| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
2. திஸ்ஸமெத்தெய்யமாணவஸுத்தனித்³தே³ஸவண்ணனா
2. Tissametteyyamāṇavasuttaniddesavaṇṇanā
9. து³தியே திஸ்ஸமெத்தெய்யஸுத்தனித்³தே³ஸே – கோத⁴ ஸந்துஸிதோதி நிட்டி²தே பன அஜிதஸுத்தே ‘‘கத²ங் லோகங் அவெக்க²ந்தங், மச்சுராஜா ந பஸ்ஸதீ’’தி (ஸு॰ நி॰ 1124; சூளனி॰ மோக⁴ராஜமாணவபுச்சா² 143) ஏவங் மோக⁴ராஜா புச்சி²துங் ஆரபி⁴. ‘‘ந தாவஸ்ஸ இந்த்³ரியானி பரிபாகங் க³தானீ’’தி ஞத்வா ப⁴க³வா ‘‘திட்ட² த்வங், மோக⁴ராஜ, அஞ்ஞோ புச்ச²தூ’’தி படிக்கி²பி. ததோ திஸ்ஸமெத்தெய்யோ அத்தனோ ஸங்ஸயங் புச்ச²ந்தோ ‘‘கோதா⁴தி கா³த²மாஹ. தத்த² கோத⁴ ஸந்துஸிதோதி கோ இத⁴ ஸத்தோ துட்டோ². இஞ்ஜிதாதி தண்ஹாதி³ட்டி²விப்ப²ந்தி³தானி. உப⁴ந்தமபி⁴ஞ்ஞாயாதி உபோ⁴ அந்தே அபி⁴ஜானித்வா. மந்தா ந லிப்பதீதி பஞ்ஞாய ந லிப்பதி.
9. Dutiye tissametteyyasuttaniddese – kodha santusitoti niṭṭhite pana ajitasutte ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. mogharājamāṇavapucchā 143) evaṃ mogharājā pucchituṃ ārabhi. ‘‘Na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhāti gāthamāha. Tattha kodha santusitoti ko idha satto tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
பரிபுண்ணஸங்கப்போதி நெக்க²ம்மாதி³விதக்கேஹி பரிபுண்ணஸங்கப்பத்தா பரிபுண்ணமனோரதோ².
Paripuṇṇasaṅkappoti nekkhammādivitakkehi paripuṇṇasaṅkappattā paripuṇṇamanoratho.
தண்ஹிஞ்ஜிதந்தி தண்ஹாய சலிதங். தி³ட்டி²ஞ்ஜிதாதீ³ஸுபி ஏஸேவ நயோ. காமிஞ்ஜிதந்தி கிலேஸகாமேஹி இஞ்ஜிதங் ப²ந்தி³தங். ‘‘கம்மிஞ்ஜித’’ந்திபி பாடோ², தங் ந ஸுந்த³ரங்.
Taṇhiñjitanti taṇhāya calitaṃ. Diṭṭhiñjitādīsupi eseva nayo. Kāmiñjitanti kilesakāmehi iñjitaṃ phanditaṃ. ‘‘Kammiñjita’’ntipi pāṭho, taṃ na sundaraṃ.
மஹந்தோ புரிஸோதி மஹாபுரிஸோ. உத்தமோ புரிஸோதி அக்³க³புரிஸோ. பதா⁴னோ புரிஸோதி ஸெட்ட²புரிஸோ. அலாமகோ புரிஸோதி விஸிட்ட²புரிஸோ. ஜெட்ட²கோ புரிஸோதி பாமொக்க²புரிஸோ. ந ஹெட்டி²மகோ புரிஸோதி உத்தமபுரிஸோ. புரிஸானங் கோடிப்பத்தோ புரிஸோதி பதா⁴னபுரிஸோ. ஸப்³பே³ஸங் இச்சி²தோ புரிஸோதி பவரபுரிஸோ.
Mahanto purisoti mahāpuriso. Uttamo purisoti aggapuriso. Padhāno purisoti seṭṭhapuriso. Alāmako purisoti visiṭṭhapuriso. Jeṭṭhako purisoti pāmokkhapuriso. Na heṭṭhimako purisoti uttamapuriso. Purisānaṃ koṭippatto purisoti padhānapuriso. Sabbesaṃ icchito purisoti pavarapuriso.
ஸிப்³பி³னிமச்சகா³தி தண்ஹங் அதிஅகா³, அதிக்கமித்வா டி²தோ. உபச்சகா³தி பு⁴ஸங் அதிஅகா³.
Sibbinimaccagāti taṇhaṃ atiagā, atikkamitvā ṭhito. Upaccagāti bhusaṃ atiagā.
10. தஸ்ஸேதமத்த²ங் ப⁴க³வா ப்³யாகரொந்தோ ‘‘காமேஸூ’’தி கா³தா²த்³வயமாஹ. தத்த² காமேஸு ப்³ரஹ்மசரியவாதி காமனிமித்தங் ப்³ரஹ்மசரியவா, காமேஸு ஆதீ³னவங் தி³ஸ்வா மக்³க³ப்³ரஹ்மசரியேன ஸமன்னாக³தோதி வுத்தங் ஹோதி. எத்தாவதா ஸந்துஸிததங் த³ஸ்ஸேதி. ‘‘வீததண்ஹோ’’திஆதீ³ஹி அனிஞ்ஜிததங். தத்த² ஸங்கா²ய நிப்³பு³தோதி அனிச்சாதி³வஸேன த⁴ம்மே வீமங்ஸித்வா ராகா³தி³னிப்³பா³னேன நிப்³பு³தோ.
10. Tassetamatthaṃ bhagavā byākaronto ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitataṃ dasseti. ‘‘Vītataṇho’’tiādīhi aniñjitataṃ. Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto.
அஸத்³த⁴ம்மஸமாபத்தியாதி நீசத⁴ம்மஸமாயோக³தோ. ஆரதீதி ஆரகா ரமனங். விரதீதி தாய வினா ரமனங். படிவிரதீதி படினிவத்தித்வா தாய வினா ரமனங். வேரமணீதி வேரவினாஸனங். அகிரியாதி கிரியாபச்சி²ந்த³னங். அகரணந்தி கரணபரிச்சி²ந்த³னங். அனஜ்ஜா²பத்தீதி அனாபஜ்ஜனதா. வேலாஅனதிக்கமோதி ஸீமாஅனதிக்கமோ. ஸேஸங் தத்த² தத்த² வுத்தனயத்தா பாகடமேவ.
Asaddhammasamāpattiyāti nīcadhammasamāyogato. Āratīti ārakā ramanaṃ. Viratīti tāya vinā ramanaṃ. Paṭiviratīti paṭinivattitvā tāya vinā ramanaṃ. Veramaṇīti veravināsanaṃ. Akiriyāti kiriyāpacchindanaṃ. Akaraṇanti karaṇaparicchindanaṃ. Anajjhāpattīti anāpajjanatā. Velāanatikkamoti sīmāanatikkamo. Sesaṃ tattha tattha vuttanayattā pākaṭameva.
ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே அயம்பி ப்³ராஹ்மணோ அரஹத்தே பதிட்டா²ஸி ஸத்³தி⁴ங் அந்தேவாஸிகஸஹஸ்ஸேன, அஞ்ஞேஸஞ்ச அனேகஸஹஸ்ஸானங் த⁴ம்மசக்கு²ங் உத³பாதி³. ஸேஸங் புப்³ப³ஸதி³ஸமேவ.
Evaṃ bhagavā idampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsikasahassena, aññesañca anekasahassānaṃ dhammacakkhuṃ udapādi. Sesaṃ pubbasadisameva.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
திஸ்ஸமெத்தெய்யமாணவஸுத்தனித்³தே³ஸவண்ணனா நிட்டி²தா.
Tissametteyyamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
2. திஸ்ஸமெத்தெய்யமாணவபுச்சா² • 2. Tissametteyyamāṇavapucchā
2. திஸ்ஸமெத்தெய்யமாணவபுச்சா²னித்³தே³ஸோ • 2. Tissametteyyamāṇavapucchāniddeso
