| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
2. திஸ்ஸமெத்தெய்யஸுத்தவண்ணனா
2. Tissametteyyasuttavaṇṇanā
1047. கோத⁴ ஸந்துஸ்ஸிதோதி திஸ்ஸமெத்தெய்யஸுத்தங். கா உப்பத்தி? ஸப்³ப³ஸுத்தானங் புச்சா²வஸிகா ஏவ உப்பத்தி. தே ஹி ப்³ராஹ்மணா ‘‘கதாவகாஸா புச்ச²வ்ஹோ’’தி ப⁴க³வதா பவாரிதத்தா அத்தனோ அத்தனோ ஸங்ஸயங் புச்சி²ங்ஸு. புட்டோ² புட்டோ² ச தேஸங் ப⁴க³வா ப்³யாகாஸி. ஏவங் புச்சா²வஸிகானேவேதானி ஸுத்தானீதி வேதி³தப்³பா³னி.
1047.Kodhasantussitoti tissametteyyasuttaṃ. Kā uppatti? Sabbasuttānaṃ pucchāvasikā eva uppatti. Te hi brāhmaṇā ‘‘katāvakāsā pucchavho’’ti bhagavatā pavāritattā attano attano saṃsayaṃ pucchiṃsu. Puṭṭho puṭṭho ca tesaṃ bhagavā byākāsi. Evaṃ pucchāvasikānevetāni suttānīti veditabbāni.
நிட்டி²தே பன அஜிதபஞ்ஹே ‘‘கத²ங் லோகங் அவெக்க²ந்தங், மச்சுராஜா ந பஸ்ஸதீ’’தி (ஸு॰ நி॰ 1124; சூளனி॰ பிங்கி³யமாணவபுச்சா² 144) ஏவங் மோக⁴ராஜா புச்சி²துங் ஆரபி⁴. தங் ‘‘ந தாவஸ்ஸ இந்த்³ரியானி பரிபாகங் க³தானீ’’தி ஞத்வா ப⁴க³வா ‘‘திட்ட² த்வங், மோக⁴ராஜ, அஞ்ஞோ புச்ச²தூ’’தி படிக்கி²பி. ததோ திஸ்ஸமெத்தெய்யோ அத்தனோ ஸங்ஸயங் புச்ச²ந்தோ ‘‘கோதா⁴’’தி கா³த²மாஹ. தத்த² கோத⁴ ஸந்துஸ்ஸிதோதி கோ இத⁴ துட்டோ². இஞ்ஜிதாதி தண்ஹாதி³ட்டி²விப்ப²ந்தி³தானி. உப⁴ந்தமபி⁴ஞ்ஞாயாதி உபோ⁴ அந்தே அபி⁴ஜானித்வா. மந்தா ந லிப்பதீதி பஞ்ஞாய ந லிப்பதி.
Niṭṭhite pana ajitapañhe ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. piṅgiyamāṇavapucchā 144) evaṃ mogharājā pucchituṃ ārabhi. Taṃ ‘‘na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhā’’ti gāthamāha. Tattha kodha santussitoti ko idha tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
1048-9. தஸ்ஸேதமத்த²ங் ப்³யாகரொந்தோ ப⁴க³வா ‘‘காமேஸூ’’தி கா³தா²த்³வயமாஹ. தத்த² காமேஸு ப்³ரஹ்மசரியவாதி காமனிமித்தங் ப்³ரஹ்மசரியவா, காமேஸு ஆதீ³னவங் தி³ஸ்வா மக்³க³ப்³ரஹ்மசரியேன ஸமன்னாக³தோதி வுத்தங் ஹோதி. எத்தாவதா ஸந்துஸிதங் த³ஸ்ஸேதி, ‘‘வீததண்ஹோ’’திஆதீ³ஹி அனிஞ்ஜிதங் . தத்த² ஸங்கா²ய நிப்³பு³தோதி அனிச்சாதி³வஸேன த⁴ம்மே வீமங்ஸித்வா ராகா³தி³னிப்³பா³னேன நிப்³பு³தோ. ஸேஸங் தத்த² தத்த² வுத்தனயத்தா பாகடமேவ.
1048-9. Tassetamatthaṃ byākaronto bhagavā ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitaṃ dasseti, ‘‘vītataṇho’’tiādīhi aniñjitaṃ . Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto. Sesaṃ tattha tattha vuttanayattā pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே அயம்பி ப்³ராஹ்மணோ அரஹத்தே பதிட்டா²ஸி ஸத்³தி⁴ங் அந்தேவாஸிஸஹஸ்ஸேன, அஞ்ஞேஸஞ்ச அனேகஸஹஸ்ஸானங் த⁴ம்மசக்கு²ங் உத³பாதி³. ஸேஸங் புப்³ப³ஸதி³ஸமேவாதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsisahassena, aññesañca anekasahassānaṃ dhammacakkhuṃ udapādi. Sesaṃ pubbasadisamevāti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய திஸ்ஸமெத்தெய்யஸுத்தவண்ணனா நிட்டி²தா.
Suttanipāta-aṭṭhakathāya tissametteyyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 2. திஸ்ஸமெத்தெய்யமாணவபுச்சா² • 2. Tissametteyyamāṇavapucchā
