| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. তিসরণগমনিযত্থেরঅপদানৰণ্ণনা
3. Tisaraṇagamaniyattheraapadānavaṇṇanā
নগরে বন্ধুমতিযাতিআদিকং আযস্মতো তিসরণগমনিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে বন্ধুমতীনগরে কুলগেহে নিব্বত্তিত্ৰা অন্ধমাতাপিতরো উপট্ঠাসি। সো একদিৰসং চিন্তেসি – ‘‘অহং মাতাপিতরো উপট্ঠহন্তো পব্বজিতুং ন লভামি, যংনূনাহং তীণি সরণানি গণ্হিস্সামি , এৰং দুগ্গতিতো মোচেস্সামী’’তি নিসভং নাম ৰিপস্সিস্স ভগৰতো অগ্গসাৰকং উপসঙ্কমিত্ৰা তীণি সরণানি গণ্হি। সো তানি ৰস্সসতসহস্সানি রক্খিত্ৰা তেনেৰ কম্মেন তাৰতিংসভৰনে নিব্বত্তো, ততো পরং দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিনগরে মহাসালকুলে নিব্বত্তো ৰিঞ্ঞুতং পত্তো সত্তৰস্সিকোৰ দারকেহি পরিৰুতো একং সঙ্ঘারামং অগমাসি। তত্থ একো খীণাসৰত্থেরো তস্স ধম্মং দেসেত্ৰা সরণানি অদাসি। সো তানি গহেত্ৰা পুব্বে অত্তনো রক্খিতানি সরণানি সরিত্ৰা ৰিপস্সনং ৰড্ঢেত্ৰা অরহত্তং পাপুণি। তং অরহত্তপ্পত্তং ভগৰা উপসম্পাদেসি।
Nagare bandhumatiyātiādikaṃ āyasmato tisaraṇagamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle bandhumatīnagare kulagehe nibbattitvā andhamātāpitaro upaṭṭhāsi. So ekadivasaṃ cintesi – ‘‘ahaṃ mātāpitaro upaṭṭhahanto pabbajituṃ na labhāmi, yaṃnūnāhaṃ tīṇi saraṇāni gaṇhissāmi , evaṃ duggatito mocessāmī’’ti nisabhaṃ nāma vipassissa bhagavato aggasāvakaṃ upasaṅkamitvā tīṇi saraṇāni gaṇhi. So tāni vassasatasahassāni rakkhitvā teneva kammena tāvatiṃsabhavane nibbatto, tato paraṃ devamanussesu saṃsaranto ubhayasampattiyo anubhavitvā imasmiṃ buddhuppāde sāvatthinagare mahāsālakule nibbatto viññutaṃ patto sattavassikova dārakehi parivuto ekaṃ saṅghārāmaṃ agamāsi. Tattha eko khīṇāsavatthero tassa dhammaṃ desetvā saraṇāni adāsi. So tāni gahetvā pubbe attano rakkhitāni saraṇāni saritvā vipassanaṃ vaḍḍhetvā arahattaṃ pāpuṇi. Taṃ arahattappattaṃ bhagavā upasampādesi.
১০৬. সো অরহত্তপ্পত্তো উপসম্পন্নো হুত্ৰা অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং পকাসেন্তো নগরে বন্ধুমতিযাতিআদিমাহ। তত্থ মাতু উপট্ঠাকো অহুন্তি অহং মাতাপিতূনং উপট্ঠাকো ভরকো বন্ধুমতীনগরে অহোসিন্তি সম্বন্ধো।
106. So arahattappatto upasampanno hutvā attano pubbakammaṃ saritvā somanassavasena pubbacaritāpadānaṃ pakāsento nagare bandhumatiyātiādimāha. Tattha mātu upaṭṭhāko ahunti ahaṃ mātāpitūnaṃ upaṭṭhāko bharako bandhumatīnagare ahosinti sambandho.
১০৮. তমন্ধকারপিহিতাতি মোহন্ধকারেন পিহিতা ছাদিতা। তিৰিধগ্গীহি ডয্হরেতি রাগগ্গিদোসগ্গিমোহগ্গিসঙ্খাতেহি তীহি অগ্গীহি ডয্হরে ডয্হন্তি সব্বে সত্তাতি সম্বন্ধো।
108.Tamandhakārapihitāti mohandhakārena pihitā chāditā. Tividhaggīhi ḍayhareti rāgaggidosaggimohaggisaṅkhātehi tīhi aggīhi ḍayhare ḍayhanti sabbe sattāti sambandho.
১১৪. অট্ঠ হেতূ লভামহন্তি অট্ঠ কারণানি সুখস্স পচ্চযভূতানি কারণানি লভামি অহন্তি অত্থো। সেসং সুৰিঞ্ঞেয্যমেৰাতি।
114.Aṭṭha hetū labhāmahanti aṭṭha kāraṇāni sukhassa paccayabhūtāni kāraṇāni labhāmi ahanti attho. Sesaṃ suviññeyyamevāti.
তিসরণগমনিযত্থেরঅপদানৰণ্ণনা সমত্তা।
Tisaraṇagamaniyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. তিসরণগমনিযত্থেরঅপদানং • 3. Tisaraṇagamaniyattheraapadānaṃ
