| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. তিস্সসুত্তৰণ্ণনা
2. Tissasuttavaṇṇanā
৮৪. মধুরকং ৰুচ্চতি কাযে ৰিভারন্তি আহ – ‘‘মধুরকজাতো ৰিযাতি সঞ্জাতগরুভাৰো ৰিযা’’তি। গরুভাৰে সতি লহুতা অনোকাসাৰ, তথা মুদুতা কম্মঞ্ঞতা চাতি ৰুত্তং ‘‘অকম্মঞ্ঞো’’তি। ‘‘কাযে’’তি আনেত্ৰা ৰত্তব্বং। ন পক্খাযন্তীতি পকাসা হুত্ৰা ন খাযন্তি। তেনাহ ‘‘ন পাকটা হোন্তী’’তি। উপট্ঠহন্তীতি উপতিট্ঠন্তি। ন দিস্সতীতি গহণং ন গচ্ছতি। মহাৰিচিকিচ্ছাতি অট্ঠৰত্থুকা সোল়সৰত্থুকা চ ৰিমতি। ন হি উপ্পজ্জতি পরিপক্ককুসলমূলত্তা।
84. Madhurakaṃ vuccati kāye vibhāranti āha – ‘‘madhurakajāto viyāti sañjātagarubhāvo viyā’’ti. Garubhāve sati lahutā anokāsāva, tathā mudutā kammaññatā cāti vuttaṃ ‘‘akammañño’’ti. ‘‘Kāye’’ti ānetvā vattabbaṃ. Na pakkhāyantīti pakāsā hutvā na khāyanti. Tenāha ‘‘na pākaṭā hontī’’ti. Upaṭṭhahantīti upatiṭṭhanti. Na dissatīti gahaṇaṃ na gacchati. Mahāvicikicchāti aṭṭhavatthukā soḷasavatthukā ca vimati. Na hi uppajjati paripakkakusalamūlattā.
কামানমেতং অধিৰচনন্তি পদং উদ্ধরিত্ৰা যেন অধিপ্পাযেন ভগৰতা নিন্নং পল্ললং কামানং নিদস্সনভাৰেন আভতং, তং অধিপ্পাযং ৰিভাৰেতুং ‘‘যথা হী’’তিআদি ৰুত্তং।
Kāmānametaṃ adhivacananti padaṃ uddharitvā yena adhippāyena bhagavatā ninnaṃ pallalaṃ kāmānaṃ nidassanabhāvena ābhataṃ, taṃ adhippāyaṃ vibhāvetuṃ ‘‘yathā hī’’tiādi vuttaṃ.
তিস্সসুত্তৰণ্ণনা নিট্ঠিতা।
Tissasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. তিস্সসুত্তং • 2. Tissasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. তিস্সসুত্তৰণ্ণনা • 2. Tissasuttavaṇṇanā
