| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
တိတ္ထိယပက္ကန္တကကထာ
Titthiyapakkantakakathā
တိတ္ထိယပက္ကန္တကော ဘိက္ခဝေတိ ဧတ္ထ ပန တိတ္ထိယေသု ပက္ကန္တော ပဝိဋ္ဌောတိ တိတ္ထိယပက္ကန္တကော။ သော န ကေဝလံ န ဥပသမ္ပာဒေတဗ္ဗော, အထ ခော န ပဗ္ဗာဇေတဗ္ဗောပိ။ တတ္ရာယံ ဝိနိစ္ဆယော – ဥပသမ္ပန္နော ဘိက္ခု တိတ္ထိယော ဘဝိသ္သာမီတိ သလိင္ဂေနေဝ တေသံ ဥပသ္သယံ ဂစ္ဆတိ, ပဒဝာရေ ပဒဝာရေ ဒုက္ကဋံ။ တေသံ လိင္ဂေ အာဒိန္နမတ္တေ တိတ္ထိယပက္ကန္တကော ဟောတိ။ ယောပိ သယမေဝ ‘‘တိတ္ထိယော ဘဝိသ္သာမီ’’တိ ကုသစီရာဒီနိ နိဝာသေတိ, တိတ္ထိယပက္ကန္တကော ဟောတိယေဝ။ ယော ပန နဂ္ဂော န္ဟာယန္တော အတ္တာနံ ဩလောကေတ္ဝာ ‘‘သောဘတိ မေ အာဇီဝကဘာဝော, အာဇီဝကော ဘဝိသ္သာမီ’’တိ ကာသာယာနိ အနာဒာယ နဂ္ဂောဝ အာဇီဝကာနံ ဥပသ္သယံ ဂစ္ဆတိ, ပဒဝာရေ ပဒဝာရေ ဒုက္ကဋံ။ သစေ ပနသ္သ အန္တရာမဂ္ဂေ ဟိရောတ္တပ္ပံ ဥပ္ပဇ္ဇတိ, ဒုက္ကဋာနိ ဒေသေတ္ဝာ မုစ္စတိ။ တေသံ ဥပသ္သယံ ဂန္တ္ဝာပိ တေဟိ ဝာ ဩဝဒိတော အတ္တနာ ဝာ ‘‘ဣမေသံ ပဗ္ဗဇ္ဇာ အတိဒုက္ခာ’’တိ နိဝတ္တန္တောပိ မုစ္စတိယေဝ။
Titthiyapakkantakobhikkhaveti ettha pana titthiyesu pakkanto paviṭṭhoti titthiyapakkantako. So na kevalaṃ na upasampādetabbo, atha kho na pabbājetabbopi. Tatrāyaṃ vinicchayo – upasampanno bhikkhu titthiyo bhavissāmīti saliṅgeneva tesaṃ upassayaṃ gacchati, padavāre padavāre dukkaṭaṃ. Tesaṃ liṅge ādinnamatte titthiyapakkantako hoti. Yopi sayameva ‘‘titthiyo bhavissāmī’’ti kusacīrādīni nivāseti, titthiyapakkantako hotiyeva. Yo pana naggo nhāyanto attānaṃ oloketvā ‘‘sobhati me ājīvakabhāvo, ājīvako bhavissāmī’’ti kāsāyāni anādāya naggova ājīvakānaṃ upassayaṃ gacchati, padavāre padavāre dukkaṭaṃ. Sace panassa antarāmagge hirottappaṃ uppajjati, dukkaṭāni desetvā muccati. Tesaṃ upassayaṃ gantvāpi tehi vā ovadito attanā vā ‘‘imesaṃ pabbajjā atidukkhā’’ti nivattantopi muccatiyeva.
သစေ ပန ‘‘ကိံ တုမ္ဟာကံ ပဗ္ဗဇ္ဇာယ ဥက္ကဋ္ဌ’’န္တိ ပုစ္ဆိတ္ဝာ ‘‘ကေသမသ္သုလုဉ္စနာဒီနီ’’တိ ဝုတ္တော ဧကကေသမ္ပိ လုဉ္စာပေတိ, ဥက္ကုဋိကပ္ပဓာနာဒီနိ ဝာ ဝတ္တာနိ အာဒိယတိ, မောရပိဉ္ဆာဒီနိ ဝာ နိဝာသေတိ, တေသံ လိင္ဂံ ဂဏ္ဟာတိ, ‘‘အယံ ပဗ္ဗဇ္ဇာ သေဋ္ဌာ’’တိ သေဋ္ဌဘာဝံ ဝာ ဥပဂစ္ဆတိ, န မုစ္စတိ, တိတ္ထိယပက္ကန္တကော ဟောတိ။ သစေ ပန ‘‘သောဘတိ နု ခော မေ တိတ္ထိယပဗ္ဗဇ္ဇာ, နနု ခော သောဘတီ’’တိ ဝီမံသနတ္ထံ ကုသစီရာဒီနိ ဝာ နိဝာသေတိ, ဇဋံ ဝာ ဗန္ဓတိ, ခာရိကာဇံ ဝာ အာဒိယတိ, ယာဝ န သမ္ပဋိစ္ဆတိ, တာဝ နံ လဒ္ဓိ ရက္ခတိ, သမ္ပဋိစ္ဆိတမတ္တေ တိတ္ထိယပက္ကန္တကော ဟောတိ။ အစ္ဆိန္နစီဝရော ပန ကုသစီရာဒီနိ နိဝာသေန္တော ရာဇဘယာဒီဟိ ဝာ တိတ္ထိယလိင္ဂံ ဂဏ္ဟန္တော လဒ္ဓိယာ အဘာဝေန နေဝ တိတ္ထိယပက္ကန္တကော ဟောတိ။
Sace pana ‘‘kiṃ tumhākaṃ pabbajjāya ukkaṭṭha’’nti pucchitvā ‘‘kesamassuluñcanādīnī’’ti vutto ekakesampi luñcāpeti, ukkuṭikappadhānādīni vā vattāni ādiyati, morapiñchādīni vā nivāseti, tesaṃ liṅgaṃ gaṇhāti, ‘‘ayaṃ pabbajjā seṭṭhā’’ti seṭṭhabhāvaṃ vā upagacchati, na muccati, titthiyapakkantako hoti. Sace pana ‘‘sobhati nu kho me titthiyapabbajjā, nanu kho sobhatī’’ti vīmaṃsanatthaṃ kusacīrādīni vā nivāseti, jaṭaṃ vā bandhati, khārikājaṃ vā ādiyati, yāva na sampaṭicchati, tāva naṃ laddhi rakkhati, sampaṭicchitamatte titthiyapakkantako hoti. Acchinnacīvaro pana kusacīrādīni nivāsento rājabhayādīhi vā titthiyaliṅgaṃ gaṇhanto laddhiyā abhāvena neva titthiyapakkantako hoti.
အယဉ္စ တိတ္ထိယပက္ကန္တကော နာမ ဥပသမ္ပန္နဘိက္ခုနာ ကထိတော, တသ္မာ သာမဏေရော သလိင္ဂေန တိတ္ထာယတနံ ဂတောပိ ပုန ပဗ္ဗဇ္ဇဉ္စ ဥပသမ္ပဒဉ္စ လဘတီတိ ကုရုန္ဒိယံ ဝုတ္တံ။ ပုရိမော ပန ထေယ္ယသံဝာသကော အနုပသမ္ပန္နေန ကထိတော; တသ္မာ ဥပသမ္ပန္နော ကူဋဝသ္သံ ဂဏေန္တောပိ အသ္သမဏော န ဟောတိ။ လိင္ဂေ သဥသ္သာဟော ပာရာဇိကံ အာပဇ္ဇိတ္ဝာ ဘိက္ခုဝသ္သာဒီနိ ဂဏေန္တောပိ ထေယ္ယသံဝာသကော န ဟောတီတိ။
Ayañca titthiyapakkantako nāma upasampannabhikkhunā kathito, tasmā sāmaṇero saliṅgena titthāyatanaṃ gatopi puna pabbajjañca upasampadañca labhatīti kurundiyaṃ vuttaṃ. Purimo pana theyyasaṃvāsako anupasampannena kathito; tasmā upasampanno kūṭavassaṃ gaṇentopi assamaṇo na hoti. Liṅge saussāho pārājikaṃ āpajjitvā bhikkhuvassādīni gaṇentopi theyyasaṃvāsako na hotīti.
တိတ္ထိယပက္ကန္တကကထာ နိဋ္ဌိတာ။
Titthiyapakkantakakathā niṭṭhitā.
