| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
තිවිධසලාකග්‌ගාහකථා
Tividhasalākaggāhakathā
235. සඤ්‌ඤත්‌තියාති සඤ්‌ඤාපනත්‌ථාය. ගූළ්‌හකන්‌තිආදීසු අලජ්‌ජුස්‌සන්‌නාය පරිසාය ගූළ්‌හකො සලාකග්‌ගාහො කාතබ්‌බො, ලජ්‌ජුස්‌සන්‌නාය පරිසාය විවටකො, බාලුස්‌සන්‌නාය සකණ්‌ණජප්‌පකො. වණ්‌ණාවණ්‌ණායො කත්‌වාති ධම්‌මවාදීනඤ්‌ච අධම්‌මවාදීනඤ්‌ච සලාකායො නිමිත්‌තසඤ්‌ඤං ආරොපෙත්‌වා අඤ්‌ඤමඤ්‌ඤං විසභාගා කාතබ්‌බා. තතො තා සබ්‌බාපි චීවරභොගෙ කත්‌වා වුත්‌තනයෙන ගාහෙතබ්‌බා. දුග්‌ගහොති පච්‌චුක්‌කඩ්‌ඪිතබ්‌බන්‌ති ‘‘දුග්‌ගහිතා සලාකායො’’ති වත්‌වා පුන ගහෙත්‌වා යාවතතියං ගාහෙතබ්‌බා. සුග්‌ගහොති සාවෙතබ්‌බන්‌ති එකස්‌මිම්‌පි ධම්‌මවාදිම්‌හි අතිරෙකජාතෙ ‘‘සුග්‌ගහිතා සලාකායො’’ති සාවෙතබ්‌බං. යථා ච තෙ ධම්‌මවාදිනො වදන්‌ති තථා තං අධිකරණං වූපසමෙතබ්‌බන්‌ති. අථ යාවතතියම්‌පි අධම්‌මවාදිනොව බහුතරා හොන්‌ති, අජ්‌ජ ‘‘අකාලො, ස්‌වෙ ජානිස්‌සාමා’’ති වුට්‌ඨහිත්‌වා අලජ්‌ජීනං පක්‌ඛභෙදත්‌ථාය ධම්‌මවාදිපක්‌ඛං පරියෙසිත්‌වා පුනදිවසෙ සලාකග්‌ගාහො කාතබ්‌බො. අයං ගූළ්‌හකො සලාකග්‌ගාහො.
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
සකණ්‌ණජප්‌පකෙ පන ගහිතෙ වත්‌තබ්‌බොති එත්‌ථ සචෙ සඞ්‌ඝත්‌ථෙරො අධම්‌මවාදිසලාකං ගණ්‌හාති, සො එවං අවබොධෙතබ්‌බො – ‘‘භන්‌තෙ, තුම්‌හෙ මහල්‌ලකා වයොඅනුප්‌පත්‌තා, තුම්‌හාකං එතං න යුත්‌තං, අයං පන ධම්‌මවාදිසලාකා’’ති අස්‌ස ඉතරා සලාකා දස්‌සෙතබ්‌බා. සචෙ සො තං ගණ්‌හාති, දාතබ්‌බා. අථ නෙව අවබුජ්‌ඣති, තතො ‘‘මා කස්‌සචි ආරොචෙහී’’ති වත්‌තබ්‌බො. සෙසං වුත්‌තනයමෙව. විවටකො විවටත්‌ථොයෙව.
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
තිවිධසලාකග්‌ගාහකථා නිට්‌ඨිතා.
Tividhasalākaggāhakathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / තිවිධසලාකග්‌ගාහො • Tividhasalākaggāho
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අධිකරණවූපසමනසමථකථාදිවණ්‌ණනා • Adhikaraṇavūpasamanasamathakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / තිවිධසලාකග්‌ගාහකථා • Tividhasalākaggāhakathā
