| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
৫-১০. তিস্সাদিথেরীগাথাৰণ্ণনা
5-10. Tissāditherīgāthāvaṇṇanā
তিস্সে যুঞ্জস্সু ধম্মেহীতি তিস্সায থেরিযা গাথা । তস্সা ৰত্থু তিস্সাসিক্খমানায ৰত্থুসদিসং। অযং পন থেরী হুত্ৰা অরহত্তং পাপুণি। যথা চ অযং, এৰং ইতো পরং ধীরা, ৰীরা, মিত্তা, ভদ্রা, উপসমাতি পঞ্চন্নং থেরীনং ৰত্থু একসদিসমেৰ। সব্বাপি ইমা কপিলৰত্থুৰাসিনিযো বোধিসত্তস্স ওরোধভূতা মহাপজাপতিগোতমিযা সদ্ধিং নিক্খন্তা ওভাসগাথায চ অরহত্তং পত্তা ঠপেত্ৰা সত্তমিং। সা পন ওভাসগাথায ৰিনা পগেৰ সত্থু সন্তিকে লদ্ধং ওৰাদং নিস্সায ৰিপস্সনং উস্সুক্কাপেত্ৰা অরহত্তং পাপুণিত্ৰা উদানৰসেন ‘‘ৰীরা ৰীরেহী’’তি গাথং অভাসি। ইতরাপি অরহত্তং পত্ৰা –
Tisseyuñjassu dhammehīti tissāya theriyā gāthā . Tassā vatthu tissāsikkhamānāya vatthusadisaṃ. Ayaṃ pana therī hutvā arahattaṃ pāpuṇi. Yathā ca ayaṃ, evaṃ ito paraṃ dhīrā, vīrā, mittā, bhadrā, upasamāti pañcannaṃ therīnaṃ vatthu ekasadisameva. Sabbāpi imā kapilavatthuvāsiniyo bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya ca arahattaṃ pattā ṭhapetvā sattamiṃ. Sā pana obhāsagāthāya vinā pageva satthu santike laddhaṃ ovādaṃ nissāya vipassanaṃ ussukkāpetvā arahattaṃ pāpuṇitvā udānavasena ‘‘vīrā vīrehī’’ti gāthaṃ abhāsi. Itarāpi arahattaṃ patvā –
৫.
5.
‘‘তিস্সে যুঞ্জস্সু ধম্মেহি, খণো তং মা উপচ্চগা।
‘‘Tisse yuñjassu dhammehi, khaṇo taṃ mā upaccagā;
খণাতীতা হি সোচন্তি, নিরযম্হি সমপ্পিতা॥
Khaṇātītā hi socanti, nirayamhi samappitā.
৬.
6.
‘‘ধীরে নিরোধং ফুসেহি, সঞ্ঞাৰূপসমং সুখং।
‘‘Dhīre nirodhaṃ phusehi, saññāvūpasamaṃ sukhaṃ;
আরাধযাহি নিব্বানং, যোগক্খেমমনুত্তরং॥
Ārādhayāhi nibbānaṃ, yogakkhemamanuttaraṃ.
৭.
7.
‘‘ৰীরা ৰীরেহি ধম্মেহি, ভিক্খুনী ভাৰিতিন্দ্রিযা।
‘‘Vīrā vīrehi dhammehi, bhikkhunī bhāvitindriyā;
ধারেতি অন্তিমং দেহং, জেত্ৰা মারং সৰাহনং॥
Dhāreti antimaṃ dehaṃ, jetvā māraṃ savāhanaṃ.
৮.
8.
‘‘সদ্ধায পব্বজিত্ৰান, মিত্তে মিত্তরতা ভৰ।
‘‘Saddhāya pabbajitvāna, mitte mittaratā bhava;
ভাৰেহি কুসলে ধম্মে, যোগক্খেমস্স পত্তিযা॥
Bhāvehi kusale dhamme, yogakkhemassa pattiyā.
৯.
9.
‘‘সদ্ধায পব্বজিত্ৰান, ভদ্রে ভদ্ররতা ভৰ।
‘‘Saddhāya pabbajitvāna, bhadre bhadraratā bhava;
ভাৰেহি কুসলে ধম্মে, যোগক্খেমমনুত্তরং॥
Bhāvehi kusale dhamme, yogakkhemamanuttaraṃ.
১০.
10.
‘‘উপসমে তরে ওঘং, মচ্চুধেয্যং সুদুত্তরং।
‘‘Upasame tare oghaṃ, maccudheyyaṃ suduttaraṃ;
ধারেহি অন্তিমং দেহং, জেত্ৰা মারং সৰাহন’’ন্তি॥ – গাথাযো অভাসিংসু।
Dhārehi antimaṃ dehaṃ, jetvā māraṃ savāhana’’nti. – gāthāyo abhāsiṃsu;
তত্থ যুঞ্জস্সু ধম্মেহীতি সমথৰিপস্সনাধম্মেহি অরিযেহি বোধিপক্খিযধম্মেহি চ যুঞ্জ যোগং করোহি। খণো তং মা উপচ্চগাতি যো এৰং যোগভাৰনং ন করোতি, তং পুগ্গলং পতিরূপদেসে উপ্পত্তিক্খণো, ছন্নং আযতনানং অৰেকল্লক্খণো, বুদ্ধুপ্পাদক্খণো, সদ্ধায পটিলদ্ধক্খণো, সব্বোপি অযং খণো অতিক্কমতি নাম। সো খণো তং মা অতিক্কমি। খণাতীতাতি যে হি খণং অতীতা, যে চ পুগ্গলে সো খণো অভীতো, তে নিরযম্হি সমপ্পিতা হুত্ৰা সোচন্তি, তত্থ নিব্বত্তিত্ৰা মহাদুক্খং পচ্চনুভৰন্তীতি অত্থো।
Tattha yuñjassu dhammehīti samathavipassanādhammehi ariyehi bodhipakkhiyadhammehi ca yuñja yogaṃ karohi. Khaṇo taṃ mā upaccagāti yo evaṃ yogabhāvanaṃ na karoti, taṃ puggalaṃ patirūpadese uppattikkhaṇo, channaṃ āyatanānaṃ avekallakkhaṇo, buddhuppādakkhaṇo, saddhāya paṭiladdhakkhaṇo, sabbopi ayaṃ khaṇo atikkamati nāma. So khaṇo taṃ mā atikkami. Khaṇātītāti ye hi khaṇaṃ atītā, ye ca puggale so khaṇo abhīto, te nirayamhi samappitā hutvā socanti, tattha nibbattitvā mahādukkhaṃ paccanubhavantīti attho.
নিরোধং ফুসেহীতি কিলেসনিরোধং ফুস্স পটিলভ। সঞ্ঞাৰূপসমং সুখং, আরাধযাহি নিব্বানন্তি কামসঞ্ঞাদীনং পাপসঞ্ঞানং উপসমনিমিত্তং অচ্চন্তসুখং নিব্বানং আরাধেহি।
Nirodhaṃ phusehīti kilesanirodhaṃ phussa paṭilabha. Saññāvūpasamaṃ sukhaṃ, ārādhayāhi nibbānanti kāmasaññādīnaṃ pāpasaññānaṃ upasamanimittaṃ accantasukhaṃ nibbānaṃ ārādhehi.
ৰীরা ৰীরেহি ধম্মেহীতি ৰীরিযপধানতায ৰীরেহি তেজুস্সদেহি অরিযমগ্গধম্মেহি ভাৰিতিন্দ্রিযা ৰড্ঢিতসদ্ধাদিইন্দ্রিযা ৰীরা ভিক্খুনী ৰত্থুকামেহি সৰাহনং কিলেসমারং জিনিত্ৰা আযতিং পুনব্ভৰাভাৰতো অন্তিমং দেহং ধারেতীতি থেরী অঞ্ঞং ৰিয কত্ৰা অত্তানং দস্সেতি।
Vīrā vīrehi dhammehīti vīriyapadhānatāya vīrehi tejussadehi ariyamaggadhammehi bhāvitindriyā vaḍḍhitasaddhādiindriyā vīrā bhikkhunī vatthukāmehi savāhanaṃ kilesamāraṃ jinitvā āyatiṃ punabbhavābhāvato antimaṃ dehaṃ dhāretīti therī aññaṃ viya katvā attānaṃ dasseti.
মিত্তেতি তং আলপতি। মিত্তরতাতি কল্যাণমিত্তেসু অভিরতা। তত্থ সক্কারসম্মানকরণতা হোহি। ভাৰেহি কুসলে ধম্মেতি অরিযমগ্গধম্মে ৰড্ঢেহি। যোগক্খেমস্সাতি অরহত্তস্স নিব্বানস্স চ পত্তিযা অধিগমায।
Mitteti taṃ ālapati. Mittaratāti kalyāṇamittesu abhiratā. Tattha sakkārasammānakaraṇatā hohi. Bhāvehi kusale dhammeti ariyamaggadhamme vaḍḍhehi. Yogakkhemassāti arahattassa nibbānassa ca pattiyā adhigamāya.
ভদ্রেতি তং আলপতি। ভদ্ররতাতি ভদ্রেসু সীলাদিধম্মেসু রতা অভিরতা হোহি। যোগক্খেমমনুত্তরন্তি চতূহি যোগেহি খেমং অনুপদ্দৰং অনুত্তরং নিব্বানং, তস্স পত্তিযা কুসলে বোধিপক্খিযধম্মে ভাৰেহীতি অত্থো।
Bhadreti taṃ ālapati. Bhadraratāti bhadresu sīlādidhammesu ratā abhiratā hohi. Yogakkhemamanuttaranti catūhi yogehi khemaṃ anupaddavaṃ anuttaraṃ nibbānaṃ, tassa pattiyā kusale bodhipakkhiyadhamme bhāvehīti attho.
উপসমেতি তং আলপতি। তরে ওঘং মচ্চুধেয্যং সুদুত্তরন্তি মচ্চু এত্থ ধীযতীতি মচ্চুধেয্যং, অনুপচিতকুসলসম্ভারেহি সুট্ঠু দুত্তরন্তি সুদুত্তরং, সংসারমহোঘং তরে অরিযমগ্গনাৰায তরেয্যাসি। ধারেহি অন্তিমং দেহন্তি তস্স তরণেনেৰ অন্তিমদেহধরা হোহীতি অত্থো।
Upasameti taṃ ālapati. Tare oghaṃ maccudheyyaṃ suduttaranti maccu ettha dhīyatīti maccudheyyaṃ, anupacitakusalasambhārehi suṭṭhu duttaranti suduttaraṃ, saṃsāramahoghaṃ tare ariyamagganāvāya tareyyāsi. Dhārehi antimaṃ dehanti tassa taraṇeneva antimadehadharā hohīti attho.
তিস্সাদিথেরীগাথাৰণ্ণনা নিট্ঠিতা।
Tissāditherīgāthāvaṇṇanā niṭṭhitā.
নিট্ঠিতা পঠমৰগ্গৰণ্ণনা।
Niṭṭhitā paṭhamavaggavaṇṇanā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi
৫. অঞ্ঞতরাতিস্সাথেরীগাথা • 5. Aññatarātissātherīgāthā
৬. ধীরাথেরীগাথা • 6. Dhīrātherīgāthā
৭. ৰীরাথেরীগাথা • 7. Vīrātherīgāthā
৮. মিত্তাথেরীগাথা • 8. Mittātherīgāthā
৯. ভদ্রাথেরীগাথা • 9. Bhadrātherīgāthā
১০. উপসমাথেরীগাথা • 10. Upasamātherīgāthā
