| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৯. তিস্সত্থেরগাথাৰণ্ণনা
9. Tissattheragāthāvaṇṇanā
সত্তিযা ৰিয ওমট্ঠোতি আযস্মতো তিস্সত্থেরস্স গাথা। কা উপ্পতি? অযম্পি কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো তিস্সস্স ভগৰতো বোধিযা মূলে পুরাণপণ্ণানি নীহরিত্ৰা সোধেসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুনগরে ভগৰতো পিতুচ্ছাপুত্তো হুত্ৰা নিব্বত্তি তিস্সো নাম নামেন। সো ভগৰন্তং অনুপব্বজিত্ৰা উপসম্পন্নো হুত্ৰা অরঞ্ঞাযতনে ৰিহরন্তো জাতিং পটিচ্চ মানং করোন্তো কোধূপাযাসবহুলো চ উজ্ঝানবহুলো চ হুত্ৰা ৰিচরতি, সমণধম্মে উস্সুক্কং ন করোতি। অথ নং সত্থা একদিৰসং দিৰাট্ঠানে ৰিৰটমুখং নিদ্দাযন্তং দিব্বচক্খুনা ওলোকেন্তো সাৰত্থিতো আকাসেন গন্ত্ৰা তস্স উপরি আকাসেযেৰ ঠত্ৰা ওভাসং ফরিত্ৰা তেনোভাসেন পটিবুদ্ধস্স সতিং উপ্পাদেত্ৰা ওৰাদং দেন্তো ‘‘সত্তিযা ৰিয ওমট্ঠো’’তি গাথং অভাসি।
Sattiyā viya omaṭṭhoti āyasmato tissattherassa gāthā. Kā uppati? Ayampi kira purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto tissassa bhagavato bodhiyā mūle purāṇapaṇṇāni nīharitvā sodhesi. So tena puññakammena devamanussesu saṃsaranto imasmiṃ buddhuppāde kapilavatthunagare bhagavato pitucchāputto hutvā nibbatti tisso nāma nāmena. So bhagavantaṃ anupabbajitvā upasampanno hutvā araññāyatane viharanto jātiṃ paṭicca mānaṃ karonto kodhūpāyāsabahulo ca ujjhānabahulo ca hutvā vicarati, samaṇadhamme ussukkaṃ na karoti. Atha naṃ satthā ekadivasaṃ divāṭṭhāne vivaṭamukhaṃ niddāyantaṃ dibbacakkhunā olokento sāvatthito ākāsena gantvā tassa upari ākāseyeva ṭhatvā obhāsaṃ pharitvā tenobhāsena paṭibuddhassa satiṃ uppādetvā ovādaṃ dento ‘‘sattiyā viya omaṭṭho’’ti gāthaṃ abhāsi.
৩৯. তত্থ সত্তিযাতি দেসনাসীসমেতং, একতোধারাদিনা সত্থেনাতি অত্থো। ওমট্ঠোতি পহতো। চত্তারো হি পহারা ওমট্ঠো উম্মট্ঠো মট্ঠো ৰিমট্ঠোতি। তত্থ উপরি ঠত্ৰা অধোমুখং দিন্নপহারো ওমট্ঠো নাম, হেট্ঠা ঠত্ৰা উদ্ধম্মুখং দিন্নপহারো উম্মট্ঠো নাম, অগ্গল়সূচি ৰিয ৰিনিৰিজ্ঝিত্ৰা গতো মট্ঠো নাম, সেসো সব্বোপি ৰিমট্ঠো নাম। ইমস্মিং পন ঠানে ওমট্ঠো গহিতো। সো হি সব্বদারুণো দুরুদ্ধরণসল্লো দুত্তিকিচ্ছো অন্তোদোসো অন্তোপুব্বলোহিতোৰ হোতি, পুব্বলোহিতং অনিক্খমিত্ৰা ৰণমুখং পরিযোনন্ধিত্ৰা তিট্ঠতি। পুব্বলোহিতং নীহরিতুকামেহি মঞ্চেন সদ্ধিং বন্ধিত্ৰা অধোসিরো কাতব্বো হোতি, মরণং ৰা মরণমত্তং ৰা দুক্খং পাপুণন্তি। ডয্হমানেতি অগ্গিনা ঝাযমানে। মত্থকেতি সীসে। ইদং ৰুত্তং হোতি – যথা সত্তিযা ওমট্ঠো পুরিসো সল্লুব্বাহনৰণতিকিচ্ছনানং অত্থায ৰীরিযং আরভতি তাদিসং পযোগং করোতি পরক্কমতি, যথা চ ডয্হমানে মত্থকে আদিত্তসীসো পুরিসো তস্স নিব্বাপনত্থং ৰীরিযং আরভতি তাদিসং পযোগং করোতি, এৰমেৰং, ভিক্খু, কামরাগপ্পহানায সতো অপ্পমত্তো অতিৰিয উস্সাহজাতো হুত্ৰা ৰিহরেয্যাতি।
39. Tattha sattiyāti desanāsīsametaṃ, ekatodhārādinā satthenāti attho. Omaṭṭhoti pahato. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnapahāro omaṭṭho nāma, heṭṭhā ṭhatvā uddhammukhaṃ dinnapahāro ummaṭṭho nāma, aggaḷasūci viya vinivijjhitvā gato maṭṭho nāma, seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharaṇasallo duttikiccho antodoso antopubbalohitova hoti, pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ nīharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇanti. Ḍayhamāneti agginā jhāyamāne. Matthaketi sīse. Idaṃ vuttaṃ hoti – yathā sattiyā omaṭṭho puriso sallubbāhanavaṇatikicchanānaṃ atthāya vīriyaṃ ārabhati tādisaṃ payogaṃ karoti parakkamati, yathā ca ḍayhamāne matthake ādittasīso puriso tassa nibbāpanatthaṃ vīriyaṃ ārabhati tādisaṃ payogaṃ karoti, evamevaṃ, bhikkhu, kāmarāgappahānāya sato appamatto ativiya ussāhajāto hutvā vihareyyāti.
এৰং ভগৰা তস্স থেরস্স কোধূপাযাসৰূপসমায ওৰাদং দেন্তো তদেকট্ঠতায কামরাগপ্পহানসীসেন দেসনং নিট্ঠাপেসি। থেরো ইমং গাথং সুত্ৰা সংৰিগ্গহদযো ৰিপস্সনায যুত্তপ্পযুত্তো ৰিহাসি। তস্স অজ্ঝাসযং ঞত্ৰা সত্থা সংযুত্তকে তিস্সত্থেরসুত্তং (সং॰ নি॰ ৩.৮৪) দেসেসি। সো দেসনাপরিযোসানে অরহত্তে পতিট্ঠাসি। তেন ৰুত্তং অপদানে (অপ॰ থের ২.৫৩.৬৬-৭৩) –
Evaṃ bhagavā tassa therassa kodhūpāyāsavūpasamāya ovādaṃ dento tadekaṭṭhatāya kāmarāgappahānasīsena desanaṃ niṭṭhāpesi. Thero imaṃ gāthaṃ sutvā saṃviggahadayo vipassanāya yuttappayutto vihāsi. Tassa ajjhāsayaṃ ñatvā satthā saṃyuttake tissattherasuttaṃ (saṃ. ni. 3.84) desesi. So desanāpariyosāne arahatte patiṭṭhāsi. Tena vuttaṃ apadāne (apa. thera 2.53.66-73) –
‘‘দেৰলোকে মনুস্সে চে, অনুভোত্ৰা উভো যসে।
‘‘Devaloke manusse ce, anubhotvā ubho yase;
অৰসানে চ নিব্বানং, সিৰং পত্তো অনুত্তরং॥
Avasāne ca nibbānaṃ, sivaṃ patto anuttaraṃ.
‘‘সম্বুদ্ধং উদ্দিসিত্ৰান, বোধিং ৰা তস্স সত্থুনো।
‘‘Sambuddhaṃ uddisitvāna, bodhiṃ vā tassa satthuno;
যো পুঞ্ঞং পসৰী পোসো, তস্স কিং নাম দুল্লভং॥
Yo puññaṃ pasavī poso, tassa kiṃ nāma dullabhaṃ.
‘‘মগ্গে ফলে আগমে চ, ঝানাভিঞ্ঞাগুণেসু চ।
‘‘Magge phale āgame ca, jhānābhiññāguṇesu ca;
অঞ্ঞেসং অধিকো হুত্ৰা, নিব্বাযামি অনাসৰো॥
Aññesaṃ adhiko hutvā, nibbāyāmi anāsavo.
‘‘পুরেহং বোধিযা পত্তং, ছড্ডেত্ৰা হট্ঠমানসো।
‘‘Purehaṃ bodhiyā pattaṃ, chaḍḍetvā haṭṭhamānaso;
ইমেহি ৰীসতঙ্গেহি, সমঙ্গী হোমি সব্বথা॥
Imehi vīsataṅgehi, samaṅgī homi sabbathā.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা থেরো অঞ্ঞং ব্যাকরোন্তো সত্থারং পূজেতুং তমেৰ গাথং অভাসি।
Arahattaṃ pana patvā thero aññaṃ byākaronto satthāraṃ pūjetuṃ tameva gāthaṃ abhāsi.
তিস্সত্থেরগাথাৰণ্ণনা নিট্ঠিতা।
Tissattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৯. তিস্সত্থেরগাথা • 9. Tissattheragāthā
