| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
(7) 2. махааваг̇г̇о
(7) 2. Mahāvaggo
1. д̇ид̇т̇ааяад̇анасуд̇д̇аван̣н̣анаа
1. Titthāyatanasuttavaṇṇanā
62. д̣̇уд̇ияасса батамз д̇ид̇т̇ам̣ наама д̣̇ваасадти д̣̇идтияо д̇аб̣б̣инимуд̇д̇асса гассажи д̣̇идтивибпанд̣̇ид̇асса абхаавад̇о. зд̇т̇а хи сад̇д̇аа д̇аранд̇и уббилаванд̇и уммуж̇ж̇анимуж̇ж̇ам̣ гаронд̇и, д̇асмаа ‘‘д̇ид̇т̇а’’нд̇и вужжад̇и. баараг̇аманасан̇каад̇ан̃хи д̇аран̣ам̣ д̣̇идтиг̇ад̇игаанам̣ над̇т̇и, д̇ад̇т̇зва абараабарам̣ нимуж̇ж̇ануммуж̇ж̇анавасзна билаванамзва д̇зсам̣ д̇аран̣ам̣ наама. уббаад̣̇агаад̇и бууран̣агассабаад̣̇аяо. д̇ид̇т̇з ж̇аад̇аа д̇ид̇т̇ияаа, яат̇аавуд̇д̇ам̣ ваа д̣̇идтиг̇ад̇асан̇каад̇ам̣ д̇ид̇т̇ам̣ зд̇зсам̣ ад̇т̇ийд̇и д̇ид̇т̇игаа, д̇ид̇т̇игаа зва д̇ид̇т̇ияаа. манорамзд̇и саад̣̇упалабхарид̇ад̇ааяа абхаяад̣̇исад̇ааяа жа манорамз. имзсуязва д̇ийсу таанзсууд̇и яат̇аавуд̇д̇зсу д̇ид̇т̇ааяад̇анзсу.
62. Dutiyassa paṭhame titthaṃ nāma dvāsaṭṭhi diṭṭhiyo tabbinimuttassa kassaci diṭṭhivipphanditassa abhāvato. Ettha hi sattā taranti uppilavanti ummujjanimujjaṃ karonti, tasmā ‘‘tittha’’nti vuccati. Pāragamanasaṅkhātañhi taraṇaṃ diṭṭhigatikānaṃ natthi, tattheva aparāparaṃ nimujjanummujjanavasena pilavanameva tesaṃ taraṇaṃ nāma. Uppādakāti pūraṇakassapādayo. Titthe jātā titthiyā, yathāvuttaṃ vā diṭṭhigatasaṅkhātaṃ titthaṃ etesaṃ atthīti titthikā, titthikā eva titthiyā. Manorameti sāduphalabharitatāya abhayadisatāya ca manorame. Imesuyeva tīsu ṭhānesūti yathāvuttesu titthāyatanesu.
яо яат̇аа ж̇аанаад̇и, д̇асса д̇ат̇аа вужжад̇ийд̇и иминаа буг̇г̇алаж̇жхаасаяавасзна д̇ат̇аа вуд̇д̇анд̇и д̣̇ассзд̇и. буг̇г̇ала-сад̣̇д̣̇о жа д̇иссаннамби багад̇ийнам̣ саад̇хааран̣о, д̇асмаа бурисаг̇г̇ахан̣зна д̇ад̇о висзсанам̣ яат̇аа ‘‘адта бурисабуг̇г̇алаа’’д̇и. бадисам̣вид̣̇ид̇ам̣ гарод̇ийд̇и гзвалам̣ ж̇аананавасзна вид̣̇ид̇ам̣ гарод̇и. анубхавад̇и ваад̇и вибаагалагкан̣аббад̇д̇ам̣ анубхавад̇и. буб̣б̣згад̇ахзд̇ууд̇и анд̇ог̇ад̇хаавад̇хааран̣ам̣ бад̣̇анд̇и ааха ‘‘буб̣б̣згад̇агаммабажжаязнзваа’’д̇и. иминаад̇и ‘‘саб̣б̣ам̣ д̇ам̣ буб̣б̣згад̇ахзд̇уу’’д̇и иминаа важанзна. гаммавзд̣̇ананд̇и гусалаагусалагаммасахаж̇ам̣ взд̣̇анам̣. гирияавзд̣̇ананд̇и ‘‘нзва гусалаагусалаа на жа гаммавибаагаа’’д̇и звам̣ вуд̇д̇ам̣ гирияажид̇д̇асахаж̇ам̣ взд̣̇анам̣. на гзвалан̃жа д̇з гаммагирияавзд̣̇анаа зва бадигкибанд̇и, ат̇а ко саасанз логз жа баагадз ваад̇ааб̣аад̇хаад̣̇ирог̇з жа бадигкибанд̇и зваад̇и д̣̇ассзд̇ум̣ ‘‘яз ваа имз’’д̇иаад̣̇имааха. д̇ад̇т̇а бид̇д̇асамудтаанаад̇и бид̇д̇авигаараад̇хигасамбхууд̇аа . ананд̇арад̣̇ваязби зсзва наяо. саннибаад̇игаад̇и бид̇д̇аад̣̇ийнам̣ д̇ин̣н̣амби вигаараанам̣ саннибаад̇ад̇о ж̇аад̇аа. уд̇убарин̣аамаж̇аад̇и сийд̇аад̣̇иуд̇уно вибарин̣аамад̇о висамабаривуд̇д̇ид̇о ж̇аад̇аа. висамабарихаараж̇аад̇и асаббааяаахаараяог̇абадисзванавасзна гааяасса висамам̣ барихаран̣ад̇о ж̇аад̇аа. обаггамигаад̇и убаггамад̇о ниб̣б̣ад̇д̇аа. гаммавибаагаж̇аад̇и гаммасса вибаагабхууд̇агканд̇хад̇о ж̇аад̇аа. вирод̇хибажжаяасамудтаанаа д̇хаад̇уунам̣ вигаараавад̇т̇аа, д̇аббажжаяаа ваа д̣̇угкаа взд̣̇анаа ааб̣аад̇ханадтзна ааб̣аад̇хо, со зва руж̇ж̇анадтзна рог̇о. д̇ад̇т̇а ‘‘яо яаабяалагкан̣о, со рог̇о, ид̇аро ааб̣аад̇хо’’д̇и вад̣̇анд̇и. саб̣б̣зсан̃жа нзсам̣ д̇ам̣д̇ам̣д̇хаад̇уунам̣ висамам̣ аасаннагааран̣ам̣, на д̇ат̇аа ид̇араани. д̇ад̇т̇ааби жа багобаавад̇т̇аа д̇хаад̇уяо аасаннагааран̣ам̣, на д̇ат̇аа барабажжаяаавад̇т̇аад̇и д̣̇адтаб̣б̣ам̣. адтамам̣язва гаммавибаагаж̇ам̣ ааб̣аад̇хам̣ самбадижчанд̇и ‘‘саб̣б̣ам̣ д̇ам̣ буб̣б̣згад̇ахзд̇уу’’д̇и вибаллаасаг̇г̇аахзна. ‘‘буб̣б̣з’’д̇и бураад̇анассзва гаммасса г̇ахид̇ад̇д̇аа убабаж̇ж̇авзд̣̇анийяамби д̇з бадигкибанд̇ийд̇и вуд̇д̇ам̣ ‘‘д̣̇вз бадиб̣аахид̇ваа’’д̇и. самбадижчанд̇ийд̇и ануж̇аананд̇и.
Yo yathā jānāti, tassa tathā vuccatīti iminā puggalajjhāsayavasena tathā vuttanti dasseti. Puggala-saddo ca tissannampi pakatīnaṃ sādhāraṇo, tasmā purisaggahaṇena tato visesanaṃ yathā ‘‘aṭṭha purisapuggalā’’ti. Paṭisaṃviditaṃ karotīti kevalaṃ jānanavasena viditaṃ karoti. Anubhavati vāti vipākalakkhaṇappattaṃ anubhavati. Pubbekatahetūti antogadhāvadhāraṇaṃ padanti āha ‘‘pubbekatakammapaccayenevā’’ti. Imināti ‘‘sabbaṃ taṃ pubbekatahetū’’ti iminā vacanena. Kammavedananti kusalākusalakammasahajaṃ vedanaṃ. Kiriyavedananti ‘‘neva kusalākusalā na ca kammavipākā’’ti evaṃ vuttaṃ kiriyacittasahajaṃ vedanaṃ. Na kevalañca te kammakiriyavedanā eva paṭikkhipanti, atha kho sāsane loke ca pākaṭe vātābādhādiroge ca paṭikkhipanti evāti dassetuṃ ‘‘ye vā ime’’tiādimāha. Tattha pittasamuṭṭhānāti pittavikārādhikasambhūtā . Anantaradvayepi eseva nayo. Sannipātikāti pittādīnaṃ tiṇṇampi vikārānaṃ sannipātato jātā. Utupariṇāmajāti sītādiutuno vipariṇāmato visamaparivuttito jātā. Visamaparihārajāti asappāyāhārayogapaṭisevanavasena kāyassa visamaṃ pariharaṇato jātā. Opakkamikāti upakkamato nibbattā. Kammavipākajāti kammassa vipākabhūtakkhandhato jātā. Virodhipaccayasamuṭṭhānā dhātūnaṃ vikārāvatthā, tappaccayā vā dukkhā vedanā ābādhanaṭṭhena ābādho, so eva rujjanaṭṭhena rogo. Tattha ‘‘yo yāpyalakkhaṇo, so rogo, itaro ābādho’’ti vadanti. Sabbesañca nesaṃ taṃtaṃdhātūnaṃ visamaṃ āsannakāraṇaṃ, na tathā itarāni. Tatthāpi ca pakopāvatthā dhātuyo āsannakāraṇaṃ, na tathā parapaccayāvatthāti daṭṭhabbaṃ. Aṭṭhamaṃyeva kammavipākajaṃ ābādhaṃ sampaṭicchanti ‘‘sabbaṃ taṃ pubbekatahetū’’ti vipallāsaggāhena. ‘‘Pubbe’’ti purātanasseva kammassa gahitattā upapajjavedanīyampi te paṭikkhipantīti vuttaṃ ‘‘dve paṭibāhitvā’’ti. Sampaṭicchantīti anujānanti.
ад̇д̇анаа гад̇амуулагзнаад̇и саахад̇т̇игагаммахзд̇у. аан̣ад̇д̇имуулагзнаад̇и барасса аан̣аабанавасзна гад̇агаммахзд̇у. имаад̇и д̇иссо взд̣̇анаа. саб̣б̣з бадиб̣ааханд̇ийд̇и саб̣б̣з рог̇з бадисзд̇хзнд̇и саб̣б̣зсамби д̇зсам̣ згзна иссарзнзва ниммид̇ад̇д̇аа д̇аб̣бхаавийбхааваасамбхавад̇о. зса наяо сзсзсуби. саб̣б̣ам̣ бадиб̣ааханд̇ийд̇и хзд̇убажжаяабадисзд̇ханад̇о саб̣б̣ам̣ нисзд̇хзнд̇и.
Attanā katamūlakenāti sāhatthikakammahetu. Āṇattimūlakenāti parassa āṇāpanavasena katakammahetu. Imāti tisso vedanā. Sabbe paṭibāhantīti sabbe roge paṭisedhenti sabbesampi tesaṃ ekena issareneva nimmitattā tabbhāvībhāvāsambhavato. Esa nayo sesesupi. Sabbaṃ paṭibāhantīti hetupaccayapaṭisedhanato sabbaṃ nisedhenti.
маад̇игам̣ нигкибид̇ваад̇и д̇ин̣н̣амби взд̣̇аанам̣ асаарабхаавад̣̇ассанад̇т̇ам̣ уд̣̇д̣̇зсам̣ гад̇ваа. д̇анд̇и д̇ам̣ маад̇игам̣. вибхаж̇ид̇ваа д̣̇ассзд̇унд̇и д̣̇осад̣̇ассанавасзнзва вибхааг̇ад̇о д̣̇ассзд̇ум̣. лад̣̇д̇хибад̇идтаабанад̇т̇анд̇и ад̇д̇ано лад̣̇д̇хияаа бадиж̇аанаабанад̇т̇ам̣. лад̣̇д̇хид̇о лад̣̇д̇хим̣ сан̇гаманд̇ийд̇и муулалад̣̇д̇хид̇о ан̃н̃алад̣̇д̇хим̣ убаг̇ажчанд̇и бадиж̇аананд̇и. буб̣б̣згад̇ахзд̇уязва бадисам̣взд̣̇зд̇ийд̇и гаммавзд̣̇анамби вибаагавзд̣̇анам̣ гад̇ваа вад̣̇анд̇и. д̣̇идтиг̇ад̇игаа хи б̣яаамуул̣хажид̇д̇аа гамманд̇аравибааганд̇араад̣̇ийни аалол̣знд̇и, асан̇гарад̇о сан̃н̃аабзд̇ум̣ на саггонд̇и. яат̇аа жа агусалагаммз, звам̣ гусалагаммзбийд̇и д̣̇ассзд̇ум̣ ‘‘звам̣ баан̣аад̇ибаад̇аа’’д̇иаад̣̇и вуд̇д̇ам̣. д̇ад̇т̇а званд̇и яат̇аа буб̣б̣згад̇ахзд̇у зва баан̣аад̇ибаад̇ино наама хонд̇и, на ид̣̇аани саяам̣гад̇агааран̣аа, звам̣ баан̣аад̇ибаад̇аа вираман̣амби буб̣б̣згад̇ахзд̇у зваад̇и вижаарияамаано буб̣б̣згад̇аваад̣̇о агирияаваад̣̇о зва самбаж̇ж̇ад̇и.
Mātikaṃ nikkhipitvāti tiṇṇampi vedānaṃ asārabhāvadassanatthaṃ uddesaṃ katvā. Tanti taṃ mātikaṃ. Vibhajitvā dassetunti dosadassanavaseneva vibhāgato dassetuṃ. Laddhipatiṭṭhāpanatthanti attano laddhiyā paṭijānāpanatthaṃ. Laddhito laddhiṃ saṅkamantīti mūlaladdhito aññaladdhiṃ upagacchanti paṭijānanti. Pubbekatahetuyeva paṭisaṃvedetīti kammavedanampi vipākavedanaṃ katvā vadanti. Diṭṭhigatikā hi byāmūḷhacittā kammantaravipākantarādīni āloḷenti, asaṅkarato saññāpetuṃ na sakkonti. Yathā ca akusalakamme, evaṃ kusalakammepīti dassetuṃ ‘‘evaṃ pāṇātipātā’’tiādi vuttaṃ. Tattha evanti yathā pubbekatahetu eva pāṇātipātino nāma honti, na idāni sayaṃkatakāraṇā, evaṃ pāṇātipātā viramaṇampi pubbekatahetu evāti vicāriyamāno pubbekatavādo akiriyavādo eva sampajjati.
гад̇д̇угамяад̇аачанд̣̇о на д̇ан̣хаачанд̣̇о. гад̇д̇угамяад̇аад̇и гаад̇умижчаа. бажжад̇д̇абурисагаарод̇и д̇зна д̇зна бурисзна гад̇д̇аб̣б̣агижжам̣ на ход̇и буб̣б̣згад̇ахзд̇у зва сиж̇жханад̇о. убхаяамби д̇ам̣ зса на лаб̣бхад̇ийд̇и гад̇д̇аб̣б̣агаран̣ам̣ сужарид̇абууран̣ам̣, агад̇д̇аб̣б̣аагаран̣ам̣ д̣̇ужжарид̇авирад̇ийд̇и ид̣̇ам̣ убхаяамби зса на лабхад̇и. саман̣ааби хи буб̣б̣згад̇агааран̣ааязва хонд̇ийд̇и буб̣б̣згад̇агааран̣ааязва саман̣ааби хонд̇и, на ид̣̇аани сам̣варасамаад̣̇аанаад̣̇инаа. ассаман̣ааби буб̣б̣згад̇агааран̣ааязваад̇и буб̣б̣згад̇агааран̣ааязва ассаман̣ааби хонд̇и, на сам̣варабхзд̣̇зна.
Kattukamyatāchando na taṇhāchando. Kattukamyatāti kātumicchā. Paccattapurisakāroti tena tena purisena kattabbakiccaṃ na hoti pubbekatahetu eva sijjhanato. Ubhayampi taṃ esa na labbhatīti kattabbakaraṇaṃ sucaritapūraṇaṃ, akattabbaakaraṇaṃ duccaritaviratīti idaṃ ubhayampi esa na labhati. Samaṇāpi hi pubbekatakāraṇāyeva hontīti pubbekatakāraṇāyeva samaṇāpi honti, na idāni saṃvarasamādānādinā. Assamaṇāpi pubbekatakāraṇāyevāti pubbekatakāraṇāyeva assamaṇāpi honti, na saṃvarabhedena.
яат̇аа буб̣б̣згад̇аваад̣̇з чанд̣̇авааяаамаанам̣ асамбхавад̇о бажжад̇д̇абурисагаараанам̣ абхааво, звам̣ иссараниммаанаваад̣̇зби иссарзнзва саб̣б̣асса ниммид̇абхааваануж̇аананад̇од̇и вуд̇д̇ам̣ ‘‘буб̣б̣згад̇аваад̣̇з вуд̇д̇анаязнзва взд̣̇ид̇аб̣б̣о’’д̇и. зса наяо ахзд̇угаваад̣̇збийд̇и ааха ‘‘д̇ат̇аа ахзд̇угаваад̣̇збий’’д̇и.
Yathā pubbekatavāde chandavāyāmānaṃ asambhavato paccattapurisakārānaṃ abhāvo, evaṃ issaranimmānavādepi issareneva sabbassa nimmitabhāvānujānanatoti vuttaṃ ‘‘pubbekatavāde vuttanayeneva veditabbo’’ti. Esa nayo ahetukavādepīti āha ‘‘tathā ahetukavādepī’’ti.
имзсанд̇иаад̣̇инаа имзсам̣ д̇ид̇т̇ааяад̇анаанам̣ д̇ужчаасаарад̇ааяа т̇усагодданзна гун̣д̣агамад̇д̇ассаби алаабхо вияа барамад̇т̇алзсассаби абхааво, д̇ат̇аа каж̇ж̇обанагобхаасад̇о д̇зж̇асо пулин̇г̇амад̇д̇ассаби абхааво вияа анд̇хавзн̣игассаби маг̇г̇асса аббадилаабхо вияа сад̣̇д̣̇амад̇д̇ам̣ ниссааяа мижчаабхааг̇зна вибаллад̇т̇ад̇ааяа д̣̇ад̣̇д̣̇араж̇аад̇агз (ж̇аа. 1.2.43-43) сасагасад̣̇исад̇аа жа вибхаавид̇аа ход̇и. саарабхааванд̇и сийласаараад̣̇исамбад̇д̇ияаа саарасаб̣бхаавам̣. нияяаанигабхааванд̇и зганд̇знзва ваддад̇о нияяаанаавахабхаавам̣. аниг̇г̇ахид̇од̇и на ниг̇г̇ахзд̇аб̣б̣о. д̇знааха ‘‘ниг̇г̇ахзд̇ум̣ асаггун̣зяяо’’д̇и. асам̣гилидтод̇и сам̣гилзсавирахид̇о. д̇знааха ‘‘ниггилзсо’’д̇иаад̣̇и. анубаваж̇ж̇од̇и д̇хаммад̇о на убавад̣̇ид̇аб̣б̣о. аббадигудто наама аббадисзд̇ханам̣ ваа сияаа анаггосанам̣ ваад̇и д̇ад̣̇убхаяам̣ д̣̇ассзнд̇о ‘‘аббадиб̣аахид̇о анубаггудто’’д̇и ааха.
Imesantiādinā imesaṃ titthāyatanānaṃ tucchāsāratāya thusakoṭṭanena kuṇḍakamattassapi alābho viya paramatthalesassapi abhāvo, tathā khajjopanakobhāsato tejaso phuliṅgamattassapi abhāvo viya andhaveṇikassapi maggassa appaṭilābho viya saddamattaṃ nissāya micchābhāgena vipallatthatāya daddarajātake (jā. 1.2.43-43) sasakasadisatā ca vibhāvitā hoti. Sārabhāvanti sīlasārādisampattiyā sārasabbhāvaṃ. Niyyānikabhāvanti ekanteneva vaṭṭato niyyānāvahabhāvaṃ. Aniggahitoti na niggahetabbo. Tenāha ‘‘niggahetuṃ asakkuṇeyyo’’ti. Asaṃkiliṭṭhoti saṃkilesavirahito. Tenāha ‘‘nikkileso’’tiādi. Anupavajjoti dhammato na upavaditabbo. Appaṭikuṭṭho nāma appaṭisedhanaṃ vā siyā anakkosanaṃ vāti tadubhayaṃ dassento ‘‘appaṭibāhito anupakkuṭṭho’’ti āha.
д̇асса д̇хаммассаад̇и ‘‘аяам̣ ко бана, бхигкавз’’д̇иаад̣̇инаа уд̣̇д̇хадасса д̇хаммасса. бан̃хам̣ бужчид̇ваад̇и гат̇зд̇угамяад̇аавасзна бан̃хам̣ бужчид̇ваа. яат̇аабадибаадияаад̇и маад̇игааяа яат̇аанигкид̇д̇аббадибаадияаа. д̇хаад̇уяод̇и сабхаавад̇хааран̣адтзна д̇хаад̇уяо. д̇аа бана яасмаа д̇ан̣хаад̣̇идтигаббанаабаригаббид̇аад̇д̇асубхасукасассад̇аад̣̇ибагад̇иаад̣̇ид̇хуваад̣̇иж̇ийваад̣̇игааяаад̣̇игаа вияа на ижчаасабхааваа д̣̇идтиаад̣̇ирахид̇зхи вимужжамаанауд̣̇умб̣арабубпаад̣̇илогавохааравад̇т̇ууни вияа жа ваажаавад̇т̇умад̇д̇аа, ат̇а ко сажжабарамад̇т̇абхууд̇аад̇и ааха ‘‘сабхааваа’’д̇и, сажжасабхааваад̇и ад̇т̇о. ад̇д̇ано сабхаавам̣ д̇хаарзнд̇ийд̇и хи д̇хаад̇уяо. ниж̇ж̇ийваниссад̇д̇абхааваббагаасагод̇и б̣аахирабаригаббид̇аж̇ийваабхааваббагаасаго логияамахааж̇анасам̣габбид̇асад̇д̇аабхааваббагаасаго жа. аагарадтзнаад̇и уббаж̇ж̇анадтаанабхаавзна. уббад̇д̇идтаанамби хи аагаро ааяад̇ананд̇и вужжад̇и яат̇аа ‘‘гамб̣ож̇о ассаанам̣ ааяад̇ана’’нд̇и. манобавижаараад̇и д̇ам̣ д̇ам̣ аарамман̣ам̣ убзжжа манасо вивид̇хажаран̣аагааро. гзхи гад̇т̇аад̇и ааха ‘‘вид̇аггавижаарабаад̣̇зхий’’д̇иаад̣̇и. адтаарасасу таанзсууд̇и ча соманассадтаанияаани , ча д̣̇оманассадтаанияаани, ча убзгкаадтаанияаанийд̇и звам̣ адтаарасасу таанзсу.
Tassa dhammassāti ‘‘ayaṃ kho pana, bhikkhave’’tiādinā uddhaṭassa dhammassa. Pañhaṃ pucchitvāti kathetukamyatāvasena pañhaṃ pucchitvā. Yathāpaṭipāṭiyāti mātikāya yathānikkhittappaṭipāṭiyā. Dhātuyoti sabhāvadhāraṇaṭṭhena dhātuyo. Tā pana yasmā taṇhādiṭṭhikappanāparikappitaattasubhasukhasassatādipakatiādidhuvādijīvādikāyādikā viya na icchāsabhāvā diṭṭhiādirahitehi vimuccamānaudumbarapupphādilokavohāravatthūni viya ca vācāvatthumattā, atha kho saccaparamatthabhūtāti āha ‘‘sabhāvā’’ti, saccasabhāvāti attho. Attano sabhāvaṃ dhārentīti hi dhātuyo. Nijjīvanissattabhāvappakāsakoti bāhiraparikappitajīvābhāvappakāsako lokiyamahājanasaṃkappitasattābhāvappakāsako ca. Ākaraṭṭhenāti uppajjanaṭṭhānabhāvena. Uppattiṭṭhānampi hi ākaro āyatananti vuccati yathā ‘‘kambojo assānaṃ āyatana’’nti. Manopavicārāti taṃ taṃ ārammaṇaṃ upecca manaso vividhacaraṇākāro. Kehi katthāti āha ‘‘vitakkavicārapādehī’’tiādi. Aṭṭhārasasu ṭhānesūti cha somanassaṭṭhāniyāni , cha domanassaṭṭhāniyāni, cha upekkhāṭṭhāniyānīti evaṃ aṭṭhārasasu ṭhānesu.
бад̇идтаад̇хаад̇ууд̇и сзсабхууд̇ад̇д̇аяасса жзва саб̣б̣уубаад̣̇ааруубаанан̃жа бад̇идтаасабхааваа д̇хаад̇у. иминаа наязна ааб̣анд̇ханад̇хаад̇ууд̇иаад̣̇ийсуби ад̇т̇о взд̣̇ид̇аб̣б̣о. абижа гагкал̣абхаавасид̣̇д̇хо сахаж̇аад̇ад̇хаммаанам̣ аад̇хаарабхааво бад̇идтаабхааво. д̣̇равабхаавасид̣̇д̇хам̣ самбин̣д̣анам̣ ааб̣анд̇ханам̣. ун̣хабхаавасид̣̇д̇хам̣ муд̣̇уд̇аабаггад̇аавахам̣ барибаажанам̣. т̇ад̣̇д̇хабхааваавахам̣ уд̣̇д̇хумаад̇анам̣ вид̇т̇амбханам̣. руубавивид̇д̇о руубабарияанд̇о аагаасод̇и язсам̣ со барижчзд̣̇о, д̇зхи со асампудтоваад̇и вуд̇д̇ам̣ ‘‘аагаасад̇хаад̇ууд̇и асампудтад̇хаад̇уу’’д̇и. сан̃ж̇аананавид̇хураа аарамман̣уубалад̣̇д̇хи виж̇аананад̇хаад̇у. вид̇т̇аарад̇оби гат̇зд̇ум̣ ваддад̇и сан̇кзбанд̇ог̇ад̇хад̇д̇аа вид̇т̇аарасса. сан̇кзбад̇о гат̇зд̇ум̣ на ваддад̇и гат̇зд̇аб̣б̣асса ад̇т̇асса анавасзсабарияаад̣̇аанаабхаавад̇о. д̇знааха ‘‘вид̇т̇аарад̇ова ваддад̇ий’’д̇и. убхаяат̇аад̇и сан̇кзбад̇о вид̇т̇аарад̇о жа.
Patiṭṭhādhātūti sesabhūtattayassa ceva sabbūpādārūpānañca patiṭṭhāsabhāvā dhātu. Iminā nayena ābandhanadhātūtiādīsupi attho veditabbo. Apica kakkhaḷabhāvasiddho sahajātadhammānaṃ ādhārabhāvo patiṭṭhābhāvo. Dravabhāvasiddhaṃ sampiṇḍanaṃ ābandhanaṃ. Uṇhabhāvasiddhaṃ mudutāpakkatāvahaṃ paripācanaṃ. Thaddhabhāvāvahaṃ uddhumātanaṃ vitthambhanaṃ. Rūpavivitto rūpapariyanto ākāsoti yesaṃ so paricchedo, tehi so asamphuṭṭhovāti vuttaṃ ‘‘ākāsadhātūti asamphuṭṭhadhātū’’ti. Sañjānanavidhurā ārammaṇūpaladdhi vijānanadhātu. Vitthāratopi kathetuṃ vaṭṭati saṅkhepantogadhattā vitthārassa. Saṅkhepato kathetuṃ na vaṭṭati kathetabbassa atthassa anavasesapariyādānābhāvato. Tenāha ‘‘vitthāratova vaṭṭatī’’ti. Ubhayathāti saṅkhepato vitthārato ca.
анибпаннааби аагаасад̇хаад̇у бхууд̇аани убаад̣̇ааяа г̇ахзд̇аб̣б̣ад̇аамад̇д̇зна ‘‘убаад̣̇аарууба’’нд̇зва вужжад̇и. д̣̇идтаанзваад̇и саллагкзд̇аб̣б̣аани убаад̣̇ааруубабхаавасааман̃н̃ад̇о. д̇зна сахаж̇аад̇аа взд̣̇анаа взд̣̇анаагканд̇хо самуд̣̇ааяз бавад̇д̇авохаарасса аваяавзби д̣̇иссанад̇о яат̇аа ‘‘вад̇т̇згад̣̇зсз д̣̇ад̣дхз вад̇т̇ам̣ д̣̇ад̣дха’’нд̇и. ‘‘пассо жа жзд̇анаа жа сан̇каарагканд̇хо’’д̇и вуд̇д̇ам̣ махаабхуумагад̇д̇аа д̇зсам̣ д̇аббад̇хаанад̇д̇аа жа сан̇каарагканд̇хасса. аруубагканд̇хаа наамам̣ аарамман̣аабхимукам̣ наманад̇о наамаад̇хийнаг̇г̇ахан̣ад̇о жа. руубагканд̇хо руубам̣ бариб̣яад̇д̇ам̣ руббанадтзна. бажжаяанд̇и ниссаяабхууд̇ам̣ бажжаяам̣. вибхааг̇зна д̣̇ваажад̇д̇аалийса. згаасийд̇и жид̇д̇аани ‘‘саммасанажаарояа’’нд̇и гад̇ваа. ануггамзна бадибаж̇ж̇амаанод̇и звам̣ ган̇каавид̇аран̣ависуд̣̇д̇хияам̣ тид̇о убаримзна д̇иссаннам̣ висуд̣̇д̇хийнам̣ самбаад̣̇анавасзна висуд̣̇д̇хибхааванам̣ уссуггаабзнд̇о.
Anipphannāpi ākāsadhātu bhūtāni upādāya gahetabbatāmattena ‘‘upādārūpa’’nteva vuccati. Diṭṭhānevāti sallakkhetabbāni upādārūpabhāvasāmaññato. Tena sahajātā vedanā vedanākkhandho samudāye pavattavohārassa avayavepi dissanato yathā ‘‘vatthekadese daḍḍhe vatthaṃ daḍḍha’’nti. ‘‘Phasso ca cetanā ca saṅkhārakkhandho’’ti vuttaṃ mahābhūmakattā tesaṃ tappadhānattā ca saṅkhārakkhandhassa. Arūpakkhandhā nāmaṃ ārammaṇābhimukhaṃ namanato nāmādhīnaggahaṇato ca. Rūpakkhandho rūpaṃ paribyattaṃ ruppanaṭṭhena. Paccayanti nissayabhūtaṃ paccayaṃ. Vibhāgena dvācattālīsa. Ekāsīticittāni ‘‘sammasanacāroya’’nti katvā. Anukkamena paṭipajjamānoti evaṃ kaṅkhāvitaraṇavisuddhiyaṃ ṭhito uparimena tissannaṃ visuddhīnaṃ sampādanavasena visuddhibhāvanaṃ ussukkāpento.
пассааяад̇ананд̇и пассасса уббад̇д̇идтаанам̣. суван̣н̣аад̣̇ийнанд̇и суван̣н̣аман̣иваж̇ираад̣̇ийнам̣. аагин̣н̣ам̣ вияа худ̇ваа уббаж̇ж̇анд̇и зд̇т̇аад̇и аагаро. яат̇аа жагку вибаагапассасса висзсабажжаяо, на д̇ат̇аа ид̇арзсанд̇и гад̇ваа вуд̇д̇ам̣ ‘‘д̣̇вз жагкувин̃н̃аан̣ааний’’д̇иаад̣̇и. зса наяо сзсаваарзсуби. д̣̇вад̇д̇им̣сааяа вибаагапассзсу д̣̇вибан̃жавин̃н̃аан̣асахаг̇ад̇апассз табзд̇ваа сзсаа д̣̇ваавийсад̇и вибаагапассаа взд̣̇ид̇аб̣б̣аа. д̣̇идтамзва ход̇и д̇зна самаанаяог̇агкамад̇д̇аа. ‘‘сан̇кзбад̇о д̇ааваа’’д̇и сан̇кзбагат̇ам̣ аарабхид̇вааби вид̇т̇аарагат̇аабзд̇т̇а вуд̇д̇анаяад̇д̇аа сувин̃н̃зяяааваад̇и вуд̇д̇ам̣ ‘‘хздтаа…бз… взд̣̇ид̇аб̣б̣а’’нд̇и.
Phassāyatananti phassassa uppattiṭṭhānaṃ. Suvaṇṇādīnanti suvaṇṇamaṇivajirādīnaṃ. Ākiṇṇaṃ viya hutvā uppajjanti etthāti ākaro. Yathā cakkhu vipākaphassassa visesapaccayo, na tathā itaresanti katvā vuttaṃ ‘‘dve cakkhuviññāṇānī’’tiādi. Esa nayo sesavāresupi. Dvattiṃsāya vipākaphassesu dvipañcaviññāṇasahagataphasse ṭhapetvā sesā dvāvīsati vipākaphassā veditabbā. Diṭṭhameva hoti tena samānayogakkhamattā. ‘‘Saṅkhepato tāvā’’ti saṅkhepakathaṃ ārabhitvāpi vitthārakathāpettha vuttanayattā suviññeyyāvāti vuttaṃ ‘‘heṭṭhā…pe… veditabba’’nti.
соманассасса уббад̇д̇идтаанабхууд̇ам̣ соманассадтаанияам̣. д̇знааха ‘‘соманассасса гааран̣абхууд̇а’’нд̇и. убавижарад̇ийд̇и убзжжа бавад̇д̇ад̇и. сабхаавад̇о сан̇габбад̇о жа соманассаад̣̇иуббад̇д̇ихзд̇угаа соманассадтаанияаад̣̇ид̇аад̇и ааха ‘‘идтам̣ ваа ход̇уу’’д̇иаад̣̇и. жад̇уд̇т̇ам̣ д̣̇идтамзва ход̇и д̇ад̣̇авинаабхаавад̇о.
Somanassassa uppattiṭṭhānabhūtaṃ somanassaṭṭhāniyaṃ. Tenāha ‘‘somanassassa kāraṇabhūta’’nti. Upavicaratīti upecca pavattati. Sabhāvato saṅkappato ca somanassādiuppattihetukā somanassaṭṭhāniyāditāti āha ‘‘iṭṭhaṃ vā hotū’’tiādi. Catutthaṃ diṭṭhameva hoti tadavinābhāvato.
арияасажжаанийд̇и буримабад̣̇з уд̇д̇арабад̣̇алобзнааяам̣ нид̣̇д̣̇зсод̇и ааха ‘‘арияабхаавагарааний’’д̇иаад̣̇и. висуд̣̇д̇химаг̇г̇з (висуд̣̇д̇хи. 2.531) багаасид̇ам̣, д̇асмаа на ид̇ха багаасзд̇аб̣б̣анд̇и ад̇хиббааяо. сукааваб̣од̇ханад̇т̇анд̇и д̣̇зсияамаанааяа ваддагат̇ааяа сукзна аваб̣од̇ханад̇т̇ам̣. д̇знааха ‘‘яасса хий’’д̇иаад̣̇и. д̣̇ваад̣̇асабад̣̇анд̇и авиж̇ж̇аад̣̇ийхи бад̣̇зхи д̣̇ваад̣̇асабад̣̇ам̣. бажжаяавадданд̇и бажжаяаббаб̣анд̇хам̣. гат̇зд̇угаамо ход̇и бажжаяаагаарамукзна сажжаани д̣̇ассзд̇угаамад̇ааяа. г̇аб̣бхаавагганд̇ивадданд̇и г̇аб̣бхогганд̇имукзна вибаагаваддам̣ д̣̇ассзд̇и ‘‘г̇аб̣бхассаавагганд̇и ход̇ий’’д̇иаад̣̇инаа. д̇асмаа банзд̇т̇а г̇аб̣бхаавагганд̇ивасзнзва ваддам̣ д̣̇ассид̇анд̇и ааха ‘‘г̇аб̣бхаавагганд̇иваддасмим̣ хий’’д̇иаад̣̇и. г̇аб̣бхаавагганд̇иваддасминд̇и маад̇угужчимхи ниб̣б̣ад̇д̇анавасзна бавад̇д̇ад̇хаммаббаб̣анд̇хз. д̣̇ассид̇зд̇и д̣̇зсанаавасзна д̣̇ассид̇з. буримаа д̣̇вз яонияо ид̇араахи ол̣ааригад̇ааяа бариб̣яад̇д̇ад̇араад̇и вуд̇д̇ам̣ ‘‘г̇аб̣бхаавагганд̇и…бз… аваб̣од̇хзд̇умбий’’д̇и.
Ariyasaccānīti purimapade uttarapadalopenāyaṃ niddesoti āha ‘‘ariyabhāvakarānī’’tiādi. Visuddhimagge (visuddhi. 2.531) pakāsitaṃ, tasmā na idha pakāsetabbanti adhippāyo. Sukhāvabodhanatthanti desiyamānāya vaṭṭakathāya sukhena avabodhanatthaṃ. Tenāha ‘‘yassa hī’’tiādi. Dvādasapadanti avijjādīhi padehi dvādasapadaṃ. Paccayavaṭṭanti paccayappabandhaṃ. Kathetukāmo hoti paccayākāramukhena saccāni dassetukāmatāya. Gabbhāvakkantivaṭṭanti gabbhokkantimukhena vipākavaṭṭaṃ dasseti ‘‘gabbhassāvakkanti hotī’’tiādinā. Tasmā panettha gabbhāvakkantivaseneva vaṭṭaṃ dassitanti āha ‘‘gabbhāvakkantivaṭṭasmiṃ hī’’tiādi. Gabbhāvakkantivaṭṭasminti mātukucchimhi nibbattanavasena pavattadhammappabandhe. Dassiteti desanāvasena dassite. Purimā dve yoniyo itarāhi oḷārikatāya paribyattatarāti vuttaṃ ‘‘gabbhāvakkanti…pe… avabodhetumpī’’ti.
бажжаяамад̇д̇анд̇и чаннам̣ д̇хаад̇уунам̣ саад̇хааран̣ам̣ бажжаяабхаавамад̇д̇ам̣, на д̇зхи бхааг̇асо нибпаад̣̇ияамаанам̣ бажжаяависзсам̣ ‘‘гуд̇о банзд̇ам̣ чаннам̣ д̇хаад̇ууна’’нд̇и авибхааг̇зна вуд̇д̇ад̇д̇аа. д̇знааха ‘‘ид̣̇ам̣ вуд̇д̇ам̣ ход̇ий’’д̇иаад̣̇и. на маад̇у на бид̇у д̇аасам̣ д̇хаад̇уунам̣ имасса сад̇д̇асса б̣аахирабхаавад̇о. г̇аб̣бхассаад̇и зд̇т̇а г̇аб̣бхад̇и ад̇д̇абхаавабхаавзна вад̇д̇ад̇ийд̇и г̇аб̣бхо, галалаад̣̇иавад̇т̇о д̇хаммаббаб̣анд̇хо. д̇анниссид̇ад̇д̇аа бана сад̇д̇асанд̇аано г̇аб̣бход̇и вуд̇д̇о яат̇аа ман̃жаниссид̇аа ‘‘ман̃жаа уггудтим̣ гаронд̇ий’’д̇и. д̇анниссаяабхаавад̇о маад̇угужчи г̇аб̣бход̇и вужжад̇и ‘‘г̇аб̣бхз васад̇и маан̣аво’’д̇иаад̣̇ийсу (ж̇аа. 1.15.363). г̇аб̣бхо вияаад̇и ваа г̇аб̣бхо. яат̇аа хи ниваасадтаанад̇ааяа сад̇д̇аанам̣ овараго ‘‘г̇аб̣бхо’’д̇и вужжад̇и, звам̣ г̇аб̣бхасзяяагаанам̣ сад̇д̇аанам̣ яаава абхиж̇аад̇и ниваасадтаанад̇ааяа маад̇угужчи ‘‘г̇аб̣бхо’’д̇и вужжад̇и. ид̇ха бана батамам̣ вуд̇д̇аад̇т̇знзва г̇аб̣бход̇и взд̣̇ид̇аб̣б̣о. д̇знааха ‘‘г̇аб̣бхо жа наамаа’’д̇иаад̣̇и.
Paccayamattanti channaṃ dhātūnaṃ sādhāraṇaṃ paccayabhāvamattaṃ, na tehi bhāgaso nipphādiyamānaṃ paccayavisesaṃ ‘‘kuto panetaṃ channaṃ dhātūna’’nti avibhāgena vuttattā. Tenāha ‘‘idaṃ vuttaṃ hotī’’tiādi. Na mātu na pitu tāsaṃ dhātūnaṃ imassa sattassa bāhirabhāvato. Gabbhassāti ettha gabbhati attabhāvabhāvena vattatīti gabbho, kalalādiavattho dhammappabandho. Tannissitattā pana sattasantāno gabbhoti vutto yathā mañcanissitā ‘‘mañcā ukkuṭṭhiṃ karontī’’ti. Tannissayabhāvato mātukucchi gabbhoti vuccati ‘‘gabbhe vasati māṇavo’’tiādīsu (jā. 1.15.363). Gabbho viyāti vā gabbho. Yathā hi nivāsaṭṭhānatāya sattānaṃ ovarako ‘‘gabbho’’ti vuccati, evaṃ gabbhaseyyakānaṃ sattānaṃ yāva abhijāti nivāsaṭṭhānatāya mātukucchi ‘‘gabbho’’ti vuccati. Idha pana paṭhamaṃ vuttaattheneva gabbhoti veditabbo. Tenāha ‘‘gabbho ca nāmā’’tiādi.
нирад̇иад̇т̇зна нираяо жа со яат̇аавуд̇д̇зна ад̇т̇зна г̇аб̣бхо жаад̇и нираяаг̇аб̣бхо. зса наяо сзсабад̣̇зсуби. аяам̣ бана висзсо – д̣̇звамануж̇аад̣̇аяо вияа уд̣̇д̇хам̣ д̣̇ийгхаа ахуд̇ваа д̇ирияам̣ ан̃жид̇аа д̣̇ийгхаад̇и д̇иражчаанаа. д̇з зва канд̇хагодтаасабхаавзна яони жа со вуд̇д̇анаязна г̇аб̣бхо жаад̇и д̇иражчаанаяониг̇аб̣бхо. багадтад̇о сукад̇о абзд̇ам̣ абаг̇амо бзд̇абхааво, д̇ам̣ бад̇д̇аанам̣ висаяод̇и бзд̇д̇ивисаяо, бзд̇аяони. манасса уссаннад̇ааяа суурабхааваад̣̇иг̇ун̣зхи убажид̇амаанасад̇ааяа уггадтаг̇ун̣ажид̇д̇ад̇ааяа мануссаа. д̣̇иб̣б̣анд̇и гаамаг̇ун̣аад̣̇ийхи гийл̣анд̇и лал̣анд̇и ж̇од̇анд̇ийд̇и д̣̇зваа. г̇аб̣бхасад̣̇д̣̇о вуд̇д̇анаяо зва. наанаббагаарод̇и яат̇аавуд̇д̇зна д̇ад̣̇ананд̇арабхзд̣̇зна жа наанаббагаараго. мануссаг̇аб̣бхо ад̇хиббзд̇о субаагадад̇ааяа бажжагкабхаавад̇о. огганд̇и маад̇угужчим̣ оггамид̇ваа вияа уббад̇ид̇ваад̇и гад̇ваа. ниб̣б̣ад̇д̇анам̣ ниб̣б̣ад̇д̇и. баад̇убхааво уббад̇д̇иббагаасаго жа.
Niratiatthena nirayo ca so yathāvuttena atthena gabbho cāti nirayagabbho. Esa nayo sesapadesupi. Ayaṃ pana viseso – devamanujādayo viya uddhaṃ dīghā ahutvā tiriyaṃ añcitā dīghāti tiracchānā. Te eva khandhakoṭṭhāsabhāvena yoni ca so vuttanayena gabbho cāti tiracchānayonigabbho. Pakaṭṭhato sukhato apetaṃ apagamo petabhāvo, taṃ pattānaṃ visayoti pettivisayo, petayoni. Manassa ussannatāya sūrabhāvādiguṇehi upacitamānasatāya ukkaṭṭhaguṇacittatāya manussā. Dibbanti kāmaguṇādīhi kīḷanti laḷanti jotantīti devā. Gabbhasaddo vuttanayo eva. Nānappakāroti yathāvuttena tadanantarabhedena ca nānappakārako. Manussagabbho adhippeto supākaṭatāya paccakkhabhāvato. Okkanti mātukucchiṃ okkamitvā viya uppatitvāti katvā. Nibbattanaṃ nibbatti. Pātubhāvo uppattippakāsako ca.
саннибаад̇о наама авзгаллаж̇аад̇ихийнавзгаллзд̇и д̣̇ассзд̇ум̣ ‘‘ид̇ха маад̇аабид̇аро’’д̇иаад̣̇и вуд̇д̇ам̣. ид̇хаад̇и имасмим̣ сад̇д̇алогз. саннибад̇ид̇аад̇и самод̇хаанабхаавад̇о саннибад̇ид̇аа самааг̇ад̇аа сам̣силидтаа. уд̇унийд̇и уд̇умад̇ий сан̃ж̇аад̇абубпаа. ид̣̇ан̃жа уд̇усамаяам̣ санд̇хааяа вуд̇д̇ам̣, на логасаман̃н̃аагараж̇асса лаг̇г̇анад̣̇ивасамад̇д̇ам̣. маад̇уг̇аамасса хи яасмим̣ г̇аб̣бхаасахасан̃н̃ид̇з огаасз д̣̇аараго ниб̣б̣ад̇д̇ад̇и, д̇ад̇т̇а махад̇ий лохид̇абийл̣агаа сан̣тахид̇ваа аг̇г̇ахид̇абуб̣б̣аа зва бхиж̇ж̇ид̇ваа баг̇гхарад̇и, вад̇т̇у суд̣̇д̇хам̣ ход̇и баг̇гхарид̇алохид̇ад̇д̇аа анаамаяад̇д̇аа жа. висуд̣̇д̇хз вад̇т̇умхи маад̇аабид̇уусу згаваарам̣ саннибад̇ид̇зсу яаава сад̇д̇а д̣̇ивасаани кзд̇д̇амзва ход̇и. суд̣̇д̇хам̣ вад̇т̇у нахаанад̇о барамби гад̇ибаяаани д̣̇ивасаани г̇аб̣бхасан̣таханад̇ааяа кзд̇д̇амзва ход̇и барид̇д̇асса лохид̇алзсасса виж̇ж̇амаанад̇д̇аа. д̇асмим̣ самаяз хад̇т̇аг̇г̇аахавзн̣иг̇г̇аахаад̣̇инаа ан̇г̇абараамасанзнаби д̣̇аараго ниб̣б̣ад̇д̇ад̇иязва. ид̇т̇исанд̇аанзби хи сад̇д̇аби д̇хаад̇уу лаб̣бханд̇зва. д̇ат̇аа хи бааригааяа наабхибараамасанзна саамасса б̣од̇хисад̇д̇асса, д̣̇идтаман̇г̇алигааяа наабхибараамасанзна (ж̇аа. адта. 4.15.маад̇ан̇г̇аж̇аад̇агаван̣н̣анаа; ма. ни. адта. 2.65) ман̣д̣аб̣яасса ниб̣б̣ад̇д̇и ахоси. г̇анд̇ханад̇о уббаннаг̇ад̇ияаа нимид̇д̇уубадтаанзна суужанад̇о д̣̇ийбанад̇о г̇анд̇ход̇и лад̣̇д̇ханаамзна бхаваг̇аамигаммунаа аб̣б̣ад̇и бавад̇д̇ад̇ийд̇и г̇анд̇хаб̣б̣о, д̇ад̇т̇а уббаж̇ж̇амаанагасад̇д̇о. бажжубадтид̇о ход̇ийд̇и на маад̇аабид̇уунам̣ саннибаад̇ам̣ ологаяамаано самийбз тид̇о бажжубадтид̇о наама ход̇и, гаммаяанд̇аяанд̇ид̇о бана зго сад̇д̇о д̇асмим̣ огаасз ниб̣б̣ад̇д̇анаго ход̇ийд̇и аяамзд̇т̇а ад̇хиббааяо. д̇ад̣̇аа хи д̇ад̇руубаг̇асад̇д̇о д̇ад̇руубабад̇д̇иааваханд̇агаммасан̇каад̇зна бзллагаяанд̇зна д̇ат̇ад̇т̇ааяа бзллид̇о убанийд̇о вияа ход̇и.
Sannipāto nāma avekallajātihīnavekalleti dassetuṃ ‘‘idha mātāpitaro’’tiādi vuttaṃ. Idhāti imasmiṃ sattaloke. Sannipatitāti samodhānabhāvato sannipatitā samāgatā saṃsiliṭṭhā. Utunīti utumatī sañjātapupphā. Idañca utusamayaṃ sandhāya vuttaṃ, na lokasamaññākarajassa lagganadivasamattaṃ. Mātugāmassa hi yasmiṃ gabbhāsahasaññite okāse dārako nibbattati, tattha mahatī lohitapīḷakā saṇṭhahitvā aggahitapubbā eva bhijjitvā paggharati, vatthu suddhaṃ hoti paggharitalohitattā anāmayattā ca. Visuddhe vatthumhi mātāpitūsu ekavāraṃ sannipatitesu yāva satta divasāni khettameva hoti. Suddhaṃ vatthu nahānato parampi katipayāni divasāni gabbhasaṇṭhahanatāya khettameva hoti parittassa lohitalesassa vijjamānattā. Tasmiṃ samaye hatthaggāhaveṇiggāhādinā aṅgaparāmasanenapi dārako nibbattatiyeva. Itthisantānepi hi sattapi dhātū labbhanteva. Tathā hi pārikāya nābhiparāmasanena sāmassa bodhisattassa, diṭṭhamaṅgalikāya nābhiparāmasanena (jā. aṭṭha. 4.15.mātaṅgajātakavaṇṇanā; ma. ni. aṭṭha. 2.65) maṇḍabyassa nibbatti ahosi. Gandhanato uppannagatiyā nimittūpaṭṭhānena sūcanato dīpanato gandhoti laddhanāmena bhavagāmikammunā abbati pavattatīti gandhabbo, tattha uppajjamānakasatto. Paccupaṭṭhito hotīti na mātāpitūnaṃ sannipātaṃ olokayamāno samīpe ṭhito paccupaṭṭhito nāma hoti, kammayantayantito pana eko satto tasmiṃ okāse nibbattanako hotīti ayamettha adhippāyo. Tadā hi tatrūpagasatto tatrūpapattiāvahantakammasaṅkhātena pellakayantena tathatthāya pellito upanīto viya hoti.
вин̃н̃аан̣абажжаяаа наамаруубанд̇и зд̇т̇а вин̃н̃аан̣асса бажжаяабхаавзна г̇ахид̇ад̇д̇аа ‘‘д̇аяо аруубино канд̇хаа’’д̇и вуд̇д̇ам̣. ид̇ха бана вин̃н̃аан̣ам̣ бажжаяабхаавзна аг̇г̇ахзд̇ваа г̇аб̣бхогганд̇ияаа зва бажжаяабхаавзна г̇ахид̇ад̇д̇аа ‘‘вин̃н̃аан̣агканд̇хамби багкибид̇ваа’’д̇и вуд̇д̇ам̣. ид̇ха бана мануссаг̇аб̣бхасса огганд̇ияаа ад̇хиббзд̇ад̇д̇аа ‘‘г̇аб̣бхасзяяагаанам̣ бадисанд̇хигкан̣з’’д̇и вуд̇д̇ам̣.
Viññāṇapaccayā nāmarūpanti ettha viññāṇassa paccayabhāvena gahitattā ‘‘tayo arūpino khandhā’’ti vuttaṃ. Idha pana viññāṇaṃ paccayabhāvena aggahetvā gabbhokkantiyā eva paccayabhāvena gahitattā ‘‘viññāṇakkhandhampi pakkhipitvā’’ti vuttaṃ. Idha pana manussagabbhassa okkantiyā adhippetattā ‘‘gabbhaseyyakānaṃ paṭisandhikkhaṇe’’ti vuttaṃ.
д̇ан̣хааяа самуд̣̇аяасажжабхаавзна г̇ахид̇ад̇д̇аа ‘‘табзд̇ваа д̇ан̣ха’’нд̇и вуд̇д̇ам̣. д̇ассзва бабхаавигаад̇и д̇ассзва яат̇аавуд̇д̇асса д̣̇угкасажжасса уббаад̣̇игаа. д̣̇угканирод̇ход̇и зд̇т̇а д̣̇угкаг̇г̇ахан̣зна д̇ан̣хааби г̇ахид̇аад̇и ааха ‘‘д̇зсам̣ д̣̇виннамби…бз… д̣̇угканирод̇хо’’д̇и. ависзсзна хи д̇збхуумагаваддам̣ ид̇ха д̣̇угканд̇и ад̇хиббзд̇ам̣. ат̇а ваа д̣̇угкасса ануббад̇д̇инирод̇хо д̇аб̣бхаавигааяа д̇ан̣хааяа ануббад̇д̇инирод̇хзна винаа на ход̇ийд̇и вуд̇д̇ам̣ ‘‘д̇зсам̣ д̣̇виннамби…бз… д̣̇угканирод̇хо’’д̇и. ануббад̇д̇инирод̇ход̇и жа ануббад̇д̇инирод̇ханимид̇д̇ам̣ ниб̣б̣аанам̣ д̣̇ассзд̇и.
Taṇhāya samudayasaccabhāvena gahitattā ‘‘ṭhapetvā taṇha’’nti vuttaṃ. Tasseva pabhāvikāti tasseva yathāvuttassa dukkhasaccassa uppādikā. Dukkhanirodhoti ettha dukkhaggahaṇena taṇhāpi gahitāti āha ‘‘tesaṃ dvinnampi…pe… dukkhanirodho’’ti. Avisesena hi tebhūmakavaṭṭaṃ idha dukkhanti adhippetaṃ. Atha vā dukkhassa anuppattinirodho tabbhāvikāya taṇhāya anuppattinirodhena vinā na hotīti vuttaṃ ‘‘tesaṃ dvinnampi…pe… dukkhanirodho’’ti. Anuppattinirodhoti ca anuppattinirodhanimittaṃ nibbānaṃ dasseti.
‘‘д̇ад̇т̇а вуд̇д̇анаязнзва взд̣̇ид̇аб̣б̣а’’нд̇и вад̇ваа убхаяад̇т̇а баал̣ияаа бавад̇д̇иаагаарабхзд̣̇ам̣ д̣̇ассзд̇ум̣ ‘‘аяам̣ бана висзсо’’д̇и ааха. д̇ад̇т̇аад̇и висад̣̇д̇химаг̇г̇з. ид̇хаад̇и имасмим̣ суд̇д̇з. авиж̇ж̇ааяа д̇взваад̇и авиж̇ж̇ааяа д̇у зва. асзсавирааг̇анирод̇хаад̇и зд̇т̇а ажжанд̇амзва сан̇каарз вираж̇ж̇ад̇и зд̇знаад̇и вирааг̇о, маг̇г̇о, д̇асмаа вирааг̇асан̇каад̇зна маг̇г̇зна асзсанирод̇хаа асзсзд̇ваа нирод̇хаа самужчинд̣̇анаад̇и звамзд̇т̇а ад̇т̇о д̣̇адтаб̣б̣о.
‘‘Tattha vuttanayeneva veditabba’’nti vatvā ubhayattha pāḷiyā pavattiākārabhedaṃ dassetuṃ ‘‘ayaṃ pana viseso’’ti āha. Tatthāti visaddhimagge. Idhāti imasmiṃ sutte. Avijjāya tvevāti avijjāya tu eva. Asesavirāganirodhāti ettha accantameva saṅkhāre virajjati etenāti virāgo, maggo, tasmā virāgasaṅkhātena maggena asesanirodhā asesetvā nirodhā samucchindanāti evamettha attho daṭṭhabbo.
сагалассаад̇и анавасзсасса. гзвалассаад̇и ваа суд̣̇д̇хасса, барабаригаббид̇асад̇д̇аж̇ийваад̣̇ивирахид̇ассаад̇и ад̇т̇о. кийн̣аагаароби вужжад̇и ‘‘нируж̇жханам̣ нирод̇хо’’д̇и иминаа ад̇т̇зна. арахад̇д̇амби нирод̇ход̇и вужжад̇и нирод̇ханд̇з уббаннад̇д̇аа. ниб̣б̣аанамби нирод̇ход̇и вужжад̇и авиж̇ж̇аад̣̇ийнам̣ нирод̇хасса нимид̇д̇абхаавад̇о авиж̇ж̇аад̣̇аяо нируж̇жханд̇и зд̇т̇аад̇и нирод̇ход̇и гад̇ваа. кийн̣аагаарад̣̇ассанавасзнаад̇и авиж̇ж̇аад̣̇ийнам̣ ануббад̇д̇инирод̇хзна нируж̇жханаагаарад̣̇ассанавасзна. ниб̣б̣аанамзва санд̇хааяа, на бана арахад̇д̇анд̇и ад̇хиббааяо. сабхаавад̇хаммаанам̣ ниг̇г̇ахо наама яат̇аавуд̇д̇ад̇хаммабарижчзд̣̇ад̇о уунаад̇хигабхааваббагаасанзна ад̇д̇асабхаававибхааванзнзва ход̇ийд̇и ааха ‘‘ниг̇г̇ан̣ханд̇о хий’’д̇иаад̣̇и.
Sakalassāti anavasesassa. Kevalassāti vā suddhassa, paraparikappitasattajīvādivirahitassāti attho. Khīṇākāropi vuccati ‘‘nirujjhanaṃ nirodho’’ti iminā atthena. Arahattampi nirodhoti vuccati nirodhante uppannattā. Nibbānampi nirodhoti vuccati avijjādīnaṃ nirodhassa nimittabhāvato avijjādayo nirujjhanti etthāti nirodhoti katvā. Khīṇākāradassanavasenāti avijjādīnaṃ anuppattinirodhena nirujjhanākāradassanavasena. Nibbānameva sandhāya, na pana arahattanti adhippāyo. Sabhāvadhammānaṃ niggaho nāma yathāvuttadhammaparicchedato ūnādhikabhāvappakāsanena attasabhāvavibhāvaneneva hotīti āha ‘‘niggaṇhanto hī’’tiādi.
д̇ид̇т̇ааяад̇анасуд̇д̇аван̣н̣анаа нидтид̇аа.
Titthāyatanasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. д̇ид̇т̇ааяад̇анаад̣̇исуд̇д̇ам̣ • 1. Titthāyatanādisuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 1. д̇ид̇т̇ааяад̇анасуд̇д̇аван̣н̣анаа • 1. Titthāyatanasuttavaṇṇanā
