| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
२. तिस्ससुत्तवण्णना
2. Tissasuttavaṇṇanā
८४. मधुरकं वुच्चति काये विभारन्ति आह – ‘‘मधुरकजातो वियाति सञ्जातगरुभावो विया’’ति। गरुभावे सति लहुता अनोकासाव, तथा मुदुता कम्मञ्ञता चाति वुत्तं ‘‘अकम्मञ्ञो’’ति। ‘‘काये’’ति आनेत्वा वत्तब्बं। न पक्खायन्तीति पकासा हुत्वा न खायन्ति। तेनाह ‘‘न पाकटा होन्ती’’ति। उपट्ठहन्तीति उपतिट्ठन्ति। न दिस्सतीति गहणं न गच्छति। महाविचिकिच्छाति अट्ठवत्थुका सोळसवत्थुका च विमति। न हि उप्पज्जति परिपक्ककुसलमूलत्ता।
84. Madhurakaṃ vuccati kāye vibhāranti āha – ‘‘madhurakajāto viyāti sañjātagarubhāvo viyā’’ti. Garubhāve sati lahutā anokāsāva, tathā mudutā kammaññatā cāti vuttaṃ ‘‘akammañño’’ti. ‘‘Kāye’’ti ānetvā vattabbaṃ. Na pakkhāyantīti pakāsā hutvā na khāyanti. Tenāha ‘‘na pākaṭā hontī’’ti. Upaṭṭhahantīti upatiṭṭhanti. Na dissatīti gahaṇaṃ na gacchati. Mahāvicikicchāti aṭṭhavatthukā soḷasavatthukā ca vimati. Na hi uppajjati paripakkakusalamūlattā.
कामानमेतं अधिवचनन्ति पदं उद्धरित्वा येन अधिप्पायेन भगवता निन्नं पल्ललं कामानं निदस्सनभावेन आभतं, तं अधिप्पायं विभावेतुं ‘‘यथा ही’’तिआदि वुत्तं।
Kāmānametaṃ adhivacananti padaṃ uddharitvā yena adhippāyena bhagavatā ninnaṃ pallalaṃ kāmānaṃ nidassanabhāvena ābhataṃ, taṃ adhippāyaṃ vibhāvetuṃ ‘‘yathā hī’’tiādi vuttaṃ.
तिस्ससुत्तवण्णना निट्ठिता।
Tissasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / २. तिस्ससुत्तं • 2. Tissasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / २. तिस्ससुत्तवण्णना • 2. Tissasuttavaṇṇanā
