| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
9. திஸ்ஸத்தே²ரகா³தா²வண்ணனா
9. Tissattheragāthāvaṇṇanā
ஸத்தியா விய ஓமட்டோ²தி ஆயஸ்மதோ திஸ்ஸத்தே²ரஸ்ஸ கா³தா². கா உப்பதி? அயம்பி கிர புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயங் புஞ்ஞங் உபசினந்தோ திஸ்ஸஸ்ஸ ப⁴க³வதோ போ³தி⁴யா மூலே புராணபண்ணானி நீஹரித்வா ஸோதே⁴ஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ கபிலவத்து²னக³ரே ப⁴க³வதோ பிதுச்சா²புத்தோ ஹுத்வா நிப்³ப³த்தி திஸ்ஸோ நாம நாமேன. ஸோ ப⁴க³வந்தங் அனுபப்³ப³ஜித்வா உபஸம்பன்னோ ஹுத்வா அரஞ்ஞாயதனே விஹரந்தோ ஜாதிங் படிச்ச மானங் கரொந்தோ கோதூ⁴பாயாஸப³ஹுலோ ச உஜ்ஜா²னப³ஹுலோ ச ஹுத்வா விசரதி, ஸமணத⁴ம்மே உஸ்ஸுக்கங் ந கரோதி. அத² நங் ஸத்தா² ஏகதி³வஸங் தி³வாட்டா²னே விவடமுக²ங் நித்³தா³யந்தங் தி³ப்³ப³சக்கு²னா ஓலோகெந்தோ ஸாவத்தி²தோ ஆகாஸேன க³ந்த்வா தஸ்ஸ உபரி ஆகாஸேயேவ ட²த்வா ஓபா⁴ஸங் ப²ரித்வா தேனோபா⁴ஸேன படிபு³த்³த⁴ஸ்ஸ ஸதிங் உப்பாதெ³த்வா ஓவாத³ங் தெ³ந்தோ ‘‘ஸத்தியா விய ஓமட்டோ²’’தி கா³த²ங் அபா⁴ஸி.
Sattiyā viya omaṭṭhoti āyasmato tissattherassa gāthā. Kā uppati? Ayampi kira purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto tissassa bhagavato bodhiyā mūle purāṇapaṇṇāni nīharitvā sodhesi. So tena puññakammena devamanussesu saṃsaranto imasmiṃ buddhuppāde kapilavatthunagare bhagavato pitucchāputto hutvā nibbatti tisso nāma nāmena. So bhagavantaṃ anupabbajitvā upasampanno hutvā araññāyatane viharanto jātiṃ paṭicca mānaṃ karonto kodhūpāyāsabahulo ca ujjhānabahulo ca hutvā vicarati, samaṇadhamme ussukkaṃ na karoti. Atha naṃ satthā ekadivasaṃ divāṭṭhāne vivaṭamukhaṃ niddāyantaṃ dibbacakkhunā olokento sāvatthito ākāsena gantvā tassa upari ākāseyeva ṭhatvā obhāsaṃ pharitvā tenobhāsena paṭibuddhassa satiṃ uppādetvā ovādaṃ dento ‘‘sattiyā viya omaṭṭho’’ti gāthaṃ abhāsi.
39. தத்த² ஸத்தியாதி தே³ஸனாஸீஸமேதங், ஏகதோதா⁴ராதி³னா ஸத்தே²னாதி அத்தோ². ஓமட்டோ²தி பஹதோ. சத்தாரோ ஹி பஹாரா ஓமட்டோ² உம்மட்டோ² மட்டோ² விமட்டோ²தி. தத்த² உபரி ட²த்வா அதோ⁴முக²ங் தி³ன்னபஹாரோ ஓமட்டோ² நாம, ஹெட்டா² ட²த்வா உத்³த⁴ம்முக²ங் தி³ன்னபஹாரோ உம்மட்டோ² நாம, அக்³க³ளஸூசி விய வினிவிஜ்ஜி²த்வா க³தோ மட்டோ² நாம, ஸேஸோ ஸப்³போ³பி விமட்டோ² நாம. இமஸ்மிங் பன டா²னே ஓமட்டோ² க³ஹிதோ. ஸோ ஹி ஸப்³ப³தா³ருணோ து³ருத்³த⁴ரணஸல்லோ து³த்திகிச்சோ² அந்தோதோ³ஸோ அந்தோபுப்³ப³லோஹிதோவ ஹோதி, புப்³ப³லோஹிதங் அனிக்க²மித்வா வணமுக²ங் பரியோனந்தி⁴த்வா திட்ட²தி. புப்³ப³லோஹிதங் நீஹரிதுகாமேஹி மஞ்சேன ஸத்³தி⁴ங் ப³ந்தி⁴த்வா அதோ⁴ஸிரோ காதப்³போ³ ஹோதி, மரணங் வா மரணமத்தங் வா து³க்க²ங் பாபுணந்தி. ட³ய்ஹமானேதி அக்³கி³னா ஜா²யமானே. மத்த²கேதி ஸீஸே. இத³ங் வுத்தங் ஹோதி – யதா² ஸத்தியா ஓமட்டோ² புரிஸோ ஸல்லுப்³பா³ஹனவணதிகிச்ச²னானங் அத்தா²ய வீரியங் ஆரப⁴தி தாதி³ஸங் பயோக³ங் கரோதி பரக்கமதி, யதா² ச ட³ய்ஹமானே மத்த²கே ஆதி³த்தஸீஸோ புரிஸோ தஸ்ஸ நிப்³பா³பனத்த²ங் வீரியங் ஆரப⁴தி தாதி³ஸங் பயோக³ங் கரோதி, ஏவமேவங், பி⁴க்கு², காமராக³ப்பஹானாய ஸதோ அப்பமத்தோ அதிவிய உஸ்ஸாஹஜாதோ ஹுத்வா விஹரெய்யாதி.
39. Tattha sattiyāti desanāsīsametaṃ, ekatodhārādinā satthenāti attho. Omaṭṭhoti pahato. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnapahāro omaṭṭho nāma, heṭṭhā ṭhatvā uddhammukhaṃ dinnapahāro ummaṭṭho nāma, aggaḷasūci viya vinivijjhitvā gato maṭṭho nāma, seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharaṇasallo duttikiccho antodoso antopubbalohitova hoti, pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ nīharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇanti. Ḍayhamāneti agginā jhāyamāne. Matthaketi sīse. Idaṃ vuttaṃ hoti – yathā sattiyā omaṭṭho puriso sallubbāhanavaṇatikicchanānaṃ atthāya vīriyaṃ ārabhati tādisaṃ payogaṃ karoti parakkamati, yathā ca ḍayhamāne matthake ādittasīso puriso tassa nibbāpanatthaṃ vīriyaṃ ārabhati tādisaṃ payogaṃ karoti, evamevaṃ, bhikkhu, kāmarāgappahānāya sato appamatto ativiya ussāhajāto hutvā vihareyyāti.
ஏவங் ப⁴க³வா தஸ்ஸ தே²ரஸ்ஸ கோதூ⁴பாயாஸவூபஸமாய ஓவாத³ங் தெ³ந்தோ ததே³கட்ட²தாய காமராக³ப்பஹானஸீஸேன தே³ஸனங் நிட்டா²பேஸி. தே²ரோ இமங் கா³த²ங் ஸுத்வா ஸங்விக்³க³ஹத³யோ விபஸ்ஸனாய யுத்தப்பயுத்தோ விஹாஸி. தஸ்ஸ அஜ்ஜா²ஸயங் ஞத்வா ஸத்தா² ஸங்யுத்தகே திஸ்ஸத்தே²ரஸுத்தங் (ஸங்॰ நி॰ 3.84) தே³ஸேஸி. ஸோ தே³ஸனாபரியோஸானே அரஹத்தே பதிட்டா²ஸி. தேன வுத்தங் அபதா³னே (அப॰ தே²ர 2.53.66-73) –
Evaṃ bhagavā tassa therassa kodhūpāyāsavūpasamāya ovādaṃ dento tadekaṭṭhatāya kāmarāgappahānasīsena desanaṃ niṭṭhāpesi. Thero imaṃ gāthaṃ sutvā saṃviggahadayo vipassanāya yuttappayutto vihāsi. Tassa ajjhāsayaṃ ñatvā satthā saṃyuttake tissattherasuttaṃ (saṃ. ni. 3.84) desesi. So desanāpariyosāne arahatte patiṭṭhāsi. Tena vuttaṃ apadāne (apa. thera 2.53.66-73) –
‘‘தே³வலோகே மனுஸ்ஸே சே, அனுபொ⁴த்வா உபோ⁴ யஸே;
‘‘Devaloke manusse ce, anubhotvā ubho yase;
அவஸானே ச நிப்³பா³னங், ஸிவங் பத்தோ அனுத்தரங்.
Avasāne ca nibbānaṃ, sivaṃ patto anuttaraṃ.
‘‘ஸம்பு³த்³த⁴ங் உத்³தி³ஸித்வான, போ³தி⁴ங் வா தஸ்ஸ ஸத்து²னோ;
‘‘Sambuddhaṃ uddisitvāna, bodhiṃ vā tassa satthuno;
யோ புஞ்ஞங் பஸவீ போஸோ, தஸ்ஸ கிங் நாம து³ல்லப⁴ங்.
Yo puññaṃ pasavī poso, tassa kiṃ nāma dullabhaṃ.
‘‘மக்³கே³ ப²லே ஆக³மே ச, ஜா²னாபி⁴ஞ்ஞாகு³ணேஸு ச;
‘‘Magge phale āgame ca, jhānābhiññāguṇesu ca;
அஞ்ஞேஸங் அதி⁴கோ ஹுத்வா, நிப்³பா³யாமி அனாஸவோ.
Aññesaṃ adhiko hutvā, nibbāyāmi anāsavo.
‘‘புரேஹங் போ³தி⁴யா பத்தங், ச²ட்³டெ³த்வா ஹட்ட²மானஸோ;
‘‘Purehaṃ bodhiyā pattaṃ, chaḍḍetvā haṭṭhamānaso;
இமேஹி வீஸதங்கே³ஹி, ஸமங்கீ³ ஹோமி ஸப்³ப³தா².
Imehi vīsataṅgehi, samaṅgī homi sabbathā.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா தே²ரோ அஞ்ஞங் ப்³யாகரொந்தோ ஸத்தா²ரங் பூஜேதுங் தமேவ கா³த²ங் அபா⁴ஸி.
Arahattaṃ pana patvā thero aññaṃ byākaronto satthāraṃ pūjetuṃ tameva gāthaṃ abhāsi.
திஸ்ஸத்தே²ரகா³தா²வண்ணனா நிட்டி²தா.
Tissattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 9. திஸ்ஸத்தே²ரகா³தா² • 9. Tissattheragāthā
