| Library / Tipiṭaka / তিপিটক • Tipiṭaka / অপদানপাল়ি • Apadānapāḷi |
৪১. মেত্তেয্যৰগ্গো
41. Metteyyavaggo
১. তিস্সমেত্তেয্যত্থেরঅপদানং
1. Tissametteyyattheraapadānaṃ
১.
1.
‘‘পব্ভারকূটং নিস্সায, সোভিতো নাম তাপসো।
‘‘Pabbhārakūṭaṃ nissāya, sobhito nāma tāpaso;
পৰত্তফলং ভুঞ্জিত্ৰা, ৰসতি পব্বতন্তরে॥
Pavattaphalaṃ bhuñjitvā, vasati pabbatantare.
২.
2.
‘‘অগ্গিং দারুং আহরিত্ৰা, উজ্জালেসিং অহং তদা।
‘‘Aggiṃ dāruṃ āharitvā, ujjālesiṃ ahaṃ tadā;
উত্তমত্থং গৰেসন্তো, ব্রহ্মলোকূপপত্তিযা॥
Uttamatthaṃ gavesanto, brahmalokūpapattiyā.
৩.
3.
‘‘পদুমুত্তরো লোকৰিদূ, আহুতীনং পটিগ্গহো।
‘‘Padumuttaro lokavidū, āhutīnaṃ paṭiggaho;
মমুদ্ধরিতুকামো সো, আগচ্ছি মম সন্তিকে॥
Mamuddharitukāmo so, āgacchi mama santike.
৪.
4.
‘‘কিং করোসি মহাপুঞ্ঞ, দেহি মে অগ্গিদারুকং।
‘‘Kiṃ karosi mahāpuñña, dehi me aggidārukaṃ;
৫.
5.
‘‘সুভদ্দকো ত্ৰং মনুজে, দেৰতে ত্ৰং পজানসি।
‘‘Subhaddako tvaṃ manuje, devate tvaṃ pajānasi;
তুৰং অগ্গিং পরিচর, হন্দ তে অগ্গিদারুকং॥
Tuvaṃ aggiṃ paricara, handa te aggidārukaṃ.
৬.
6.
‘‘ততো কট্ঠং গহেত্ৰান, অগ্গিং উজ্জালযী জিনো।
‘‘Tato kaṭṭhaṃ gahetvāna, aggiṃ ujjālayī jino;
ন তত্থ কট্ঠং পজ্ঝাযি, পাটিহেরং মহেসিনো॥
Na tattha kaṭṭhaṃ pajjhāyi, pāṭiheraṃ mahesino.
৭.
7.
‘‘ন তে অগ্গি পজ্জলতি, আহুতী তে ন ৰিজ্জতি।
‘‘Na te aggi pajjalati, āhutī te na vijjati;
নিরত্থকং ৰতং তুয্হং, অগ্গিং পরিচরস্সু মে॥
Niratthakaṃ vataṃ tuyhaṃ, aggiṃ paricarassu me.
৮.
8.
ময্হম্পি কথযস্সেতং, উভো পরিচরামসে॥
Mayhampi kathayassetaṃ, ubho paricarāmase.
৯.
9.
‘‘হেতুধম্মনিরোধায , কিলেসসমণায চ।
‘‘Hetudhammanirodhāya , kilesasamaṇāya ca;
ইস্সামচ্ছরিযং হিত্ৰা, তযো এতে মমাহুতী॥
Issāmacchariyaṃ hitvā, tayo ete mamāhutī.
১০.
10.
‘‘কীদিসো ত্ৰং মহাৰীর, কথং গোত্তোসি মারিস।
‘‘Kīdiso tvaṃ mahāvīra, kathaṃ gottosi mārisa;
আচারপটিপত্তি তে, বাল়্হং খো মম রুচ্চতি॥
Ācārapaṭipatti te, bāḷhaṃ kho mama ruccati.
১১.
11.
‘‘খত্তিযম্হি কুলে জাতো, অভিঞ্ঞাপারমিং গতো।
‘‘Khattiyamhi kule jāto, abhiññāpāramiṃ gato;
সব্বাসৰপরিক্খীণো, নত্থি দানি পুনব্ভৰো॥
Sabbāsavaparikkhīṇo, natthi dāni punabbhavo.
১২.
12.
‘‘যদি বুদ্ধোসি সব্বঞ্ঞূ, পভঙ্কর তমোনুদ।
‘‘Yadi buddhosi sabbaññū, pabhaṅkara tamonuda;
নমস্সিস্সামি তং দেৰ, দুক্খস্সন্তকরো তুৰং॥
Namassissāmi taṃ deva, dukkhassantakaro tuvaṃ.
১৩.
13.
‘‘পত্থরিত্ৰাজিনচম্মং, নিসীদনমদাসহং।
‘‘Pattharitvājinacammaṃ, nisīdanamadāsahaṃ;
নিসীদ নাথ সব্বঞ্ঞু, উপট্ঠিস্সামহং তুৰং॥
Nisīda nātha sabbaññu, upaṭṭhissāmahaṃ tuvaṃ.
১৪.
14.
‘‘নিসীদি ভগৰা তত্থ, অজিনম্হি সুৰিত্থতে।
‘‘Nisīdi bhagavā tattha, ajinamhi suvitthate;
নিমন্তযিত্ৰা সম্বুদ্ধং, পব্বতং অগমাসহং॥
Nimantayitvā sambuddhaṃ, pabbataṃ agamāsahaṃ.
১৫.
15.
‘‘খারিভারঞ্চ পূরেত্ৰা, তিন্দুকফলমাহরিং।
‘‘Khāribhārañca pūretvā, tindukaphalamāhariṃ;
মধুনা যোজযিত্ৰান, ফলং বুদ্ধস্সদাসহং॥
Madhunā yojayitvāna, phalaṃ buddhassadāsahaṃ.
১৬.
16.
‘‘মম নিজ্ঝাযমানস্স, পরিভুঞ্জি তদা জিনো।
‘‘Mama nijjhāyamānassa, paribhuñji tadā jino;
তত্থ চিত্তং পসাদেসিং, পেক্খন্তো লোকনাযকং॥
Tattha cittaṃ pasādesiṃ, pekkhanto lokanāyakaṃ.
১৭.
17.
‘‘পদুমুত্তরো লোকৰিদূ, আহুতীনং পটিগ্গহো।
‘‘Padumuttaro lokavidū, āhutīnaṃ paṭiggaho;
মমস্সমে নিসীদিত্ৰা, ইমা গাথা অভাসথ॥
Mamassame nisīditvā, imā gāthā abhāsatha.
১৮.
18.
‘‘‘যো মং ফলেন তপ্পেসি, পসন্নো সেহি পাণিভি।
‘‘‘Yo maṃ phalena tappesi, pasanno sehi pāṇibhi;
তমহং কিত্তযিস্সামি, সুণাথ মম ভাসতো॥
Tamahaṃ kittayissāmi, suṇātha mama bhāsato.
১৯.
19.
‘‘‘পঞ্চৰীসতিক্খত্তুং সো, দেৰরজ্জং করিস্সতি।
‘‘‘Pañcavīsatikkhattuṃ so, devarajjaṃ karissati;
সহস্সক্খত্তুং রাজা চ, চক্কৰত্তী ভৰিস্সতি॥
Sahassakkhattuṃ rājā ca, cakkavattī bhavissati.
২০.
20.
‘‘‘তস্স সঙ্কপ্পমঞ্ঞায, পুব্বকম্মসমঙ্গিনো।
‘‘‘Tassa saṅkappamaññāya, pubbakammasamaṅgino;
অন্নং পানঞ্চ ৰত্থঞ্চ, সযনঞ্চ মহারহং॥
Annaṃ pānañca vatthañca, sayanañca mahārahaṃ.
২১.
21.
‘‘‘পুঞ্ঞকম্মেন সংযুত্তা, নিব্বত্তিস্সন্তি তাৰদে।
‘‘‘Puññakammena saṃyuttā, nibbattissanti tāvade;
সদা পমুদিতো চাযং, ভৰিস্সতি অনামযো॥
Sadā pamudito cāyaṃ, bhavissati anāmayo.
২২.
22.
‘‘‘উপপজ্জতি যং যোনিং, দেৰত্তং অথ মানুসং।
‘‘‘Upapajjati yaṃ yoniṃ, devattaṃ atha mānusaṃ;
সব্বত্থ সুখিতো হুত্ৰা, মনুস্সত্তং গমিস্সতি॥
Sabbattha sukhito hutvā, manussattaṃ gamissati.
২৩.
23.
‘‘‘অজ্ঝাযকো মন্তধরো, তিণ্ণং ৰেদান পারগূ।
‘‘‘Ajjhāyako mantadharo, tiṇṇaṃ vedāna pāragū;
সম্বুদ্ধং উপগন্ত্ৰান, অরহা সো ভৰিস্সতি’॥
Sambuddhaṃ upagantvāna, arahā so bhavissati’.
২৪.
24.
‘‘যতো সরামি অত্তানং, যতো পত্তোস্মি ৰিঞ্ঞুতং।
‘‘Yato sarāmi attānaṃ, yato pattosmi viññutaṃ;
ভোগে মে ঊনতা নত্থি, ফলদানস্সিদং ফলং॥
Bhoge me ūnatā natthi, phaladānassidaṃ phalaṃ.
২৫.
25.
‘‘ৰরধম্মমনুপ্পত্তো, রাগদোসে সমূহনিং।
‘‘Varadhammamanuppatto, rāgadose samūhaniṃ;
সব্বাসৰপরিক্খীণো, নত্থি দানি পুনব্ভৰো॥
Sabbāsavaparikkhīṇo, natthi dāni punabbhavo.
২৬.
26.
‘‘কিলেসা ঝাপিতা ময্হং, ভৰা সব্বে সমূহতা।
‘‘Kilesā jhāpitā mayhaṃ, bhavā sabbe samūhatā;
নাগোৰ বন্ধনং ছেত্ৰা, ৰিহরামি অনাসৰো॥
Nāgova bandhanaṃ chetvā, viharāmi anāsavo.
২৭.
27.
‘‘স্ৰাগতং ৰত মে আসি, মম বুদ্ধস্স সন্তিকে।
‘‘Svāgataṃ vata me āsi, mama buddhassa santike;
তিস্সো ৰিজ্জা অনুপ্পত্তা, কতং বুদ্ধস্স সাসনং॥
Tisso vijjā anuppattā, kataṃ buddhassa sāsanaṃ.
২৮.
28.
‘‘পটিসম্ভিদা চতস্সো, ৰিমোক্খাপি চ অট্ঠিমে।
‘‘Paṭisambhidā catasso, vimokkhāpi ca aṭṭhime;
ছল়ভিঞ্ঞা সচ্ছিকতা, কতং বুদ্ধস্স সাসনং’’॥
Chaḷabhiññā sacchikatā, kataṃ buddhassa sāsanaṃ’’.
ইত্থং সুদং আযস্মা তিস্সমেত্তেয্যো থেরো ইমা গাথাযো অভাসিত্থাতি।
Itthaṃ sudaṃ āyasmā tissametteyyo thero imā gāthāyo abhāsitthāti.
তিস্সমেত্তেয্যত্থেরস্সাপদানং পঠমং।
Tissametteyyattherassāpadānaṃ paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / অপদান-অট্ঠকথা • Apadāna-aṭṭhakathā / ১. তিস্সমেত্তেয্যত্থেরঅপদানৰণ্ণনা • 1. Tissametteyyattheraapadānavaṇṇanā
