| Library / Tipiṭaka / ਤਿਪਿਟਕ • Tipiṭaka / ਸੁਤ੍ਤਨਿਪਾਤ-ਅਟ੍ਠਕਥਾ • Suttanipāta-aṭṭhakathā |
੨. ਤਿਸ੍ਸਮੇਤ੍ਤੇਯ੍ਯਸੁਤ੍ਤવਣ੍ਣਨਾ
2. Tissametteyyasuttavaṇṇanā
੧੦੪੭. ਕੋਧ ਸਨ੍ਤੁਸ੍ਸਿਤੋਤਿ ਤਿਸ੍ਸਮੇਤ੍ਤੇਯ੍ਯਸੁਤ੍ਤਂ। ਕਾ ਉਪ੍ਪਤ੍ਤਿ? ਸਬ੍ਬਸੁਤ੍ਤਾਨਂ ਪੁਚ੍ਛਾવਸਿਕਾ ਏવ ਉਪ੍ਪਤ੍ਤਿ। ਤੇ ਹਿ ਬ੍ਰਾਹ੍ਮਣਾ ‘‘ਕਤਾવਕਾਸਾ ਪੁਚ੍ਛવ੍ਹੋ’’ਤਿ ਭਗવਤਾ ਪવਾਰਿਤਤ੍ਤਾ ਅਤ੍ਤਨੋ ਅਤ੍ਤਨੋ ਸਂਸਯਂ ਪੁਚ੍ਛਿਂਸੁ। ਪੁਟ੍ਠੋ ਪੁਟ੍ਠੋ ਚ ਤੇਸਂ ਭਗવਾ ਬ੍ਯਾਕਾਸਿ। ਏવਂ ਪੁਚ੍ਛਾવਸਿਕਾਨੇવੇਤਾਨਿ ਸੁਤ੍ਤਾਨੀਤਿ વੇਦਿਤਬ੍ਬਾਨਿ।
1047.Kodhasantussitoti tissametteyyasuttaṃ. Kā uppatti? Sabbasuttānaṃ pucchāvasikā eva uppatti. Te hi brāhmaṇā ‘‘katāvakāsā pucchavho’’ti bhagavatā pavāritattā attano attano saṃsayaṃ pucchiṃsu. Puṭṭho puṭṭho ca tesaṃ bhagavā byākāsi. Evaṃ pucchāvasikānevetāni suttānīti veditabbāni.
ਨਿਟ੍ਠਿਤੇ ਪਨ ਅਜਿਤਪਞ੍ਹੇ ‘‘ਕਥਂ ਲੋਕਂ ਅવੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤੀ’’ਤਿ (ਸੁ॰ ਨਿ॰ ੧੧੨੪; ਚੂਲ਼ਨਿ॰ ਪਿਙ੍ਗਿਯਮਾਣવਪੁਚ੍ਛਾ ੧੪੪) ਏવਂ ਮੋਘਰਾਜਾ ਪੁਚ੍ਛਿਤੁਂ ਆਰਭਿ। ਤਂ ‘‘ਨ ਤਾવਸ੍ਸ ਇਨ੍ਦ੍ਰਿਯਾਨਿ ਪਰਿਪਾਕਂ ਗਤਾਨੀ’’ਤਿ ਞਤ੍વਾ ਭਗવਾ ‘‘ਤਿਟ੍ਠ ਤ੍વਂ, ਮੋਘਰਾਜ, ਅਞ੍ਞੋ ਪੁਚ੍ਛਤੂ’’ਤਿ ਪਟਿਕ੍ਖਿਪਿ। ਤਤੋ ਤਿਸ੍ਸਮੇਤ੍ਤੇਯ੍ਯੋ ਅਤ੍ਤਨੋ ਸਂਸਯਂ ਪੁਚ੍ਛਨ੍ਤੋ ‘‘ਕੋਧਾ’’ਤਿ ਗਾਥਮਾਹ। ਤਤ੍ਥ ਕੋਧ ਸਨ੍ਤੁਸ੍ਸਿਤੋਤਿ ਕੋ ਇਧ ਤੁਟ੍ਠੋ। ਇਞ੍ਜਿਤਾਤਿ ਤਣ੍ਹਾਦਿਟ੍ਠਿવਿਪ੍ਫਨ੍ਦਿਤਾਨਿ। ਉਭਨ੍ਤਮਭਿਞ੍ਞਾਯਾਤਿ ਉਭੋ ਅਨ੍ਤੇ ਅਭਿਜਾਨਿਤ੍વਾ। ਮਨ੍ਤਾ ਨ ਲਿਪ੍ਪਤੀਤਿ ਪਞ੍ਞਾਯ ਨ ਲਿਪ੍ਪਤਿ।
Niṭṭhite pana ajitapañhe ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. piṅgiyamāṇavapucchā 144) evaṃ mogharājā pucchituṃ ārabhi. Taṃ ‘‘na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhā’’ti gāthamāha. Tattha kodha santussitoti ko idha tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
੧੦੪੮-੯. ਤਸ੍ਸੇਤਮਤ੍ਥਂ ਬ੍ਯਾਕਰੋਨ੍ਤੋ ਭਗવਾ ‘‘ਕਾਮੇਸੂ’’ਤਿ ਗਾਥਾਦ੍વਯਮਾਹ। ਤਤ੍ਥ ਕਾਮੇਸੁ ਬ੍ਰਹ੍ਮਚਰਿਯવਾਤਿ ਕਾਮਨਿਮਿਤ੍ਤਂ ਬ੍ਰਹ੍ਮਚਰਿਯવਾ, ਕਾਮੇਸੁ ਆਦੀਨવਂ ਦਿਸ੍વਾ ਮਗ੍ਗਬ੍ਰਹ੍ਮਚਰਿਯੇਨ ਸਮਨ੍ਨਾਗਤੋਤਿ વੁਤ੍ਤਂ ਹੋਤਿ। ਏਤ੍ਤਾવਤਾ ਸਨ੍ਤੁਸਿਤਂ ਦਸ੍ਸੇਤਿ, ‘‘વੀਤਤਣ੍ਹੋ’’ਤਿਆਦੀਹਿ ਅਨਿਞ੍ਜਿਤਂ । ਤਤ੍ਥ ਸਙ੍ਖਾਯ ਨਿਬ੍ਬੁਤੋਤਿ ਅਨਿਚ੍ਚਾਦਿવਸੇਨ ਧਮ੍ਮੇ વੀਮਂਸਿਤ੍વਾ ਰਾਗਾਦਿਨਿਬ੍ਬਾਨੇਨ ਨਿਬ੍ਬੁਤੋ। ਸੇਸਂ ਤਤ੍ਥ ਤਤ੍ਥ વੁਤ੍ਤਨਯਤ੍ਤਾ ਪਾਕਟਮੇવ।
1048-9. Tassetamatthaṃ byākaronto bhagavā ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitaṃ dasseti, ‘‘vītataṇho’’tiādīhi aniñjitaṃ . Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto. Sesaṃ tattha tattha vuttanayattā pākaṭameva.
ਏવਂ ਭਗવਾ ਇਮਮ੍ਪਿ ਸੁਤ੍ਤਂ ਅਰਹਤ੍ਤਨਿਕੂਟੇਨੇવ ਦੇਸੇਸਿ। ਦੇਸਨਾਪਰਿਯੋਸਾਨੇ ਅਯਮ੍ਪਿ ਬ੍ਰਾਹ੍ਮਣੋ ਅਰਹਤ੍ਤੇ ਪਤਿਟ੍ਠਾਸਿ ਸਦ੍ਧਿਂ ਅਨ੍ਤੇવਾਸਿਸਹਸ੍ਸੇਨ, ਅਞ੍ਞੇਸਞ੍ਚ ਅਨੇਕਸਹਸ੍ਸਾਨਂ ਧਮ੍ਮਚਕ੍ਖੁਂ ਉਦਪਾਦਿ। ਸੇਸਂ ਪੁਬ੍ਬਸਦਿਸਮੇવਾਤਿ।
Evaṃ bhagavā imampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsisahassena, aññesañca anekasahassānaṃ dhammacakkhuṃ udapādi. Sesaṃ pubbasadisamevāti.
ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ
Paramatthajotikāya khuddaka-aṭṭhakathāya
ਸੁਤ੍ਤਨਿਪਾਤ-ਅਟ੍ਠਕਥਾਯ ਤਿਸ੍ਸਮੇਤ੍ਤੇਯ੍ਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Suttanipāta-aṭṭhakathāya tissametteyyasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਸੁਤ੍ਤਨਿਪਾਤਪਾਲ਼ਿ • Suttanipātapāḷi / ੨. ਤਿਸ੍ਸਮੇਤ੍ਤੇਯ੍ਯਮਾਣવਪੁਚ੍ਛਾ • 2. Tissametteyyamāṇavapucchā
