| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
ཏིཏྠིཡཔཀྐནྟཀཀཐཱཝཎྞནཱ
Titthiyapakkantakakathāvaṇṇanā
ཏིཏྠིཡཔཀྐནྟཀཱདིཀཐཱསུ ཏེསཾ ལིངྒེ ཨཱདིནྣམཏྟེཏི ཝཱིམཾསཱདིཨདྷིཔྤཱཡཾ ཝིནཱ ‘‘ཏིཏྠིཡོ བྷཝིསྶཱམཱི’’ཏི སནྣིཊྛཱནཝསེན ལིངྒེ ཀཱཡེན དྷཱརིཏམཏྟེ། སཡམེཝཱཏི ཏིཏྠིཡཱནཾ སནྟིཀཾ ཨགནྟྭཱ སཡམེཝ སངྒྷཱརཱམེཔི ཀུསཙཱིརཱདཱིནི ནིཝཱསེཏི། ཨཱཛཱིཝཀོ བྷཝིསྶཱམི…པེ॰… གཙྪཏཱིཏི ཨཱཛཱིཝཀཱནཾ སནྟིཀེ ཏེསཾ པབྦཛནཝིདྷིནཱ ‘‘ཨཱཛཱིཝཀོ བྷཝིསྶཱམཱི’’ཏི གཙྪཏི། ཏསྶ ཧི ཏིཏྠིཡབྷཱཝཱུཔགམནཾ པཏི སནྣིཊྛཱནེ ཝིཛྫམཱནེཔི ‘‘གནྟྭཱ བྷཝིསྶཱམཱི’’ཏི པརིཀཔྤིཏཏྟཱ པདཝཱརེ དུཀྐཊམེཝ ཝུཏྟཾ། དུཀྐཊནྟི པཱལི༹ཡཱ ཨཝུཏྟེཔི མེཐུནཱདཱིསུ ཝུཏྟཔུབྦཔཡོགདུཀྐཊཱནུལོམཏོ ཝུཏྟཾ། ཨེཏེན ཙ སནྣིཊྛཱནཝསེན ལིངྒེ སམྤཊིཙྪིཏེ པཱརཱཛིཀཾ, ཏཏོ པུརིམཔཡོགེ ཐུལླཙྩཡཉྩ ཝཏྟབྦམེཝ, ཐུལླཙྩཡཀྑཎེ ནིཝཏྟནྟོཔི ཨཱཔཏྟིཾ དེསཱཔེཏྭཱ མུཙྩཏི ཨེཝཱཏི དཊྛབྦཾ། ཡཐཱ ཙེཏྠ, ཨེཝཾ སངྒྷབྷེདེཔི ལོཧིཏུཔྤཱདེཔི བྷིཀྑཱུནཾ པུབྦཔཡོགཱདཱིསུ དུཀྐཊཐུལླཙྩཡཔཱརཱཛིཀཱཧི མུཙྩནསཱིམཱ ཙ ཝེདིཏབྦཱ། སཱསནཝིརུདྡྷཏཱཡེཏྠ ཨཱདིཀམྨིཀཱནམྤི ཨནཱཔཏྟི ན ཝུཏྟཱ། པབྦཛྫཱཡཔི ཨབྷབྦཏཱདསྶནཏྠཾ པནེཏེ, ཨཉྙེ ཙ པཱརཱཛིཀཀཎྜེ ཝིསུཾ སིཀྑཱཔདེན པཱརཱཛིཀཱདིཾ ཨདསྶེཏྭཱ ཨིདྷ ཨབྷབྦེསུ ཨེཝ ཝུཏྟཱཏི ཝེདིཏབྦཾ།
Titthiyapakkantakādikathāsu tesaṃ liṅge ādinnamatteti vīmaṃsādiadhippāyaṃ vinā ‘‘titthiyo bhavissāmī’’ti sanniṭṭhānavasena liṅge kāyena dhāritamatte. Sayamevāti titthiyānaṃ santikaṃ agantvā sayameva saṅghārāmepi kusacīrādīni nivāseti. Ājīvako bhavissāmi…pe… gacchatīti ājīvakānaṃ santike tesaṃ pabbajanavidhinā ‘‘ājīvako bhavissāmī’’ti gacchati. Tassa hi titthiyabhāvūpagamanaṃ pati sanniṭṭhāne vijjamānepi ‘‘gantvā bhavissāmī’’ti parikappitattā padavāre dukkaṭameva vuttaṃ. Dukkaṭanti pāḷiyā avuttepi methunādīsu vuttapubbapayogadukkaṭānulomato vuttaṃ. Etena ca sanniṭṭhānavasena liṅge sampaṭicchite pārājikaṃ, tato purimapayoge thullaccayañca vattabbameva, thullaccayakkhaṇe nivattantopi āpattiṃ desāpetvā muccati evāti daṭṭhabbaṃ. Yathā cettha, evaṃ saṅghabhedepi lohituppādepi bhikkhūnaṃ pubbapayogādīsu dukkaṭathullaccayapārājikāhi muccanasīmā ca veditabbā. Sāsanaviruddhatāyettha ādikammikānampi anāpatti na vuttā. Pabbajjāyapi abhabbatādassanatthaṃ panete, aññe ca pārājikakaṇḍe visuṃ sikkhāpadena pārājikādiṃ adassetvā idha abhabbesu eva vuttāti veditabbaṃ.
ཏཾ ལདྡྷིནྟི ཏིཏྠིཡཝེསེ སེཊྛབྷཱཝགྒཧཎམེཝ སནྡྷཱཡ ཝུཏྟཾ། ཏེསཉྷི ཏིཏྠིཡཱནཾ སསྶཏཱདིགྒཱཧཾ གཎྷནྟོཔི ལིངྒེ ཨསམྤཊིཙྪིཏེ ཏིཏྠིཡཔཀྐནྟཀོ ན ཧོཏི, ཏཾ ལདྡྷིཾ ཨགྒཧེཏྭཱཔི ‘‘ཨེཏེསཾ ཝཏཙརིཡཱ སུནྡརཱ’’ཏི ལིངྒཾ སམྤཊིཙྪནྟོ ཏིཏྠིཡཔཀྐནྟཀོ ཧོཏི ཨེཝ ། ལདྡྷིཡཱ ཨབྷཱཝེནཱཏི བྷིཀྑུབྷཱཝེ སཱལཡཏཱཡ ཏིཏྠིཡབྷཱཝཱུཔགམནལདྡྷིཡཱ ཨབྷཱཝེན, ཨེཏེན ཙ ཨཱཔདཱསུ ཀུསཙཱིརཱདིཾ པཱརུཔནྟསྶཱཔི ནགྒསྶ ཝིཡ ཨནཱཔཏྟིཾ དསྶེཏི།
Taṃladdhinti titthiyavese seṭṭhabhāvaggahaṇameva sandhāya vuttaṃ. Tesañhi titthiyānaṃ sassatādiggāhaṃ gaṇhantopi liṅge asampaṭicchite titthiyapakkantako na hoti, taṃ laddhiṃ aggahetvāpi ‘‘etesaṃ vatacariyā sundarā’’ti liṅgaṃ sampaṭicchanto titthiyapakkantako hoti eva . Laddhiyā abhāvenāti bhikkhubhāve sālayatāya titthiyabhāvūpagamanaladdhiyā abhāvena, etena ca āpadāsu kusacīrādiṃ pārupantassāpi naggassa viya anāpattiṃ dasseti.
ཨུཔསམྤནྣབྷིཀྑུནཱ ཀཐིཏོཏི ཨེཏྠ སངྒྷབྷེདཀོཔི ཨུཔསམྤནྣབྷིཀྑུནཱཝ ཀཐིཏོ, མཱཏུགྷཱཏཀཱདཡོ པན ཨནུཔསམྤནྣེནཱཔཱིཏི དཊྛབྦཾ།
Upasampannabhikkhunā kathitoti ettha saṅghabhedakopi upasampannabhikkhunāva kathito, mātughātakādayo pana anupasampannenāpīti daṭṭhabbaṃ.
ཏིཏྠིཡཔཀྐནྟཀཀཐཱཝཎྞནཱ ནིཊྛིཏཱ།
Titthiyapakkantakakathāvaṇṇanā niṭṭhitā.
