| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
திவித⁴ஸலாகக்³கா³ஹகதா²
Tividhasalākaggāhakathā
235. ஸஞ்ஞத்தியாதி எத்த² ஸஞ்ஞாபனங் ஸஞ்ஞத்தி, தத³த்தா²யாதி த³ஸ்ஸெந்தோ ஆஹ ‘‘ஸஞ்ஞாபனத்தா²யா’’தி. கூ³ஹிதப்³போ³தி கூ³ள்ஹோ, ஸோயேவ கூ³ள்ஹகோ, ஸலாகக்³கா³ஹோ காதப்³போ³தி ஸம்ப³ந்தோ⁴. விவரிதப்³போ³தி விவடோ, ஸோயேவ விவடகோ. ஸஸ்ஸ அத்தனோ கண்ணஸமீபே ஜப்பீயதி கதீ²யதீதி ஸகண்ணஜப்போ, ஸோயேவ ஸகண்ணஜப்பகோ. ‘‘நிமித்தஸஞ்ஞங் ஆரோபெத்வா’’தி இமினா வண்ணாவண்ணாயோ கத்வாதி எத்த² வண்ணஸத்³தோ³ ஸண்டா²னவாசகோதி த³ஸ்ஸேதி. ஸுஸண்டா²னது³ஸண்டா²னா ஸலாகாயோ கத்வாதி அத்தோ². ததோதி விஸபா⁴க³கரணதோ பரங் க³ஹேதப்³போ³தி ஸம்ப³ந்தோ⁴. ஸப்³பா³பி தா ஸலாகாயோதி யோஜனா. கத்வாதி பக்கி²பனங் கத்வா. வுத்தனயேனாதி ‘‘அலஜ்ஜுஸ்ஸன்னாயா’’திஆதி³னா வுத்தனயேன. ‘‘யாவததிய’’ந்தி இமினா பச்சுக்கட்³டி⁴தப்³ப³ந்தி எத்த² புனப்புனங் உத்³த⁴ங் கட்³டி⁴தப்³ப³ந்தி அத்த²ங் த³ஸ்ஸேதி. அதிரேகஜாதேதி அத⁴ம்மவாதீ³ஹி அதிரேகதோ ஜாதே ஸதீதி ஸம்ப³ந்தோ⁴. யாவததியம்பீதி பிஸத்³தோ³ ததோ ஊனே ஏகத்³வேவாரே பன கா நாம கதா²தி த³ஸ்ஸேதி.
235.Saññattiyāti ettha saññāpanaṃ saññatti, tadatthāyāti dassento āha ‘‘saññāpanatthāyā’’ti. Gūhitabboti gūḷho, soyeva gūḷhako, salākaggāho kātabboti sambandho. Vivaritabboti vivaṭo, soyeva vivaṭako. Sassa attano kaṇṇasamīpe jappīyati kathīyatīti sakaṇṇajappo, soyeva sakaṇṇajappako. ‘‘Nimittasaññaṃ āropetvā’’ti iminā vaṇṇāvaṇṇāyo katvāti ettha vaṇṇasaddo saṇṭhānavācakoti dasseti. Susaṇṭhānadusaṇṭhānā salākāyo katvāti attho. Tatoti visabhāgakaraṇato paraṃ gahetabboti sambandho. Sabbāpi tā salākāyoti yojanā. Katvāti pakkhipanaṃ katvā. Vuttanayenāti ‘‘alajjussannāyā’’tiādinā vuttanayena. ‘‘Yāvatatiya’’nti iminā paccukkaḍḍhitabbanti ettha punappunaṃ uddhaṃ kaḍḍhitabbanti atthaṃ dasseti. Atirekajāteti adhammavādīhi atirekato jāte satīti sambandho. Yāvatatiyampīti pisaddo tato ūne ekadvevāre pana kā nāma kathāti dasseti.
ஸகண்ணஜப்பகே பன ஏவங் வினிச்ச²யோ வேதி³தப்³போ³தி யோஜனா. ஸசே ஸங்க⁴த்தே²ரோ க³ண்ஹாதீதி ஸம்ப³ந்தோ⁴. ஸோதி ஸங்க⁴த்தே²ரோ. வயோஅனுப்பத்தாதி பச்சி²மவயங் அனுப்பத்தா. ஏதந்தி அத⁴ம்மவாதி³ஸலாகங். அஸ்ஸாதி ஸங்க⁴த்தே²ரஸ்ஸ. இதரா ஸலாகாதி அத⁴ம்மவாதி³ஸலாகாஹி அஞ்ஞா த⁴ம்மவாதி³ஸலாகா. ஸோதி ஸங்க⁴த்தே²ரோ. தந்தி த⁴ம்மவாதி³ஸலாகங். ததோதி நேவ அவபு³ஜ்ஜ²னகாரணா. வுத்தனயமேவாதி கூ³ள்ஹகே வுத்தனயமேவ. விவடோ அத்தோ² இமஸ்ஸாதி விவடத்தோ².
Sakaṇṇajappake pana evaṃ vinicchayo veditabboti yojanā. Sace saṅghatthero gaṇhātīti sambandho. Soti saṅghatthero. Vayoanuppattāti pacchimavayaṃ anuppattā. Etanti adhammavādisalākaṃ. Assāti saṅghattherassa. Itarā salākāti adhammavādisalākāhi aññā dhammavādisalākā. Soti saṅghatthero. Tanti dhammavādisalākaṃ. Tatoti neva avabujjhanakāraṇā. Vuttanayamevāti gūḷhake vuttanayameva. Vivaṭo attho imassāti vivaṭattho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / திவித⁴ஸலாகக்³கா³ஹோ • Tividhasalākaggāho
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / திவித⁴ஸலாகக்³கா³ஹகதா² • Tividhasalākaggāhakathā
