| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā |
ತಿವಿಧಸಲಾಕಗ್ಗಾಹಕಥಾ
Tividhasalākaggāhakathā
೨೩೫. ಸಞ್ಞತ್ತಿಯಾತಿ ಸಞ್ಞಾಪನತ್ಥಾಯ। ಗೂಳ್ಹಕನ್ತಿಆದೀಸು ಅಲಜ್ಜುಸ್ಸನ್ನಾಯ ಪರಿಸಾಯ ಗೂಳ್ಹಕೋ ಸಲಾಕಗ್ಗಾಹೋ ಕಾತಬ್ಬೋ, ಲಜ್ಜುಸ್ಸನ್ನಾಯ ಪರಿಸಾಯ ವಿವಟಕೋ, ಬಾಲುಸ್ಸನ್ನಾಯ ಸಕಣ್ಣಜಪ್ಪಕೋ। ವಣ್ಣಾವಣ್ಣಾಯೋ ಕತ್ವಾತಿ ಧಮ್ಮವಾದೀನಞ್ಚ ಅಧಮ್ಮವಾದೀನಞ್ಚ ಸಲಾಕಾಯೋ ನಿಮಿತ್ತಸಞ್ಞಂ ಆರೋಪೇತ್ವಾ ಅಞ್ಞಮಞ್ಞಂ ವಿಸಭಾಗಾ ಕಾತಬ್ಬಾ। ತತೋ ತಾ ಸಬ್ಬಾಪಿ ಚೀವರಭೋಗೇ ಕತ್ವಾ ವುತ್ತನಯೇನ ಗಾಹೇತಬ್ಬಾ। ದುಗ್ಗಹೋತಿ ಪಚ್ಚುಕ್ಕಡ್ಢಿತಬ್ಬನ್ತಿ ‘‘ದುಗ್ಗಹಿತಾ ಸಲಾಕಾಯೋ’’ತಿ ವತ್ವಾ ಪುನ ಗಹೇತ್ವಾ ಯಾವತತಿಯಂ ಗಾಹೇತಬ್ಬಾ। ಸುಗ್ಗಹೋತಿ ಸಾವೇತಬ್ಬನ್ತಿ ಏಕಸ್ಮಿಮ್ಪಿ ಧಮ್ಮವಾದಿಮ್ಹಿ ಅತಿರೇಕಜಾತೇ ‘‘ಸುಗ್ಗಹಿತಾ ಸಲಾಕಾಯೋ’’ತಿ ಸಾವೇತಬ್ಬಂ। ಯಥಾ ಚ ತೇ ಧಮ್ಮವಾದಿನೋ ವದನ್ತಿ ತಥಾ ತಂ ಅಧಿಕರಣಂ ವೂಪಸಮೇತಬ್ಬನ್ತಿ। ಅಥ ಯಾವತತಿಯಮ್ಪಿ ಅಧಮ್ಮವಾದಿನೋವ ಬಹುತರಾ ಹೋನ್ತಿ, ಅಜ್ಜ ‘‘ಅಕಾಲೋ, ಸ್ವೇ ಜಾನಿಸ್ಸಾಮಾ’’ತಿ ವುಟ್ಠಹಿತ್ವಾ ಅಲಜ್ಜೀನಂ ಪಕ್ಖಭೇದತ್ಥಾಯ ಧಮ್ಮವಾದಿಪಕ್ಖಂ ಪರಿಯೇಸಿತ್ವಾ ಪುನದಿವಸೇ ಸಲಾಕಗ್ಗಾಹೋ ಕಾತಬ್ಬೋ। ಅಯಂ ಗೂಳ್ಹಕೋ ಸಲಾಕಗ್ಗಾಹೋ।
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
ಸಕಣ್ಣಜಪ್ಪಕೇ ಪನ ಗಹಿತೇ ವತ್ತಬ್ಬೋತಿ ಏತ್ಥ ಸಚೇ ಸಙ್ಘತ್ಥೇರೋ ಅಧಮ್ಮವಾದಿಸಲಾಕಂ ಗಣ್ಹಾತಿ, ಸೋ ಏವಂ ಅವಬೋಧೇತಬ್ಬೋ – ‘‘ಭನ್ತೇ, ತುಮ್ಹೇ ಮಹಲ್ಲಕಾ ವಯೋಅನುಪ್ಪತ್ತಾ, ತುಮ್ಹಾಕಂ ಏತಂ ನ ಯುತ್ತಂ, ಅಯಂ ಪನ ಧಮ್ಮವಾದಿಸಲಾಕಾ’’ತಿ ಅಸ್ಸ ಇತರಾ ಸಲಾಕಾ ದಸ್ಸೇತಬ್ಬಾ। ಸಚೇ ಸೋ ತಂ ಗಣ್ಹಾತಿ, ದಾತಬ್ಬಾ। ಅಥ ನೇವ ಅವಬುಜ್ಝತಿ, ತತೋ ‘‘ಮಾ ಕಸ್ಸಚಿ ಆರೋಚೇಹೀ’’ತಿ ವತ್ತಬ್ಬೋ। ಸೇಸಂ ವುತ್ತನಯಮೇವ। ವಿವಟಕೋ ವಿವಟತ್ಥೋಯೇವ।
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
ತಿವಿಧಸಲಾಕಗ್ಗಾಹಕಥಾ ನಿಟ್ಠಿತಾ।
Tividhasalākaggāhakathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ತಿವಿಧಸಲಾಕಗ್ಗಾಹೋ • Tividhasalākaggāho
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಧಿಕರಣವೂಪಸಮನಸಮಥಕಥಾದಿವಣ್ಣನಾ • Adhikaraṇavūpasamanasamathakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ತಿವಿಧಸಲಾಕಗ್ಗಾಹಕಥಾ • Tividhasalākaggāhakathā
