| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
தித்தி²யபக்கந்தககதா²
Titthiyapakkantakakathā
தித்தி²யபக்கந்தகோ பி⁴க்க²வேதி எத்த² பன தித்தி²யேஸு பக்கந்தோ பவிட்டோ²தி தித்தி²யபக்கந்தகோ. ஸோ ந கேவலங் ந உபஸம்பாதே³தப்³போ³, அத² கோ² ந பப்³பா³ஜேதப்³போ³பி. தத்ராயங் வினிச்ச²யோ – உபஸம்பன்னோ பி⁴க்கு² தித்தி²யோ ப⁴விஸ்ஸாமீதி ஸலிங்கே³னேவ தேஸங் உபஸ்ஸயங் க³ச்ச²தி, பத³வாரே பத³வாரே து³க்கடங். தேஸங் லிங்கே³ ஆதி³ன்னமத்தே தித்தி²யபக்கந்தகோ ஹோதி. யோபி ஸயமேவ ‘‘தித்தி²யோ ப⁴விஸ்ஸாமீ’’தி குஸசீராதீ³னி நிவாஸேதி, தித்தி²யபக்கந்தகோ ஹோதியேவ. யோ பன நக்³கோ³ ந்ஹாயந்தோ அத்தானங் ஓலோகெத்வா ‘‘ஸோப⁴தி மே ஆஜீவகபா⁴வோ, ஆஜீவகோ ப⁴விஸ்ஸாமீ’’தி காஸாயானி அனாதா³ய நக்³கோ³வ ஆஜீவகானங் உபஸ்ஸயங் க³ச்ச²தி, பத³வாரே பத³வாரே து³க்கடங். ஸசே பனஸ்ஸ அந்தராமக்³கே³ ஹிரொத்தப்பங் உப்பஜ்ஜதி, து³க்கடானி தே³ஸெத்வா முச்சதி. தேஸங் உபஸ்ஸயங் க³ந்த்வாபி தேஹி வா ஓவதி³தோ அத்தனா வா ‘‘இமேஸங் பப்³ப³ஜ்ஜா அதிது³க்கா²’’தி நிவத்தந்தோபி முச்சதியேவ.
Titthiyapakkantakobhikkhaveti ettha pana titthiyesu pakkanto paviṭṭhoti titthiyapakkantako. So na kevalaṃ na upasampādetabbo, atha kho na pabbājetabbopi. Tatrāyaṃ vinicchayo – upasampanno bhikkhu titthiyo bhavissāmīti saliṅgeneva tesaṃ upassayaṃ gacchati, padavāre padavāre dukkaṭaṃ. Tesaṃ liṅge ādinnamatte titthiyapakkantako hoti. Yopi sayameva ‘‘titthiyo bhavissāmī’’ti kusacīrādīni nivāseti, titthiyapakkantako hotiyeva. Yo pana naggo nhāyanto attānaṃ oloketvā ‘‘sobhati me ājīvakabhāvo, ājīvako bhavissāmī’’ti kāsāyāni anādāya naggova ājīvakānaṃ upassayaṃ gacchati, padavāre padavāre dukkaṭaṃ. Sace panassa antarāmagge hirottappaṃ uppajjati, dukkaṭāni desetvā muccati. Tesaṃ upassayaṃ gantvāpi tehi vā ovadito attanā vā ‘‘imesaṃ pabbajjā atidukkhā’’ti nivattantopi muccatiyeva.
ஸசே பன ‘‘கிங் தும்ஹாகங் பப்³ப³ஜ்ஜாய உக்கட்ட²’’ந்தி புச்சி²த்வா ‘‘கேஸமஸ்ஸுலுஞ்சனாதீ³னீ’’தி வுத்தோ ஏககேஸம்பி லுஞ்சாபேதி, உக்குடிகப்பதா⁴னாதீ³னி வா வத்தானி ஆதி³யதி, மோரபிஞ்சா²தீ³னி வா நிவாஸேதி, தேஸங் லிங்க³ங் க³ண்ஹாதி, ‘‘அயங் பப்³ப³ஜ்ஜா ஸெட்டா²’’தி ஸெட்ட²பா⁴வங் வா உபக³ச்ச²தி, ந முச்சதி, தித்தி²யபக்கந்தகோ ஹோதி. ஸசே பன ‘‘ஸோப⁴தி நு கோ² மே தித்தி²யபப்³ப³ஜ்ஜா, நனு கோ² ஸோப⁴தீ’’தி வீமங்ஸனத்த²ங் குஸசீராதீ³னி வா நிவாஸேதி, ஜடங் வா ப³ந்த⁴தி, கா²ரிகாஜங் வா ஆதி³யதி, யாவ ந ஸம்படிச்ச²தி, தாவ நங் லத்³தி⁴ ரக்க²தி, ஸம்படிச்சி²தமத்தே தித்தி²யபக்கந்தகோ ஹோதி. அச்சி²ன்னசீவரோ பன குஸசீராதீ³னி நிவாஸெந்தோ ராஜப⁴யாதீ³ஹி வா தித்தி²யலிங்க³ங் க³ண்ஹந்தோ லத்³தி⁴யா அபா⁴வேன நேவ தித்தி²யபக்கந்தகோ ஹோதி.
Sace pana ‘‘kiṃ tumhākaṃ pabbajjāya ukkaṭṭha’’nti pucchitvā ‘‘kesamassuluñcanādīnī’’ti vutto ekakesampi luñcāpeti, ukkuṭikappadhānādīni vā vattāni ādiyati, morapiñchādīni vā nivāseti, tesaṃ liṅgaṃ gaṇhāti, ‘‘ayaṃ pabbajjā seṭṭhā’’ti seṭṭhabhāvaṃ vā upagacchati, na muccati, titthiyapakkantako hoti. Sace pana ‘‘sobhati nu kho me titthiyapabbajjā, nanu kho sobhatī’’ti vīmaṃsanatthaṃ kusacīrādīni vā nivāseti, jaṭaṃ vā bandhati, khārikājaṃ vā ādiyati, yāva na sampaṭicchati, tāva naṃ laddhi rakkhati, sampaṭicchitamatte titthiyapakkantako hoti. Acchinnacīvaro pana kusacīrādīni nivāsento rājabhayādīhi vā titthiyaliṅgaṃ gaṇhanto laddhiyā abhāvena neva titthiyapakkantako hoti.
அயஞ்ச தித்தி²யபக்கந்தகோ நாம உபஸம்பன்னபி⁴க்கு²னா கதி²தோ, தஸ்மா ஸாமணேரோ ஸலிங்கே³ன தித்தா²யதனங் க³தோபி புன பப்³ப³ஜ்ஜஞ்ச உபஸம்பத³ஞ்ச லப⁴தீதி குருந்தி³யங் வுத்தங். புரிமோ பன தெ²ய்யஸங்வாஸகோ அனுபஸம்பன்னேன கதி²தோ; தஸ்மா உபஸம்பன்னோ கூடவஸ்ஸங் க³ணெந்தோபி அஸ்ஸமணோ ந ஹோதி. லிங்கே³ ஸஉஸ்ஸாஹோ பாராஜிகங் ஆபஜ்ஜித்வா பி⁴க்கு²வஸ்ஸாதீ³னி க³ணெந்தோபி தெ²ய்யஸங்வாஸகோ ந ஹோதீதி.
Ayañca titthiyapakkantako nāma upasampannabhikkhunā kathito, tasmā sāmaṇero saliṅgena titthāyatanaṃ gatopi puna pabbajjañca upasampadañca labhatīti kurundiyaṃ vuttaṃ. Purimo pana theyyasaṃvāsako anupasampannena kathito; tasmā upasampanno kūṭavassaṃ gaṇentopi assamaṇo na hoti. Liṅge saussāho pārājikaṃ āpajjitvā bhikkhuvassādīni gaṇentopi theyyasaṃvāsako na hotīti.
தித்தி²யபக்கந்தககதா² நிட்டி²தா.
Titthiyapakkantakakathā niṭṭhitā.
