| Library / Tipiṭaka / တိပိဋက • Tipiṭaka / စူဠဝဂ္ဂ-အဋ္ဌကထာ • Cūḷavagga-aṭṭhakathā |
တိဝိဓသလာကဂ္ဂာဟကထာ
Tividhasalākaggāhakathā
၂၃၅. သညတ္တိယာတိ သညာပနတ္ထာယ။ ဂူဠ္ဟကန္တိအာဒီသု အလဇ္ဇုသ္သန္နာယ ပရိသာယ ဂူဠ္ဟကော သလာကဂ္ဂာဟော ကာတဗ္ဗော, လဇ္ဇုသ္သန္နာယ ပရိသာယ ဝိဝဋကော, ဗာလုသ္သန္နာယ သကဏ္ဏဇပ္ပကော။ ဝဏ္ဏာဝဏ္ဏာယော ကတ္ဝာတိ ဓမ္မဝာဒီနဉ္စ အဓမ္မဝာဒီနဉ္စ သလာကာယော နိမိတ္တသညံ အာရောပေတ္ဝာ အညမညံ ဝိသဘာဂာ ကာတဗ္ဗာ။ တတော တာ သဗ္ဗာပိ စီဝရဘောဂေ ကတ္ဝာ ဝုတ္တနယေန ဂာဟေတဗ္ဗာ။ ဒုဂ္ဂဟောတိ ပစ္စုက္ကဍ္ဎိတဗ္ဗန္တိ ‘‘ဒုဂ္ဂဟိတာ သလာကာယော’’တိ ဝတ္ဝာ ပုန ဂဟေတ္ဝာ ယာဝတတိယံ ဂာဟေတဗ္ဗာ။ သုဂ္ဂဟောတိ သာဝေတဗ္ဗန္တိ ဧကသ္မိမ္ပိ ဓမ္မဝာဒိမ္ဟိ အတိရေကဇာတေ ‘‘သုဂ္ဂဟိတာ သလာကာယော’’တိ သာဝေတဗ္ဗံ။ ယထာ စ တေ ဓမ္မဝာဒိနော ဝဒန္တိ တထာ တံ အဓိကရဏံ ဝူပသမေတဗ္ဗန္တိ။ အထ ယာဝတတိယမ္ပိ အဓမ္မဝာဒိနောဝ ဗဟုတရာ ဟောန္တိ, အဇ္ဇ ‘‘အကာလော, သ္ဝေ ဇာနိသ္သာမာ’’တိ ဝုဋ္ဌဟိတ္ဝာ အလဇ္ဇီနံ ပက္ခဘေဒတ္ထာယ ဓမ္မဝာဒိပက္ခံ ပရိယေသိတ္ဝာ ပုနဒိဝသေ သလာကဂ္ဂာဟော ကာတဗ္ဗော။ အယံ ဂူဠ္ဟကော သလာကဂ္ဂာဟော။
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
သကဏ္ဏဇပ္ပကေ ပန ဂဟိတေ ဝတ္တဗ္ဗောတိ ဧတ္ထ သစေ သင္ဃတ္ထေရော အဓမ္မဝာဒိသလာကံ ဂဏ္ဟာတိ, သော ဧဝံ အဝဗောဓေတဗ္ဗော – ‘‘ဘန္တေ, တုမ္ဟေ မဟလ္လကာ ဝယောအနုပ္ပတ္တာ, တုမ္ဟာကံ ဧတံ န ယုတ္တံ, အယံ ပန ဓမ္မဝာဒိသလာကာ’’တိ အသ္သ ဣတရာ သလာကာ ဒသ္သေတဗ္ဗာ။ သစေ သော တံ ဂဏ္ဟာတိ, ဒာတဗ္ဗာ။ အထ နေဝ အဝဗုဇ္ဈတိ, တတော ‘‘မာ ကသ္သစိ အာရောစေဟီ’’တိ ဝတ္တဗ္ဗော။ သေသံ ဝုတ္တနယမေဝ။ ဝိဝဋကော ဝိဝဋတ္ထောယေဝ။
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
တိဝိဓသလာကဂ္ဂာဟကထာ နိဋ္ဌိတာ။
Tividhasalākaggāhakathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / တိဝိဓသလာကဂ္ဂာဟော • Tividhasalākaggāho
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဓိကရဏဝူပသမနသမထကထာဒိဝဏ္ဏနာ • Adhikaraṇavūpasamanasamathakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / တိဝိဓသလာကဂ္ဂာဟကထာ • Tividhasalākaggāhakathā
