| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
তিত্থিযপক্কন্তককথাৰণ্ণনা
Titthiyapakkantakakathāvaṇṇanā
তিত্থিযপক্কন্তকো, ভিক্খৰেতিআদি অত্তনো নিদানভূতে পসূরৰত্থুস্মিং এৰ ৰত্তব্বং সমানম্পি তত্থ ৰারিতঅধিকারাভাৰা অভব্বা। ইধেৰ থেয্যসংৰাসকেন ৰিনা সম্ভৰতো ৰুত্তো। তত্থ ‘‘অথ খো ন পব্বাজেতব্বোপী’’তি ইধেৰ ৰচনং পসূরস্স উপসম্পদায এৰ যাচনিচ্ছায দস্সনেন, ‘‘সো আগতো ন উপসম্পাদেতব্বো’’তি ভগৰতো উপসম্পদামত্তপটিসেধনেন চ পব্বজ্জানুমতিদোসপ্পসঙ্গভযাতি ৰেদিতব্বং। তেসং লিঙ্গে আদিন্নমত্তে লদ্ধিযা গহিতাযপি অগ্গহিতাযপি তিত্থিযপক্কন্তকো হোতি, অৰন্দনীযস্সেৰ নগ্গলিঙ্গস্স সেট্ঠভাৰং ৰা উপগচ্ছতি, ন মুচ্চতি, এত্থ ‘‘পদৰারে দুক্কটং, আজীৰকো ভৰিস্সন্তি ৰিসমচিত্তৰসেন গতত্তা নগ্গো হুত্ৰা ন গমনেনা’’তি ৰদন্তি। উভিন্নম্পি ৰসেন যুত্তন্তি মম তক্কো। তাৰ নং লদ্ধি রক্খতি অসম্পটিচ্ছিতত্তা। উপসম্পন্নভিক্খুনা কথিতোতি কথং পঞ্ঞাযতি? অট্ঠকথাৰচনপ্পমাণতোৰাতি একে। নিদানৰসেনাতি একে। পসূরস্স উপসম্পন্নত্তা উপসম্পন্নানং এৰ তিত্থিযপক্কন্ততাৰচনতোতি একে। যথাহ ‘‘উপজ্ঝাযো পক্কন্তোৰা হোতি, ৰিব্ভন্তো ৰা, কালংকতো ৰা, পক্খসঙ্কন্তো ৰা’’তি আচরিযো। পক্খসঙ্কন্তো ৰাতি সামণেরনাসনাৰত্থূসু অভাৰতোতি একে। অঞ্ঞতিত্থিযপুব্বস্স উপসম্পন্নস্স সতো পক্খসঙ্কন্তভযা অনুপসম্পন্নকালে উপসম্পদত্থং পরিৰাসপঞ্ঞাপনেনাতি একে । পব্বজ্জত্থম্পীতি চে? ন, পুব্বে ৰিচারিতত্তা, অপব্বজিতস্স অধিসীলাভাৰতো চ। পাতিমোক্খসীলঞ্হি অধিসীলং নাম, তঞ্চ অপব্বজিতস্স নত্থি। ইমস্স চ পরিৰাসৰত্তে অধিসীলং ৰুত্তং। যথাহ ‘‘পুন চপরং, ভিক্খৰে, অঞ্ঞতিত্থিযপুব্বো তিব্বচ্ছন্দো হোতি উদ্দেসে পরিপুচ্ছায অধিসীলে’’তি (মহাৰ॰ ৮৭)। অপিচ ‘‘সচে, ভিক্খৰে, জাতিযা সাকিযো অঞ্ঞতিত্থিযপুব্বো আগচ্ছতি, সো আগতো উপসম্পাদেতব্বো’’তি (মহাৰ॰ ৮৭) এত্থ উপসম্পদামত্তপরিদীপনতো। উপসম্পদামত্তপরিদীপনঞ্হেত্থ তস্সেৰ পরিৰাসদানসিদ্ধিতো। পরিৰাসদানত্তনিদস্সনত্থে হেসা পাল়ি।
Titthiyapakkantako, bhikkhavetiādi attano nidānabhūte pasūravatthusmiṃ eva vattabbaṃ samānampi tattha vāritaadhikārābhāvā abhabbā. Idheva theyyasaṃvāsakena vinā sambhavato vutto. Tattha ‘‘atha kho na pabbājetabbopī’’ti idheva vacanaṃ pasūrassa upasampadāya eva yācanicchāya dassanena, ‘‘so āgato na upasampādetabbo’’ti bhagavato upasampadāmattapaṭisedhanena ca pabbajjānumatidosappasaṅgabhayāti veditabbaṃ. Tesaṃ liṅge ādinnamatte laddhiyā gahitāyapi aggahitāyapi titthiyapakkantako hoti, avandanīyasseva naggaliṅgassa seṭṭhabhāvaṃ vā upagacchati, na muccati, ettha ‘‘padavāre dukkaṭaṃ, ājīvako bhavissanti visamacittavasena gatattā naggo hutvā na gamanenā’’ti vadanti. Ubhinnampi vasena yuttanti mama takko. Tāva naṃ laddhi rakkhati asampaṭicchitattā. Upasampannabhikkhunā kathitoti kathaṃ paññāyati? Aṭṭhakathāvacanappamāṇatovāti eke. Nidānavasenāti eke. Pasūrassa upasampannattā upasampannānaṃ eva titthiyapakkantatāvacanatoti eke. Yathāha ‘‘upajjhāyo pakkantovā hoti, vibbhanto vā, kālaṃkato vā, pakkhasaṅkanto vā’’ti ācariyo. Pakkhasaṅkanto vāti sāmaṇeranāsanāvatthūsu abhāvatoti eke. Aññatitthiyapubbassa upasampannassa sato pakkhasaṅkantabhayā anupasampannakāle upasampadatthaṃ parivāsapaññāpanenāti eke . Pabbajjatthampīti ce? Na, pubbe vicāritattā, apabbajitassa adhisīlābhāvato ca. Pātimokkhasīlañhi adhisīlaṃ nāma, tañca apabbajitassa natthi. Imassa ca parivāsavatte adhisīlaṃ vuttaṃ. Yathāha ‘‘puna caparaṃ, bhikkhave, aññatitthiyapubbo tibbacchando hoti uddese paripucchāya adhisīle’’ti (mahāva. 87). Apica ‘‘sace, bhikkhave, jātiyā sākiyo aññatitthiyapubbo āgacchati, so āgato upasampādetabbo’’ti (mahāva. 87) ettha upasampadāmattaparidīpanato. Upasampadāmattaparidīpanañhettha tasseva parivāsadānasiddhito. Parivāsadānattanidassanatthe hesā pāḷi.
তিত্থিযপক্কন্তককথাৰণ্ণনা নিট্ঠিতা।
Titthiyapakkantakakathāvaṇṇanā niṭṭhitā.
