Library / Tipiṭaka / तिपिटक • Tipiṭaka / अपदानपाळि • Apadānapāḷi

    ३. तिसरणगमनियत्थेरअपदानं

    3. Tisaraṇagamaniyattheraapadānaṃ

    १०६.

    106.

    ‘‘नगरे चन्दवतिया 1, मातुउपट्ठाको 2 अहुं।

    ‘‘Nagare candavatiyā 3, mātuupaṭṭhāko 4 ahuṃ;

    अन्धा माता पिता मय्हं, ते पोसेमि अहं तदा॥

    Andhā mātā pitā mayhaṃ, te posemi ahaṃ tadā.

    १०७.

    107.

    ‘‘रहोगतो निसीदित्वा, एवं चिन्तेसहं तदा।

    ‘‘Rahogato nisīditvā, evaṃ cintesahaṃ tadā;

    पोसेन्तो मातापितरो, पब्बज्‍जं न लभामहं॥

    Posento mātāpitaro, pabbajjaṃ na labhāmahaṃ.

    १०८.

    108.

    ‘‘महन्धकारपिहिता 5, तिविधग्गीहि डय्हरे।

    ‘‘Mahandhakārapihitā 6, tividhaggīhi ḍayhare;

    एतादिसे भवे 7 जाते, नत्थि कोचि विनायको॥

    Etādise bhave 8 jāte, natthi koci vināyako.

    १०९.

    109.

    ‘‘बुद्धो लोके समुप्पन्‍नो, दिप्पति 9 10 दानि सासनं।

    ‘‘Buddho loke samuppanno, dippati 1112 dāni sāsanaṃ;

    सक्‍का उद्धरितुं अत्ता, पुञ्‍ञकामेन जन्तुना॥

    Sakkā uddharituṃ attā, puññakāmena jantunā.

    ११०.

    110.

    ‘‘उग्गय्ह तीणि सरणे, परिपुण्णानि गोपयिं।

    ‘‘Uggayha tīṇi saraṇe, paripuṇṇāni gopayiṃ;

    तेन कम्मेन सुकतेन, पटिमोक्खामि दुग्गतिं॥

    Tena kammena sukatena, paṭimokkhāmi duggatiṃ.

    १११.

    111.

    ‘‘निसभो नाम समणो, बुद्धस्स अग्गसावको।

    ‘‘Nisabho nāma samaṇo, buddhassa aggasāvako;

    तमहं उपगन्त्वान, सरणगमनं गहिं॥

    Tamahaṃ upagantvāna, saraṇagamanaṃ gahiṃ.

    ११२.

    112.

    ‘‘वस्ससतसहस्सानि, आयु विज्‍जति तावदे।

    ‘‘Vassasatasahassāni, āyu vijjati tāvade;

    तावता सरणगमनं, परिपुण्णं अगोपयिं॥

    Tāvatā saraṇagamanaṃ, paripuṇṇaṃ agopayiṃ.

    ११३.

    113.

    ‘‘चरिमे वत्तमानम्हि, सरणं तं अनुस्सरिं।

    ‘‘Carime vattamānamhi, saraṇaṃ taṃ anussariṃ;

    तेन कम्मेन सुकतेन, तावतिंसं अगच्छहं॥

    Tena kammena sukatena, tāvatiṃsaṃ agacchahaṃ.

    ११४.

    114.

    ‘‘देवलोकगतो सन्तो, पुञ्‍ञकम्मसमाहितो।

    ‘‘Devalokagato santo, puññakammasamāhito;

    यं देसं 13 उपपज्‍जामि 14, अट्ठ हेतू लभामहं॥

    Yaṃ desaṃ 15 upapajjāmi 16, aṭṭha hetū labhāmahaṃ.

    ११५.

    115.

    ‘‘दिसासु पूजितो होमि, तिक्खपञ्‍ञो भवामहं।

    ‘‘Disāsu pūjito homi, tikkhapañño bhavāmahaṃ;

    सब्बे देवानुवत्तन्ति, अमितभोगं लभामहं॥

    Sabbe devānuvattanti, amitabhogaṃ labhāmahaṃ.

    ११६.

    116.

    ‘‘सुवण्णवण्णो सब्बत्थ, पटिकन्तो भवामहं।

    ‘‘Suvaṇṇavaṇṇo sabbattha, paṭikanto bhavāmahaṃ;

    मित्तानं अचलो होमि, यसो अब्भुग्गतो ममं॥

    Mittānaṃ acalo homi, yaso abbhuggato mamaṃ.

    ११७.

    117.

    ‘‘असीतिक्खत्तु देविन्दो, देवरज्‍जमकारयिं।

    ‘‘Asītikkhattu devindo, devarajjamakārayiṃ;

    दिब्बसुखं अनुभविं, अच्छराहि पुरक्खतो॥

    Dibbasukhaṃ anubhaviṃ, accharāhi purakkhato.

    ११८.

    118.

    ‘‘पञ्‍चसत्ततिक्खत्तुञ्‍च , चक्‍कवत्ती अहोसहं।

    ‘‘Pañcasattatikkhattuñca , cakkavattī ahosahaṃ;

    पदेसरज्‍जं विपुलं, गणनातो असङ्खियं॥

    Padesarajjaṃ vipulaṃ, gaṇanāto asaṅkhiyaṃ.

    ११९.

    119.

    ‘‘पच्छिमे भवे सम्पत्ते, पुञ्‍ञकम्मसमाहितो।

    ‘‘Pacchime bhave sampatte, puññakammasamāhito;

    पुरे सावत्थियं जातो, महासाले सुअड्ढके॥

    Pure sāvatthiyaṃ jāto, mahāsāle suaḍḍhake.

    १२०.

    120.

    ‘‘नगरा निक्खमित्वान, दारकेहि पुरक्खतो।

    ‘‘Nagarā nikkhamitvāna, dārakehi purakkhato;

    हसखिड्डसमङ्गीहं 17, सङ्घारामं उपागमिं॥

    Hasakhiḍḍasamaṅgīhaṃ 18, saṅghārāmaṃ upāgamiṃ.

    १२१.

    121.

    ‘‘तत्थद्दसासिं 19 समणं, विप्पमुत्तं निरूपधिं।

    ‘‘Tatthaddasāsiṃ 20 samaṇaṃ, vippamuttaṃ nirūpadhiṃ;

    सो मे धम्ममदेसेसि, सरणञ्‍च अदासि मे॥

    So me dhammamadesesi, saraṇañca adāsi me.

    १२२.

    122.

    ‘‘सोहं सुत्वान सरणं, सरणं मे अनुस्सरिं।

    ‘‘Sohaṃ sutvāna saraṇaṃ, saraṇaṃ me anussariṃ;

    एकासने निसीदित्वा, अरहत्तमपापुणिं॥

    Ekāsane nisīditvā, arahattamapāpuṇiṃ.

    १२३.

    123.

    ‘‘जातिया सत्तमे वस्से, अरहत्तमपापुणिं।

    ‘‘Jātiyā sattame vasse, arahattamapāpuṇiṃ;

    उपसम्पादयि बुद्धो, गुणमञ्‍ञाय चक्खुमा॥

    Upasampādayi buddho, guṇamaññāya cakkhumā.

    १२४.

    124.

    ‘‘अपरिमेय्ये इतो कप्पे, सरणानि अगच्छहं।

    ‘‘Aparimeyye ito kappe, saraṇāni agacchahaṃ;

    ततो मे सुकतं कम्मं, फलं दस्सेसि मे इध॥

    Tato me sukataṃ kammaṃ, phalaṃ dassesi me idha.

    १२५.

    125.

    ‘‘सुगोपितं मे सरणं, मानसं सुप्पणीहितं।

    ‘‘Sugopitaṃ me saraṇaṃ, mānasaṃ suppaṇīhitaṃ;

    अनुभोत्वा यसं सब्बं, पत्तोम्हि अचलं पदं॥

    Anubhotvā yasaṃ sabbaṃ, pattomhi acalaṃ padaṃ.

    १२६.

    126.

    ‘‘येसं सोतावधानत्थि, सुणोथ मम भासतो।

    ‘‘Yesaṃ sotāvadhānatthi, suṇotha mama bhāsato;

    अहं 21 वो कथयिस्सामि, सामं दिट्ठं पदं मम॥

    Ahaṃ 22 vo kathayissāmi, sāmaṃ diṭṭhaṃ padaṃ mama.

    १२७.

    127.

    ‘‘‘बुद्धो लोके समुप्पन्‍नो, वत्तते जिनसासनं।

    ‘‘‘Buddho loke samuppanno, vattate jinasāsanaṃ;

    अमता वादिता भेरी, सोकसल्‍लविनोदना॥

    Amatā vāditā bherī, sokasallavinodanā.

    १२८.

    128.

    ‘‘‘यथासकेन थामेन, पुञ्‍ञक्खेत्ते अनुत्तरे।

    ‘‘‘Yathāsakena thāmena, puññakkhette anuttare;

    अधिकारं करेय्याथ, पस्सयिस्सथ निब्बुतिं॥

    Adhikāraṃ kareyyātha, passayissatha nibbutiṃ.

    १२९.

    129.

    ‘‘‘पग्गय्ह तीणि सरणे, पञ्‍चसीलानि गोपिय।

    ‘‘‘Paggayha tīṇi saraṇe, pañcasīlāni gopiya;

    बुद्धे चित्तं पसादेत्वा, दुक्खस्सन्तं करिस्सथ॥

    Buddhe cittaṃ pasādetvā, dukkhassantaṃ karissatha.

    १३०.

    130.

    ‘‘‘सम्मा धम्मं भावेत्वान 23, सीलानि परिगोपिय।

    ‘‘‘Sammā dhammaṃ bhāvetvāna 24, sīlāni parigopiya;

    अचिरं अरहत्तं वो, सब्बेपि पापुणिस्सथ॥

    Aciraṃ arahattaṃ vo, sabbepi pāpuṇissatha.

    १३१.

    131.

    ‘‘‘तेविज्‍जो इद्धिपत्तोम्हि, चेतोपरियकोविदो।

    ‘‘‘Tevijjo iddhipattomhi, cetopariyakovido;

    सावको ते महावीर, सरणो 25 वन्दति सत्थुनो’॥

    Sāvako te mahāvīra, saraṇo 26 vandati satthuno’.

    १३२.

    132.

    ‘‘अपरिमेय्ये इतो कप्पे, सरणं बुद्धस्स गच्छहं।

    ‘‘Aparimeyye ito kappe, saraṇaṃ buddhassa gacchahaṃ;

    दुग्गतिं नाभिजानामि, सरणं गमने फलं॥

    Duggatiṃ nābhijānāmi, saraṇaṃ gamane phalaṃ.

    १३३.

    133.

    ‘‘पटिसम्भिदा चतस्सो, विमोक्खापि च अट्ठिमे।

    ‘‘Paṭisambhidā catasso, vimokkhāpi ca aṭṭhime;

    छळभिञ्‍ञा सच्छिकता, कतं बुद्धस्स सासनं’’॥

    Chaḷabhiññā sacchikatā, kataṃ buddhassa sāsanaṃ’’.

    इत्थं सुदं आयस्मा तिसरणगमनियो थेरो इमा गाथायो अभासित्थाति।

    Itthaṃ sudaṃ āyasmā tisaraṇagamaniyo thero imā gāthāyo abhāsitthāti.

    तिसरणगमनियत्थेरस्सापदानं ततियं।

    Tisaraṇagamaniyattherassāpadānaṃ tatiyaṃ.




    Next: ४. पञ्‍चसीलसमादानियत्थेरअपदानं • 4. Pañcasīlasamādāniyattheraapadānaṃ




    Footnotes:
    1. बन्धुमतिया (अट्ठ॰)
    2. मातुपट्ठायको (सी॰), मातुपट्ठानको (स्या॰)
    3. bandhumatiyā (aṭṭha.)
    4. mātupaṭṭhāyako (sī.), mātupaṭṭhānako (syā.)
    5. तमन्धकारपिहिता (स्या॰)
    6. tamandhakārapihitā (syā.)
    7. भये (सी॰)
    8. bhaye (sī.)
    9. दिब्बति (क॰)
    10. जिनसासनं (सी॰)
    11. dibbati (ka.)
    12. jinasāsanaṃ (sī.)
    13. यं यं देसं (स्या॰)
    14. उपगच्छामि (सी॰)
    15. yaṃ yaṃ desaṃ (syā.)
    16. upagacchāmi (sī.)
    17. साहं खिड्डसमङ्गी (स्या॰)
    18. sāhaṃ khiḍḍasamaṅgī (syā.)
    19. तत्थद्दसाहं (क॰)
    20. tatthaddasāhaṃ (ka.)
    21. अत्थं (स्या॰)
    22. atthaṃ (syā.)
    23. ममोपमं करित्वान (सी॰ स्या॰)
    24. mamopamaṃ karitvāna (sī. syā.)
    25. चरणे (सी॰ स्या॰)
    26. caraṇe (sī. syā.)



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३. तिसरणगमनियत्थेरअपदानवण्णना • 3. Tisaraṇagamaniyattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact