| Library / Tipiṭaka / д̇ибидага • Tipiṭaka / б̣уд̣̇д̇хавам̣са-адтагат̇аа • Buddhavaṃsa-aṭṭhakathā |
19. д̇иссаб̣уд̣̇д̇хавам̣саван̣н̣анаа
19. Tissabuddhavaṃsavaṇṇanā
д̇асса бана сид̣̇д̇хад̇т̇асса бхаг̇авад̇о абарабхааг̇з зго габбо б̣уд̣̇д̇хасун̃н̃о ахоси. ид̇о д̣̇ваанавуд̇игаббамад̇т̇агз д̇иссо, пуссод̇и згасмим̣ габбз д̣̇вз б̣уд̣̇д̇хаа ниб̣б̣ад̇д̇им̣су. д̇ад̇т̇а д̇иссо наама махаабурисо баарамияо буурзд̇ваа д̇усид̇абурз ниб̣б̣ад̇д̇ид̇ваа д̇ад̇о жавид̇ваа кзмаганаг̇арз ж̇анасанд̇хасса наама ран̃н̃о аг̇г̇амахзсияаа бад̣̇умад̣̇аласад̣̇исанаяанааяа бад̣̇умаанаамааяа д̣̇звияаа гужчисмим̣ бадисанд̇хим̣ г̇ахзд̇ваа д̣̇асаннам̣ маасаанам̣ ажжаязна аномуяяаанз маад̇угужчид̇о нигками. сад̇д̇авассасахассаани аг̇аарам̣ аж̇жхааваси. д̇асса г̇ухаасзла-наарисаяа-нисабханаамагаа д̇аяо баасаад̣̇аа ахзсум̣. субхад̣̇д̣̇аад̣̇звиббамукаани д̇зд̇д̇им̣са ид̇т̇исахассаани ахзсум̣.
Tassa pana siddhatthassa bhagavato aparabhāge eko kappo buddhasuñño ahosi. Ito dvānavutikappamatthake tisso, phussoti ekasmiṃ kappe dve buddhā nibbattiṃsu. Tattha tisso nāma mahāpuriso pāramiyo pūretvā tusitapure nibbattitvā tato cavitvā khemakanagare janasandhassa nāma rañño aggamahesiyā padumadalasadisanayanāya padumānāmāya deviyā kucchismiṃ paṭisandhiṃ gahetvā dasannaṃ māsānaṃ accayena anomuyyāne mātukucchito nikkhami. Sattavassasahassāni agāraṃ ajjhāvasi. Tassa guhāsela-nārisaya-nisabhanāmakā tayo pāsādā ahesuṃ. Subhaddādevippamukhāni tettiṃsa itthisahassāni ahesuṃ.
со жад̇д̇аари нимид̇д̇аани д̣̇исваа субхад̣̇д̣̇аад̣̇звияаа буд̇д̇з аананд̣̇агумаарз уббаннз сонуд̇д̇арам̣ наама ануд̇д̇арам̣ д̇уран̇г̇аварамааруяха махаабхинигкаманам̣ нигкамид̇ваа баб̣б̣аж̇и. д̇ам̣ мануссаанам̣ годи анубаб̣б̣аж̇и. со д̇зхи баривуд̇о адта маасз бад̇хаанажарияам̣ жарид̇ваа висаакабун̣н̣амааяа вийраниг̇амз вийрасздтисса д̇хийд̇ааяа д̣̇иннам̣ мад̇хубааяаасам̣ барибхун̃ж̇ид̇ваа салалаванз д̣̇иваавихаарам̣ вийд̇инаамзд̇ваа сааяанхасамаяз виж̇ид̇асан̇г̇аамагзна наама яавабаалзна убанийд̇аа адта д̇ин̣амудтияо г̇ахзд̇ваа асанаб̣од̇хим̣ убасан̇гамид̇ваа жад̇д̇аалийсахад̇т̇авид̇т̇ад̇ам̣ д̇ин̣асант̇арам̣ сант̇арид̇ваа д̇ад̇т̇а баллан̇гам̣ аабхуж̇ид̇ваа самаарам̣ маараб̣алам̣ вид̇хамид̇ваа ад̇хиг̇ад̇асаб̣б̣ан̃н̃уд̇ан̃н̃аан̣о – ‘‘анзгаж̇аад̇исам̣саарам̣…бз… д̇ан̣хаанам̣ каяамаж̇жхаг̇аа’’д̇и уд̣̇аанам̣ уд̣̇аанзд̇ваа сад̇д̇асад̇д̇аахам̣ б̣од̇хисамийбзязва вийд̇инаамзд̇ваа яасавад̇ий наг̇арз б̣рахмад̣̇звам̣ уд̣̇аяан̃жа д̣̇вз рааж̇абуд̇д̇з сабариваарз убаниссаяасамбаннз аагаасзна г̇анд̇ваа яасавад̇иймиг̇ад̣̇ааяз од̇арид̇ваа уяяаанабаалзна рааж̇абуд̇д̇з баггосаабзд̇ваа д̇зсам̣ сабариваараанам̣ ависааринаа б̣яаабинаа мад̇хурзна б̣рахмассарзна д̣̇асасахассилогад̇хаад̇ум̣ вин̃н̃аабзнд̇ова д̇хаммажаггам̣ бавад̇д̇зси, д̇ад̣̇аа годисад̇аанам̣ батамо д̇хаммаабхисамаяо ахоси. д̇зна вуд̇д̇ам̣ –
So cattāri nimittāni disvā subhaddādeviyā putte ānandakumāre uppanne sonuttaraṃ nāma anuttaraṃ turaṅgavaramāruyha mahābhinikkhamanaṃ nikkhamitvā pabbaji. Taṃ manussānaṃ koṭi anupabbaji. So tehi parivuto aṭṭha māse padhānacariyaṃ caritvā visākhapuṇṇamāya vīranigame vīraseṭṭhissa dhītāya dinnaṃ madhupāyāsaṃ paribhuñjitvā salalavane divāvihāraṃ vītināmetvā sāyanhasamaye vijitasaṅgāmakena nāma yavapālena upanītā aṭṭha tiṇamuṭṭhiyo gahetvā asanabodhiṃ upasaṅkamitvā cattālīsahatthavitthataṃ tiṇasantharaṃ santharitvā tattha pallaṅkaṃ ābhujitvā samāraṃ mārabalaṃ vidhamitvā adhigatasabbaññutaññāṇo – ‘‘anekajātisaṃsāraṃ…pe… taṇhānaṃ khayamajjhagā’’ti udānaṃ udānetvā sattasattāhaṃ bodhisamīpeyeva vītināmetvā yasavatī nagare brahmadevaṃ udayañca dve rājaputte saparivāre upanissayasampanne ākāsena gantvā yasavatīmigadāye otaritvā uyyānapālena rājaputte pakkosāpetvā tesaṃ saparivārānaṃ avisārinā byāpinā madhurena brahmassarena dasasahassilokadhātuṃ viññāpentova dhammacakkaṃ pavattesi, tadā koṭisatānaṃ paṭhamo dhammābhisamayo ahosi. Tena vuttaṃ –
1.
1.
‘‘сид̣̇д̇хад̇т̇асса абарзна, асамо аббадибуг̇г̇ало;
‘‘Siddhatthassa aparena, asamo appaṭipuggalo;
ананд̇ад̇зж̇о амид̇аяасо, д̇иссо логаг̇г̇анааяаго.
Anantatejo amitayaso, tisso lokagganāyako.
2.
2.
‘‘д̇аманд̇хагаарам̣ вид̇хамид̇ваа, обхаасзд̇ваа сад̣̇звагам̣;
‘‘Tamandhakāraṃ vidhamitvā, obhāsetvā sadevakaṃ;
анугамбаго махаавийро, логз уббаж̇ж̇и жагкумаа.
Anukampako mahāvīro, loke uppajji cakkhumā.
3.
3.
‘‘д̇ассааби ад̇улаа ид̣̇д̇хи, ад̇улам̣ сийлам̣ самаад̇хи жа;
‘‘Tassāpi atulā iddhi, atulaṃ sīlaṃ samādhi ca;
саб̣б̣ад̇т̇а баарамим̣ г̇анд̇ваа, д̇хаммажаггам̣ бавад̇д̇аяи.
Sabbattha pāramiṃ gantvā, dhammacakkaṃ pavattayi.
4.
4.
‘‘со б̣уд̣̇д̇хо д̣̇асасахассимхи, вин̃н̃аабзси г̇ирам̣ сужим̣;
‘‘So buddho dasasahassimhi, viññāpesi giraṃ suciṃ;
годисад̇аани абхисамим̣су, батамз д̇хаммад̣̇зсанз’’д̇и.
Koṭisatāni abhisamiṃsu, paṭhame dhammadesane’’ti.
д̇ад̇т̇а саб̣б̣ад̇т̇аад̇и саб̣б̣зсу д̇хаммзсу баарам̣ г̇анд̇ваа. д̣̇асасахассимхийд̇и д̣̇асасахассияам̣ ат̇аабарзна самаязна д̇иссзна сад̇т̇аараа сад̣̇д̇хим̣ баб̣б̣аж̇ид̇аанам̣ бхигкуунам̣ годи махаабурисасса г̇ан̣аваасам̣ бахааяа б̣од̇химууламубаг̇аманасамаяз ан̃н̃ад̇ра г̇ад̇аа. саа д̇иссзна саммаасамб̣уд̣̇д̇хзна д̇хаммажаггам̣ бавад̇д̇ид̇а’’нд̇и суд̇ваа яасавад̇иймиг̇ад̣̇ааяам̣ ааг̇анд̇ваа д̣̇асаб̣аламабхиваад̣̇зд̇ваа д̇ам̣ бариваарзд̇ваа нисийд̣̇и. д̇зсам̣ бхаг̇аваа д̇хаммам̣ д̣̇зсзси, д̇ад̣̇аа навуд̇ияаа годийнам̣ д̣̇уд̇ияаабхисамаяо ахоси. буна махааман̇г̇аласамааг̇амз ман̇г̇алабарияосаанз садтияаа годийнам̣ д̇ад̇ияо абхисамаяо ахоси. д̇зна вуд̇д̇ам̣ –
Tattha sabbatthāti sabbesu dhammesu pāraṃ gantvā. Dasasahassimhīti dasasahassiyaṃ athāparena samayena tissena satthārā saddhiṃ pabbajitānaṃ bhikkhūnaṃ koṭi mahāpurisassa gaṇavāsaṃ pahāya bodhimūlamupagamanasamaye aññatra gatā. Sā tissena sammāsambuddhena dhammacakkaṃ pavattita’’nti sutvā yasavatīmigadāyaṃ āgantvā dasabalamabhivādetvā taṃ parivāretvā nisīdi. Tesaṃ bhagavā dhammaṃ desesi, tadā navutiyā koṭīnaṃ dutiyābhisamayo ahosi. Puna mahāmaṅgalasamāgame maṅgalapariyosāne saṭṭhiyā koṭīnaṃ tatiyo abhisamayo ahosi. Tena vuttaṃ –
5.
5.
‘‘д̣̇уд̇ияо навуд̇игодийнам̣, д̇ад̇ияо садтигодияо;
‘‘Dutiyo navutikoṭīnaṃ, tatiyo saṭṭhikoṭiyo;
б̣анд̇ханаад̇о баможзси, сад̇д̇з нарамаруу д̇ад̣̇аа’’д̇и.
Bandhanāto pamocesi, satte naramarū tadā’’ti.
д̇ад̇т̇а д̣̇уд̇ияо навуд̇игодийнанд̇и д̣̇уд̇ияо абхисамаяо ахоси навуд̇игодибаан̣ийнанд̇и ад̇т̇о. б̣анд̇ханаад̇од̇и б̣анд̇ханад̇о, д̣̇асахи сам̣яож̇анзхи бариможзсийд̇и ад̇т̇о. ид̣̇аани бариможид̇з сад̇д̇з саруубад̇о д̣̇ассзнд̇о ‘‘нарамаруу’’д̇и ааха. нарамарууд̇и нараамарз.
Tattha dutiyo navutikoṭīnanti dutiyo abhisamayo ahosi navutikoṭipāṇīnanti attho. Bandhanātoti bandhanato, dasahi saṃyojanehi parimocesīti attho. Idāni parimocite satte sarūpato dassento ‘‘naramarū’’ti āha. Naramarūti narāmare.
яасавад̇ийнаг̇арз гира анд̇овассам̣ баб̣б̣аж̇ид̇аанам̣ араханд̇аанам̣ сад̇асахассзхи баривуд̇о баваарзси, со батамо саннибаад̇о ахоси. убхад̇о суж̇аад̇асса суж̇аад̇асса наама ран̃н̃о нааривааханагумааро наариваахананаг̇арам̣ ануббад̇д̇з бхаг̇авад̇и логанаат̇з сабаривааро бажжуг̇г̇анд̇ваа д̣̇асаб̣алам̣ сабхигкусан̇гхам̣ ниманд̇зд̇ваа сад̇д̇аахам̣ асад̣̇исад̣̇аанам̣ д̣̇ад̇ваа ад̇д̇ано раж̇ж̇ам̣ буд̇д̇асса нияяаад̇зд̇ваа сабаривааро саб̣б̣алогаад̇хибад̇исса д̇иссасаммаасамб̣уд̣̇д̇хасса санд̇игз зхибхигкубаб̣б̣аж̇ж̇ааяа баб̣б̣аж̇и. д̇асса гира саа баб̣б̣аж̇ж̇аа саб̣б̣ад̣̇исаасу баагадаа ахоси. д̇асмаа д̇ад̇о д̇ад̇о ааг̇анд̇ваа нааривааханагумаарам̣ махааж̇ано анубаб̣б̣аж̇и. д̇ад̣̇аа д̇ат̇ааг̇ад̇о навуд̇ияаа бхигкусад̇асахассасса маж̇жхаг̇ад̇о баад̇имогкам̣ уд̣̇д̣̇иси , со д̣̇уд̇ияо саннибаад̇о ахоси. буна кзмавад̇ийнаг̇арз н̃аад̇исамааг̇амз б̣уд̣̇д̇хавам̣сад̇хаммагат̇ам̣ суд̇ваа асийд̇исад̇асахассаани д̇асса санд̇игз баб̣б̣аж̇ид̇ваа арахад̇д̇ам̣ баабун̣им̣су, д̇зхи баривуд̇о суг̇ад̇о баад̇имогкам̣ уд̣̇д̣̇иси, со д̇ад̇ияо саннибаад̇о ахоси. д̇зна вуд̇д̇ам̣ –
Yasavatīnagare kira antovassaṃ pabbajitānaṃ arahantānaṃ satasahassehi parivuto pavāresi, so paṭhamo sannipāto ahosi. Ubhato sujātassa sujātassa nāma rañño nārivāhanakumāro nārivāhananagaraṃ anuppatte bhagavati lokanāthe saparivāro paccuggantvā dasabalaṃ sabhikkhusaṅghaṃ nimantetvā sattāhaṃ asadisadānaṃ datvā attano rajjaṃ puttassa niyyātetvā saparivāro sabbalokādhipatissa tissasammāsambuddhassa santike ehibhikkhupabbajjāya pabbaji. Tassa kira sā pabbajjā sabbadisāsu pākaṭā ahosi. Tasmā tato tato āgantvā nārivāhanakumāraṃ mahājano anupabbaji. Tadā tathāgato navutiyā bhikkhusatasahassassa majjhagato pātimokkhaṃ uddisi , so dutiyo sannipāto ahosi. Puna khemavatīnagare ñātisamāgame buddhavaṃsadhammakathaṃ sutvā asītisatasahassāni tassa santike pabbajitvā arahattaṃ pāpuṇiṃsu, tehi parivuto sugato pātimokkhaṃ uddisi, so tatiyo sannipāto ahosi. Tena vuttaṃ –
6.
6.
‘‘саннибаад̇аа д̇аяо аасум̣, д̇иссз логаг̇г̇анааяагз;
‘‘Sannipātā tayo āsuṃ, tisse lokagganāyake;
кийн̣аасаваанам̣ вималаанам̣, санд̇ажид̇д̇аана д̇аад̣̇инам̣.
Khīṇāsavānaṃ vimalānaṃ, santacittāna tādinaṃ.
7.
7.
‘‘кийн̣аасавасад̇асахассаанам̣, батамо ааси самааг̇амо;
‘‘Khīṇāsavasatasahassānaṃ, paṭhamo āsi samāgamo;
навуд̇исад̇асахассаанам̣, д̣̇уд̇ияо ааси самааг̇амо.
Navutisatasahassānaṃ, dutiyo āsi samāgamo.
8.
8.
‘‘асийд̇исад̇асахассаанам̣, д̇ад̇ияо ааси самааг̇амо;
‘‘Asītisatasahassānaṃ, tatiyo āsi samāgamo;
кийн̣аасаваанам̣ вималаанам̣, бубпид̇аанам̣ вимуд̇д̇ияаа’’д̇и.
Khīṇāsavānaṃ vimalānaṃ, pupphitānaṃ vimuttiyā’’ti.
д̇ад̣̇аа амхаагам̣ б̣од̇хисад̇д̇о яасавад̇ийнаг̇арз суж̇аад̇о наама рааж̇аа худ̇ваа ид̣̇д̇хам̣ пийд̇ам̣ ж̇анабад̣̇ам̣ анзгагодид̇ханасаннижаяам̣ анурааг̇амубаг̇ад̇ахад̣̇аяан̃жа бариж̇анам̣ д̇ин̣анал̣амива барижжаж̇ид̇ваа ж̇аад̇иаад̣̇ийсу сам̣виг̇г̇ахад̣̇аяо нигкамид̇ваа д̇аабасабаб̣б̣аж̇ж̇ам̣ баб̣б̣аж̇ид̇ваа махид̣̇д̇хиго махаанубхааво худ̇ваа ‘‘б̣уд̣̇д̇хо логз уббанно’’д̇и суд̇ваа бан̃жаван̣н̣ааяа бийд̇ияаа пудасарийро худ̇ваа сабад̇иссо д̇иссам̣ бхаг̇аванд̇ам̣ убасан̇гамид̇ваа ванд̣̇ид̇ваа жинд̇зси – ‘‘ханд̣̇аахам̣ манд̣̇ааравабаарижчад̇д̇агаад̣̇ийхи д̣̇иб̣б̣агусумзхи бхаг̇аванд̇ам̣ бууж̇зссаамий’’д̇и. ат̇а со звам̣ жинд̇зд̇ваа ид̣̇д̇хияаа саг̇г̇алогам̣ г̇анд̇ваа жид̇д̇алад̇ааванам̣ бависид̇ваа бад̣̇умабаарижчад̇д̇агаманд̣̇аараваад̣̇ийхи д̣̇иб̣б̣агусумзхи рад̇анамаяам̣ жан̇годагам̣ г̇аавуд̇аббамаан̣ам̣ буурзд̇ваа г̇ахзд̇ваа г̇аг̇анад̇алзна ааг̇анд̇ваа д̣̇иб̣б̣зхи сурабхигусумзхи бхаг̇аванд̇ам̣ бууж̇зси. зган̃жа ман̣ид̣̇ан̣д̣агам̣ суван̣н̣амаяаган̣н̣игам̣ бад̣̇умарааг̇аман̣имаяабан̣н̣ам̣ суг̇анд̇хагзсаражчад̇д̇ам̣ вияа бад̣̇умажчад̇д̇ам̣ бхаг̇авад̇о сираси д̇хаараяанд̇о жад̇убарисамаж̇жхз адтааси. ат̇а бхаг̇аваа нам̣ – ‘‘ид̇о д̣̇взнавуд̇з габбз г̇од̇амо наама б̣уд̣̇д̇хо бхависсад̇ий’’д̇и б̣яаагааси. д̇зна вуд̇д̇ам̣ –
Tadā amhākaṃ bodhisatto yasavatīnagare sujāto nāma rājā hutvā iddhaṃ phītaṃ janapadaṃ anekakoṭidhanasannicayaṃ anurāgamupagatahadayañca parijanaṃ tiṇanaḷamiva pariccajitvā jātiādīsu saṃviggahadayo nikkhamitvā tāpasapabbajjaṃ pabbajitvā mahiddhiko mahānubhāvo hutvā ‘‘buddho loke uppanno’’ti sutvā pañcavaṇṇāya pītiyā phuṭasarīro hutvā sapatisso tissaṃ bhagavantaṃ upasaṅkamitvā vanditvā cintesi – ‘‘handāhaṃ mandāravapāricchattakādīhi dibbakusumehi bhagavantaṃ pūjessāmī’’ti. Atha so evaṃ cintetvā iddhiyā saggalokaṃ gantvā cittalatāvanaṃ pavisitvā padumapāricchattakamandāravādīhi dibbakusumehi ratanamayaṃ caṅkoṭakaṃ gāvutappamāṇaṃ pūretvā gahetvā gaganatalena āgantvā dibbehi surabhikusumehi bhagavantaṃ pūjesi. Ekañca maṇidaṇḍakaṃ suvaṇṇamayakaṇṇikaṃ padumarāgamaṇimayapaṇṇaṃ sugandhakesaracchattaṃ viya padumacchattaṃ bhagavato sirasi dhārayanto catuparisamajjhe aṭṭhāsi. Atha bhagavā naṃ – ‘‘ito dvenavute kappe gotamo nāma buddho bhavissatī’’ti byākāsi. Tena vuttaṃ –
9.
9.
‘‘ахам̣ д̇зна самаязна, суж̇аад̇о наама кад̇д̇ияо;
‘‘Ahaṃ tena samayena, sujāto nāma khattiyo;
махаабхог̇ам̣ чад̣д̣аяид̇ваа, баб̣б̣аж̇им̣ исибаб̣б̣аж̇ам̣.
Mahābhogaṃ chaḍḍayitvā, pabbajiṃ isipabbajaṃ.
10.
10.
‘‘маяи баб̣б̣аж̇ид̇з санд̇з, уббаж̇ж̇и логанааяаго;
‘‘Mayi pabbajite sante, uppajji lokanāyako;
б̣уд̣̇д̇ход̇и сад̣̇д̣̇ам̣ суд̇ваана, бийд̇и мз убабаж̇ж̇ат̇а.
Buddhoti saddaṃ sutvāna, pīti me upapajjatha.
11.
11.
‘‘д̣̇иб̣б̣ам̣ манд̣̇ааравам̣ бубпам̣, бад̣̇умам̣ бааричад̇д̇агам̣;
‘‘Dibbaṃ mandāravaṃ pupphaṃ, padumaṃ pārichattakaṃ;
убхо хад̇т̇зхи баг̇г̇аяха, д̇хунамаано убааг̇амим̣.
Ubho hatthehi paggayha, dhunamāno upāgamiṃ.
12.
12.
‘‘жаад̇уван̣н̣абаривуд̇ам̣, д̇иссам̣ логаг̇г̇анааяагам̣;
‘‘Cātuvaṇṇaparivutaṃ, tissaṃ lokagganāyakaṃ;
д̇амахам̣ бубпам̣ г̇ахзд̇ваа, мад̇т̇агз д̇хаараяим̣ ж̇инам̣.
Tamahaṃ pupphaṃ gahetvā, matthake dhārayiṃ jinaṃ.
13.
13.
‘‘соби мам̣ б̣уд̣̇д̇хо б̣яаагааси, ж̇анамаж̇жхз нисийд̣̇ияа;
‘‘Sopi maṃ buddho byākāsi, janamajjhe nisīdiya;
д̣̇взнавуд̇з ид̇о габбз, аяам̣ б̣уд̣̇д̇хо бхависсад̇и.
Dvenavute ito kappe, ayaṃ buddho bhavissati.
14.
14.
‘‘бад̇хаанам̣ бад̣̇ахид̇ваана…бз… хзссаама саммукаа имам̣.
‘‘Padhānaṃ padahitvāna…pe… hessāma sammukhā imaṃ.
15.
15.
‘‘д̇ассааби важанам̣ суд̇ваа, бхияяо жид̇д̇ам̣ басаад̣̇аяим̣;
‘‘Tassāpi vacanaṃ sutvā, bhiyyo cittaṃ pasādayiṃ;
уд̇д̇арим̣ вад̇амад̇хидтаасим̣, д̣̇асабаарамибуурияаа’’д̇и.
Uttariṃ vatamadhiṭṭhāsiṃ, dasapāramipūriyā’’ti.
д̇ад̇т̇а маяи баб̣б̣аж̇ид̇зд̇и маяи баб̣б̣аж̇ид̇абхаавам̣ убаг̇ад̇з. ‘‘мама баб̣б̣аж̇ид̇ам̣ санд̇а’’нд̇и бод̇т̇агзсу ликанд̇и, со бамаад̣̇алзкод̇и взд̣̇ид̇аб̣б̣о. убабаж̇ж̇ат̇аад̇и уббаж̇ж̇ид̇т̇а. убхо хад̇т̇зхийд̇и убхзхи хад̇т̇зхи. баг̇г̇аяхаад̇и г̇ахзд̇ваана. д̇хунамаанод̇и ваагажийраани вид̇хунамаанова. жаад̇уван̣н̣абаривуд̇анд̇и жад̇убарисабаривуд̇ам̣, кад̇д̇ияаб̣раахман̣аг̇ахабад̇исаман̣абаривуд̇анд̇и ад̇т̇о. ‘‘жад̇уван̣н̣зхи баривуд̇а’’нд̇и батанд̇и гзжи.
Tattha mayi pabbajiteti mayi pabbajitabhāvaṃ upagate. ‘‘Mama pabbajitaṃ santa’’nti potthakesu likhanti, so pamādalekhoti veditabbo. Upapajjathāti uppajjittha. Ubho hatthehīti ubhehi hatthehi. Paggayhāti gahetvāna. Dhunamānoti vākacīrāni vidhunamānova. Cātuvaṇṇaparivutanti catuparisaparivutaṃ, khattiyabrāhmaṇagahapatisamaṇaparivutanti attho. ‘‘Catuvaṇṇehi parivuta’’nti paṭhanti keci.
д̇асса бана бхаг̇авад̇о кзмам̣ наама наг̇арам̣ ахоси. ж̇анасанд̇хо наама кад̇д̇ияо бид̇аа, бад̣̇умаа наама ж̇анигаа, б̣рахмад̣̇зво жа уд̣̇аяо жа д̣̇вз аг̇г̇асаавагаа, саман̇г̇о наамубадтааго, пуссаа жа суд̣̇ад̇д̇аа жа д̣̇вз аг̇г̇асаавигаа, асанаругко б̣од̇хи, сарийрам̣ садтихад̇т̇уб̣б̣зд̇хам̣ ахоси, вассасад̇асахассам̣ ааяу, субхад̣̇д̣̇аа наама аг̇г̇амахзсий, аананд̣̇о наама буд̇д̇о, д̇уран̇г̇аяаанзна нигками. д̇зна вуд̇д̇ам̣ –
Tassa pana bhagavato khemaṃ nāma nagaraṃ ahosi. Janasandho nāma khattiyo pitā, padumā nāma janikā, brahmadevo ca udayo ca dve aggasāvakā, samaṅgo nāmupaṭṭhāko, phussā ca sudattā ca dve aggasāvikā, asanarukkho bodhi, sarīraṃ saṭṭhihatthubbedhaṃ ahosi, vassasatasahassaṃ āyu, subhaddā nāma aggamahesī, ānando nāma putto, turaṅgayānena nikkhami. Tena vuttaṃ –
16.
16.
‘‘кзмагам̣ наама наг̇арам̣, ж̇анасанд̇хо наама кад̇д̇ияо;
‘‘Khemakaṃ nāma nagaraṃ, janasandho nāma khattiyo;
бад̣̇умаа наама ж̇анигаа, д̇иссасса жа махзсино.
Padumā nāma janikā, tissassa ca mahesino.
21.
21.
‘‘б̣рахмад̣̇зво жа уд̣̇аяо жа, ахзсум̣ аг̇г̇асаавагаа;
‘‘Brahmadevo ca udayo ca, ahesuṃ aggasāvakā;
саман̇г̇о наамубадтааго, д̇иссасса жа махзсино.
Samaṅgo nāmupaṭṭhāko, tissassa ca mahesino.
22.
22.
‘‘пуссаа жзва суд̣̇ад̇д̇аа жа, ахзсум̣ аг̇г̇асаавигаа;
‘‘Phussā ceva sudattā ca, ahesuṃ aggasāvikā;
б̣од̇хи д̇асса бхаг̇авад̇о, асанод̇и бавужжад̇и.
Bodhi tassa bhagavato, asanoti pavuccati.
24.
24.
‘‘со б̣уд̣̇д̇хо садтирад̇ано, аху ужжад̇д̇анз ж̇ино;
‘‘So buddho saṭṭhiratano, ahu uccattane jino;
ануубамо асад̣̇исо, химаваа вияа д̣̇иссад̇и.
Anūpamo asadiso, himavā viya dissati.
25.
25.
‘‘д̇ассааби ад̇улад̇зж̇асса, ааяу ааси ануд̇д̇аро;
‘‘Tassāpi atulatejassa, āyu āsi anuttaro;
вассасад̇асахассаани, логз адтааси жагкумаа.
Vassasatasahassāni, loke aṭṭhāsi cakkhumā.
26.
26.
‘‘уд̇д̇амам̣ баварам̣ сздтам̣, анубход̇ваа махааяасам̣;
‘‘Uttamaṃ pavaraṃ seṭṭhaṃ, anubhotvā mahāyasaṃ;
ж̇алид̇ваа аг̇г̇игканд̇хова, ниб̣б̣уд̇о со сасааваго.
Jalitvā aggikkhandhova, nibbuto so sasāvako.
27.
27.
‘‘валаахагова анилзна, сууриязна вияа уссаво;
‘‘Valāhakova anilena, sūriyena viya ussavo;
анд̇хагаарова бад̣̇ийбзна, ниб̣б̣уд̇о со сасааваго’’д̇и.
Andhakārova padīpena, nibbuto so sasāvako’’ti.
д̇ад̇т̇а ужжад̇д̇анзд̇и ужжабхаавзна. химаваа вияа д̣̇иссад̇ийд̇и химаваава бад̣̇иссад̇и. аяамзва ваа баато. яат̇аа яож̇анаанам̣ сад̇аанужжо химаваа бан̃жабаб̣б̣ад̇о суд̣̇уурз тид̇аанамби ужжабхаавзна жа соммабхаавзна жа ад̇ираман̣ийяо худ̇ваа д̣̇иссад̇и, звам̣ бхаг̇авааби д̣̇иссад̇ийд̇и ад̇т̇о. ануд̇д̇арод̇и наад̇ид̣̇ийгхо наад̇ирассо. ааяу вассасад̇асахассанд̇и ад̇т̇о. уд̇д̇амам̣ баварам̣ сздтанд̇и ан̃н̃аман̃н̃авзважанаани. уссавод̇и химаб̣инд̣̇у валаахагауссаваанд̇хагаараа вияа аниласуурияад̣̇ийбзхи анижжад̇ааниласуурияад̣̇ийбзхи убад̣̇д̣̇уд̇о бариниб̣б̣уд̇о сасааваго бхаг̇аваад̇и ад̇т̇о.
Tattha uccattaneti uccabhāvena. Himavā viya dissatīti himavāva padissati. Ayameva vā pāṭho. Yathā yojanānaṃ satānucco himavā pañcapabbato sudūre ṭhitānampi uccabhāvena ca sommabhāvena ca atiramaṇīyo hutvā dissati, evaṃ bhagavāpi dissatīti attho. Anuttaroti nātidīgho nātirasso. Āyu vassasatasahassanti attho. Uttamaṃ pavaraṃ seṭṭhanti aññamaññavevacanāni. Ussavoti himabindu valāhakaussavaandhakārā viya anilasūriyadīpehi aniccatānilasūriyadīpehi upadduto parinibbuto sasāvako bhagavāti attho.
д̇иссо гира бхаг̇аваа сунанд̣̇авад̇ийнаг̇арз сунанд̣̇аараамз бариниб̣б̣ааяи. сзсамзд̇т̇а г̇аат̇аасу баагадамзваад̇и.
Tisso kira bhagavā sunandavatīnagare sunandārāme parinibbāyi. Sesamettha gāthāsu pākaṭamevāti.
д̇иссаб̣уд̣̇д̇хавам̣саван̣н̣анаа нидтид̇аа.
Tissabuddhavaṃsavaṇṇanā niṭṭhitā.
нидтид̇о сад̇д̇арасамо б̣уд̣̇д̇хавам̣со.
Niṭṭhito sattarasamo buddhavaṃso.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / б̣уд̣̇д̇хавам̣сабаал̣и • Buddhavaṃsapāḷi / 19. д̇иссаб̣уд̣̇д̇хавам̣со • 19. Tissabuddhavaṃso
