| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. திடா²னஸுத்தவண்ணனா
2. Tiṭhānasuttavaṇṇanā
42. து³தியே மச்ச²ரியமேவ மலங் மச்ச²ரியமலங், சித்தஸ்ஸ மலீனஸபா⁴வாபாத³னதோ விக³தங் மச்ச²ரியமலங் எத்தா²தி விக³தமச்ச²ரியமலங். கே³தா⁴பா⁴வேன கோசி கிஞ்சி தெ³ந்தோபி தத்த² ஆஸத்திங் ந விஸ்ஸஜ்ஜேதி, அயங் பன ந தாதி³ஸோதி ஆஹ ‘‘விஸ்ஸட்ட²சாகோ³’’தி. மலீனஹத்தோ²வ சித்தவிஸுத்³தி⁴யா அபா⁴வதோ. தோ⁴தஹத்தோ²வ தோ⁴தஹத்தே²ன காதப்³ப³கிச்சஸாத⁴னதோ. தேன வுத்தங் – ‘‘சித்தே ஸுத்³தே⁴ விஸுஜ்ஜ²ந்தி, இதி வுத்தங் மஹேஸினா’’தி. யாசிதுங் யுத்தோ யாசகானங் மனோரத²பூரணதோ. யாசயோகோ³ பயோகா³ஸஹேஹி யாசகேஹி ஸுட்டு² யுத்தபா⁴வதோ. தங்ஸமங்கீ³ ஏவ தத்த² ரதோ நாம, ந சித்தமத்தேனேவாதி ஆஹ ‘‘தா³னங்…பே॰… ரதோ நாம ஹோதீ’’தி.
42. Dutiye macchariyameva malaṃ macchariyamalaṃ, cittassa malīnasabhāvāpādanato vigataṃ macchariyamalaṃ etthāti vigatamacchariyamalaṃ. Gedhābhāvena koci kiñci dentopi tattha āsattiṃ na vissajjeti, ayaṃ pana na tādisoti āha ‘‘vissaṭṭhacāgo’’ti. Malīnahatthova cittavisuddhiyā abhāvato. Dhotahatthova dhotahatthena kātabbakiccasādhanato. Tena vuttaṃ – ‘‘citte suddhe visujjhanti, iti vuttaṃ mahesinā’’ti. Yācituṃ yutto yācakānaṃ manorathapūraṇato. Yācayogo payogāsahehi yācakehi suṭṭhu yuttabhāvato. Taṃsamaṅgī eva tattha rato nāma, na cittamattenevāti āha ‘‘dānaṃ…pe… rato nāma hotī’’ti.
‘‘உச்சா, ப⁴ந்தே’’தி வத்வா அயங் மங் உச்சதோ வத³தீதி சிந்தெய்யாதி புன ‘‘நாதிஉச்சா தும்ஹே’’தி ஆஹ, ஸரீரேனாதி அதி⁴ப்பாயோ. மேசகவண்ணஸ்ஸாதி நீலோபா⁴ஸஸ்ஸ. புச்சீ²தி பி⁴க்கூ² புச்சி². பூ⁴மியங் லேக²ங் லிக²ந்தோ அச்சீ²தி பட²மங் மஞ்சே நிபஜ்ஜித்வா உட்டா²ய பூ⁴மியங் லேக²ங் லிக²ந்தோ அச்சி² ‘‘அகீ²ணாஸவோதி மஞ்ஞனா ஹோதூ’’தி. ததா² ஹி ராஜா கீ²ணாஸவஸ்ஸ நாம…பே॰… நிவத்தி. த⁴ஜபக்³க³ஹிதாவாதி பக்³க³ஹிதத⁴ஜாவ. ஸிலாசேதியட்டா²னந்தி தூ²பாராமஸ்ஸ ச மஹாசேதியஸ்ஸ ச அந்தரே ஸிலாய கதசேதியட்டா²னங். சேதியங்…பே॰… அட்டா²ஸி ஸாவகஸ்ஸ தங் கூடாகா³ரந்தி கத்வா.
‘‘Uccā, bhante’’ti vatvā ayaṃ maṃ uccato vadatīti cinteyyāti puna ‘‘nātiuccā tumhe’’ti āha, sarīrenāti adhippāyo. Mecakavaṇṇassāti nīlobhāsassa. Pucchīti bhikkhū pucchi. Bhūmiyaṃ lekhaṃ likhanto acchīti paṭhamaṃ mañce nipajjitvā uṭṭhāya bhūmiyaṃ lekhaṃ likhanto acchi ‘‘akhīṇāsavoti maññanā hotū’’ti. Tathā hi rājā khīṇāsavassa nāma…pe… nivatti. Dhajapaggahitāvāti paggahitadhajāva. Silācetiyaṭṭhānanti thūpārāmassa ca mahācetiyassa ca antare silāya katacetiyaṭṭhānaṃ. Cetiyaṃ…pe… aṭṭhāsi sāvakassa taṃ kūṭāgāranti katvā.
பச்சா²பா⁴கே³னாதி த⁴ம்மகதி²கஸ்ஸ தே²ரஸ்ஸ பிட்டி²பஸ்ஸேன. கோ³னஸோதி மண்ட³லஸப்போ. த⁴ம்மஸ்ஸவனந்தராய ப³ஹூனங் ஸக்³க³மக்³க³ப்படிலாப⁴ந்தராயோ ப⁴வெய்யாதி அதி⁴ப்பாயேன ‘‘த⁴ம்மஸ்ஸவனந்தராயங் ந கரிஸ்ஸாமீ’’தி சிந்தேஸி. விஸங் விக்க²ம்பெ⁴த்வாதி விபஸ்ஸனாதேஜேன விஸவேக³ங் விக்க²ம்பெ⁴த்வா. கா³தா²ஸஹஸ்ஸந்தி கா³தா²ஸஹஸ்ஸவந்தங். பட்டா²னகா³தா²யாதி பட்டா²பனகா³தா²ய, ஆதி³கா³தா²யாதி அத்தோ². பட்டா²ன…பே॰… அவஸானகா³த²ங் ஏவ வவத்த²பேஸி, ந த்³வின்னங் அந்தரே வுத்தங் கிலந்தகாயத்தா. ஸரபா⁴ணங் ஸாயன்ஹத⁴ம்மகதா². பக்³க³ண்ஹாதீதி பச்சக்க²ங் கரொந்தீ க³ண்ஹாதி, ஸக்கச்சங் ஸுணாதீதி அத்தோ². த⁴ம்மகத²னதி³வஸே த⁴ம்மகதி²கானங் அகிலமனத்த²ங் ஸத்³தா⁴ உபாஸகா ஸினித்³த⁴போ⁴ஜனங் மது⁴பானகஞ்ச தெ³ந்தி ஸரஸ்ஸ மது⁴ரபா⁴வாய ஸப்பிமது⁴கதேலாதி³ஞ்ச பே⁴ஸஜ்ஜங். தேனாஹ ‘‘அரியவங்ஸங் கதெ²ஸ்ஸாமீ’’திஆதி³. சதூஹி தா³டா²ஹி ட³ங்ஸித்வாதி த³ள்ஹத³ட்ட²பா⁴வத³ஸ்ஸனங். சரிஸ்ஸாமீதி ஸம்மானெஸ்ஸாமி, ஸக்கச்சங் ஸுணிஸ்ஸாமீதி அத்தோ². நிம்மதெ²த்வாதி நிம்மத்³தி³த்வா, அபனெத்வாதி அத்தோ².
Pacchābhāgenāti dhammakathikassa therassa piṭṭhipassena. Gonasoti maṇḍalasappo. Dhammassavanantarāya bahūnaṃ saggamaggappaṭilābhantarāyo bhaveyyāti adhippāyena ‘‘dhammassavanantarāyaṃ na karissāmī’’ti cintesi. Visaṃ vikkhambhetvāti vipassanātejena visavegaṃ vikkhambhetvā. Gāthāsahassanti gāthāsahassavantaṃ. Paṭṭhānagāthāyāti paṭṭhāpanagāthāya, ādigāthāyāti attho. Paṭṭhāna…pe… avasānagāthaṃ eva vavatthapesi, na dvinnaṃ antare vuttaṃ kilantakāyattā. Sarabhāṇaṃ sāyanhadhammakathā. Paggaṇhātīti paccakkhaṃ karontī gaṇhāti, sakkaccaṃ suṇātīti attho. Dhammakathanadivase dhammakathikānaṃ akilamanatthaṃ saddhā upāsakā siniddhabhojanaṃ madhupānakañca denti sarassa madhurabhāvāya sappimadhukatelādiñca bhesajjaṃ. Tenāha ‘‘ariyavaṃsaṃ kathessāmī’’tiādi. Catūhi dāṭhāhi ḍaṃsitvāti daḷhadaṭṭhabhāvadassanaṃ. Carissāmīti sammānessāmi, sakkaccaṃ suṇissāmīti attho. Nimmathetvāti nimmadditvā, apanetvāti attho.
திடா²னஸுத்தவண்ணனா நிட்டி²தா.
Tiṭhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. திடா²னஸுத்தங் • 2. Tiṭhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. திடா²னஸுத்தவண்ணனா • 2. Tiṭhānasuttavaṇṇanā
