| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១៩. តិស្សពុទ្ធវំសោ
19. Tissabuddhavaṃso
១.
1.
សិទ្ធត្ថស្ស អបរេន, អសមោ អប្បដិបុគ្គលោ;
Siddhatthassa aparena, asamo appaṭipuggalo;
អនន្តតេជោ អមិតយសោ, តិស្សោ លោកគ្គនាយកោ។
Anantatejo amitayaso, tisso lokagganāyako.
២.
2.
តមន្ធការំ វិធមិត្វា, ឱភាសេត្វា សទេវកំ;
Tamandhakāraṃ vidhamitvā, obhāsetvā sadevakaṃ;
អនុកម្បកោ មហាវីរោ, លោកេ ឧប្បជ្ជិ ចក្ខុមា។
Anukampako mahāvīro, loke uppajji cakkhumā.
៣.
3.
តស្សាបិ អតុលា ឥទ្ធិ, អតុលំ សីលំ សមាធិ ច;
Tassāpi atulā iddhi, atulaṃ sīlaṃ samādhi ca;
សព្ពត្ថ បារមិំ គន្ត្វា, ធម្មចក្កំ បវត្តយិ។
Sabbattha pāramiṃ gantvā, dhammacakkaṃ pavattayi.
៤.
4.
សោ ពុទ្ធោ ទសសហស្សិម្ហិ, វិញ្ញាបេសិ គិរំ សុចិំ;
So buddho dasasahassimhi, viññāpesi giraṃ suciṃ;
កោដិសតានិ អភិសមិំសុ, បឋមេ ធម្មទេសនេ។
Koṭisatāni abhisamiṃsu, paṭhame dhammadesane.
៥.
5.
ទុតិយោ នវុតិកោដីនំ, តតិយោ សដ្ឋិកោដិយោ;
Dutiyo navutikoṭīnaṃ, tatiyo saṭṭhikoṭiyo;
៦.
6.
សន្និបាតា តយោ អាសុំ, តិស្សេ លោកគ្គនាយកេ;
Sannipātā tayo āsuṃ, tisse lokagganāyake;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៧.
7.
ខីណាសវសតសហស្សានំ, បឋមោ អាសិ សមាគមោ;
Khīṇāsavasatasahassānaṃ, paṭhamo āsi samāgamo;
នវុតិសតសហស្សានំ, ទុតិយោ អាសិ សមាគមោ។
Navutisatasahassānaṃ, dutiyo āsi samāgamo.
៨.
8.
អសីតិសតសហស្សានំ , តតិយោ អាសិ សមាគមោ;
Asītisatasahassānaṃ , tatiyo āsi samāgamo;
ខីណាសវានំ វិមលានំ, បុប្ផិតានំ វិមុត្តិយា។
Khīṇāsavānaṃ vimalānaṃ, pupphitānaṃ vimuttiyā.
៩.
9.
អហំ តេន សមយេន, សុជាតោ នាម ខត្តិយោ;
Ahaṃ tena samayena, sujāto nāma khattiyo;
មហាភោគំ ឆឌ្ឌយិត្វា, បព្ពជិំ ឥសិបព្ពជំ។
Mahābhogaṃ chaḍḍayitvā, pabbajiṃ isipabbajaṃ.
១០.
10.
មយិ បព្ពជិតេ សន្តេ, ឧប្បជ្ជិ លោកនាយកោ;
Mayi pabbajite sante, uppajji lokanāyako;
ពុទ្ធោតិ សទ្ទំ សុត្វាន, បីតិ មេ ឧបបជ្ជថ។
Buddhoti saddaṃ sutvāna, pīti me upapajjatha.
១១.
11.
ទិព្ពំ មន្ទារវំ បុប្ផំ, បទុមំ បារិឆត្តកំ;
Dibbaṃ mandāravaṃ pupphaṃ, padumaṃ pārichattakaṃ;
ឧភោ ហត្ថេហិ បគ្គយ្ហ, ធុនមានោ ឧបាគមិំ។
Ubho hatthehi paggayha, dhunamāno upāgamiṃ.
១២.
12.
ចតុវណ្ណបរិវុតំ, តិស្សំ លោកគ្គនាយកំ;
Catuvaṇṇaparivutaṃ, tissaṃ lokagganāyakaṃ;
តមហំ បុប្ផំ គហេត្វា, មត្ថកេ ធារយិំ ជិនំ។
Tamahaṃ pupphaṃ gahetvā, matthake dhārayiṃ jinaṃ.
១៣.
13.
សោបិ មំ ពុទ្ធោ ព្យាកាសិ, ជនមជ្ឈេ និសីទិយ;
Sopi maṃ buddho byākāsi, janamajjhe nisīdiya;
‘‘ទ្វេនវុតេ ឥតោ កប្បេ, អយំ ពុទ្ធោ ភវិស្សតិ។
‘‘Dvenavute ito kappe, ayaṃ buddho bhavissati.
១៤.
14.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៥.
15.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៦.
16.
ខេមកំ នាម នគរំ, ជនសន្ធោ នាម ខត្តិយោ;
Khemakaṃ nāma nagaraṃ, janasandho nāma khattiyo;
បទុមា នាម ជនិកា, តិស្សស្ស ច មហេសិនោ។
Padumā nāma janikā, tissassa ca mahesino.
១៧.
17.
សត្តវស្សសហស្សានិ, អគារំ អជ្ឈ សោ វសិ;
Sattavassasahassāni, agāraṃ ajjha so vasi;
១៨.
18.
សមតិំសសហស្សានិ, នារិយោ សមលង្កតា;
Samatiṃsasahassāni, nāriyo samalaṅkatā;
សុភទ្ទានាមិកា នារី, អានន្ទោ នាម អត្រជោ។
Subhaddānāmikā nārī, ānando nāma atrajo.
១៩.
19.
និមិត្តេ ចតុរោ ទិស្វា, អស្សយានេន និក្ខមិ;
Nimitte caturo disvā, assayānena nikkhami;
អនូនអដ្ឋមាសានិ, បធានំ បទហី ជិនោ។
Anūnaaṭṭhamāsāni, padhānaṃ padahī jino.
២០.
20.
ព្រហ្មុនា យាចិតោ សន្តោ, តិស្សោ លោកគ្គនាយកោ;
Brahmunā yācito santo, tisso lokagganāyako;
វត្តិ ចក្កំ មហាវីរោ, យសវតិយមុត្តមេ។
Vatti cakkaṃ mahāvīro, yasavatiyamuttame.
២១.
21.
ព្រហ្មទេវោ ឧទយោ ច, អហេសុំ អគ្គសាវកា;
Brahmadevo udayo ca, ahesuṃ aggasāvakā;
សមង្គោ នាមុបដ្ឋាកោ, តិស្សស្ស ច មហេសិនោ។
Samaṅgo nāmupaṭṭhāko, tissassa ca mahesino.
២២.
22.
ផុស្សា ចេវ សុទត្តា ច, អហេសុំ អគ្គសាវិកា;
Phussā ceva sudattā ca, ahesuṃ aggasāvikā;
ពោធិ តស្ស ភគវតោ, អសនោតិ បវុច្ចតិ។
Bodhi tassa bhagavato, asanoti pavuccati.
២៣.
23.
សម្ពលោ ច សិរិមា ចេវ, អហេសុំ អគ្គុបដ្ឋកា;
Sambalo ca sirimā ceva, ahesuṃ aggupaṭṭhakā;
កិសាគោតមី ឧបសេនា, អហេសុំ អគ្គុបដ្ឋិកា។
Kisāgotamī upasenā, ahesuṃ aggupaṭṭhikā.
២៤.
24.
សោ ពុទ្ធោ សដ្ឋិរតនោ, អហុ ឧច្ចត្តនេ ជិនោ;
So buddho saṭṭhiratano, ahu uccattane jino;
អនូបមោ អសទិសោ, ហិមវា វិយ ទិស្សតិ។
Anūpamo asadiso, himavā viya dissati.
២៥.
25.
តស្សាបិ អតុលតេជស្ស, អាយុ អាសិ អនុត្តរោ;
Tassāpi atulatejassa, āyu āsi anuttaro;
វស្សសតសហស្សានិ, លោកេ អដ្ឋាសិ ចក្ខុមា។
Vassasatasahassāni, loke aṭṭhāsi cakkhumā.
២៦.
26.
ឧត្តមំ បវរំ សេដ្ឋំ, អនុភោត្វា មហាយសំ;
Uttamaṃ pavaraṃ seṭṭhaṃ, anubhotvā mahāyasaṃ;
ជលិត្វា អគ្គិក្ខន្ធោវ, និព្ពុតោ សោ សសាវកោ។
Jalitvā aggikkhandhova, nibbuto so sasāvako.
២៧.
27.
វលាហកោវ អនិលេន, សូរិយេន វិយ ឧស្សវោ;
Valāhakova anilena, sūriyena viya ussavo;
អន្ធការោវ បទីបេន, និព្ពុតោ សោ សសាវកោ។
Andhakārova padīpena, nibbuto so sasāvako.
២៨.
28.
តិស្សោ ជិនវរោ ពុទ្ធោ, នន្ទារាមម្ហិ និព្ពុតោ;
Tisso jinavaro buddho, nandārāmamhi nibbuto;
តត្ថេវស្ស ជិនថូបោ, តីណិយោជនមុគ្គតោតិ។
Tatthevassa jinathūpo, tīṇiyojanamuggatoti.
តិស្សស្ស ភគវតោ វំសោ សត្តរសមោ។
Tissassa bhagavato vaṃso sattarasamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១៩. តិស្សពុទ្ធវំសវណ្ណនា • 19. Tissabuddhavaṃsavaṇṇanā
