| Library / Tipiṭaka / ཏིཔིཊཀ • Tipiṭaka / ཙཱུལ༹ནིདྡེས-ཨཊྛཀཐཱ • Cūḷaniddesa-aṭṭhakathā |
༢. ཏིསྶམེཏྟེཡྻམཱཎཝསུཏྟནིདྡེསཝཎྞནཱ
2. Tissametteyyamāṇavasuttaniddesavaṇṇanā
༩. དུཏིཡེ ཏིསྶམེཏྟེཡྻསུཏྟནིདྡེསེ – ཀོདྷ སནྟུསིཏོཏི ནིཊྛིཏེ པན ཨཛིཏསུཏྟེ ‘‘ཀཐཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི (སུ॰ ནི॰ ༡༡༢༤; ཙཱུལ༹ནི॰ མོགྷརཱཛམཱཎཝཔུཙྪཱ ༡༤༣) ཨེཝཾ མོགྷརཱཛཱ པུཙྪིཏུཾ ཨཱརབྷི། ‘‘ན ཏཱཝསྶ ཨིནྡྲིཡཱནི པརིཔཱཀཾ གཏཱནཱི’’ཏི ཉཏྭཱ བྷགཝཱ ‘‘ཏིཊྛ ཏྭཾ, མོགྷརཱཛ, ཨཉྙོ པུཙྪཏཱུ’’ཏི པཊིཀྑིཔི། ཏཏོ ཏིསྶམེཏྟེཡྻོ ཨཏྟནོ སཾསཡཾ པུཙྪནྟོ ‘‘ཀོདྷཱཏི གཱཐམཱཧ། ཏཏྠ ཀོདྷ སནྟུསིཏོཏི ཀོ ཨིདྷ སཏྟོ ཏུཊྛོ། ཨིཉྫིཏཱཏི ཏཎྷཱདིཊྛིཝིཔྥནྡིཏཱནི། ཨུབྷནྟམབྷིཉྙཱཡཱཏི ཨུབྷོ ཨནྟེ ཨབྷིཛཱནིཏྭཱ། མནྟཱ ན ལིཔྤཏཱིཏི པཉྙཱཡ ན ལིཔྤཏི།
9. Dutiye tissametteyyasuttaniddese – kodha santusitoti niṭṭhite pana ajitasutte ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. mogharājamāṇavapucchā 143) evaṃ mogharājā pucchituṃ ārabhi. ‘‘Na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhāti gāthamāha. Tattha kodha santusitoti ko idha satto tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
པརིཔུཎྞསངྐཔྤོཏི ནེཀྑམྨཱདིཝིཏཀྐེཧི པརིཔུཎྞསངྐཔྤཏྟཱ པརིཔུཎྞམནོརཐོ།
Paripuṇṇasaṅkappoti nekkhammādivitakkehi paripuṇṇasaṅkappattā paripuṇṇamanoratho.
ཏཎྷིཉྫིཏནྟི ཏཎྷཱཡ ཙལིཏཾ། དིཊྛིཉྫིཏཱདཱིསུཔི ཨེསེཝ ནཡོ། ཀཱམིཉྫིཏནྟི ཀིལེསཀཱམེཧི ཨིཉྫིཏཾ ཕནྡིཏཾ། ‘‘ཀམྨིཉྫིཏ’’ནྟིཔི པཱཋོ, ཏཾ ན སུནྡརཾ།
Taṇhiñjitanti taṇhāya calitaṃ. Diṭṭhiñjitādīsupi eseva nayo. Kāmiñjitanti kilesakāmehi iñjitaṃ phanditaṃ. ‘‘Kammiñjita’’ntipi pāṭho, taṃ na sundaraṃ.
མཧནྟོ པུརིསོཏི མཧཱཔུརིསོ། ཨུཏྟམོ པུརིསོཏི ཨགྒཔུརིསོ། པདྷཱནོ པུརིསོཏི སེཊྛཔུརིསོ། ཨལཱམཀོ པུརིསོཏི ཝིསིཊྛཔུརིསོ། ཛེཊྛཀོ པུརིསོཏི པཱམོཀྑཔུརིསོ། ན ཧེཊྛིམཀོ པུརིསོཏི ཨུཏྟམཔུརིསོ། པུརིསཱནཾ ཀོཊིཔྤཏྟོ པུརིསོཏི པདྷཱནཔུརིསོ། སབྦེསཾ ཨིཙྪིཏོ པུརིསོཏི པཝརཔུརིསོ།
Mahanto purisoti mahāpuriso. Uttamo purisoti aggapuriso. Padhāno purisoti seṭṭhapuriso. Alāmako purisoti visiṭṭhapuriso. Jeṭṭhako purisoti pāmokkhapuriso. Na heṭṭhimako purisoti uttamapuriso. Purisānaṃ koṭippatto purisoti padhānapuriso. Sabbesaṃ icchito purisoti pavarapuriso.
སིབྦིནིམཙྩགཱཏི ཏཎྷཾ ཨཏིཨགཱ, ཨཏིཀྐམིཏྭཱ ཋིཏོ། ཨུཔཙྩགཱཏི བྷུསཾ ཨཏིཨགཱ།
Sibbinimaccagāti taṇhaṃ atiagā, atikkamitvā ṭhito. Upaccagāti bhusaṃ atiagā.
༡༠. ཏསྶེཏམཏྠཾ བྷགཝཱ བྱཱཀརོནྟོ ‘‘ཀཱམེསཱུ’’ཏི གཱཐཱདྭཡམཱཧ། ཏཏྠ ཀཱམེསུ བྲཧྨཙརིཡཝཱཏི ཀཱམནིམིཏྟཾ བྲཧྨཙརིཡཝཱ, ཀཱམེསུ ཨཱདཱིནཝཾ དིསྭཱ མགྒབྲཧྨཙརིཡེན སམནྣཱགཏོཏི ཝུཏྟཾ ཧོཏི། ཨེཏྟཱཝཏཱ སནྟུསིཏཏཾ དསྶེཏི། ‘‘ཝཱིཏཏཎྷོ’’ཏིཨཱདཱིཧི ཨནིཉྫིཏཏཾ། ཏཏྠ སངྑཱཡ ནིབྦུཏོཏི ཨནིཙྩཱདིཝསེན དྷམྨེ ཝཱིམཾསིཏྭཱ རཱགཱདིནིབྦཱནེན ནིབྦུཏོ།
10. Tassetamatthaṃ bhagavā byākaronto ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitataṃ dasseti. ‘‘Vītataṇho’’tiādīhi aniñjitataṃ. Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto.
ཨསདྡྷམྨསམཱཔཏྟིཡཱཏི ནཱིཙདྷམྨསམཱཡོགཏོ། ཨཱརཏཱིཏི ཨཱརཀཱ རམནཾ། ཝིརཏཱིཏི ཏཱཡ ཝིནཱ རམནཾ། པཊིཝིརཏཱིཏི པཊིནིཝཏྟིཏྭཱ ཏཱཡ ཝིནཱ རམནཾ། ཝེརམཎཱིཏི ཝེརཝིནཱསནཾ། ཨཀིརིཡཱཏི ཀིརིཡཱཔཙྪིནྡནཾ། ཨཀརཎནྟི ཀརཎཔརིཙྪིནྡནཾ། ཨནཛ྄ཛྷཱཔཏྟཱིཏི ཨནཱཔཛྫནཏཱ། ཝེལཱཨནཏིཀྐམོཏི སཱིམཱཨནཏིཀྐམོ། སེསཾ ཏཏྠ ཏཏྠ ཝུཏྟནཡཏྟཱ པཱཀཊམེཝ།
Asaddhammasamāpattiyāti nīcadhammasamāyogato. Āratīti ārakā ramanaṃ. Viratīti tāya vinā ramanaṃ. Paṭiviratīti paṭinivattitvā tāya vinā ramanaṃ. Veramaṇīti veravināsanaṃ. Akiriyāti kiriyāpacchindanaṃ. Akaraṇanti karaṇaparicchindanaṃ. Anajjhāpattīti anāpajjanatā. Velāanatikkamoti sīmāanatikkamo. Sesaṃ tattha tattha vuttanayattā pākaṭameva.
ཨེཝཾ བྷགཝཱ ཨིདམྤི སུཏྟཾ ཨརཧཏྟནིཀཱུཊེནེཝ དེསེསི། དེསནཱཔརིཡོསཱནེ ཨཡམྤི བྲཱཧྨཎོ ཨརཧཏྟེ པཏིཊྛཱསི སདྡྷིཾ ཨནྟེཝཱསིཀསཧསྶེན, ཨཉྙེསཉྩ ཨནེཀསཧསྶཱནཾ དྷམྨཙཀྑུཾ ཨུདཔཱདི། སེསཾ པུབྦསདིསམེཝ།
Evaṃ bhagavā idampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsikasahassena, aññesañca anekasahassānaṃ dhammacakkhuṃ udapādi. Sesaṃ pubbasadisameva.
སདྡྷམྨཔྤཛྫོཏིཀཱཡ ཙཱུལ༹ནིདྡེས-ཨཊྛཀཐཱཡ
Saddhammappajjotikāya cūḷaniddesa-aṭṭhakathāya
ཏིསྶམེཏྟེཡྻམཱཎཝསུཏྟནིདྡེསཝཎྞནཱ ནིཊྛིཏཱ།
Tissametteyyamāṇavasuttaniddesavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཙཱུལ༹ནིདྡེསཔཱལི༹ • Cūḷaniddesapāḷi
༢. ཏིསྶམེཏྟེཡྻམཱཎཝཔུཙྪཱ • 2. Tissametteyyamāṇavapucchā
༢. ཏིསྶམེཏྟེཡྻམཱཎཝཔུཙྪཱནིདྡེསོ • 2. Tissametteyyamāṇavapucchāniddeso
