| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ತಿಸರಣಗಮನಿಯತ್ಥೇರಅಪದಾನವಣ್ಣನಾ
3. Tisaraṇagamaniyattheraapadānavaṇṇanā
ನಗರೇ ಬನ್ಧುಮತಿಯಾತಿಆದಿಕಂ ಆಯಸ್ಮತೋ ತಿಸರಣಗಮನಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಬನ್ಧುಮತೀನಗರೇ ಕುಲಗೇಹೇ ನಿಬ್ಬತ್ತಿತ್ವಾ ಅನ್ಧಮಾತಾಪಿತರೋ ಉಪಟ್ಠಾಸಿ। ಸೋ ಏಕದಿವಸಂ ಚಿನ್ತೇಸಿ – ‘‘ಅಹಂ ಮಾತಾಪಿತರೋ ಉಪಟ್ಠಹನ್ತೋ ಪಬ್ಬಜಿತುಂ ನ ಲಭಾಮಿ, ಯಂನೂನಾಹಂ ತೀಣಿ ಸರಣಾನಿ ಗಣ್ಹಿಸ್ಸಾಮಿ , ಏವಂ ದುಗ್ಗತಿತೋ ಮೋಚೇಸ್ಸಾಮೀ’’ತಿ ನಿಸಭಂ ನಾಮ ವಿಪಸ್ಸಿಸ್ಸ ಭಗವತೋ ಅಗ್ಗಸಾವಕಂ ಉಪಸಙ್ಕಮಿತ್ವಾ ತೀಣಿ ಸರಣಾನಿ ಗಣ್ಹಿ। ಸೋ ತಾನಿ ವಸ್ಸಸತಸಹಸ್ಸಾನಿ ರಕ್ಖಿತ್ವಾ ತೇನೇವ ಕಮ್ಮೇನ ತಾವತಿಂಸಭವನೇ ನಿಬ್ಬತ್ತೋ, ತತೋ ಪರಂ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿನಗರೇ ಮಹಾಸಾಲಕುಲೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸತ್ತವಸ್ಸಿಕೋವ ದಾರಕೇಹಿ ಪರಿವುತೋ ಏಕಂ ಸಙ್ಘಾರಾಮಂ ಅಗಮಾಸಿ। ತತ್ಥ ಏಕೋ ಖೀಣಾಸವತ್ಥೇರೋ ತಸ್ಸ ಧಮ್ಮಂ ದೇಸೇತ್ವಾ ಸರಣಾನಿ ಅದಾಸಿ। ಸೋ ತಾನಿ ಗಹೇತ್ವಾ ಪುಬ್ಬೇ ಅತ್ತನೋ ರಕ್ಖಿತಾನಿ ಸರಣಾನಿ ಸರಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣಿ। ತಂ ಅರಹತ್ತಪ್ಪತ್ತಂ ಭಗವಾ ಉಪಸಮ್ಪಾದೇಸಿ।
Nagare bandhumatiyātiādikaṃ āyasmato tisaraṇagamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle bandhumatīnagare kulagehe nibbattitvā andhamātāpitaro upaṭṭhāsi. So ekadivasaṃ cintesi – ‘‘ahaṃ mātāpitaro upaṭṭhahanto pabbajituṃ na labhāmi, yaṃnūnāhaṃ tīṇi saraṇāni gaṇhissāmi , evaṃ duggatito mocessāmī’’ti nisabhaṃ nāma vipassissa bhagavato aggasāvakaṃ upasaṅkamitvā tīṇi saraṇāni gaṇhi. So tāni vassasatasahassāni rakkhitvā teneva kammena tāvatiṃsabhavane nibbatto, tato paraṃ devamanussesu saṃsaranto ubhayasampattiyo anubhavitvā imasmiṃ buddhuppāde sāvatthinagare mahāsālakule nibbatto viññutaṃ patto sattavassikova dārakehi parivuto ekaṃ saṅghārāmaṃ agamāsi. Tattha eko khīṇāsavatthero tassa dhammaṃ desetvā saraṇāni adāsi. So tāni gahetvā pubbe attano rakkhitāni saraṇāni saritvā vipassanaṃ vaḍḍhetvā arahattaṃ pāpuṇi. Taṃ arahattappattaṃ bhagavā upasampādesi.
೧೦೬. ಸೋ ಅರಹತ್ತಪ್ಪತ್ತೋ ಉಪಸಮ್ಪನ್ನೋ ಹುತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸವಸೇನ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಗರೇ ಬನ್ಧುಮತಿಯಾತಿಆದಿಮಾಹ। ತತ್ಥ ಮಾತು ಉಪಟ್ಠಾಕೋ ಅಹುನ್ತಿ ಅಹಂ ಮಾತಾಪಿತೂನಂ ಉಪಟ್ಠಾಕೋ ಭರಕೋ ಬನ್ಧುಮತೀನಗರೇ ಅಹೋಸಿನ್ತಿ ಸಮ್ಬನ್ಧೋ।
106. So arahattappatto upasampanno hutvā attano pubbakammaṃ saritvā somanassavasena pubbacaritāpadānaṃ pakāsento nagare bandhumatiyātiādimāha. Tattha mātu upaṭṭhāko ahunti ahaṃ mātāpitūnaṃ upaṭṭhāko bharako bandhumatīnagare ahosinti sambandho.
೧೦೮. ತಮನ್ಧಕಾರಪಿಹಿತಾತಿ ಮೋಹನ್ಧಕಾರೇನ ಪಿಹಿತಾ ಛಾದಿತಾ। ತಿವಿಧಗ್ಗೀಹಿ ಡಯ್ಹರೇತಿ ರಾಗಗ್ಗಿದೋಸಗ್ಗಿಮೋಹಗ್ಗಿಸಙ್ಖಾತೇಹಿ ತೀಹಿ ಅಗ್ಗೀಹಿ ಡಯ್ಹರೇ ಡಯ್ಹನ್ತಿ ಸಬ್ಬೇ ಸತ್ತಾತಿ ಸಮ್ಬನ್ಧೋ।
108.Tamandhakārapihitāti mohandhakārena pihitā chāditā. Tividhaggīhi ḍayhareti rāgaggidosaggimohaggisaṅkhātehi tīhi aggīhi ḍayhare ḍayhanti sabbe sattāti sambandho.
೧೧೪. ಅಟ್ಠ ಹೇತೂ ಲಭಾಮಹನ್ತಿ ಅಟ್ಠ ಕಾರಣಾನಿ ಸುಖಸ್ಸ ಪಚ್ಚಯಭೂತಾನಿ ಕಾರಣಾನಿ ಲಭಾಮಿ ಅಹನ್ತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
114.Aṭṭha hetū labhāmahanti aṭṭha kāraṇāni sukhassa paccayabhūtāni kāraṇāni labhāmi ahanti attho. Sesaṃ suviññeyyamevāti.
ತಿಸರಣಗಮನಿಯತ್ಥೇರಅಪದಾನವಣ್ಣನಾ ಸಮತ್ತಾ।
Tisaraṇagamaniyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ತಿಸರಣಗಮನಿಯತ್ಥೇರಅಪದಾನಂ • 3. Tisaraṇagamaniyattheraapadānaṃ
