbapaccattharaṇadibbaseyyādialaṅkāravidhayo nibbattiṃsu. Sāpi tesaṃ sampatti yathā sabbāva pākaṭā hoti, tathā bhagavā adhiṭṭhāsi. Rājā ativiya attamano ahosi. Tato bhagavā bhuttāvī pavārito rañño māgadhassa anumodanatthaṃ ‘‘tirokuṭṭesu tiṭṭhantī’’ti imā gāthā abhāsi.
এত্তাৰতা চ ‘‘যেন যত্থ যদা যস্মা, তিরোকুট্টং পকাসিতং, পকাসেত্ৰান তং সব্ব’’ন্তি অযং মাতিকা সঙ্খেপতো ৰিত্থারতো চ ৰিভত্তা হোতি।
Ettāvatā ca ‘‘yena yattha yadā yasmā, tirokuṭṭaṃ pakāsitaṃ, pakāsetvāna taṃ sabba’’nti ayaṃ mātikā saṅkhepato vitthārato ca vibhattā hoti.
পঠমগাথাৰণ্ণনা
Paṭhamagāthāvaṇṇanā
১. ইদানি ইমস্স তিরোকুট্টস্স যথাক্কমং অত্থৰণ্ণনং করিস্সাম। সেয্যথিদং – পঠমগাথায তাৰ তিরোকুট্টাতি কুট্টানং পরভাগা ৰুচ্চন্তি। তিট্ঠন্তীতি নিসজ্জাদিপ্পটিক্খেপতো ঠানকপ্পনৰচনমেতং। তেন যথা পাকারপরভাগং পব্বতপরভাগঞ্চ গচ্ছন্তং ‘‘তিরোপাকারং তিরোপব্বতং অসজ্জমানো গচ্ছতী’’তি ৰদন্তি, এৰমিধাপি কুট্টস্স পরভাগেসু তিট্ঠন্তে ‘‘তিরোকুট্টেসু তিট্ঠন্তী’’তি আহ। সন্ধিসিঙ্ঘাটকেসু চাতি এত্থ সন্ধিযোতি চতুক্কোণরচ্ছা ৰুচ্চন্তি ঘরসন্ধিভিত্তিসন্ধিআলোকসন্ধিযো চাপি। সিঙ্ঘাটকাতি তিকোণরচ্ছা ৰুচ্চন্তি, তদেকজ্ঝং কত্ৰা পুরিমেন সদ্ধিং সঙ্ঘটেন্তো ‘‘সন্ধিসিঙ্ঘাটকেসু চা’’তি আহ। দ্ৰারবাহাসু তিট্ঠন্তীতি নগরদ্ৰারঘরদ্ৰারানং বাহা নিস্সায তিট্ঠন্তি। আগন্ত্ৰান সকং ঘরন্তি এত্থ সকং ঘরং নাম পুব্বঞাতিঘরম্পি অত্তনা সামিকভাৰেন অজ্ঝাৰুত্থপুব্বঘরম্পি। তদুভযম্পি যস্মা তে সকঘরসঞ্ঞায আগচ্ছন্তি, তস্মা ‘‘আগন্ত্ৰান সকং ঘর’’ন্তি আহ।
1. Idāni imassa tirokuṭṭassa yathākkamaṃ atthavaṇṇanaṃ karissāma. Seyyathidaṃ – paṭhamagāthāya tāva tirokuṭṭāti kuṭṭānaṃ parabhāgā vuccanti. Tiṭṭhantīti nisajjādippaṭikkhepato ṭhānakappanavacanametaṃ. Tena yathā pākāraparabhāgaṃ pabbataparabhāgañca gacchantaṃ ‘‘tiropākāraṃ tiropabbataṃ asajjamāno gacchatī’’ti vadanti, evamidhāpi kuṭṭassa parabhāgesu tiṭṭhante ‘‘tirokuṭṭesu tiṭṭhantī’’ti āha. Sandhisiṅghāṭakesu cāti ettha sandhiyoti catukkoṇaracchā vuccanti gharasandhibhittisandhiālokasandhiyo cāpi. Siṅghāṭakāti tikoṇaracchā vuccanti, tadekajjhaṃ katvā purimena saddhiṃ saṅghaṭento ‘‘sandhisiṅghāṭakesu cā’’ti āha. Dvārabāhāsu tiṭṭhantīti nagaradvāragharadvārānaṃ bāhā nissāya tiṭṭhanti. Āgantvāna sakaṃ gharanti ettha sakaṃ gharaṃ nāma pubbañātigharampi attanā sāmikabhāvena ajjhāvutthapubbagharampi. Tadubhayampi yasmā te sakagharasaññāya āgacchanti, tasmā ‘‘āgantvāna sakaṃ ghara’’nti āha.
দুতিযগাথাৰণ্ণনা
Dutiyagāthāvaṇṇanā
২. এৰং ভগৰা পুব্বে অনজ্ঝাৰুত্থপুব্বম্পি পুব্বঞাতিঘরং বিম্বিসারনিৰেসনং সকঘরসঞ্ঞায আগন্ত্ৰা তিরোকুট্টসন্ধিসিঙ্ঘাটকদ্ৰারবাহাসু ঠিতে ইস্সামচ্ছরিযফলং অনুভৰন্তে, অপ্পেকচ্চে দীঘমস্সুকেসৰিকারধরে অন্ধকারমুখে সিথিলবন্ধনৰিলম্বমানকিসফরুসকাল়কঙ্গপচ্চঙ্গে তত্থ তত্থ ঠিতৰনদাহদড্ঢতালরুক্খসদিসে, অপ্পেকচ্চে জিঘচ্ছাপিপাসারণিনিম্মথনেন উদরতো উট্ঠায মুখতো ৰিনিচ্ছরন্তায অগ্গিজালায পরিডয্হমানসরীরে, অপ্পেকচ্চে সূচিছিদ্দাণুমত্তকণ্ঠবিলতায পব্বতাকারকুচ্ছিতায চ লদ্ধম্পি পানভোজনং যাৰদত্থং ভুঞ্জিতুং অসমত্থতায খুপ্পিপাসাপরেতে অঞ্ঞং রসমৰিন্দমানে, অপ্পেকচ্চে অঞ্ঞমঞ্ঞস্স অঞ্ঞেসং ৰা সত্তানং পভিন্নগণ্ডপিল়কমুখা পগ্ঘরিতরুধিরপুব্বলসিকাদিং লদ্ধা অমতমিৰ সাযমানে অতিৰিয দুদ্দসিকৰিরূপভযানকসরীরে বহূ পেতে রঞ্ঞো নিদস্সেন্তো –
2. Evaṃ bhagavā pubbe anajjhāvutthapubbampi pubbañātigharaṃ bimbisāranivesanaṃ sakagharasaññāya āgantvā tirokuṭṭasandhisiṅghāṭakadvārabāhāsu ṭhite issāmacchariyaphalaṃ anubhavante, appekacce dīghamassukesavikāradhare andhakāramukhe sithilabandhanavilambamānakisapharusakāḷakaṅgapaccaṅge tattha tattha ṭhitavanadāhadaḍḍhatālarukkhasadise, appekacce jighacchāpipāsāraṇinimmathanena udarato uṭṭhāya mukhato viniccharantāya aggijālāya pariḍayhamānasarīre, appekacce sūcichiddāṇumattakaṇṭhabilatāya pabbatākārakucchitāya ca laddhampi pānabhojanaṃ yāvadatthaṃ bhuñjituṃ asamatthatāya khuppipāsāparete aññaṃ rasamavindamāne, appekacce aññamaññassa aññesaṃ vā sattānaṃ pabhinnagaṇḍapiḷakamukhā paggharitarudhirapubbalasikādiṃ laddhā amatamiva sāyamāne ativiya duddasikavirūpabhayānakasarīre bahū pete rañño nidassento –
‘‘তিরোকুট্টেসু তিট্ঠন্তি, সন্ধিসিঙ্ঘাটকেসু চ।
‘‘Tirokuṭṭesu tiṭṭhanti, sandhisiṅghāṭakesu ca;
দ্ৰারবাহাসু তিট্ঠন্তি, আগন্ত্ৰান সকং ঘর’’ন্তি॥ –
Dvārabāhāsu tiṭṭhanti, āgantvāna sakaṃ ghara’’nti. –
ৰত্ৰা পুন তেহি কতস্স কম্মস্স দারুণভাৰং দস্সেন্তো ‘‘পহূতে অন্নপানম্হী’’তি দুতিযগাথমাহ।
Vatvā puna tehi katassa kammassa dāruṇabhāvaṃ dassento ‘‘pahūte annapānamhī’’ti dutiyagāthamāha.
তত্থ পহূতেতি অনপ্পকে বহুম্হি, যাৰদত্থিকেতি ৰুত্তং হোতি। ভ-কারস্স হি হ-কারো লব্ভতি ‘‘পহু সন্তো ন ভরতী’’তিআদীসু (সু॰ নি॰ ৯৮) ৰিয। কেচি পন ‘‘বহূতে’’ ইতি চ ‘‘বহূকে’’ ইতি চ পঠন্তি। পমাদপাঠা এতে । অন্নে চ পানম্হি চ অন্নপানম্হি। খজ্জে চ ভোজ্জে চ খজ্জভোজ্জে, এতেন অসিতপীতখাযিতসাযিতৰসেন চতুব্বিধং আহারং দস্সেতি। উপট্ঠিতেতি উপগম্ম ঠিতে, সজ্জিতে পটিযত্তে সমোহিতেতি ৰুত্তং হোতি। ন তেসং কোচি সরতি, সত্তানন্তি তেসং পেত্তিৰিসযে উপ্পন্নানং সত্তানং কোচি মাতা ৰা পিতা ৰা পুত্তো ৰা ন সরতি। কিং কারণা? কম্মপচ্চযা, অত্তনা কতস্স অদানদানপ্পটিসেধনাদিভেদস্স কদরিযকম্মস্স পচ্চযা। তঞ্হি তেসং কম্মং ঞাতীনং সরিতুং ন দেতি।
Tattha pahūteti anappake bahumhi, yāvadatthiketi vuttaṃ hoti. Bha-kārassa hi ha-kāro labbhati ‘‘pahu santo na bharatī’’tiādīsu (su. ni. 98) viya. Keci pana ‘‘bahūte’’ iti ca ‘‘bahūke’’ iti ca paṭhanti. Pamādapāṭhā ete . Anne ca pānamhi ca annapānamhi. Khajje ca bhojje ca khajjabhojje, etena asitapītakhāyitasāyitavasena catubbidhaṃ āhāraṃ dasseti. Upaṭṭhiteti upagamma ṭhite, sajjite paṭiyatte samohiteti vuttaṃ hoti. Na tesaṃ koci sarati, sattānanti tesaṃ pettivisaye uppannānaṃ sattānaṃ koci mātā vā pitā vā putto vā na sarati. Kiṃ kāraṇā? Kammapaccayā, attanā katassa adānadānappaṭisedhanādibhedassa kadariyakammassa paccayā. Tañhi tesaṃ kammaṃ ñātīnaṃ sarituṃ na deti.
ততিযগাথাৰণ্ণনা
Tatiyagāthāvaṇṇanā
৩. এৰং ভগৰা অনপ্পকেপি অন্নপানাদিম্হি পচ্চুপট্ঠিতে ‘‘অপি নাম অম্হে উদ্দিস্স কিঞ্চি দদেয্যু’’ন্তি ঞাতী পচ্চাসীসন্তানং ৰিচরতং তেসং পেতানং তেহি কতস্স অতিকটুকৰিপাককরস্স কম্মস্স পচ্চযেন কস্সচি ঞাতিনো অনুস্সরণমত্তাভাৰং দস্সেন্তো –
3. Evaṃ bhagavā anappakepi annapānādimhi paccupaṭṭhite ‘‘api nāma amhe uddissa kiñci dadeyyu’’nti ñātī paccāsīsantānaṃ vicarataṃ tesaṃ petānaṃ tehi katassa atikaṭukavipākakarassa kammassa paccayena kassaci ñātino anussaraṇamattābhāvaṃ dassento –
‘‘পহূতে অন্নপানম্হি, খজ্জভোজ্জে উপট্ঠিতে।
‘‘Pahūte annapānamhi, khajjabhojje upaṭṭhite;
ন তেসং কোচি সরতি, সত্তানং কম্মপচ্চযা’’তি॥ –
Na tesaṃ koci sarati, sattānaṃ kammapaccayā’’ti. –
ৰত্ৰা পুন রঞ্ঞো পেত্তিৰিসযূপপন্নে ঞাতকে উদ্দিস্স দিন্নং দানং পসংসন্তো ‘‘এৰং দদন্তি ঞাতীন’’ন্তি ততিযগাথমাহ।
Vatvā puna rañño pettivisayūpapanne ñātake uddissa dinnaṃ dānaṃ pasaṃsanto ‘‘evaṃ dadanti ñātīna’’nti tatiyagāthamāha.
তত্থ এৰন্তি উপমাৰচনং। তস্স দ্ৰিধা সম্বন্ধো – তেসং সত্তানং কম্মপচ্চযা অসরন্তেপি কিস্মিঞ্চি দদন্তি, ঞাতীনং, যে এৰং অনুকম্পকা হোন্তীতি চ যথা তযা, মহারাজ, দিন্নং, এৰং সুচিং পণীতং কালেন কপ্পিযং পানভোজনং দদন্তি ঞাতীনং, যে হোন্তি অনুকম্পকাতি চ। দদন্তীতি দেন্তি উদ্দিসন্তি নিয্যাতেন্তি। ঞাতীনন্তি মাতিতো চ পিতিতো চ সম্বন্ধানং। যেতি যে কেচি পুত্তা ৰা ধীতরো ৰা ভাতরো ৰা হোন্তীতি ভৰন্তি। অনুকম্পকাতি অত্থকামা হিতেসিনো। সুচিন্তি ৰিমলং দস্সনেয্যং মনোরমং ধম্মিকং ধম্মলদ্ধং। পণীতন্তি উত্তমং সেট্ঠং। কালেনাতি ঞাতিপেতানং তিরোকুট্টাদীসু আগন্ত্ৰা ঠিতকালেন। কপ্পিযন্তি অনুচ্ছৰিকং পতিরূপং অরিযানং পরিভোগারহং। পানভোজনন্তি পানঞ্চ ভোজনঞ্চ। ইধ পানভোজনমুখেন সব্বোপি দেয্যধম্মো অধিপ্পেতো।
Tattha evanti upamāvacanaṃ. Tassa dvidhā sambandho – tesaṃ sattānaṃ kammapaccayā asarantepi kismiñci dadanti, ñātīnaṃ, ye evaṃ anukampakā hontīti ca yathā tayā, mahārāja, dinnaṃ, evaṃ suciṃ paṇītaṃ kālena kappiyaṃ pānabhojanaṃ dadanti ñātīnaṃ, ye honti anukampakāti ca. Dadantīti denti uddisanti niyyātenti. Ñātīnanti mātito ca pitito ca sambandhānaṃ. Yeti ye keci puttā vā dhītaro vā bhātaro vā hontīti bhavanti. Anukampakāti atthakāmā hitesino. Sucinti vimalaṃ dassaneyyaṃ manoramaṃ dhammikaṃ dhammaladdhaṃ. Paṇītanti uttamaṃ seṭṭhaṃ. Kālenāti ñātipetānaṃ tirokuṭṭādīsu āgantvā ṭhitakālena. Kappiyanti anucchavikaṃ patirūpaṃ ariyānaṃ paribhogārahaṃ. Pānabhojananti pānañca bhojanañca. Idha pānabhojanamukhena sabbopi deyyadhammo adhippeto.
চতুত্থগাথাপুব্বদ্ধৰণ্ণনা
Catutthagāthāpubbaddhavaṇṇanā
৪. এৰং ভগৰা রঞ্ঞা মাগধেন পেতভূতানং ঞাতীনং অনুকম্পায দিন্নং পানভোজনং পসংসন্তো –
4. Evaṃ bhagavā raññā māgadhena petabhūtānaṃ ñātīnaṃ anukampāya dinnaṃ pānabhojanaṃ pasaṃsanto –
‘‘এৰং দদন্তি ঞাতীনং, যে হোন্তি অনুকম্পকা।
‘‘Evaṃ dadanti ñātīnaṃ, ye honti anukampakā;
সুচিং পণীতং কালেন, কপ্পিযং পানভোজন’’ন্তি॥ –
Suciṃ paṇītaṃ kālena, kappiyaṃ pānabhojana’’nti. –
ৰত্ৰা পুন যেন পকারেন দিন্নং তেসং হোতি, তং দস্সেন্তো ‘‘ইদং ৰো ঞাতীনং হোতূ’’তি চতুত্থগাথায পুব্বদ্ধমাহ তং ততিযগাথায পুব্বদ্ধেন সম্বন্ধিতব্বং –
Vatvā puna yena pakārena dinnaṃ tesaṃ hoti, taṃ dassento ‘‘idaṃ vo ñātīnaṃ hotū’’ti catutthagāthāya pubbaddhamāha taṃ tatiyagāthāya pubbaddhena sambandhitabbaṃ –
‘‘এৰং দদন্তি ঞাতীনং, যে হোন্তি অনুকম্পকা ।
‘‘Evaṃ dadanti ñātīnaṃ, ye honti anukampakā ;
ইদং ৰো ঞাতীনং হোতু, সুখিতা হোন্তু ঞাতযো’’তি॥
Idaṃ vo ñātīnaṃ hotu, sukhitā hontu ñātayo’’ti.
তেন ‘‘ইদং ৰো ঞাতীনং হোতূতি এৰং দদন্তি, নো অঞ্ঞথা’’তি এত্থ আকারত্থেন এৰংসদ্দেন দাতব্বাকারনিদস্সনং কতং হোতি।
Tena ‘‘idaṃ vo ñātīnaṃ hotūti evaṃ dadanti, no aññathā’’ti ettha ākāratthena evaṃsaddena dātabbākāranidassanaṃ kataṃ hoti.
তত্থ ইদন্তি দেয্যধম্মনিদস্সনং। ৰোতি ‘‘কচ্চি পন ৰো অনুরুদ্ধা সমগ্গা সম্মোদমানা’’তি চ (ম॰ নি॰ ১.৩২৬; মহাৰ॰ ৪৬৬), ‘‘যেহি ৰো অরিযা’’তি চ এৰমাদীসু ৰিয কেৰলং নিপাতমত্তং, ন সামিৰচনং। ঞাতীনং হোতূতি পেত্তিৰিসযে উপ্পন্নানং ঞাতকানং হোতু। সুখিতা হোন্তু ঞাতযোতি তে পেত্তিৰিসযূপপন্না ঞাতযো ইদং পচ্চনুভৰন্তা সুখিতা হোন্তূতি।
Tattha idanti deyyadhammanidassanaṃ. Voti ‘‘kacci pana vo anuruddhā samaggā sammodamānā’’ti ca (ma. ni. 1.326; mahāva. 466), ‘‘yehi vo ariyā’’ti ca evamādīsu viya kevalaṃ nipātamattaṃ, na sāmivacanaṃ. Ñātīnaṃ hotūti pettivisaye uppannānaṃ ñātakānaṃ hotu. Sukhitā hontu ñātayoti te pettivisayūpapannā ñātayo idaṃ paccanubhavantā sukhitā hontūti.
চতুত্থগাথাপরদ্ধপঞ্চমগাথাপুব্বদ্ধৰণ্ণনা
Catutthagāthāparaddhapañcamagāthāpubbaddhavaṇṇanā
৪-৫. এৰং ভগৰা যেন পকারেন পেত্তিৰিসযূপপন্নানং ঞাতীনং দাতব্বং, তং দস্সেন্তো ‘‘ইদং ৰো ঞাতীনং হোতু, সুখিতা হোন্তু ঞাতযো’’তি ৰত্ৰা পুন যস্মা ‘‘ইদং ৰো ঞাতীনং হোতূ’’তি ৰুত্তেপি ন অঞ্ঞেন কতং কম্মং অঞ্ঞস্স ফলদং হোতি, কেৰলন্তু তথা উদ্দিস্স দিয্যমানং তং ৰত্থু ঞাতীনং কুসলকম্মস্স পচ্চযো হোতি। তস্মা যথা তেসং তস্মিংযেৰ ৰত্থুস্মিং তঙ্খণে ফলনিব্বত্তকং কুসলকম্মং হোতি, তং দস্সেন্তো ‘‘তে চ তত্থা’’তি চতুত্থগাথায পচ্ছিমদ্ধং ‘‘পহূতে অন্নপানম্হী’’তি পঞ্চমগাথায পুব্বদ্ধঞ্চ আহ।
4-5. Evaṃ bhagavā yena pakārena pettivisayūpapannānaṃ ñātīnaṃ dātabbaṃ, taṃ dassento ‘‘idaṃ vo ñātīnaṃ hotu, sukhitā hontu ñātayo’’ti vatvā puna yasmā ‘‘idaṃ vo ñātīnaṃ hotū’’ti vuttepi na aññena kataṃ kammaṃ aññassa phaladaṃ hoti, kevalantu tathā uddissa diyyamānaṃ taṃ vatthu ñātīnaṃ kusalakammassa paccayo hoti. Tasmā yathā tesaṃ tasmiṃyeva vatthusmiṃ taṅkhaṇe phalanibbattakaṃ kusalakammaṃ hoti, taṃ dassento ‘‘te ca tatthā’’ti catutthagāthāya pacchimaddhaṃ ‘‘pahūte annapānamhī’’ti pañcamagāthāya pubbaddhañca āha.
তেসং অত্থো – তে ঞাতিপেতা যত্থ তং দানং দীযতি, তত্থ সমন্ততো আগন্ত্ৰা সমাগন্ত্ৰা, সমোধায ৰা একজ্ঝং হুত্ৰাতি ৰুত্তং হোতি, সম্মা আগতা সমাগতা ‘‘ইমে নো ঞাতযো অম্হাকং অত্থায দানং উদ্দিসিস্সন্তী’’তি এতদত্থং সম্মা আগতা হুত্ৰাতি ৰুত্তং হোতি। পহূতে অন্নপানম্হীতি তস্মিং অত্তনো উদ্দিস্সমানে পহূতে অন্নপানম্হি। সক্কচ্চং অনুমোদরেতি অভিসদ্দহন্তা কম্মফলং অৰিজহন্তা চিত্তীকারং অৰিক্খিত্তচিত্তা হুত্ৰা ‘‘ইদং নো দানং হিতায সুখায হোতূ’’তি মোদন্তি অনুমোদন্তি, পীতিসোমনস্সজাতা হোন্তীতি।
Tesaṃ attho – te ñātipetā yattha taṃ dānaṃ dīyati, tattha samantato āgantvā samāgantvā, samodhāya vā ekajjhaṃ hutvāti vuttaṃ hoti, sammā āgatā samāgatā ‘‘ime no ñātayo amhākaṃ atthāya dānaṃ uddisissantī’’ti etadatthaṃ sammā āgatā hutvāti vuttaṃ hoti. Pahūte annapānamhīti tasmiṃ attano uddissamāne pahūte annapānamhi. Sakkaccaṃ anumodareti abhisaddahantā kammaphalaṃ avijahantā cittīkāraṃ avikkhittacittā hutvā ‘‘idaṃ no dānaṃ hitāya sukhāya hotū’’ti modanti anumodanti, pītisomanassajātā hontīti.
পঞ্চমগাথাপরদ্ধছট্ঠগাথাপুব্বদ্ধৰণ্ণনা
Pañcamagāthāparaddhachaṭṭhagāthāpubbaddhavaṇṇanā
৫-৬. এৰং ভগৰা যথা পেত্তিৰিসযূপপন্নানং তঙ্খণে ফলনিব্বত্তকং কুসলং কম্মং হোতি, তং দস্সেন্তো –
5-6. Evaṃ bhagavā yathā pettivisayūpapannānaṃ taṅkhaṇe phalanibbattakaṃ kusalaṃ kammaṃ hoti, taṃ dassento –
‘‘তে চ তত্থ সমাগন্ত্ৰা, ঞাতিপেতা সমাগতা।
‘‘Te ca tattha samāgantvā, ñātipetā samāgatā;
পহূতে অন্নপানম্হি, সক্কচ্চং অনুমোদরে’’তি॥ –
Pahūte annapānamhi, sakkaccaṃ anumodare’’ti. –
ৰত্ৰা পুন ঞাতকে নিস্সায নিব্বত্তকুসলকম্মফলং পচ্চনুভোন্তানং তেসং ঞাতী আরব্ভ থোমনাকারং দস্সেন্তো ‘‘চিরং জীৰন্তূ’’তি পঞ্চমগাথায পচ্ছিমদ্ধং ‘‘অম্হাকঞ্চ কতা পূজা’’তি ছট্ঠগাথায পুব্বদ্ধঞ্চ আহ।
Vatvā puna ñātake nissāya nibbattakusalakammaphalaṃ paccanubhontānaṃ tesaṃ ñātī ārabbha thomanākāraṃ dassento ‘‘ciraṃ jīvantū’’ti pañcamagāthāya pacchimaddhaṃ ‘‘amhākañca katā pūjā’’ti chaṭṭhagāthāya pubbaddhañca āha.
তেসং অত্থো – চিরং জীৰন্তূতি চিরজীৰিনো দীঘাযুকা হোন্তু। নো ঞাতীতি অম্হাকং ঞাতকা। যেসং হেতূতি যে নিস্সায যেসং কারণা। লভামসেতি লভাম। অত্তনা তঙ্খণং পটিলদ্ধসম্পত্তিং অপদিসন্তা ভণন্তি। পেতানঞ্হি অত্তনো অনুমোদনেন, দাযকানং উদ্দেসেন, দক্খিণেয্যসম্পদায চাতি তীহি অঙ্গেহি দক্খিণা সমিজ্ঝতি, তঙ্খণে ফলনিব্বত্তিকা হোতি। তত্থ দাযকা ৰিসেসহেতু। তেনাহংসু ‘‘যেসং হেতু লভামসে’’তি। অম্হাকঞ্চ কতা পূজাতি ‘‘ইদং ৰো ঞাতীনং হোতূ’’তি এৰং ইমং দানং উদ্দিসন্তেহি অম্হাকঞ্চ পূজা কতা। দাযকা চ অনিপ্ফলাতি যম্হি সন্তানে পরিচ্চাগমযং কম্মং কতং, তস্স তত্থেৰ ফলদানতো দাযকা চ অনিপ্ফলাতি।
Tesaṃ attho – ciraṃ jīvantūti cirajīvino dīghāyukā hontu. No ñātīti amhākaṃ ñātakā. Yesaṃ hetūti ye nissāya yesaṃ kāraṇā. Labhāmaseti labhāma. Attanā taṅkhaṇaṃ paṭiladdhasampattiṃ apadisantā bhaṇanti. Petānañhi attano anumodanena, dāyakānaṃ uddesena, dakkhiṇeyyasampadāya cāti tīhi aṅgehi dakkhiṇā samijjhati, taṅkhaṇe phalanibbattikā hoti. Tattha dāyakā visesahetu. Tenāhaṃsu ‘‘yesaṃ hetu labhāmase’’ti. Amhākañca katā pūjāti ‘‘idaṃ vo ñātīnaṃ hotū’’ti evaṃ imaṃ dānaṃ uddisantehi amhākañca pūjā katā. Dāyakā ca anipphalāti yamhi santāne pariccāgamayaṃ kammaṃ kataṃ, tassa tattheva phaladānato dāyakā ca anipphalāti.
এত্থাহ – ‘‘কিং পন পেত্তিৰিসযূপপন্না এৰ ঞাতযো লভন্তি, উদাহু অঞ্ঞেপি লভন্তী’’তি ? ৰুচ্চতে – ভগৰতা এৰেতং ব্যাকতং জাণুস্সোণিনা ব্রাহ্মণেন পুট্ঠেন, কিমেত্থ অম্হেহি ৰত্তব্বং অত্থি। ৰুত্তং হেতং –
Etthāha – ‘‘kiṃ pana pettivisayūpapannā eva ñātayo labhanti, udāhu aññepi labhantī’’ti ? Vuccate – bhagavatā evetaṃ byākataṃ jāṇussoṇinā brāhmaṇena puṭṭhena, kimettha amhehi vattabbaṃ atthi. Vuttaṃ hetaṃ –
‘‘মযমস্সু, ভো গোতম, ব্রাহ্মণা নাম দানানি দেম, সদ্ধানি করোম ‘ইদং দানং পেতানং ঞাতিসালোহিতানং উপকপ্পতু, ইদং দানং পেতা ঞাতিসালোহিতা পরিভুঞ্জন্তূ’তি, কচ্চি তং, ভো গোতম, দানং পেতানং ঞাতিসালোহিতানং উপকপ্পতি, কচ্চি তে পেতা ঞাতিসালোহিতা তং দানং পরিভুঞ্জন্তীতি। ঠানে খো, ব্রাহ্মণ, উপকপ্পতি, নো অট্ঠানেতি।
‘‘Mayamassu, bho gotama, brāhmaṇā nāma dānāni dema, saddhāni karoma ‘idaṃ dānaṃ petānaṃ ñātisālohitānaṃ upakappatu, idaṃ dānaṃ petā ñātisālohitā paribhuñjantū’ti, kacci taṃ, bho gotama, dānaṃ petānaṃ ñātisālohitānaṃ upakappati, kacci te petā ñātisālohitā taṃ dānaṃ paribhuñjantīti. Ṭhāne kho, brāhmaṇa, upakappati, no aṭṭhāneti.
‘‘কতমং পন তং, ভো গোতম, ঠানং, কতমং অট্ঠানন্তি? ইধ, ব্রাহ্মণ, একচ্চো পাণাতিপাতী হোতি…পে॰… মিচ্ছাদিট্ঠিকো হোতি, সো কাযস্স ভেদা পরং মরণা নিরযং উপপজ্জতি। যো নেরযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি। ইদং খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি।
‘‘Katamaṃ pana taṃ, bho gotama, ṭhānaṃ, katamaṃ aṭṭhānanti? Idha, brāhmaṇa, ekacco pāṇātipātī hoti…pe… micchādiṭṭhiko hoti, so kāyassa bhedā paraṃ maraṇā nirayaṃ upapajjati. Yo nerayikānaṃ sattānaṃ āhāro, tena so tattha yāpeti, tena so tattha tiṭṭhati. Idaṃ kho, brāhmaṇa, aṭṭhānaṃ, yattha ṭhitassa taṃ dānaṃ na upakappati.
‘‘ইধ পন, ব্রাহ্মণ, একচ্চো পাণাতিপাতী হোতি…পে॰… মিচ্ছাদিট্ঠিকো হোতি, সো কাযস্স ভেদা পরং মরণা তিরচ্ছানযোনিং উপপজ্জতি। যো তিরচ্ছানযোনিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি। ইদম্পি খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি।
‘‘Idha pana, brāhmaṇa, ekacco pāṇātipātī hoti…pe… micchādiṭṭhiko hoti, so kāyassa bhedā paraṃ maraṇā tiracchānayoniṃ upapajjati. Yo tiracchānayonikānaṃ sattānaṃ āhāro, tena so tattha yāpeti, tena so tattha tiṭṭhati. Idampi kho, brāhmaṇa, aṭṭhānaṃ, yattha ṭhitassa taṃ dānaṃ na upakappati.
‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি…পে॰… সম্মাদিট্ঠিকো হোতি, সো কাযস্স ভেদা পরং মরণা মনুস্সানং সহব্যতং উপপজ্জতি…পে॰… দেৰানং সহব্যতং উপপজ্জতি। যো দেৰানং আহারো, তেন সো তত্থ যাপেতি, তেন সো তত্থ তিট্ঠতি। ইদম্পি খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি।
‘‘Idha pana, brāhmaṇa, ekacco pāṇātipātā paṭivirato hoti…pe… sammādiṭṭhiko hoti, so kāyassa bhedā paraṃ maraṇā manussānaṃ sahabyataṃ upapajjati…pe… devānaṃ sahabyataṃ upapajjati. Yo devānaṃ āhāro, tena so tattha yāpeti, tena so tattha tiṭṭhati. Idampi kho, brāhmaṇa, aṭṭhānaṃ, yattha ṭhitassa taṃ dānaṃ na upakappati.
‘‘ইধ পন, ব্রাহ্মণ, একচ্চো পাণাতিপাতী হোতি…পে॰… মিচ্ছাদিট্ঠিকো হোতি, সো কাযস্স ভেদা পরং মরণা পেত্তিৰিসযং উপপজ্জতি। যো পেত্তিৰেসযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি। যং ৰা পনস্স ইতো অনুপৰেচ্ছন্তি মিত্তামচ্চা ৰা ঞাতিসালোহিতা ৰা, তেন সো তত্থ যাপেতি, তেন সো তত্থ তিট্ঠতি। ইদং খো, ব্রাহ্মণ, ঠানং, যত্থ ঠিতস্স তং দানং উপকপ্পতীতি।
‘‘Idha pana, brāhmaṇa, ekacco pāṇātipātī hoti…pe… micchādiṭṭhiko hoti, so kāyassa bhedā paraṃ maraṇā pettivisayaṃ upapajjati. Yo pettivesayikānaṃ sattānaṃ āhāro, tena so tattha yāpeti, tena so tattha tiṭṭhati. Yaṃ vā panassa ito anupavecchanti mittāmaccā vā ñātisālohitā vā, tena so tattha yāpeti, tena so tattha tiṭṭhati. Idaṃ kho, brāhmaṇa, ṭhānaṃ, yattha ṭhitassa taṃ dānaṃ upakappatīti.
‘‘সচে পন, ভো গোতম, সো পেতো ঞাতিসালোহিতো তং ঠানং অনুপপন্নো হোতি, কো তং দানং পরিভুঞ্জতীতি? অঞ্ঞেপিস্স, ব্রাহ্মণ, পেতা ঞাতিসালোহিতা তং ঠানং উপপন্না হোন্তি, তে তং দানং পরিভুঞ্জন্তীতি।
‘‘Sace pana, bho gotama, so peto ñātisālohito taṃ ṭhānaṃ anupapanno hoti, ko taṃ dānaṃ paribhuñjatīti? Aññepissa, brāhmaṇa, petā ñātisālohitā taṃ ṭhānaṃ upapannā honti, te taṃ dānaṃ paribhuñjantīti.
‘‘সচে পন, ভো গোতম, সো চেৰ পেতো ঞাতিসালোহিতো তং ঠানং অনুপপন্নো হোতি, অঞ্ঞেপিস্স পেতা ঞাতিসালোহিতা তং ঠানং অনুপপন্না হোন্তি, কো তং দানং পরিভুঞ্জতীতি? অট্ঠানং খো এতং ব্রাহ্মণ অনৰকাসো, যং তং ঠানং ৰিৰিত্তং অস্স ইমিনা দীঘেন অদ্ধুনা যদিদং পেতেহি ঞাতিসালোহিতেহি। অপিচ ব্রাহ্মণ দাযকোপি অনিপ্ফলো’’তি (অ॰ নি॰ ১০.১৭৭)।
‘‘Sace pana, bho gotama, so ceva peto ñātisālohito taṃ ṭhānaṃ anupapanno hoti, aññepissa petā ñātisālohitā taṃ ṭhānaṃ anupapannā honti, ko taṃ dānaṃ paribhuñjatīti? Aṭṭhānaṃ kho etaṃ brāhmaṇa anavakāso, yaṃ taṃ ṭhānaṃ vivittaṃ assa iminā dīghena addhunā yadidaṃ petehi ñātisālohitehi. Apica brāhmaṇa dāyakopi anipphalo’’ti (a. ni. 10.177).
ছট্ঠগাথাপরদ্ধসত্তমগাথাৰণ্ণনা
Chaṭṭhagāthāparaddhasattamagāthāvaṇṇanā
৬-৭. এৰং ভগৰা রঞ্ঞো মাগধস্স পেত্তিৰিসযূপপন্নানং পুব্বঞাতীনং সম্পত্তিং নিস্সায থোমেন্তো ‘‘এতে তে, মহারাজ, ঞাতী ইমায দানসম্পদায অত্তমনা এৰং থোমেন্তী’’তি দস্সেন্তো –
6-7. Evaṃ bhagavā rañño māgadhassa pettivisayūpapannānaṃ pubbañātīnaṃ sampattiṃ nissāya thomento ‘‘ete te, mahārāja, ñātī imāya dānasampadāya attamanā evaṃ thomentī’’ti dassento –
‘‘চিরং জীৰন্তু নো ঞাতী, যেসং হেতু লভামসে।
‘‘Ciraṃ jīvantu no ñātī, yesaṃ hetu labhāmase;
অম্হাকঞ্চ কতা পূজা, দাযকা চ অনিপ্ফলা’’তি॥ –
Amhākañca katā pūjā, dāyakā ca anipphalā’’ti. –
ৰত্ৰা পুন তেসং পেত্তিৰিসযূপপন্নানং অঞ্ঞস্স কসিগোরক্খাদিনো সম্পত্তিপটিলাভকারণস্স অভাৰং ইতো দিন্নেন যাপনভাৰঞ্চ দস্সেন্তো ‘‘ন হি তত্থ কসী অত্থী’’তি ছট্ঠগাথায পচ্ছিমদ্ধং ‘‘ৰণিজ্জা তাদিসী’’তি ইমং সত্তমগাথঞ্চ আহ।
Vatvā puna tesaṃ pettivisayūpapannānaṃ aññassa kasigorakkhādino sampattipaṭilābhakāraṇassa abhāvaṃ ito dinnena yāpanabhāvañca dassento ‘‘na hi tattha kasī atthī’’ti chaṭṭhagāthāya pacchimaddhaṃ ‘‘vaṇijjā tādisī’’ti imaṃ sattamagāthañca āha.
তত্রাযং অত্থৰণ্ণনা – ন হি, মহারাজ, তত্থ পেত্তিৰিসযে কসি অত্থি, যং নিস্সায তে পেতা সম্পত্তিং পটিলভেয্যুং। গোরক্খেত্থ ন ৰিজ্জতীতি ন কেৰলং কসি এৰ, গোরক্খাপি এত্থ পেত্তিৰিসযে ন ৰিজ্জতি, যং নিস্সায তে সম্পত্তিং পটিলভেয্যুং। ৰণিজ্জা তাদিসী নত্থীতি ৰাণিজ্জাপি তাদিসী নত্থি, যা তেসং সম্পত্তিপটিলাভহেতু ভৰেয্য। হিরঞ্ঞেন কযাকযন্তি হিরঞ্ঞেন কযৰিক্কযম্পি তত্থ তাদিসং নত্থি, যং তেসং সম্পত্তিপটিলাভহেতু ভৰেয্য। ইতো দিন্নেন যাপেন্তি, পেতা কালগতা তহিন্তি কেৰলং পন ইতো ঞাতীহি ৰা মিত্তামচ্চেহি ৰা দিন্নেন যাপেন্তি, অত্তভাৰং গমেন্তি। পেতাতি পেত্তিৰিসযূপপন্না সত্তা। কালগতাতি অত্তনো মরণকালেন গতা, ‘‘কালকতা’’তি ৰা পাঠো, কতকালা কতমরণাতি অত্থো। তহিন্তি তস্মিং পেত্তিৰিসযে।
Tatrāyaṃ atthavaṇṇanā – na hi, mahārāja, tattha pettivisaye kasi atthi, yaṃ nissāya te petā sampattiṃ paṭilabheyyuṃ. Gorakkhettha na vijjatīti na kevalaṃ kasi eva, gorakkhāpi ettha pettivisaye na vijjati, yaṃ nissāya te sampattiṃ paṭilabheyyuṃ. Vaṇijjā tādisī natthīti vāṇijjāpi tādisī natthi, yā tesaṃ sampattipaṭilābhahetu bhaveyya. Hiraññena kayākayanti hiraññena kayavikkayampi tattha tādisaṃ natthi, yaṃ tesaṃ sampattipaṭilābhahetu bhaveyya. Ito dinnena yāpenti, petā kālagatā tahinti kevalaṃ pana ito ñātīhi vā mittāmaccehi vā dinnena yāpenti, attabhāvaṃ gamenti. Petāti pettivisayūpapannā sattā. Kālagatāti attano maraṇakālena gatā, ‘‘kālakatā’’ti vā pāṭho, katakālā katamaraṇāti attho. Tahinti tasmiṃ pettivisaye.
অট্ঠমনৰমগাথাদ্ৰযৰণ্ণনা
Aṭṭhamanavamagāthādvayavaṇṇanā
৮-৯. এৰং ‘‘ইতো দিন্নেন যাপেন্তি, পেতা কালগতা তহি’’ন্তি ৰত্ৰা ইদানি উপমাহি তমত্থং পকাসেন্তো ‘‘উন্নমে উদকং ৰুট্ঠ’’ন্তি ইদং গাথাদ্ৰযমাহ।
8-9. Evaṃ ‘‘ito dinnena yāpenti, petā kālagatā tahi’’nti vatvā idāni upamāhi tamatthaṃ pakāsento ‘‘unname udakaṃ vuṭṭha’’nti idaṃ gāthādvayamāha.
তস্সত্থো – যথা উন্নতে থলে উস্সাদে ভূমিভাগে মেঘেহি অভিৰুট্ঠং উদকং নিন্নং পৰত্ততি, যো যো ভূমিভাগো নিন্নো ওণতো, তং তং পৰত্ততি গচ্ছতি পাপুণাতি, এৰমেৰ ইতো দিন্নং দানং পেতানং উপকপ্পতি নিব্বত্ততি, পাতুভৰতীতি অত্থো। নিন্নমিৰ হি উদকপ্পৰত্তিযা ঠানং পেতলোকো দানুপকপ্পনায। যথাহ – ‘‘ইদং খো, ব্রাহ্মণ, ঠানং, যত্থ ঠিতস্স তং দানং উপকপ্পতী’’তি (অ॰ নি॰ ১০.১৭৭)। যথা চ কন্দরপদরসাখাপসাখকুসোব্ভমহাসোব্ভসন্নিপাতেহি ৰারিৰহা মহানজ্জো পূরা হুত্ৰা সাগরং পরিপূরেন্তি, এৰম্পি ইতো দিন্নদানং পুব্বে ৰুত্তনযেনেৰ পেতানং উপকপ্পতীতি।
Tassattho – yathā unnate thale ussāde bhūmibhāge meghehi abhivuṭṭhaṃ udakaṃ ninnaṃ pavattati, yo yo bhūmibhāgo ninno oṇato, taṃ taṃ pavattati gacchati pāpuṇāti, evameva ito dinnaṃ dānaṃ petānaṃ upakappati nibbattati, pātubhavatīti attho. Ninnamiva hi udakappavattiyā ṭhānaṃ petaloko dānupakappanāya. Yathāha – ‘‘idaṃ kho, brāhmaṇa, ṭhānaṃ, yattha ṭhitassa taṃ dānaṃ upakappatī’’ti (a. ni. 10.177). Yathā ca kandarapadarasākhāpasākhakusobbhamahāsobbhasannipātehi vārivahā mahānajjo pūrā hutvā sāgaraṃ paripūrenti, evampi ito dinnadānaṃ pubbe vuttanayeneva petānaṃ upakappatīti.
দসমগাথাৰণ্ণনা
Dasamagāthāvaṇṇanā
১০. এৰং ভগৰা ‘‘ইতো দিন্নেন যাপেন্তি, পেতা কালগতা তহি’’ন্তি ইমং অত্থং উপমাহি পকাসেত্ৰা পুন যস্মা তে পেতা ‘‘ইতো কিঞ্চি লচ্ছামা’’তি আসাভিভূতা ঞাতিঘরং আগন্ত্ৰাপি ‘‘ইদং নাম নো দেথা’’তি যাচিতুং অসমত্থা, তস্মা তেসং ইমানি অনুস্সরণৰত্থূনি অনুস্সরন্তো কুলপুত্তো দক্খিণং দজ্জাতি দস্সেন্তো ‘‘অদাসি মে’’তি ইমং গাথমাহ।
10. Evaṃ bhagavā ‘‘ito dinnena yāpenti, petā kālagatā tahi’’nti imaṃ atthaṃ upamāhi pakāsetvā puna yasmā te petā ‘‘ito kiñci lacchāmā’’ti āsābhibhūtā ñātigharaṃ āgantvāpi ‘‘idaṃ nāma no dethā’’ti yācituṃ asamatthā, tasmā tesaṃ imāni anussaraṇavatthūni anussaranto kulaputto dakkhiṇaṃ dajjāti dassento ‘‘adāsi me’’ti imaṃ gāthamāha.
তস্সত্থো – ‘‘ইদং নাম মে ধনং ৰা ধঞ্ঞং ৰা অদাসী’’তি চ, ‘‘ইদং নাম মে কিচ্চং অত্তনা উয্যোগমাপজ্জন্তো অকাসী’’তি চ, ‘‘অমু মে মাতিতো ৰা পিতিতো ৰা সম্বন্ধত্তা ঞাতী’’তি চ সিনেহৰসেন তাণসমত্থতায ‘‘মিত্তা’’তি চ, ‘‘অসুকো মে সহ পংসুকীল়কো সখা’’তি চ এৰং সব্বমনুস্সরন্তো পেতানং দক্খিণং দজ্জা, দানং নিয্যাতেয্যাতি। অপরো পাঠো ‘‘পেতানং দক্খিণা দজ্জা’’তি। তস্সত্থো – দাতব্বাতি দজ্জা। কা সা? পেতানং দক্খিণা, তেনেৰ ‘‘অদাসি মে’’তিআদিনা নযেন পুব্বে কতমনুস্সরং অনুস্সরতাতি ৰুত্তং হোতি। করণৰচনপ্পসঙ্গে পচ্চত্তৰচনং ৰেদিতব্বং।
Tassattho – ‘‘idaṃ nāma me dhanaṃ vā dhaññaṃ vā adāsī’’ti ca, ‘‘idaṃ nāma me kiccaṃ attanā uyyogamāpajjanto akāsī’’ti ca, ‘‘amu me mātito vā pitito vā sambandhattā ñātī’’ti ca sinehavasena tāṇasamatthatāya ‘‘mittā’’ti ca, ‘‘asuko me saha paṃsukīḷako sakhā’’ti ca evaṃ sabbamanussaranto petānaṃ dakkhiṇaṃ dajjā, dānaṃ niyyāteyyāti. Aparo pāṭho ‘‘petānaṃ dakkhiṇā dajjā’’ti. Tassattho – dātabbāti dajjā. Kā sā? Petānaṃ dakkhiṇā, teneva ‘‘adāsi me’’tiādinā nayena pubbe katamanussaraṃ anussaratāti vuttaṃ hoti. Karaṇavacanappasaṅge paccattavacanaṃ veditabbaṃ.
একাদসমগাথাৰণ্ণনা
Ekādasamagāthāvaṇṇanā
১১. এৰং ভগৰা পেতানং দক্খিণানিয্যাতনে কারণভূতানি অনুস্সরণৰত্থূনি দস্সেন্তো –
11. Evaṃ bhagavā petānaṃ dakkhiṇāniyyātane kāraṇabhūtāni anussaraṇavatthūni dassento –
‘‘অদাসি মে অকাসি মে, ঞাতিমিত্তা সখা চ মে।
‘‘Adāsi me akāsi me, ñātimittā sakhā ca me;
পেতানং দক্খিণং দজ্জা, পুব্বে কতমনুস্সর’’ন্তি॥ –
Petānaṃ dakkhiṇaṃ dajjā, pubbe katamanussara’’nti. –
ৰত্ৰা পুন যে ঞাতিমরণেন রুণ্ণসোকাদিপরা এৰ হুত্ৰা তিট্ঠন্তি, ন তেসং অত্থায কিঞ্চি দেন্তি, তেসং তং রুণ্ণসোকাদি কেৰলং অত্তপরিতাপনমেৰ হোতি, ন পেতানং কিঞ্চি অত্থং নিপ্ফাদেতীতি দস্সেন্তো ‘‘ন হি রুণ্ণং ৰা’’তি ইমং গাথমাহ।
Vatvā puna ye ñātimaraṇena ruṇṇasokādiparā eva hutvā tiṭṭhanti, na tesaṃ atthāya kiñci denti, tesaṃ taṃ ruṇṇasokādi kevalaṃ attaparitāpanameva hoti, na petānaṃ kiñci atthaṃ nipphādetīti dassento ‘‘na hi ruṇṇaṃ vā’’ti imaṃ gāthamāha.
তত্থ রুণ্ণন্তি রোদনা রোদিতত্তং অস্সুপাতনং, এতেন কাযপরিস্সমং দস্সেতি। সোকোতি সোচনা সোচিতত্তং, এতেন চিত্তপরিস্সমং দস্সেতি। যা চঞ্ঞাতি যা চ রুণ্ণসোকেহি অঞ্ঞা। পরিদেৰনাতি ঞাতিব্যসনেন ফুট্ঠস্স লালপ্পনা, ‘‘কহং একপুত্তক পিয মনাপা’’তি এৰমাদিনা নযেন গুণসংৰণ্ণনা, এতেন ৰচীপরিস্সমং দস্সেতি।
Tattha ruṇṇanti rodanā roditattaṃ assupātanaṃ, etena kāyaparissamaṃ dasseti. Sokoti socanā socitattaṃ, etena cittaparissamaṃ dasseti. Yā caññāti yā ca ruṇṇasokehi aññā. Paridevanāti ñātibyasanena phuṭṭhassa lālappanā, ‘‘kahaṃ ekaputtaka piya manāpā’’ti evamādinā nayena guṇasaṃvaṇṇanā, etena vacīparissamaṃ dasseti.
দ্ৰাদসমগাথাৰণ্ণনা
Dvādasamagāthāvaṇṇanā
১২. এৰং ভগৰা ‘‘রুণ্ণং ৰা সোকো ৰা যা চঞ্ঞা পরিদেৰনা, সব্বম্পি তং পেতানং অত্থায ন হোতি, কেৰলন্তু অত্তানং পরিতাপনমত্তমেৰ, এৰং তিট্ঠন্তি ঞাতযো’’তি রুণ্ণাদীনং নিরত্থকভাৰং দস্সেত্ৰা পুন মাগধরাজেন যা দক্খিণা দিন্না, তস্সা সাত্থকভাৰং দস্সেন্তো ‘‘অযঞ্চ খো দক্খিণা’’তি ইমং গাথমাহ।
12. Evaṃ bhagavā ‘‘ruṇṇaṃ vā soko vā yā caññā paridevanā, sabbampi taṃ petānaṃ atthāya na hoti, kevalantu attānaṃ paritāpanamattameva, evaṃ tiṭṭhanti ñātayo’’ti ruṇṇādīnaṃ niratthakabhāvaṃ dassetvā puna māgadharājena yā dakkhiṇā dinnā, tassā sātthakabhāvaṃ dassento ‘‘ayañca kho dakkhiṇā’’ti imaṃ gāthamāha.
তস্সত্থো – অযঞ্চ খো, মহারাজ, দক্খিণা তযা অজ্জ অত্তনো ঞাতিগণং উদ্দিস্স দিন্না , সা যস্মা সঙ্ঘো অনুত্তরং পুঞ্ঞক্খেত্তং লোকস্স, তস্মা সঙ্ঘম্হি সুপ্পতিট্ঠিতা অস্স পেতজনস্স দীঘরত্তং হিতায উপকপ্পতি সম্পজ্জতি ফলতীতি ৰুত্তং হোতি। উপকপ্পতীতি চ ঠানসো উপকপ্পতি, তংখণংযেৰ উপকপ্পতি, ন চিরেন। যথা হি তংখণঞ্ঞেৰ পটিভন্তং ‘‘ঠানসোৰেতং তথাগতং পটিভাতী’’তি ৰুচ্চতি, এৰমিধাপি তংখণংযেৰ উপকপ্পন্তা ‘‘ঠানসো উপকপ্পতী’’তি ৰুত্তা। যং ৰা তং ‘‘ইদং খো, ব্রাহ্মণ, ঠানং, যত্থ ঠিতস্স তং দানং উপকপ্পতী’’তি (অ॰ নি॰ ১০.১৭৭) ৰুত্তং, তত্থ খুপ্পিপাসিকৰন্তাসপরদত্তূপজীৰিনিজ্ঝামতণ্হিকাদিভেদভিন্নে ঠানে উপকপ্পতীতি ৰুত্তং যথা কহাপণং দেন্তো ‘‘কহাপণসো দেতী’’তি লোকে ৰুচ্চতি। ইমস্মিঞ্চ অত্থৰিকপ্পে উপকপ্পতীতি পাতুভৰতি, নিব্বত্ততীতি ৰুত্তং হোতি।
Tassattho – ayañca kho, mahārāja, dakkhiṇā tayā ajja attano ñātigaṇaṃ uddissa dinnā , sā yasmā saṅgho anuttaraṃ puññakkhettaṃ lokassa, tasmā saṅghamhi suppatiṭṭhitā assa petajanassa dīgharattaṃ hitāya upakappati sampajjati phalatīti vuttaṃ hoti. Upakappatīti ca ṭhānaso upakappati, taṃkhaṇaṃyeva upakappati, na cirena. Yathā hi taṃkhaṇaññeva paṭibhantaṃ ‘‘ṭhānasovetaṃ tathāgataṃ paṭibhātī’’ti vuccati, evamidhāpi taṃkhaṇaṃyeva upakappantā ‘‘ṭhānaso upakappatī’’ti vuttā. Yaṃ vā taṃ ‘‘idaṃ kho, brāhmaṇa, ṭhānaṃ, yattha ṭhitassa taṃ dānaṃ upakappatī’’ti (a. ni. 10.177) vuttaṃ, tattha khuppipāsikavantāsaparadattūpajīvinijjhāmataṇhikādibhedabhinne ṭhāne upakappatīti vuttaṃ yathā kahāpaṇaṃ dento ‘‘kahāpaṇaso detī’’ti loke vuccati. Imasmiñca atthavikappe upakappatīti pātubhavati, nibbattatīti vuttaṃ hoti.
তেরসমগাথাৰণ্ণনা
Terasamagāthāvaṇṇanā
১৩. এৰং ভগৰা রঞ্ঞা দিন্নায দক্খিণায সাত্থকভাৰং দস্সেন্তো –
13. Evaṃ bhagavā raññā dinnāya dakkhiṇāya sātthakabhāvaṃ dassento –
‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা।
‘‘Ayañca kho dakkhiṇā dinnā, saṅghamhi suppatiṭṭhitā;
দীঘরত্তং হিতাযস্স, ঠানসো উপকপ্পতী’’তি॥ –
Dīgharattaṃ hitāyassa, ṭhānaso upakappatī’’ti. –
ৰত্ৰা পুন যস্মা ইমং দক্খিণং দেন্তেন ঞাতীনং ঞাতীহি কত্তব্বকিচ্চকরণৰসেন ঞাতিধম্মো নিদস্সিতো, বহুজনস্স পাকটীকতো, নিদস্সনং ৰা কতো, তুম্হেহিপি ঞাতীনং এৰমেৰ ঞাতীহি কত্তব্বকিচ্চকরণৰসেন ঞাতিধম্মো পরিপূরেতব্বো, ন নিরত্থকেহি রুণ্ণাদীহি অত্তা পরিতাপেতব্বোতি চ পেতে দিব্বসম্পত্তিং অধিগমেন্তেন পেতানং পূজা কতা উল়ারা, বুদ্ধপ্পমুখঞ্চ ভিক্খুসঙ্ঘং অন্নপানাদীহি সন্তপ্পেন্তেন ভিক্খূনং বলং অনুপদিন্নং, অনুকম্পাদিগুণপরিৰারঞ্চ চাগচেতনং নিব্বত্তেন্তেন অনপ্পকং পুঞ্ঞং পসুতং, তস্মা ভগৰা ইমেহি যথাভুচ্চগুণেহি রাজানং সম্পহংসেন্তো –
Vatvā puna yasmā imaṃ dakkhiṇaṃ dentena ñātīnaṃ ñātīhi kattabbakiccakaraṇavasena ñātidhammo nidassito, bahujanassa pākaṭīkato, nidassanaṃ vā kato, tumhehipi ñātīnaṃ evameva ñātīhi kattabbakiccakaraṇavasena ñātidhammo paripūretabbo, na niratthakehi ruṇṇādīhi attā paritāpetabboti ca pete dibbasampattiṃ adhigamentena petānaṃ pūjā katā uḷārā, buddhappamukhañca bhikkhusaṅghaṃ annapānādīhi santappentena bhikkhūnaṃ balaṃ anupadinnaṃ, anukampādiguṇaparivārañca cāgacetanaṃ nibbattentena anappakaṃ puññaṃ pasutaṃ, tasmā bhagavā imehi yathābhuccaguṇehi rājānaṃ sampahaṃsento –
‘‘সো ঞাতিধম্মো চ অযং নিদস্সিতো,
‘‘So ñātidhammo ca ayaṃ nidassito,
পেতান পূজা চ কতা উল়ারা।
Petāna pūjā ca katā uḷārā;
বলঞ্চ ভিক্খূনমনুপ্পদিন্নং,
Balañca bhikkhūnamanuppadinnaṃ,
তুম্হেহি পুঞ্ঞং পসুতং অনপ্পক’’ন্তি॥ –
Tumhehi puññaṃ pasutaṃ anappaka’’nti. –
ইমায গাথায দেসনং পরিযোসাপেতি।
Imāya gāthāya desanaṃ pariyosāpeti.
অথ ৰা ‘‘সো ঞাতিধম্মো চ অযং নিদস্সিতো’’তি ইমিনা গাথাপদেন ভগৰা রাজানং ধম্মিযা কথায সন্দস্সেতি। ঞাতিধম্মনিদস্সনমেৰ হি এত্থ সন্দস্সনং পেতান পূজা চ কতা উল়ারাতি ইমিনা সমাদপেতি। উল়ারাতি পসংসনমেৰ হি এত্থ পুনপ্পুনং পূজাকরণে সমাদপনং। বলঞ্চ ভিক্খূনমনুপ্পদিন্নন্তি ইমিনা সমুত্তেজেতি। বলানুপ্পদানমেৰ হি এত্থ এৰং দানং, বলানুপ্পদানতাতি তস্স উস্সাহৰড্ঢনেন সমুত্তেজনং। তুম্হেহি পুঞ্ঞং পসুতং অনপ্পকন্তি ইমিনা সম্পহংসেতি। পুঞ্ঞপ্পসুতকিত্তনমেৰ হি এত্থ তস্স যথাভুচ্চগুণসংৰণ্ণনভাৰেন সম্পহংসনজননতো সম্পহংসনন্তি ৰেদিতব্বং।
Atha vā ‘‘so ñātidhammo ca ayaṃ nidassito’’ti iminā gāthāpadena bhagavā rājānaṃ dhammiyā kathāya sandasseti. Ñātidhammanidassanameva hi ettha sandassanaṃ petāna pūjā ca katā uḷārāti iminā samādapeti. Uḷārāti pasaṃsanameva hi ettha punappunaṃ pūjākaraṇe samādapanaṃ. Balañca bhikkhūnamanuppadinnanti iminā samuttejeti. Balānuppadānameva hi ettha evaṃ dānaṃ, balānuppadānatāti tassa ussāhavaḍḍhanena samuttejanaṃ. Tumhehi puññaṃ pasutaṃ anappakanti iminā sampahaṃseti. Puññappasutakittanameva hi ettha tassa yathābhuccaguṇasaṃvaṇṇanabhāvena sampahaṃsanajananato sampahaṃsananti veditabbaṃ.
দেসনাপরিযোসানে চ পেত্তিৰিসযূপপত্তিআদীনৰসংৰণ্ণনেন সংৰিগ্গানং যোনিসো পদহতং চতুরাসীতিযা পাণসহস্সানং ধম্মাভিসমযো অহোসি। দুতিযদিৰসেপি ভগৰা দেৰমনুস্সানং ইদমেৰ তিরোকুট্টং দেসেসি, এৰং যাৰ সত্তমদিৰসা তাদিসো এৰ ধম্মাভিসমযো অহোসীতি।
Desanāpariyosāne ca pettivisayūpapattiādīnavasaṃvaṇṇanena saṃviggānaṃ yoniso padahataṃ caturāsītiyā pāṇasahassānaṃ dhammābhisamayo ahosi. Dutiyadivasepi bhagavā devamanussānaṃ idameva tirokuṭṭaṃ desesi, evaṃ yāva sattamadivasā tādiso eva dhammābhisamayo ahosīti.
পরমত্থজোতিকায খুদ্দকপাঠ-অট্ঠকথায
Paramatthajotikāya khuddakapāṭha-aṭṭhakathāya
তিরোকুট্টসুত্তৰণ্ণনা নিট্ঠিতা।
Tirokuṭṭasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / খুদ্দকপাঠপাল়ি • Khuddakapāṭhapāḷi / ৭. তিরোকুট্টসুত্তং • 7. Tirokuṭṭasuttaṃ
