| Library / Tipiṭaka / ਤਿਪਿਟਕ • Tipiṭaka / ਸੁਤ੍ਤਨਿਪਾਤ-ਅਟ੍ਠਕਥਾ • Suttanipāta-aṭṭhakathā |
੭. ਤਿਸ੍ਸਮੇਤ੍ਤੇਯ੍ਯਸੁਤ੍ਤવਣ੍ਣਨਾ
7. Tissametteyyasuttavaṇṇanā
੮੨੧. ਮੇਥੁਨਮਨੁਯੁਤ੍ਤਸ੍ਸਾਤਿ ਤਿਸ੍ਸਮੇਤ੍ਤੇਯ੍ਯਸੁਤ੍ਤਂ। ਕਾ ਉਪ੍ਪਤ੍ਤਿ? ਭਗવਤਿ ਕਿਰ ਸਾવਤ੍ਥਿਯਂ વਿਹਰਨ੍ਤੇ ਤਿਸ੍ਸਮੇਤ੍ਤੇਯ੍ਯਾ ਨਾਮ ਦ੍વੇ ਸਹਾਯਾ ਸਾવਤ੍ਥਿਂ ਅਗਮਂਸੁ। ਤੇ ਸਾਯਨ੍ਹਸਮਯਂ ਮਹਾਜਨਂ ਜੇਤવਨਾਭਿਮੁਖਂ ਗਚ੍ਛਨ੍ਤਂ ਦਿਸ੍વਾ ‘‘ਕੁਹਿਂ ਗਚ੍ਛਥਾ’’ਤਿ ਪੁਚ੍ਛਿਂਸੁ। ਤਤੋ ਤੇਹਿ ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਬਹੁਜਨਹਿਤਾਯ ਧਮ੍ਮਂ ਦੇਸੇਤਿ, ਤਂ ਸੋਤੁਂ ਜੇਤવਨਂ ਗਚ੍ਛਾਮਾ’’ਤਿ વੁਤ੍ਤੇ ‘‘ਮਯਮ੍ਪਿ ਸੋਸ੍ਸਾਮਾ’’ਤਿ ਅਗਮਂਸੁ। ਤੇ ਅવਞ੍ਝਧਮ੍ਮਦੇਸਕਸ੍ਸ ਭਗવਤੋ ਧਮ੍ਮਦੇਸਨਂ ਸੁਤ੍વਾ ਪਰਿਸਨ੍ਤਰੇ ਨਿਸਿਨ੍ਨਾવ ਚਿਨ੍ਤੇਸੁਂ – ‘‘ਨ ਸਕ੍ਕਾ ਅਗਾਰਮਜ੍ਝੇ ਠਿਤੇਨਾਯਂ ਧਮ੍ਮੋ ਪਰਿਪੂਰੇਤੁ’’ਨ੍ਤਿ। ਅਥ ਪਕ੍ਕਨ੍ਤੇ ਮਹਾਜਨੇ ਭਗવਨ੍ਤਂ ਪਬ੍ਬਜ੍ਜਂ ਯਾਚਿਂਸੁ। ਭਗવਾ ‘‘ਇਮੇ ਪਬ੍ਬਾਜੇਹੀ’’ਤਿ ਅਞ੍ਞਤਰਂ ਭਿਕ੍ਖੁਂ ਆਣਾਪੇਸਿ। ਸੋ ਤੇ ਪਬ੍ਬਾਜੇਤ੍વਾ ਤਚਪਞ੍ਚਕਕਮ੍ਮਟ੍ਠਾਨਂ ਦਤ੍વਾ ਅਰਞ੍ਞવਾਸਂ ਗਨ੍ਤੁਮਾਰਦ੍ਧੋ। ਮੇਤ੍ਤੇਯ੍ਯੋ ਤਿਸ੍ਸਂ ਆਹ – ‘‘ਆવੁਸੋ, ਉਪਜ੍ਝਾਯੋ ਅਰਞ੍ਞਂ ਗਚ੍ਛਤਿ, ਮਯਮ੍ਪਿ ਗਚ੍ਛਾਮਾ’’ਤਿ। ਤਿਸ੍ਸੋ ‘‘ਅਲਂ ਆવੁਸੋ, ਭਗવਤੋ ਦਸ੍ਸਨਂ ਧਮ੍ਮਸ੍ਸવਨਞ੍ਚ ਅਹਂ ਪਿਹੇਮਿ, ਗਚ੍ਛ ਤ੍વ’’ਨ੍ਤਿ વਤ੍વਾ ਨ ਅਗਮਾਸਿ। ਮੇਤ੍ਤੇਯ੍ਯੋ ਉਪਜ੍ਝਾਯੇਨ ਸਹ ਗਨ੍ਤ੍વਾ ਅਰਞ੍ਞੇ ਸਮਣਧਮ੍ਮਂ ਕਰੋਨ੍ਤੋ ਨ ਚਿਰਸ੍ਸੇવ ਅਰਹਤ੍ਤਂ ਪਾਪੁਣਿ ਸਦ੍ਧਿਂ ਆਚਰਿਯੁਪਜ੍ਝਾਯੇਹਿ। ਤਿਸ੍ਸਸ੍ਸਾਪਿ ਜੇਟ੍ਠਭਾਤਾ ਬ੍ਯਾਧਿਨਾ ਕਾਲਮਕਾਸਿ। ਸੋ ਤਂ ਸੁਤ੍વਾ ਅਤ੍ਤਨੋ ਗਾਮਂ ਅਗਮਾਸਿ, ਤਤ੍ਰ ਨਂ ਞਾਤਕਾ ਪਲੋਭੇਤ੍વਾ ਉਪ੍ਪਬ੍ਬਾਜੇਸੁਂ। ਮੇਤ੍ਤੇਯ੍ਯੋਪਿ ਆਚਰਿਯੁਪਜ੍ਝਾਯੇਹਿ ਸਦ੍ਧਿਂ ਸਾવਤ੍ਥਿਂ ਆਗਤੋ। ਅਥ ਭਗવਾ વੁਤ੍ਥવਸ੍ਸੋ ਜਨਪਦਚਾਰਿਕਂ ਚਰਮਾਨੋ ਅਨੁਪੁਬ੍ਬੇਨ ਤਂ ਗਾਮਂ ਪਾਪੁਣਿ। ਤਤ੍ਥ ਮੇਤ੍ਤੇਯ੍ਯੋ ਭਗવਨ੍ਤਂ વਨ੍ਦਿਤ੍વਾ ‘‘ਇਮਸ੍ਮਿਂ, ਭਨ੍ਤੇ, ਗਾਮੇ ਮਮ ਗਿਹਿਸਹਾਯੋ ਅਤ੍ਥਿ, ਮੁਹੁਤ੍ਤਂ ਤਾવ ਆਗਮੇਥ ਅਨੁਕਮ੍ਪਂ ਉਪਾਦਾਯਾ’’ਤਿ વਤ੍વਾ ਗਾਮਂ ਪવਿਸਿਤ੍વਾ ਤਂ ਭਗવਤੋ ਸਨ੍ਤਿਕਂ ਆਨੇਤ੍વਾ ਏਕਮਨ੍ਤਂ ਠਿਤੋ ਤਸ੍ਸਤ੍ਥਾਯ ਆਦਿਗਾਥਾਯ ਭਗવਨ੍ਤਂ ਪਞ੍ਹਂ ਪੁਚ੍ਛਿ। ਤਸ੍ਸ ਭਗવਾ ਬ੍ਯਾਕਰੋਨ੍ਤੋ ਅવਸੇਸਗਾਥਾਯੋ ਅਭਾਸਿ। ਅਯਮਸ੍ਸ ਸੁਤ੍ਤਸ੍ਸ ਉਪ੍ਪਤ੍ਤਿ।
821.Methunamanuyuttassāti tissametteyyasuttaṃ. Kā uppatti? Bhagavati kira sāvatthiyaṃ viharante tissametteyyā nāma dve sahāyā sāvatthiṃ agamaṃsu. Te sāyanhasamayaṃ mahājanaṃ jetavanābhimukhaṃ gacchantaṃ disvā ‘‘kuhiṃ gacchathā’’ti pucchiṃsu. Tato tehi ‘‘buddho loke uppanno, bahujanahitāya dhammaṃ deseti, taṃ sotuṃ jetavanaṃ gacchāmā’’ti vutte ‘‘mayampi sossāmā’’ti agamaṃsu. Te avañjhadhammadesakassa bhagavato dhammadesanaṃ sutvā parisantare nisinnāva cintesuṃ – ‘‘na sakkā agāramajjhe ṭhitenāyaṃ dhammo paripūretu’’nti. Atha pakkante mahājane bhagavantaṃ pabbajjaṃ yāciṃsu. Bhagavā ‘‘ime pabbājehī’’ti aññataraṃ bhikkhuṃ āṇāpesi. So te pabbājetvā tacapañcakakammaṭṭhānaṃ datvā araññavāsaṃ gantumāraddho. Metteyyo tissaṃ āha – ‘‘āvuso, upajjhāyo araññaṃ gacchati, mayampi gacchāmā’’ti. Tisso ‘‘alaṃ āvuso, bhagavato dassanaṃ dhammassavanañca ahaṃ pihemi, gaccha tva’’nti vatvā na agamāsi. Metteyyo upajjhāyena saha gantvā araññe samaṇadhammaṃ karonto na cirasseva arahattaṃ pāpuṇi saddhiṃ ācariyupajjhāyehi. Tissassāpi jeṭṭhabhātā byādhinā kālamakāsi. So taṃ sutvā attano gāmaṃ agamāsi, tatra naṃ ñātakā palobhetvā uppabbājesuṃ. Metteyyopi ācariyupajjhāyehi saddhiṃ sāvatthiṃ āgato. Atha bhagavā vutthavasso janapadacārikaṃ caramāno anupubbena taṃ gāmaṃ pāpuṇi. Tattha metteyyo bhagavantaṃ vanditvā ‘‘imasmiṃ, bhante, gāme mama gihisahāyo atthi, muhuttaṃ tāva āgametha anukampaṃ upādāyā’’ti vatvā gāmaṃ pavisitvā taṃ bhagavato santikaṃ ānetvā ekamantaṃ ṭhito tassatthāya ādigāthāya bhagavantaṃ pañhaṃ pucchi. Tassa bhagavā byākaronto avasesagāthāyo abhāsi. Ayamassa suttassa uppatti.
ਤਤ੍ਥ ਮੇਥੁਨਮਨੁਯੁਤ੍ਤਸ੍ਸਾਤਿ ਮੇਥੁਨਧਮ੍ਮਸਮਾਯੁਤ੍ਤਸ੍ਸ। ਇਤੀਤਿ ਏવਮਾਹ। ਆਯਸ੍ਮਾਤਿ ਪਿਯવਚਨਮੇਤਂ, ਤਿਸ੍ਸੋਤਿ ਨਾਮਂ ਤਸ੍ਸ ਥੇਰਸ੍ਸ। ਸੋ ਹਿ ਤਿਸ੍ਸੋਤਿ ਨਾਮੇਨ। ਮੇਤ੍ਤੇਯ੍ਯੋਤਿ ਗੋਤ੍ਤਂ, ਗੋਤ੍ਤવਸੇਨੇવ ਚੇਸ ਪਾਕਟੋ ਅਹੋਸਿ। ਤਸ੍ਮਾ ਅਟ੍ਠੁਪ੍ਪਤ੍ਤਿਯਂ વੁਤ੍ਤਂ ‘‘ਤਿਸ੍ਸਮੇਤ੍ਤੇਯ੍ਯਾ ਨਾਮ ਦ੍વੇ ਸਹਾਯਾ’’ਤਿ। વਿਘਾਤਨ੍ਤਿ ਉਪਘਾਤਂ। ਬ੍ਰੂਹੀਤਿ ਆਚਿਕ੍ਖ। ਮਾਰਿਸਾਤਿ ਪਿਯવਚਨਮੇਤਂ, ਨਿਦੁਕ੍ਖਾਤਿ વੁਤ੍ਤਂ ਹੋਤਿ। ਸੁਤ੍વਾਨ ਤવ ਸਾਸਨਨ੍ਤਿ ਤવ વਚਨਂ ਸੁਤ੍વਾ। વਿવੇਕੇ ਸਿਕ੍ਖਿਸ੍ਸਾਮਸੇਤਿ ਸਹਾਯਂ ਆਰਬ੍ਭ ਧਮ੍ਮਦੇਸਨਂ ਯਾਚਨ੍ਤੋ ਭਣਤਿ। ਸੋ ਪਨ ਸਿਕ੍ਖਿਤਸਿਕ੍ਖੋਯੇવ।
Tattha methunamanuyuttassāti methunadhammasamāyuttassa. Itīti evamāha. Āyasmāti piyavacanametaṃ, tissoti nāmaṃ tassa therassa. So hi tissoti nāmena. Metteyyoti gottaṃ, gottavaseneva cesa pākaṭo ahosi. Tasmā aṭṭhuppattiyaṃ vuttaṃ ‘‘tissametteyyā nāma dve sahāyā’’ti. Vighātanti upaghātaṃ. Brūhīti ācikkha. Mārisāti piyavacanametaṃ, nidukkhāti vuttaṃ hoti. Sutvāna tava sāsananti tava vacanaṃ sutvā. Viveke sikkhissāmaseti sahāyaṃ ārabbha dhammadesanaṃ yācanto bhaṇati. So pana sikkhitasikkhoyeva.
੮੨੨. ਮੁਸ੍ਸਤੇ વਾਪਿ ਸਾਸਨਨ੍ਤਿ ਪਰਿਯਤ੍ਤਿਪਟਿਪਤ੍ਤਿਤੋ ਦੁવਿਧਮ੍ਪਿ ਸਾਸਨਂ ਨਸ੍ਸਤਿ। વਾਪੀਤਿ ਪਦਪੂਰਣਮਤ੍ਤਂ। ਏਤਂ ਤਸ੍ਮਿਂ ਅਨਾਰਿਯਨ੍ਤਿ ਤਸ੍ਮਿਂ ਪੁਗ੍ਗਲੇ ਏਤਂ ਅਨਰਿਯਂ, ਯਦਿਦਂ ਮਿਚ੍ਛਾਪਟਿਪਦਾ।
822.Mussatevāpi sāsananti pariyattipaṭipattito duvidhampi sāsanaṃ nassati. Vāpīti padapūraṇamattaṃ. Etaṃ tasmiṃ anāriyanti tasmiṃ puggale etaṃ anariyaṃ, yadidaṃ micchāpaṭipadā.
੮੨੩. ਏਕੋ ਪੁਬ੍ਬੇ ਚਰਿਤ੍વਾਨਾਤਿ ਪਬ੍ਬਜ੍ਜਾਸਙ੍ਖਾਤੇਨ વਾ ਗਣવੋਸ੍ਸਗ੍ਗਟ੍ਠੇਨ વਾ ਪੁਬ੍ਬੇ ਏਕੋ વਿਹਰਿਤ੍વਾ। ਯਾਨਂ ਭਨ੍ਤਂવ ਤਂ ਲੋਕੇ, ਹੀਨਮਾਹੁ ਪੁਥੁਜ੍ਜਨਨ੍ਤਿ ਤਂ વਿਬ੍ਭਨ੍ਤਕਂ ਪੁਗ੍ਗਲਂ ਯਥਾ ਹਤ੍ਥਿਯਾਨਾਦਿਯਾਨਂ ਅਦਨ੍ਤਂ વਿਸਮਂ ਆਰੋਹਤਿ, ਆਰੋਹਕਮ੍ਪਿ ਭਞ੍ਜਤਿ, ਪਪਾਤੇਪਿ ਪਪਤਤਿ। ਏવਂ ਕਾਯਦੁਚ੍ਚਰਿਤਾਦਿવਿਸਮਾਰੋਹਨੇਨ ਨਰਕਾਦੀਸੁ, ਅਤ੍ਥਭਞ੍ਜਨੇਨ ਜਾਤਿਪਪਾਤਾਦੀਸੁ ਪਪਤਨੇਨ ਚ ਯਾਨਂ ਭਨ੍ਤਂવ ਆਹੁ ਹੀਨਂ ਪੁਥੁਜ੍ਜਨਞ੍ਚ ਆਹੂਤਿ।
823.Ekopubbe caritvānāti pabbajjāsaṅkhātena vā gaṇavossaggaṭṭhena vā pubbe eko viharitvā. Yānaṃ bhantaṃva taṃ loke, hīnamāhu puthujjananti taṃ vibbhantakaṃ puggalaṃ yathā hatthiyānādiyānaṃ adantaṃ visamaṃ ārohati, ārohakampi bhañjati, papātepi papatati. Evaṃ kāyaduccaritādivisamārohanena narakādīsu, atthabhañjanena jātipapātādīsu papatanena ca yānaṃ bhantaṃva āhu hīnaṃ puthujjanañca āhūti.
੮੨੪-੫. ਯਸੋ ਕਿਤ੍ਤਿ ਚਾਤਿ ਲਾਭਸਕ੍ਕਾਰੋ ਪਸਂਸਾ ਚ। ਪੁਬ੍ਬੇਤਿ ਪਬ੍ਬਜਿਤਭਾવੇ। ਹਾਯਤੇ વਾਪਿ ਤਸ੍ਸ ਸਾਤਿ ਤਸ੍ਸ વਿਬ੍ਭਨ੍ਤਕਸ੍ਸ ਸਤੋ ਸੋ ਚ ਯਸੋ ਸਾ ਚ ਕਿਤ੍ਤਿ ਹਾਯਤਿ। ਏਤਮ੍ਪਿ ਦਿਸ੍વਾਤਿ ਏਤਮ੍ਪਿ ਪੁਬ੍ਬੇ ਯਸਕਿਤ੍ਤੀਨਂ ਭਾવਂ ਪਚ੍ਛਾ ਚ ਹਾਨਿਂ ਦਿਸ੍વਾ। ਸਿਕ੍ਖੇਥ ਮੇਥੁਨਂ વਿਪ੍ਪਹਾਤવੇਤਿ ਤਿਸ੍ਸੋ ਸਿਕ੍ਖਾ ਸਿਕ੍ਖੇਥ। ਕਿਂ ਕਾਰਣਂ? ਮੇਥੁਨਂ વਿਪ੍ਪਹਾਤવੇ, ਮੇਥੁਨਪ੍ਪਹਾਨਤ੍ਥਾਯਾਤਿ વੁਤ੍ਤਂ ਹੋਤਿ। ਯੋ ਹਿ ਮੇਥੁਨਂ ਨ વਿਪ੍ਪਜਹਤਿ, ਸਙ੍ਕਪ੍ਪੇਹਿ…ਪੇ॰… ਤਥਾવਿਧੋ । ਤਤ੍ਥ ਪਰੇਤੋਤਿ ਸਮਨ੍ਨਾਗਤੋ। ਪਰੇਸਂ ਨਿਗ੍ਘੋਸਨ੍ਤਿ ਉਪਜ੍ਝਾਯਾਦੀਨਂ ਨਿਨ੍ਦਾવਚਨਂ। ਮਙ੍ਕੁ ਹੋਤੀਤਿ ਦੁਮ੍ਮਨੋ ਹੋਤਿ।
824-5.Yaso kitti cāti lābhasakkāro pasaṃsā ca. Pubbeti pabbajitabhāve. Hāyate vāpi tassa sāti tassa vibbhantakassa sato so ca yaso sā ca kitti hāyati. Etampi disvāti etampi pubbe yasakittīnaṃ bhāvaṃ pacchā ca hāniṃ disvā. Sikkhetha methunaṃ vippahātaveti tisso sikkhā sikkhetha. Kiṃ kāraṇaṃ? Methunaṃ vippahātave, methunappahānatthāyāti vuttaṃ hoti. Yo hi methunaṃ na vippajahati, saṅkappehi…pe… tathāvidho. Tattha paretoti samannāgato. Paresaṃ nigghosanti upajjhāyādīnaṃ nindāvacanaṃ. Maṅku hotīti dummano hoti.
੮੨੬. ਇਤੋ ਪਰਾ ਗਾਥਾ ਪਾਕਟਸਮ੍ਬਨ੍ਧਾ ਏવ। ਤਾਸੁ ਸਤ੍ਥਾਨੀਤਿ ਕਾਯਦੁਚ੍ਚਰਿਤਾਦੀਨਿ। ਤਾਨਿ ਹਿ ਅਤ੍ਤਨੋ ਪਰੇਸਞ੍ਚ ਛੇਦਨਟ੍ਠੇਨ ‘‘ਸਤ੍ਥਾਨੀ’’ਤਿ વੁਚ੍ਚਨ੍ਤਿ। ਤੇਸੁ ਚਾਯਂ વਿਸੇਸਤੋ ਚੋਦਿਤੋ ਮੁਸਾવਚਨਸਤ੍ਥਾਨੇવ ਕਰੋਤਿ – ‘‘ਇਮਿਨਾ ਕਾਰਣੇਨਾਹਂ વਿਬ੍ਭਨ੍ਤੋ’’ਤਿ ਭਣਨ੍ਤੋ। ਤੇਨੇવਾਹ – ‘‘ਏਸ ਖ੍વਸ੍ਸ ਮਹਾਗੇਧੋ, ਮੋਸવਜ੍ਜਂ ਪਗਾਹਤੀ’’ਤਿ। ਤਤ੍ਥ ਏਸ ਖ੍વਸ੍ਸਾਤਿ ਏਸ ਖੋ ਅਸ੍ਸ। ਮਹਾਗੇਧੋਤਿ ਮਹਾਬਨ੍ਧਨਂ। ਕਤਮੋਤਿ ਚੇ? ਯਦਿਦਂ ਮੋਸવਜ੍ਜਂ ਪਗਾਹਤਿ, ਸ੍વਾਸ੍ਸ ਮੁਸਾવਾਦਜ੍ਝੋਗਾਹੋ ਮਹਾਗੇਧੋਤਿ વੇਦਿਤਬ੍ਬੋ।
826. Ito parā gāthā pākaṭasambandhā eva. Tāsu satthānīti kāyaduccaritādīni. Tāni hi attano paresañca chedanaṭṭhena ‘‘satthānī’’ti vuccanti. Tesu cāyaṃ visesato codito musāvacanasatthāneva karoti – ‘‘iminā kāraṇenāhaṃ vibbhanto’’ti bhaṇanto. Tenevāha – ‘‘esa khvassa mahāgedho, mosavajjaṃ pagāhatī’’ti. Tattha esa khvassāti esa kho assa. Mahāgedhoti mahābandhanaṃ. Katamoti ce? Yadidaṃ mosavajjaṃ pagāhati, svāssa musāvādajjhogāho mahāgedhoti veditabbo.
੮੨੭. ਮਨ੍ਦੋવ ਪਰਿਕਿਸ੍ਸਤੀਤਿ ਪਾਣવਧਾਦੀਨਿ ਕਰੋਨ੍ਤੋ ਤਤੋਨਿਦਾਨਞ੍ਚ ਦੁਕ੍ਖਮਨੁਭੋਨ੍ਤੋ ਭੋਗਪਰਿਯੇਸਨਰਕ੍ਖਨਾਨਿ ਚ ਕਰੋਨ੍ਤੋ ਮੋਮੂਹੋ વਿਯ ਪਰਿਕਿਲਿਸ੍ਸਤਿ।
827.Mandova parikissatīti pāṇavadhādīni karonto tatonidānañca dukkhamanubhonto bhogapariyesanarakkhanāni ca karonto momūho viya parikilissati.
੮੨੮-੯. ‘‘ਏਤਮਾਦੀਨવਂ ਞਤ੍વਾ, ਮੁਨਿ ਪੁਬ੍ਬਾਪਰੇ ਇਧਾ’’ਤਿ ਏਤਂ ‘‘ਯਸੋ ਕਿਤ੍ਤਿ ਚ ਯਾ ਪੁਬ੍ਬੇ, ਹਾਯਤੇવਾਪਿ ਤਸ੍ਸ ਸਾ’’ਤਿ ਇਤੋ ਪਭੁਤਿ વੁਤ੍ਤੇ ਪੁਬ੍ਬਾਪਰੇ ਇਧ ਇਮਸ੍ਮਿਂ ਸਾਸਨੇ ਪੁਬ੍ਬਤੋ ਅਪਰੇ ਸਮਣਭਾવਤੋ વਿਬ੍ਭਨ੍ਤਕਭਾવੇ ਆਦੀਨવਂ ਮੁਨਿ ਞਤ੍વਾ। ਏਤਦਰਿਯਾਨਮੁਤ੍ਤਮਨ੍ਤਿ ਯਦਿਦਂ વਿવੇਕਚਰਿਯਾ , ਏਤਂ ਬੁਦ੍ਧਾਦੀਨਂ ਅਰਿਯਾਨਂ ਉਤ੍ਤਮਂ, ਤਸ੍ਮਾ વਿવੇਕਞ੍ਞੇવ ਸਿਕ੍ਖੇਥਾਤਿ ਅਧਿਪ੍ਪਾਯੋ। ਨ ਤੇਨ ਸੇਟ੍ਠੋ ਮਞ੍ਞੇਥਾਤਿ ਤੇਨ ਚ વਿવੇਕੇਨ ਨ ਅਤ੍ਤਾਨਂ ‘‘ਸੇਟ੍ਠੋ ਅਹ’’ਨ੍ਤਿ ਮਞ੍ਞੇਯ੍ਯ, ਤੇਨ ਥਦ੍ਧੋ ਨ ਭવੇਯ੍ਯਾਤਿ વੁਤ੍ਤਂ ਹੋਤਿ।
828-9.‘‘Etamādīnavaṃ ñatvā, muni pubbāpare idhā’’ti etaṃ ‘‘yaso kitti ca yā pubbe, hāyatevāpi tassa sā’’ti ito pabhuti vutte pubbāpare idha imasmiṃ sāsane pubbato apare samaṇabhāvato vibbhantakabhāve ādīnavaṃ muni ñatvā. Etadariyānamuttamanti yadidaṃ vivekacariyā , etaṃ buddhādīnaṃ ariyānaṃ uttamaṃ, tasmā vivekaññeva sikkhethāti adhippāyo. Na tena seṭṭho maññethāti tena ca vivekena na attānaṃ ‘‘seṭṭho aha’’nti maññeyya, tena thaddho na bhaveyyāti vuttaṃ hoti.
੮੩੦. ਰਿਤ੍ਤਸ੍ਸਾਤਿ વਿવਿਤ੍ਤਸ੍ਸ ਕਾਯਦੁਚ੍ਚਰਿਤਾਦੀਹਿ વਿਰਹਿਤਸ੍ਸ। ਓਘਤਿਣ੍ਣਸ੍ਸ ਪਿਹਯਨ੍ਤਿ, ਕਾਮੇਸੁ ਗਧਿਤਾ ਪਜਾਤਿ વਤ੍ਥੁਕਾਮੇਸੁ ਲਗ੍ਗਾ ਸਤ੍ਤਾ ਤਸ੍ਸ ਚਤੁਰੋਘਤਿਣ੍ਣਸ੍ਸ ਪਿਹਯਨ੍ਤਿ ਇਣਾਯਿਕਾ વਿਯ ਆਣਣ੍ਯਸ੍ਸਾਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ। ਦੇਸਨਾਪਰਿਯੋਸਾਨੇ ਤਿਸ੍ਸੋ ਸੋਤਾਪਤ੍ਤਿਫਲਂ ਪਤ੍વਾ ਪਚ੍ਛਾ ਪਬ੍ਬਜਿਤ੍વਾ ਅਰਹਤ੍ਤਂ ਸਚ੍ਛਾਕਾਸੀਤਿ।
830.Rittassāti vivittassa kāyaduccaritādīhi virahitassa. Oghatiṇṇassa pihayanti, kāmesu gadhitā pajāti vatthukāmesu laggā sattā tassa caturoghatiṇṇassa pihayanti iṇāyikā viya āṇaṇyassāti arahattanikūṭena desanaṃ niṭṭhāpesi. Desanāpariyosāne tisso sotāpattiphalaṃ patvā pacchā pabbajitvā arahattaṃ sacchākāsīti.
ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ
Paramatthajotikāya khuddaka-aṭṭhakathāya
ਸੁਤ੍ਤਨਿਪਾਤ-ਅਟ੍ਠਕਥਾਯ ਤਿਸ੍ਸਮੇਤ੍ਤੇਯ੍ਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Suttanipāta-aṭṭhakathāya tissametteyyasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਸੁਤ੍ਤਨਿਪਾਤਪਾਲ਼ਿ • Suttanipātapāḷi / ੭. ਤਿਸ੍ਸਮੇਤ੍ਤੇਯ੍ਯਸੁਤ੍ਤਂ • 7. Tissametteyyasuttaṃ
