| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
திவித⁴ஸலாகக்³கா³ஹகதா²
Tividhasalākaggāhakathā
235. ஸஞ்ஞத்தியாதி ஸஞ்ஞாபனத்தா²ய. கூ³ள்ஹகந்திஆதீ³ஸு அலஜ்ஜுஸ்ஸன்னாய பரிஸாய கூ³ள்ஹகோ ஸலாகக்³கா³ஹோ காதப்³போ³, லஜ்ஜுஸ்ஸன்னாய பரிஸாய விவடகோ, பா³லுஸ்ஸன்னாய ஸகண்ணஜப்பகோ. வண்ணாவண்ணாயோ கத்வாதி த⁴ம்மவாதீ³னஞ்ச அத⁴ம்மவாதீ³னஞ்ச ஸலாகாயோ நிமித்தஸஞ்ஞங் ஆரோபெத்வா அஞ்ஞமஞ்ஞங் விஸபா⁴கா³ காதப்³பா³. ததோ தா ஸப்³பா³பி சீவரபோ⁴கே³ கத்வா வுத்தனயேன கா³ஹேதப்³பா³. து³க்³க³ஹோதி பச்சுக்கட்³டி⁴தப்³ப³ந்தி ‘‘து³க்³க³ஹிதா ஸலாகாயோ’’தி வத்வா புன க³ஹெத்வா யாவததியங் கா³ஹேதப்³பா³. ஸுக்³க³ஹோதி ஸாவேதப்³ப³ந்தி ஏகஸ்மிம்பி த⁴ம்மவாதி³ம்ஹி அதிரேகஜாதே ‘‘ஸுக்³க³ஹிதா ஸலாகாயோ’’தி ஸாவேதப்³ப³ங். யதா² ச தே த⁴ம்மவாதி³னோ வத³ந்தி ததா² தங் அதி⁴கரணங் வூபஸமேதப்³ப³ந்தி. அத² யாவததியம்பி அத⁴ம்மவாதி³னோவ ப³ஹுதரா ஹொந்தி, அஜ்ஜ ‘‘அகாலோ, ஸ்வே ஜானிஸ்ஸாமா’’தி வுட்ட²ஹித்வா அலஜ்ஜீனங் பக்க²பே⁴த³த்தா²ய த⁴ம்மவாதி³பக்க²ங் பரியேஸித்வா புனதி³வஸே ஸலாகக்³கா³ஹோ காதப்³போ³. அயங் கூ³ள்ஹகோ ஸலாகக்³கா³ஹோ.
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
ஸகண்ணஜப்பகே பன க³ஹிதே வத்தப்³போ³தி எத்த² ஸசே ஸங்க⁴த்தே²ரோ அத⁴ம்மவாதி³ஸலாகங் க³ண்ஹாதி, ஸோ ஏவங் அவபோ³தே⁴தப்³போ³ – ‘‘ப⁴ந்தே, தும்ஹே மஹல்லகா வயோஅனுப்பத்தா, தும்ஹாகங் ஏதங் ந யுத்தங், அயங் பன த⁴ம்மவாதி³ஸலாகா’’தி அஸ்ஸ இதரா ஸலாகா த³ஸ்ஸேதப்³பா³. ஸசே ஸோ தங் க³ண்ஹாதி, தா³தப்³பா³. அத² நேவ அவபு³ஜ்ஜ²தி, ததோ ‘‘மா கஸ்ஸசி ஆரோசேஹீ’’தி வத்தப்³போ³. ஸேஸங் வுத்தனயமேவ. விவடகோ விவடத்தோ²யேவ.
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
திவித⁴ஸலாகக்³கா³ஹகதா² நிட்டி²தா.
Tividhasalākaggāhakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / திவித⁴ஸலாகக்³கா³ஹோ • Tividhasalākaggāho
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அதி⁴கரணவூபஸமனஸமத²கதா²தி³வண்ணனா • Adhikaraṇavūpasamanasamathakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / திவித⁴ஸலாகக்³கா³ஹகதா² • Tividhasalākaggāhakathā
