| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
தித்தி²யபக்கந்தககதா²வண்ணனா
Titthiyapakkantakakathāvaṇṇanā
தித்தி²யபக்கந்தகோ, பி⁴க்க²வேதிஆதி³ அத்தனோ நிதா³னபூ⁴தே பஸூரவத்து²ஸ்மிங் ஏவ வத்தப்³ப³ங் ஸமானம்பி தத்த² வாரிதஅதி⁴காராபா⁴வா அப⁴ப்³பா³. இதே⁴வ தெ²ய்யஸங்வாஸகேன வினா ஸம்ப⁴வதோ வுத்தோ. தத்த² ‘‘அத² கோ² ந பப்³பா³ஜேதப்³போ³பீ’’தி இதே⁴வ வசனங் பஸூரஸ்ஸ உபஸம்பதா³ய ஏவ யாசனிச்சா²ய த³ஸ்ஸனேன, ‘‘ஸோ ஆக³தோ ந உபஸம்பாதே³தப்³போ³’’தி ப⁴க³வதோ உபஸம்பதா³மத்தபடிஸேத⁴னேன ச பப்³ப³ஜ்ஜானுமதிதோ³ஸப்பஸங்க³ப⁴யாதி வேதி³தப்³ப³ங். தேஸங் லிங்கே³ ஆதி³ன்னமத்தே லத்³தி⁴யா க³ஹிதாயபி அக்³க³ஹிதாயபி தித்தி²யபக்கந்தகோ ஹோதி, அவந்த³னீயஸ்ஸேவ நக்³க³லிங்க³ஸ்ஸ ஸெட்ட²பா⁴வங் வா உபக³ச்ச²தி, ந முச்சதி, எத்த² ‘‘பத³வாரே து³க்கடங், ஆஜீவகோ ப⁴விஸ்ஸந்தி விஸமசித்தவஸேன க³தத்தா நக்³கோ³ ஹுத்வா ந க³மனேனா’’தி வத³ந்தி. உபி⁴ன்னம்பி வஸேன யுத்தந்தி மம தக்கோ. தாவ நங் லத்³தி⁴ ரக்க²தி அஸம்படிச்சி²தத்தா. உபஸம்பன்னபி⁴க்கு²னா கதி²தோதி கத²ங் பஞ்ஞாயதி? அட்ட²கதா²வசனப்பமாணதோவாதி ஏகே. நிதா³னவஸேனாதி ஏகே. பஸூரஸ்ஸ உபஸம்பன்னத்தா உபஸம்பன்னானங் ஏவ தித்தி²யபக்கந்ததாவசனதோதி ஏகே. யதா²ஹ ‘‘உபஜ்ஜா²யோ பக்கந்தோவா ஹோதி, விப்³ப⁴ந்தோ வா, காலங்கதோ வா, பக்க²ஸங்கந்தோ வா’’தி ஆசரியோ. பக்க²ஸங்கந்தோ வாதி ஸாமணேரனாஸனாவத்தூ²ஸு அபா⁴வதோதி ஏகே. அஞ்ஞதித்தி²யபுப்³ப³ஸ்ஸ உபஸம்பன்னஸ்ஸ ஸதோ பக்க²ஸங்கந்தப⁴யா அனுபஸம்பன்னகாலே உபஸம்பத³த்த²ங் பரிவாஸபஞ்ஞாபனேனாதி ஏகே . பப்³ப³ஜ்ஜத்த²ம்பீதி சே? ந, புப்³பே³ விசாரிதத்தா, அபப்³ப³ஜிதஸ்ஸ அதி⁴ஸீலாபா⁴வதோ ச. பாதிமொக்க²ஸீலஞ்ஹி அதி⁴ஸீலங் நாம, தஞ்ச அபப்³ப³ஜிதஸ்ஸ நத்தி². இமஸ்ஸ ச பரிவாஸவத்தே அதி⁴ஸீலங் வுத்தங். யதா²ஹ ‘‘புன சபரங், பி⁴க்க²வே, அஞ்ஞதித்தி²யபுப்³போ³ திப்³ப³ச்ச²ந்தோ³ ஹோதி உத்³தே³ஸே பரிபுச்சா²ய அதி⁴ஸீலே’’தி (மஹாவ॰ 87). அபிச ‘‘ஸசே, பி⁴க்க²வே, ஜாதியா ஸாகியோ அஞ்ஞதித்தி²யபுப்³போ³ ஆக³ச்ச²தி, ஸோ ஆக³தோ உபஸம்பாதே³தப்³போ³’’தி (மஹாவ॰ 87) எத்த² உபஸம்பதா³மத்தபரிதீ³பனதோ. உபஸம்பதா³மத்தபரிதீ³பனஞ்ஹெத்த² தஸ்ஸேவ பரிவாஸதா³னஸித்³தி⁴தோ. பரிவாஸதா³னத்தனித³ஸ்ஸனத்தே² ஹேஸா பாளி.
Titthiyapakkantako, bhikkhavetiādi attano nidānabhūte pasūravatthusmiṃ eva vattabbaṃ samānampi tattha vāritaadhikārābhāvā abhabbā. Idheva theyyasaṃvāsakena vinā sambhavato vutto. Tattha ‘‘atha kho na pabbājetabbopī’’ti idheva vacanaṃ pasūrassa upasampadāya eva yācanicchāya dassanena, ‘‘so āgato na upasampādetabbo’’ti bhagavato upasampadāmattapaṭisedhanena ca pabbajjānumatidosappasaṅgabhayāti veditabbaṃ. Tesaṃ liṅge ādinnamatte laddhiyā gahitāyapi aggahitāyapi titthiyapakkantako hoti, avandanīyasseva naggaliṅgassa seṭṭhabhāvaṃ vā upagacchati, na muccati, ettha ‘‘padavāre dukkaṭaṃ, ājīvako bhavissanti visamacittavasena gatattā naggo hutvā na gamanenā’’ti vadanti. Ubhinnampi vasena yuttanti mama takko. Tāva naṃ laddhi rakkhati asampaṭicchitattā. Upasampannabhikkhunā kathitoti kathaṃ paññāyati? Aṭṭhakathāvacanappamāṇatovāti eke. Nidānavasenāti eke. Pasūrassa upasampannattā upasampannānaṃ eva titthiyapakkantatāvacanatoti eke. Yathāha ‘‘upajjhāyo pakkantovā hoti, vibbhanto vā, kālaṃkato vā, pakkhasaṅkanto vā’’ti ācariyo. Pakkhasaṅkanto vāti sāmaṇeranāsanāvatthūsu abhāvatoti eke. Aññatitthiyapubbassa upasampannassa sato pakkhasaṅkantabhayā anupasampannakāle upasampadatthaṃ parivāsapaññāpanenāti eke . Pabbajjatthampīti ce? Na, pubbe vicāritattā, apabbajitassa adhisīlābhāvato ca. Pātimokkhasīlañhi adhisīlaṃ nāma, tañca apabbajitassa natthi. Imassa ca parivāsavatte adhisīlaṃ vuttaṃ. Yathāha ‘‘puna caparaṃ, bhikkhave, aññatitthiyapubbo tibbacchando hoti uddese paripucchāya adhisīle’’ti (mahāva. 87). Apica ‘‘sace, bhikkhave, jātiyā sākiyo aññatitthiyapubbo āgacchati, so āgato upasampādetabbo’’ti (mahāva. 87) ettha upasampadāmattaparidīpanato. Upasampadāmattaparidīpanañhettha tasseva parivāsadānasiddhito. Parivāsadānattanidassanatthe hesā pāḷi.
தித்தி²யபக்கந்தககதா²வண்ணனா நிட்டி²தா.
Titthiyapakkantakakathāvaṇṇanā niṭṭhitā.
