| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೧೯. ತಿಸ್ಸಬುದ್ಧವಂಸೋ
19. Tissabuddhavaṃso
೧.
1.
ಸಿದ್ಧತ್ಥಸ್ಸ ಅಪರೇನ, ಅಸಮೋ ಅಪ್ಪಟಿಪುಗ್ಗಲೋ।
Siddhatthassa aparena, asamo appaṭipuggalo;
ಅನನ್ತತೇಜೋ ಅಮಿತಯಸೋ, ತಿಸ್ಸೋ ಲೋಕಗ್ಗನಾಯಕೋ॥
Anantatejo amitayaso, tisso lokagganāyako.
೨.
2.
ತಮನ್ಧಕಾರಂ ವಿಧಮಿತ್ವಾ, ಓಭಾಸೇತ್ವಾ ಸದೇವಕಂ।
Tamandhakāraṃ vidhamitvā, obhāsetvā sadevakaṃ;
ಅನುಕಮ್ಪಕೋ ಮಹಾವೀರೋ, ಲೋಕೇ ಉಪ್ಪಜ್ಜಿ ಚಕ್ಖುಮಾ॥
Anukampako mahāvīro, loke uppajji cakkhumā.
೩.
3.
ತಸ್ಸಾಪಿ ಅತುಲಾ ಇದ್ಧಿ, ಅತುಲಂ ಸೀಲಂ ಸಮಾಧಿ ಚ।
Tassāpi atulā iddhi, atulaṃ sīlaṃ samādhi ca;
ಸಬ್ಬತ್ಥ ಪಾರಮಿಂ ಗನ್ತ್ವಾ, ಧಮ್ಮಚಕ್ಕಂ ಪವತ್ತಯಿ॥
Sabbattha pāramiṃ gantvā, dhammacakkaṃ pavattayi.
೪.
4.
ಸೋ ಬುದ್ಧೋ ದಸಸಹಸ್ಸಿಮ್ಹಿ, ವಿಞ್ಞಾಪೇಸಿ ಗಿರಂ ಸುಚಿಂ।
So buddho dasasahassimhi, viññāpesi giraṃ suciṃ;
ಕೋಟಿಸತಾನಿ ಅಭಿಸಮಿಂಸು, ಪಠಮೇ ಧಮ್ಮದೇಸನೇ॥
Koṭisatāni abhisamiṃsu, paṭhame dhammadesane.
೫.
5.
ದುತಿಯೋ ನವುತಿಕೋಟೀನಂ, ತತಿಯೋ ಸಟ್ಠಿಕೋಟಿಯೋ।
Dutiyo navutikoṭīnaṃ, tatiyo saṭṭhikoṭiyo;
೬.
6.
ಸನ್ನಿಪಾತಾ ತಯೋ ಆಸುಂ, ತಿಸ್ಸೇ ಲೋಕಗ್ಗನಾಯಕೇ।
Sannipātā tayo āsuṃ, tisse lokagganāyake;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೭.
7.
ಖೀಣಾಸವಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ।
Khīṇāsavasatasahassānaṃ, paṭhamo āsi samāgamo;
ನವುತಿಸತಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥
Navutisatasahassānaṃ, dutiyo āsi samāgamo.
೮.
8.
ಅಸೀತಿಸತಸಹಸ್ಸಾನಂ , ತತಿಯೋ ಆಸಿ ಸಮಾಗಮೋ।
Asītisatasahassānaṃ , tatiyo āsi samāgamo;
ಖೀಣಾಸವಾನಂ ವಿಮಲಾನಂ, ಪುಪ್ಫಿತಾನಂ ವಿಮುತ್ತಿಯಾ॥
Khīṇāsavānaṃ vimalānaṃ, pupphitānaṃ vimuttiyā.
೯.
9.
ಅಹಂ ತೇನ ಸಮಯೇನ, ಸುಜಾತೋ ನಾಮ ಖತ್ತಿಯೋ।
Ahaṃ tena samayena, sujāto nāma khattiyo;
ಮಹಾಭೋಗಂ ಛಡ್ಡಯಿತ್ವಾ, ಪಬ್ಬಜಿಂ ಇಸಿಪಬ್ಬಜಂ॥
Mahābhogaṃ chaḍḍayitvā, pabbajiṃ isipabbajaṃ.
೧೦.
10.
ಮಯಿ ಪಬ್ಬಜಿತೇ ಸನ್ತೇ, ಉಪ್ಪಜ್ಜಿ ಲೋಕನಾಯಕೋ।
Mayi pabbajite sante, uppajji lokanāyako;
ಬುದ್ಧೋತಿ ಸದ್ದಂ ಸುತ್ವಾನ, ಪೀತಿ ಮೇ ಉಪಪಜ್ಜಥ॥
Buddhoti saddaṃ sutvāna, pīti me upapajjatha.
೧೧.
11.
ದಿಬ್ಬಂ ಮನ್ದಾರವಂ ಪುಪ್ಫಂ, ಪದುಮಂ ಪಾರಿಛತ್ತಕಂ।
Dibbaṃ mandāravaṃ pupphaṃ, padumaṃ pārichattakaṃ;
ಉಭೋ ಹತ್ಥೇಹಿ ಪಗ್ಗಯ್ಹ, ಧುನಮಾನೋ ಉಪಾಗಮಿಂ॥
Ubho hatthehi paggayha, dhunamāno upāgamiṃ.
೧೨.
12.
ಚತುವಣ್ಣಪರಿವುತಂ, ತಿಸ್ಸಂ ಲೋಕಗ್ಗನಾಯಕಂ।
Catuvaṇṇaparivutaṃ, tissaṃ lokagganāyakaṃ;
ತಮಹಂ ಪುಪ್ಫಂ ಗಹೇತ್ವಾ, ಮತ್ಥಕೇ ಧಾರಯಿಂ ಜಿನಂ॥
Tamahaṃ pupphaṃ gahetvā, matthake dhārayiṃ jinaṃ.
೧೩.
13.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಜನಮಜ್ಝೇ ನಿಸೀದಿಯ।
Sopi maṃ buddho byākāsi, janamajjhe nisīdiya;
‘‘ದ್ವೇನವುತೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Dvenavute ito kappe, ayaṃ buddho bhavissati.
೧೪.
14.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೫.
15.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೬.
16.
ಖೇಮಕಂ ನಾಮ ನಗರಂ, ಜನಸನ್ಧೋ ನಾಮ ಖತ್ತಿಯೋ।
Khemakaṃ nāma nagaraṃ, janasandho nāma khattiyo;
ಪದುಮಾ ನಾಮ ಜನಿಕಾ, ತಿಸ್ಸಸ್ಸ ಚ ಮಹೇಸಿನೋ॥
Padumā nāma janikā, tissassa ca mahesino.
೧೭.
17.
ಸತ್ತವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Sattavassasahassāni, agāraṃ ajjha so vasi;
೧೮.
18.
ಸಮತಿಂಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Samatiṃsasahassāni, nāriyo samalaṅkatā;
ಸುಭದ್ದಾನಾಮಿಕಾ ನಾರೀ, ಆನನ್ದೋ ನಾಮ ಅತ್ರಜೋ॥
Subhaddānāmikā nārī, ānando nāma atrajo.
೧೯.
19.
ನಿಮಿತ್ತೇ ಚತುರೋ ದಿಸ್ವಾ, ಅಸ್ಸಯಾನೇನ ನಿಕ್ಖಮಿ।
Nimitte caturo disvā, assayānena nikkhami;
ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ॥
Anūnaaṭṭhamāsāni, padhānaṃ padahī jino.
೨೦.
20.
ಬ್ರಹ್ಮುನಾ ಯಾಚಿತೋ ಸನ್ತೋ, ತಿಸ್ಸೋ ಲೋಕಗ್ಗನಾಯಕೋ।
Brahmunā yācito santo, tisso lokagganāyako;
ವತ್ತಿ ಚಕ್ಕಂ ಮಹಾವೀರೋ, ಯಸವತಿಯಮುತ್ತಮೇ॥
Vatti cakkaṃ mahāvīro, yasavatiyamuttame.
೨೧.
21.
ಬ್ರಹ್ಮದೇವೋ ಉದಯೋ ಚ, ಅಹೇಸುಂ ಅಗ್ಗಸಾವಕಾ।
Brahmadevo udayo ca, ahesuṃ aggasāvakā;
ಸಮಙ್ಗೋ ನಾಮುಪಟ್ಠಾಕೋ, ತಿಸ್ಸಸ್ಸ ಚ ಮಹೇಸಿನೋ॥
Samaṅgo nāmupaṭṭhāko, tissassa ca mahesino.
೨೨.
22.
ಫುಸ್ಸಾ ಚೇವ ಸುದತ್ತಾ ಚ, ಅಹೇಸುಂ ಅಗ್ಗಸಾವಿಕಾ।
Phussā ceva sudattā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಅಸನೋತಿ ಪವುಚ್ಚತಿ॥
Bodhi tassa bhagavato, asanoti pavuccati.
೨೩.
23.
ಸಮ್ಬಲೋ ಚ ಸಿರಿಮಾ ಚೇವ, ಅಹೇಸುಂ ಅಗ್ಗುಪಟ್ಠಕಾ।
Sambalo ca sirimā ceva, ahesuṃ aggupaṭṭhakā;
ಕಿಸಾಗೋತಮೀ ಉಪಸೇನಾ, ಅಹೇಸುಂ ಅಗ್ಗುಪಟ್ಠಿಕಾ॥
Kisāgotamī upasenā, ahesuṃ aggupaṭṭhikā.
೨೪.
24.
ಸೋ ಬುದ್ಧೋ ಸಟ್ಠಿರತನೋ, ಅಹು ಉಚ್ಚತ್ತನೇ ಜಿನೋ।
So buddho saṭṭhiratano, ahu uccattane jino;
ಅನೂಪಮೋ ಅಸದಿಸೋ, ಹಿಮವಾ ವಿಯ ದಿಸ್ಸತಿ॥
Anūpamo asadiso, himavā viya dissati.
೨೫.
25.
ತಸ್ಸಾಪಿ ಅತುಲತೇಜಸ್ಸ, ಆಯು ಆಸಿ ಅನುತ್ತರೋ।
Tassāpi atulatejassa, āyu āsi anuttaro;
ವಸ್ಸಸತಸಹಸ್ಸಾನಿ, ಲೋಕೇ ಅಟ್ಠಾಸಿ ಚಕ್ಖುಮಾ॥
Vassasatasahassāni, loke aṭṭhāsi cakkhumā.
೨೬.
26.
ಉತ್ತಮಂ ಪವರಂ ಸೇಟ್ಠಂ, ಅನುಭೋತ್ವಾ ಮಹಾಯಸಂ।
Uttamaṃ pavaraṃ seṭṭhaṃ, anubhotvā mahāyasaṃ;
ಜಲಿತ್ವಾ ಅಗ್ಗಿಕ್ಖನ್ಧೋವ, ನಿಬ್ಬುತೋ ಸೋ ಸಸಾವಕೋ॥
Jalitvā aggikkhandhova, nibbuto so sasāvako.
೨೭.
27.
ವಲಾಹಕೋವ ಅನಿಲೇನ, ಸೂರಿಯೇನ ವಿಯ ಉಸ್ಸವೋ।
Valāhakova anilena, sūriyena viya ussavo;
ಅನ್ಧಕಾರೋವ ಪದೀಪೇನ, ನಿಬ್ಬುತೋ ಸೋ ಸಸಾವಕೋ॥
Andhakārova padīpena, nibbuto so sasāvako.
೨೮.
28.
ತಿಸ್ಸೋ ಜಿನವರೋ ಬುದ್ಧೋ, ನನ್ದಾರಾಮಮ್ಹಿ ನಿಬ್ಬುತೋ।
Tisso jinavaro buddho, nandārāmamhi nibbuto;
ತತ್ಥೇವಸ್ಸ ಜಿನಥೂಪೋ, ತೀಣಿಯೋಜನಮುಗ್ಗತೋತಿ॥
Tatthevassa jinathūpo, tīṇiyojanamuggatoti.
ತಿಸ್ಸಸ್ಸ ಭಗವತೋ ವಂಸೋ ಸತ್ತರಸಮೋ।
Tissassa bhagavato vaṃso sattarasamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೧೯. ತಿಸ್ಸಬುದ್ಧವಂಸವಣ್ಣನಾ • 19. Tissabuddhavaṃsavaṇṇanā
