| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
ཏིཏྠིཡཔཀྐནྟཀཀཐཱཝཎྞནཱ
Titthiyapakkantakakathāvaṇṇanā
ཏིཏྠིཡཔཀྐནྟཀོ, བྷིཀྑཝེཏིཨཱདི ཨཏྟནོ ནིདཱནབྷཱུཏེ པསཱུརཝཏྠུསྨིཾ ཨེཝ ཝཏྟབྦཾ སམཱནམྤི ཏཏྠ ཝཱརིཏཨདྷིཀཱརཱབྷཱཝཱ ཨབྷབྦཱ། ཨིདྷེཝ ཐེཡྻསཾཝཱསཀེན ཝིནཱ སམྦྷཝཏོ ཝུཏྟོ། ཏཏྠ ‘‘ཨཐ ཁོ ན པབྦཱཛེཏབྦོཔཱི’’ཏི ཨིདྷེཝ ཝཙནཾ པསཱུརསྶ ཨུཔསམྤདཱཡ ཨེཝ ཡཱཙནིཙྪཱཡ དསྶནེན, ‘‘སོ ཨཱགཏོ ན ཨུཔསམྤཱདེཏབྦོ’’ཏི བྷགཝཏོ ཨུཔསམྤདཱམཏྟཔཊིསེདྷནེན ཙ པབྦཛྫཱནུམཏིདོསཔྤསངྒབྷཡཱཏི ཝེདིཏབྦཾ། ཏེསཾ ལིངྒེ ཨཱདིནྣམཏྟེ ལདྡྷིཡཱ གཧིཏཱཡཔི ཨགྒཧིཏཱཡཔི ཏིཏྠིཡཔཀྐནྟཀོ ཧོཏི, ཨཝནྡནཱིཡསྶེཝ ནགྒལིངྒསྶ སེཊྛབྷཱཝཾ ཝཱ ཨུཔགཙྪཏི, ན མུཙྩཏི, ཨེཏྠ ‘‘པདཝཱརེ དུཀྐཊཾ, ཨཱཛཱིཝཀོ བྷཝིསྶནྟི ཝིསམཙིཏྟཝསེན གཏཏྟཱ ནགྒོ ཧུཏྭཱ ན གམནེནཱ’’ཏི ཝདནྟི། ཨུབྷིནྣམྤི ཝསེན ཡུཏྟནྟི མམ ཏཀྐོ། ཏཱཝ ནཾ ལདྡྷི རཀྑཏི ཨསམྤཊིཙྪིཏཏྟཱ། ཨུཔསམྤནྣབྷིཀྑུནཱ ཀཐིཏོཏི ཀཐཾ པཉྙཱཡཏི? ཨཊྛཀཐཱཝཙནཔྤམཱཎཏོཝཱཏི ཨེཀེ། ནིདཱནཝསེནཱཏི ཨེཀེ། པསཱུརསྶ ཨུཔསམྤནྣཏྟཱ ཨུཔསམྤནྣཱནཾ ཨེཝ ཏིཏྠིཡཔཀྐནྟཏཱཝཙནཏོཏི ཨེཀེ། ཡཐཱཧ ‘‘ཨུཔཛ྄ཛྷཱཡོ པཀྐནྟོཝཱ ཧོཏི, ཝིབྦྷནྟོ ཝཱ, ཀཱལཾཀཏོ ཝཱ, པཀྑསངྐནྟོ ཝཱ’’ཏི ཨཱཙརིཡོ། པཀྑསངྐནྟོ ཝཱཏི སཱམཎེརནཱསནཱཝཏྠཱུསུ ཨབྷཱཝཏོཏི ཨེཀེ། ཨཉྙཏིཏྠིཡཔུབྦསྶ ཨུཔསམྤནྣསྶ སཏོ པཀྑསངྐནྟབྷཡཱ ཨནུཔསམྤནྣཀཱལེ ཨུཔསམྤདཏྠཾ པརིཝཱསཔཉྙཱཔནེནཱཏི ཨེཀེ ། པབྦཛྫཏྠམྤཱིཏི ཙེ? ན, པུབྦེ ཝིཙཱརིཏཏྟཱ, ཨཔབྦཛིཏསྶ ཨདྷིསཱིལཱབྷཱཝཏོ ཙ། པཱཏིམོཀྑསཱིལཉྷི ཨདྷིསཱིལཾ ནཱམ, ཏཉྩ ཨཔབྦཛིཏསྶ ནཏྠི། ཨིམསྶ ཙ པརིཝཱསཝཏྟེ ཨདྷིསཱིལཾ ཝུཏྟཾ། ཡཐཱཧ ‘‘པུན ཙཔརཾ, བྷིཀྑཝེ, ཨཉྙཏིཏྠིཡཔུབྦོ ཏིབྦཙྪནྡོ ཧོཏི ཨུདྡེསེ པརིཔུཙྪཱཡ ཨདྷིསཱིལེ’’ཏི (མཧཱཝ॰ ༨༧)། ཨཔིཙ ‘‘སཙེ, བྷིཀྑཝེ, ཛཱཏིཡཱ སཱཀིཡོ ཨཉྙཏིཏྠིཡཔུབྦོ ཨཱགཙྪཏི, སོ ཨཱགཏོ ཨུཔསམྤཱདེཏབྦོ’’ཏི (མཧཱཝ॰ ༨༧) ཨེཏྠ ཨུཔསམྤདཱམཏྟཔརིདཱིཔནཏོ། ཨུཔསམྤདཱམཏྟཔརིདཱིཔནཉྷེཏྠ ཏསྶེཝ པརིཝཱསདཱནསིདྡྷིཏོ། པརིཝཱསདཱནཏྟནིདསྶནཏྠེ ཧེསཱ པཱལི༹།
Titthiyapakkantako, bhikkhavetiādi attano nidānabhūte pasūravatthusmiṃ eva vattabbaṃ samānampi tattha vāritaadhikārābhāvā abhabbā. Idheva theyyasaṃvāsakena vinā sambhavato vutto. Tattha ‘‘atha kho na pabbājetabbopī’’ti idheva vacanaṃ pasūrassa upasampadāya eva yācanicchāya dassanena, ‘‘so āgato na upasampādetabbo’’ti bhagavato upasampadāmattapaṭisedhanena ca pabbajjānumatidosappasaṅgabhayāti veditabbaṃ. Tesaṃ liṅge ādinnamatte laddhiyā gahitāyapi aggahitāyapi titthiyapakkantako hoti, avandanīyasseva naggaliṅgassa seṭṭhabhāvaṃ vā upagacchati, na muccati, ettha ‘‘padavāre dukkaṭaṃ, ājīvako bhavissanti visamacittavasena gatattā naggo hutvā na gamanenā’’ti vadanti. Ubhinnampi vasena yuttanti mama takko. Tāva naṃ laddhi rakkhati asampaṭicchitattā. Upasampannabhikkhunā kathitoti kathaṃ paññāyati? Aṭṭhakathāvacanappamāṇatovāti eke. Nidānavasenāti eke. Pasūrassa upasampannattā upasampannānaṃ eva titthiyapakkantatāvacanatoti eke. Yathāha ‘‘upajjhāyo pakkantovā hoti, vibbhanto vā, kālaṃkato vā, pakkhasaṅkanto vā’’ti ācariyo. Pakkhasaṅkanto vāti sāmaṇeranāsanāvatthūsu abhāvatoti eke. Aññatitthiyapubbassa upasampannassa sato pakkhasaṅkantabhayā anupasampannakāle upasampadatthaṃ parivāsapaññāpanenāti eke . Pabbajjatthampīti ce? Na, pubbe vicāritattā, apabbajitassa adhisīlābhāvato ca. Pātimokkhasīlañhi adhisīlaṃ nāma, tañca apabbajitassa natthi. Imassa ca parivāsavatte adhisīlaṃ vuttaṃ. Yathāha ‘‘puna caparaṃ, bhikkhave, aññatitthiyapubbo tibbacchando hoti uddese paripucchāya adhisīle’’ti (mahāva. 87). Apica ‘‘sace, bhikkhave, jātiyā sākiyo aññatitthiyapubbo āgacchati, so āgato upasampādetabbo’’ti (mahāva. 87) ettha upasampadāmattaparidīpanato. Upasampadāmattaparidīpanañhettha tasseva parivāsadānasiddhito. Parivāsadānattanidassanatthe hesā pāḷi.
ཏིཏྠིཡཔཀྐནྟཀཀཐཱཝཎྞནཱ ནིཊྛིཏཱ།
Titthiyapakkantakakathāvaṇṇanā niṭṭhitā.
