| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. তিস্সসুত্তৰণ্ণনা
9. Tissasuttavaṇṇanā
২৪৩. ভণ্ডকন্তি পত্তচীৰরং। নিসীদিযেৰ ৰত্তস্স অসিক্খিতত্তা। তুজ্জনত্থেন ৰাচা এৰ সত্তিযোতি আহ ‘‘ৰাচাসত্তীহী’’তি।
243.Bhaṇḍakanti pattacīvaraṃ. Nisīdiyeva vattassa asikkhitattā. Tujjanatthena vācā eva sattiyoti āha ‘‘vācāsattīhī’’ti.
ৰাচায সন্নিতোদকেনাতি ৰচনসঙ্খাতেন সমন্ততো নিচ্চং কত্ৰা উপতুদনতো সন্নিতুদকেন। ৰিভত্তিঅলোপেন সো নিদ্দেসো। তেনাহ ‘‘ৰচনপতোদেনা’’তি।
Vācāya sannitodakenāti vacanasaṅkhātena samantato niccaṃ katvā upatudanato sannitudakena. Vibhattialopena so niddeso. Tenāha ‘‘vacanapatodenā’’ti.
উচ্চকুলে জাতি এতস্সাতি জাতিমা, ব্রহ্মজাতিকো ইসি। মাতঙ্গোতি চণ্ডালো। তত্থাতি কুম্ভকারসালাযং। ওকাসং যাচি কুম্ভকারং। মহন্তং দিস্ৰা আহ – ‘‘পঠমতরং পৰিট্ঠো পব্বজিতো’’তি। তত্থেৰাতি তস্সাযেৰ সালায দ্ৰারং নিস্সায দ্ৰারসমীপে। মেতি মযা। খম ময্হন্তি ময্হং অপরাধং খমস্সু। তেতি তযা। পুন তেতি তৰ। গণ্হি উগ্গন্তুং অপ্পদানৰসেন। তেনাহ ‘‘নাস্স উগ্গন্তুং অদাসী’’তি। পবুজ্ঝিংসূতি নিদ্দায পবুজ্ঝিংসু পকতিযা পবুজ্ঝনৰেলায উপগতত্তা।
Uccakule jāti etassāti jātimā, brahmajātiko isi. Mātaṅgoti caṇḍālo. Tatthāti kumbhakārasālāyaṃ. Okāsaṃ yāci kumbhakāraṃ. Mahantaṃ disvā āha – ‘‘paṭhamataraṃ paviṭṭho pabbajito’’ti. Tatthevāti tassāyeva sālāya dvāraṃ nissāya dvārasamīpe. Meti mayā. Khama mayhanti mayhaṃ aparādhaṃ khamassu. Teti tayā. Puna teti tava. Gaṇhi uggantuṃ appadānavasena. Tenāha ‘‘nāssa uggantuṃ adāsī’’ti. Pabujjhiṃsūti niddāya pabujjhiṃsu pakatiyā pabujjhanavelāya upagatattā.
ছৰোতি নিহীনো। অনন্তমাযোতি ৰিৰিধমাযো মাযাৰী।
Chavoti nihīno. Anantamāyoti vividhamāyo māyāvī.
সোতি মত্তিকাপিণ্ডো। ‘‘সত্তধা ভিজ্জী’’তি এত্থাযমধিপ্পাযো – যং তেন তাপসেন পারমিতাপরিভাৰনসমিদ্ধাহি নানাৰিহারসমাপত্তিপরিপূরিতাহি সীলদিট্ঠিসম্পদাদীহি সুসঙ্খতসন্তানে মহাকরুণাধিৰাসে মহাসত্তে বোধিসত্তে অরিযূপৰাদকম্মং অভিসপসঙ্খাতং ফরুসৰচনং পৰত্তিতং, তং মহাসত্তস্স খেত্তৰিসেসভাৰতো তস্স চ অজ্ঝাসযফরুসতায দিট্ঠধম্মৰেদনীযং হুত্ৰা সচে সো মহাসত্তং ন খমাপেতি, তং কক্খল়ং হুত্ৰা ৰিপচ্চনসভাৰং জাতং, খমাপিতে পন মহাসত্তে পযোগসম্পত্তিপটিবাহিতত্তা অৰিপাকধম্মতং আপজ্জতি অহোসিকম্মভাৰতো। অযঞ্হি অরিযূপৰাদপাপস্স দিট্ঠধম্মৰেদনীযস্স চ ধম্মতা। যং তং বোধিসত্তেন সূরিযুগ্গমননিৰারণং কতং, অযং বোধিসত্তেন দিট্ঠো উপাযো। তেন হি উব্বাল়্হা মনুস্সা বোধিসত্তস্স সন্তিকে তাপসং আনেত্ৰা খমাপেসুং। সোপি চ মহাসত্তস্স গুণে জানিত্ৰা তস্মিং চিত্তং পসাদেসি। যং পনস্স মত্থকে মত্তিকাপিণ্ডস্স ঠপনং তস্স সত্তধা ফালনং কতং, তং মনুস্সানং চিত্তানুরক্খণত্থং। অঞ্ঞথা হি ইমে পব্বজিতা সমানা চিত্তস্স ৰসং ৰত্তন্তি, ন পন চিত্তমত্তনো ৰসে ৰত্তাপেন্তীতি মহাসত্তম্পি তেন সদিসং কত্ৰা গণ্হেয্যুং, তদস্স নেসং দীঘরত্তং অহিতায দুক্খাযাতি। পতিরূপন্তি যুত্তং।
Soti mattikāpiṇḍo. ‘‘Sattadhā bhijjī’’ti etthāyamadhippāyo – yaṃ tena tāpasena pāramitāparibhāvanasamiddhāhi nānāvihārasamāpattiparipūritāhi sīladiṭṭhisampadādīhi susaṅkhatasantāne mahākaruṇādhivāse mahāsatte bodhisatte ariyūpavādakammaṃ abhisapasaṅkhātaṃ pharusavacanaṃ pavattitaṃ, taṃ mahāsattassa khettavisesabhāvato tassa ca ajjhāsayapharusatāya diṭṭhadhammavedanīyaṃ hutvā sace so mahāsattaṃ na khamāpeti, taṃ kakkhaḷaṃ hutvā vipaccanasabhāvaṃ jātaṃ, khamāpite pana mahāsatte payogasampattipaṭibāhitattā avipākadhammataṃ āpajjati ahosikammabhāvato. Ayañhi ariyūpavādapāpassa diṭṭhadhammavedanīyassa ca dhammatā. Yaṃ taṃ bodhisattena sūriyuggamananivāraṇaṃ kataṃ, ayaṃ bodhisattena diṭṭho upāyo. Tena hi ubbāḷhā manussā bodhisattassa santike tāpasaṃ ānetvā khamāpesuṃ. Sopi ca mahāsattassa guṇe jānitvā tasmiṃ cittaṃ pasādesi. Yaṃ panassa matthake mattikāpiṇḍassa ṭhapanaṃ tassa sattadhā phālanaṃ kataṃ, taṃ manussānaṃ cittānurakkhaṇatthaṃ. Aññathā hi ime pabbajitā samānā cittassa vasaṃ vattanti, na pana cittamattano vase vattāpentīti mahāsattampi tena sadisaṃ katvā gaṇheyyuṃ, tadassa nesaṃ dīgharattaṃ ahitāya dukkhāyāti. Patirūpanti yuttaṃ.
তিস্সসুত্তৰণ্ণনা নিট্ঠিতা।
Tissasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. তিস্সসুত্তং • 9. Tissasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. তিস্সসুত্তৰণ্ণনা • 9. Tissasuttavaṇṇanā
