| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. තිස්‌සබ්‍රහ්‌මාසුත්‌තවණ්‌ණනා
3. Tissabrahmāsuttavaṇṇanā
56. තතියෙ භික්‌ඛුනියොති මහාපජාපතියා පරිවාරා පඤ්‌චසතා භික්‌ඛුනියො. විමුත්‌තාති පඤ්‌චහි විමුත්‌තීහි විමුත්‌තා. අනුපාදිසෙසාති උපාදානසෙසං අට්‌ඨපෙත්‌වා පඤ්‌චහි විමුත්‌තීහි අනවසෙසාහිපි විමුත්‌තා. සඋපාදිසෙසෙ වා සඋපාදිසෙසොති සඋපාදානසෙසෙ පුග්‌ගලෙ ‘‘සඋපාදානසෙසො අය’’න්‌ති. ඉතරස්‌මිම්‌පි එසෙව නයො. තිස්‌සොති ථෙරස්‌ස සද්‌ධිවිහාරිකබ්‍රහ්‌මා. අනුලොමිකානීති පටිපත්‌තියා අනුලොමානි විවිත්‌තානි අන්‌තිමපරියන්‌තිමානි. ඉන්‌ද්‍රියානීති සද්‌ධාදීනි විපස්‌සනින්‌ද්‍රියානි. සමන්‌නානයමානොති සමන්‌නාහාරෙ ඨපයමානො. න හි පන තෙති ඉදං කස්‌මා ආරභි? සත්‌තමස්‌ස පුග්‌ගලස්‌ස දස්‌සනත්‌ථං. සත්‌තමො හි සද්‌ධානුසාරිපුග්‌ගලො න දස්‌සිතො. අථ භගවා බලවවිපස්‌සකවසෙන තං දස්‌සෙන්‌තො එවමාහ. තත්‌ථ සබ්‌බනිමිත්‌තානන්‌ති සබ්‌බෙසං නිච්‌චනිමිත්‌තාදීනං. අනිමිත්‌තන්‌ති බලවවිපස්‌සනාසමාධිං.
56. Tatiye bhikkhuniyoti mahāpajāpatiyā parivārā pañcasatā bhikkhuniyo. Vimuttāti pañcahi vimuttīhi vimuttā. Anupādisesāti upādānasesaṃ aṭṭhapetvā pañcahi vimuttīhi anavasesāhipi vimuttā. Saupādisese vā saupādisesoti saupādānasese puggale ‘‘saupādānaseso aya’’nti. Itarasmimpi eseva nayo. Tissoti therassa saddhivihārikabrahmā. Anulomikānīti paṭipattiyā anulomāni vivittāni antimapariyantimāni. Indriyānīti saddhādīni vipassanindriyāni. Samannānayamānoti samannāhāre ṭhapayamāno. Na hi pana teti idaṃ kasmā ārabhi? Sattamassa puggalassa dassanatthaṃ. Sattamo hi saddhānusāripuggalo na dassito. Atha bhagavā balavavipassakavasena taṃ dassento evamāha. Tattha sabbanimittānanti sabbesaṃ niccanimittādīnaṃ. Animittanti balavavipassanāsamādhiṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. තිස්‌සබ්‍රහ්‌මාසුත්‌තං • 3. Tissabrahmāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3. තිස්‌සබ්‍රහ්‌මාසුත්‌තවණ්‌ණනා • 3. Tissabrahmāsuttavaṇṇanā
