| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
৪. তিস্সাথেরীগাথাৰণ্ণনা
4. Tissātherīgāthāvaṇṇanā
তিস্সে সিক্খস্সু সিক্খাযাতি তিস্সায সিক্খমানায গাথা। অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা সম্ভতকুসলপচ্চযা ইমস্মিং বুদ্ধুপ্পাদে কপিলৰত্থুস্মিং সক্যরাজকুলে নিব্বত্তিত্ৰা ৰযপ্পত্তা বোধিসত্তস্স ওরোধভূতা পচ্ছা মহাপজাপতিগোতমিযা সদ্ধিং নিক্খমিত্ৰা পব্বজিত্ৰা ৰিপস্সনায কম্মং করোতি। তস্সা সত্থা হেট্ঠা ৰুত্তনযেনেৰ ওভাসং ৰিস্সজ্জেত্ৰা –
Tisse sikkhassu sikkhāyāti tissāya sikkhamānāya gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā sambhatakusalapaccayā imasmiṃ buddhuppāde kapilavatthusmiṃ sakyarājakule nibbattitvā vayappattā bodhisattassa orodhabhūtā pacchā mahāpajāpatigotamiyā saddhiṃ nikkhamitvā pabbajitvā vipassanāya kammaṃ karoti. Tassā satthā heṭṭhā vuttanayeneva obhāsaṃ vissajjetvā –
৪.
4.
‘‘তিস্সে সিক্খস্সু সিক্খায, মা তং যোগা উপচ্চগুং।
‘‘Tisse sikkhassu sikkhāya, mā taṃ yogā upaccaguṃ;
সব্বযোগৰিসংযুত্তা, চর লোকে অনাসৰা’’তি॥ – গাথং অভাসি।
Sabbayogavisaṃyuttā, cara loke anāsavā’’ti. – gāthaṃ abhāsi;
তত্থ তিস্সেতি তস্সা আলপনং। সিক্খস্সু সিক্খাযাতি অধিসীলসিক্খাদিকায তিৰিধায সিক্খায সিক্খ, মগ্গসম্পযুত্তা তিস্সো সিক্খাযো সম্পাদেহীতি অত্থো। ইদানি তাসং সম্পাদনে কারণমাহ ‘‘মা তং যোগা উপচ্চগু’’ন্তি মনুস্সত্তং, ইন্দ্রিযাৰেকল্লং, বুদ্ধুপ্পাদো, সদ্ধাপটিলাভোতি ইমে যোগা সমযা দুল্লভক্খণা তং মা অতিক্কমুং। কামযোগাদযো এৰ ৰা চত্তারো যোগা তং মা উপচ্চগুং মা অভিভৰেয্যুং। সব্বযোগৰিসংযুত্তাতি সব্বেহি কামযোগাদীহি যোগেহি ৰিমুত্তা ততো এৰ অনাসৰা হুত্ৰা লোকে চর, দিট্ঠসুখৰিহারেন ৰিহরাহীতি অত্থো।
Tattha tisseti tassā ālapanaṃ. Sikkhassu sikkhāyāti adhisīlasikkhādikāya tividhāya sikkhāya sikkha, maggasampayuttā tisso sikkhāyo sampādehīti attho. Idāni tāsaṃ sampādane kāraṇamāha ‘‘mā taṃ yogā upaccagu’’nti manussattaṃ, indriyāvekallaṃ, buddhuppādo, saddhāpaṭilābhoti ime yogā samayā dullabhakkhaṇā taṃ mā atikkamuṃ. Kāmayogādayo eva vā cattāro yogā taṃ mā upaccaguṃ mā abhibhaveyyuṃ. Sabbayogavisaṃyuttāti sabbehi kāmayogādīhi yogehi vimuttā tato eva anāsavā hutvā loke cara, diṭṭhasukhavihārena viharāhīti attho.
সা তং গাথং সুত্ৰা ৰিপস্সনং ৰড্ঢেত্ৰা অরহত্তং পাপুণীতি আদিনযো হেট্ঠা ৰুত্তনযেনেৰ ৰেদিতব্বো।
Sā taṃ gāthaṃ sutvā vipassanaṃ vaḍḍhetvā arahattaṃ pāpuṇīti ādinayo heṭṭhā vuttanayeneva veditabbo.
তিস্সাথেরীগাথাৰণ্ণনা নিট্ঠিতা।
Tissātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ৪. তিস্সাথেরীগাথা • 4. Tissātherīgāthā
