| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
তিৰিধসলাকগ্গাহো
Tividhasalākaggāho
২৩৫. তেন খো পন সমযেন সাৰত্থিযা এৰং জাতং এৰং সমুপ্পন্নং অধিকরণং হোতি। অথ খো তে ভিক্খূ – অসন্তুট্ঠা সাৰত্থিযা সঙ্ঘস্স অধিকরণৰূপসমনেন – অস্সোসুং খো অমুকস্মিং কির আৰাসে সম্বহুলা থেরা ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা পণ্ডিতা ৰিযত্তা মেধাৰিনো লজ্জিনো কুক্কুচ্চকা সিক্খাকামা। তে চে থেরা ইমং অধিকরণং ৰূপসমেয্যুং ধম্মেন ৰিনযেন সত্থুসাসনেন, এৰমিদং অধিকরণং সুৰূপসন্তং অস্সাতি। অথ খো তে ভিক্খূ তং আৰাসং গন্ত্ৰা তে থেরে এতদৰোচুং – ‘‘ইদং, ভন্তে, অধিকরণং এৰং জাতং, এৰং সমুপ্পন্নং। সাধু, ভন্তে, থেরা ইমং অধিকরণং ৰূপসমেন্তু ধম্মেন ৰিনযেন সত্থুসাসনেন, যথযিদং অধিকরণং সুৰূপসন্তং অস্সা’’তি। অথ খো তে থেরা – যথা সাৰত্থিযা সঙ্ঘেন অধিকরণং ৰূপসমিতং তথা সুৰূপসন্তন্তি 1 – তথা তং অধিকরণং ৰূপসমেসুং ।
235. Tena kho pana samayena sāvatthiyā evaṃ jātaṃ evaṃ samuppannaṃ adhikaraṇaṃ hoti. Atha kho te bhikkhū – asantuṭṭhā sāvatthiyā saṅghassa adhikaraṇavūpasamanena – assosuṃ kho amukasmiṃ kira āvāse sambahulā therā viharanti bahussutā āgatāgamā dhammadharā vinayadharā mātikādharā paṇḍitā viyattā medhāvino lajjino kukkuccakā sikkhākāmā. Te ce therā imaṃ adhikaraṇaṃ vūpasameyyuṃ dhammena vinayena satthusāsanena, evamidaṃ adhikaraṇaṃ suvūpasantaṃ assāti. Atha kho te bhikkhū taṃ āvāsaṃ gantvā te there etadavocuṃ – ‘‘idaṃ, bhante, adhikaraṇaṃ evaṃ jātaṃ, evaṃ samuppannaṃ. Sādhu, bhante, therā imaṃ adhikaraṇaṃ vūpasamentu dhammena vinayena satthusāsanena, yathayidaṃ adhikaraṇaṃ suvūpasantaṃ assā’’ti. Atha kho te therā – yathā sāvatthiyā saṅghena adhikaraṇaṃ vūpasamitaṃ tathā suvūpasantanti 2 – tathā taṃ adhikaraṇaṃ vūpasamesuṃ .
অথ খো তে ভিক্খূ – অসন্তুট্ঠা সাৰত্থিযা সঙ্ঘস্স অধিকরণৰূপসমনেন, অসন্তুট্ঠা সম্বহুলানং থেরানং অধিকরণৰূপসমনেন – অস্সোসুং খো অমুকস্মিং কির আৰাসে তযো থেরা ৰিহরন্তি…পে॰… দ্ৰে থেরা ৰিহরন্তি…পে॰… একো থেরো ৰিহরতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো। সো চে থেরো ইমং অধিকরণং ৰূপসমেয্য ধম্মেন ৰিনযেন সত্থুসাসনেন, এৰমিদং অধিকরণং সুৰূপসন্তং অস্সাতি। অথ খো তে ভিক্খূ তং আৰাসং গন্ত্ৰা তং থেরং এতদৰোচুং – ‘‘ইদং, ভন্তে, অধিকরণং এৰং জাতং, এৰং সমুপ্পন্নং। সাধু, ভন্তে, থেরো ইমং অধিকরণং ৰূপসমেতু ধম্মেন ৰিনযেন সত্থুসাসনেন, যথযিদং অধিকরণং সুৰূপসন্তং অস্সা’’তি। অথ খো সো থেরো – যথা সাৰত্থিযা সঙ্ঘেন অধিকরণং ৰূপসমিতং, যথা সম্বহুলেহি থেরেহি অধিকরণং ৰূপসমিতং, যথা তীহি থেরেহি অধিকরণং ৰূপসমিতং, যথা দ্ৰীহি থেরেহি অধিকরণং ৰূপসমিতং, তথা সুৰূপসন্তন্তি – তথা তং অধিকরণং ৰূপসমেসি।
Atha kho te bhikkhū – asantuṭṭhā sāvatthiyā saṅghassa adhikaraṇavūpasamanena, asantuṭṭhā sambahulānaṃ therānaṃ adhikaraṇavūpasamanena – assosuṃ kho amukasmiṃ kira āvāse tayo therā viharanti…pe… dve therā viharanti…pe… eko thero viharati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So ce thero imaṃ adhikaraṇaṃ vūpasameyya dhammena vinayena satthusāsanena, evamidaṃ adhikaraṇaṃ suvūpasantaṃ assāti. Atha kho te bhikkhū taṃ āvāsaṃ gantvā taṃ theraṃ etadavocuṃ – ‘‘idaṃ, bhante, adhikaraṇaṃ evaṃ jātaṃ, evaṃ samuppannaṃ. Sādhu, bhante, thero imaṃ adhikaraṇaṃ vūpasametu dhammena vinayena satthusāsanena, yathayidaṃ adhikaraṇaṃ suvūpasantaṃ assā’’ti. Atha kho so thero – yathā sāvatthiyā saṅghena adhikaraṇaṃ vūpasamitaṃ, yathā sambahulehi therehi adhikaraṇaṃ vūpasamitaṃ, yathā tīhi therehi adhikaraṇaṃ vūpasamitaṃ, yathā dvīhi therehi adhikaraṇaṃ vūpasamitaṃ, tathā suvūpasantanti – tathā taṃ adhikaraṇaṃ vūpasamesi.
অথ খো তে ভিক্খূ অসন্তুট্ঠা সাৰত্থিযা সঙ্ঘস্স অধিকরণৰূপসমনেন, অসন্তুট্ঠা সম্বহুলানং থেরানং অধিকরণৰূপসমনেন, অসন্তুট্ঠা তিণ্ণং থেরানং অধিকরণৰূপসমনেন, অসন্তুট্ঠা দ্ৰিন্নং থেরানং অধিকরণৰূপসমনেন, অসন্তুট্ঠা একস্স থেরস্স অধিকরণৰূপসমনেন, যেন ভগৰা তেনুপসঙ্কমিংসু, উপসঙ্কমিত্ৰা ভগৰতো এতমত্থং আরোচেসুং…পে॰… ‘‘নিহতমেতং, ভিক্খৰে, অধিকরণং সন্তং ৰূপসন্তং সুৰূপসন্তং। অনুজানামি, ভিক্খৰে, তেসং ভিক্খূনং সঞ্ঞত্তিযা তযো সলাকগ্গাহে – গূল়্হকং, সকণ্ণজপ্পকং, ৰিৰটকং।
Atha kho te bhikkhū asantuṭṭhā sāvatthiyā saṅghassa adhikaraṇavūpasamanena, asantuṭṭhā sambahulānaṃ therānaṃ adhikaraṇavūpasamanena, asantuṭṭhā tiṇṇaṃ therānaṃ adhikaraṇavūpasamanena, asantuṭṭhā dvinnaṃ therānaṃ adhikaraṇavūpasamanena, asantuṭṭhā ekassa therassa adhikaraṇavūpasamanena, yena bhagavā tenupasaṅkamiṃsu, upasaṅkamitvā bhagavato etamatthaṃ ārocesuṃ…pe… ‘‘nihatametaṃ, bhikkhave, adhikaraṇaṃ santaṃ vūpasantaṃ suvūpasantaṃ. Anujānāmi, bhikkhave, tesaṃ bhikkhūnaṃ saññattiyā tayo salākaggāhe – gūḷhakaṃ, sakaṇṇajappakaṃ, vivaṭakaṃ.
‘‘কথঞ্চ , ভিক্খৰে, গূল়্হকো সলাকগ্গাহো হোতি? তেন সলাকগ্গাহাপকেন ভিক্খুনা সলাকাযো ৰণ্ণাৰণ্ণাযো কত্ৰা একমেকো ভিক্খু উপসঙ্কমিত্ৰা এৰমস্স ৰচনীযো – ‘অযং এৰংৰাদিস্স সলাকা, অযং এৰংৰাদিস্স সলাকা। যং ইচ্ছসি তং গণ্হাহী’তি। গহিতে ৰত্তব্বো – ‘মা চ কস্সচি দস্সেহী’তি। সচে জানাতি – অধম্মৰাদী বহুতরাতি, দুগ্গহোতি, পচ্চুক্কড্ঢিতব্বং। সচে জানাতি – ধম্মৰাদী বহুতরাতি, সুগ্গহোতি, সাৰেতব্বং। এৰং খো, ভিক্খৰে, গূল়্হকো সলাকগ্গাহো হোতি।
‘‘Kathañca , bhikkhave, gūḷhako salākaggāho hoti? Tena salākaggāhāpakena bhikkhunā salākāyo vaṇṇāvaṇṇāyo katvā ekameko bhikkhu upasaṅkamitvā evamassa vacanīyo – ‘ayaṃ evaṃvādissa salākā, ayaṃ evaṃvādissa salākā. Yaṃ icchasi taṃ gaṇhāhī’ti. Gahite vattabbo – ‘mā ca kassaci dassehī’ti. Sace jānāti – adhammavādī bahutarāti, duggahoti, paccukkaḍḍhitabbaṃ. Sace jānāti – dhammavādī bahutarāti, suggahoti, sāvetabbaṃ. Evaṃ kho, bhikkhave, gūḷhako salākaggāho hoti.
‘‘কথঞ্চ, ভিক্খৰে, সকণ্ণজপ্পকো সলাকগ্গাহো হোতি? তেন সলাকগ্গাহাপকেন ভিক্খুনা একমেকস্স ভিক্খুনো উপকণ্ণকে আরোচেতব্বং – ‘অযং এৰংৰাদিস্স সলাকা, অযং এৰংৰাদিস্স সলাকা। যং ইচ্ছসি তং গণ্হাহী’তি। গহিতে ৰত্তব্বো – ‘মা চ কস্সচি আরোচেহী’তি। সচে জানাতি – অধম্মৰাদী বহুতরাতি, দুগ্গহোতি, পচ্চুক্কড্ঢিতব্বং। সচে জানাতি – ধম্মৰাদী বহুতরাতি, সুগ্গহোতি, সাৰেতব্বং। এৰং খো, ভিক্খৰে, সকণ্ণজপ্পকো সলাকগ্গাহো হোতি।
‘‘Kathañca, bhikkhave, sakaṇṇajappako salākaggāho hoti? Tena salākaggāhāpakena bhikkhunā ekamekassa bhikkhuno upakaṇṇake ārocetabbaṃ – ‘ayaṃ evaṃvādissa salākā, ayaṃ evaṃvādissa salākā. Yaṃ icchasi taṃ gaṇhāhī’ti. Gahite vattabbo – ‘mā ca kassaci ārocehī’ti. Sace jānāti – adhammavādī bahutarāti, duggahoti, paccukkaḍḍhitabbaṃ. Sace jānāti – dhammavādī bahutarāti, suggahoti, sāvetabbaṃ. Evaṃ kho, bhikkhave, sakaṇṇajappako salākaggāho hoti.
‘‘কথঞ্চ, ভিক্খৰে, ৰিৰটকো সলাকগ্গাহো হোতি? সচে জানাতি – ধম্মৰাদী বহুতরাতি, ৰিস্সট্ঠেনেৰ ৰিৰটেন গাহেতব্বো । এৰং খো, ভিক্খৰে, ৰিৰটকো সলাকগ্গাহো হোতি। ইমে খো, ভিক্খৰে, তযো সলাকগ্গাহা’’তি।
‘‘Kathañca, bhikkhave, vivaṭako salākaggāho hoti? Sace jānāti – dhammavādī bahutarāti, vissaṭṭheneva vivaṭena gāhetabbo . Evaṃ kho, bhikkhave, vivaṭako salākaggāho hoti. Ime kho, bhikkhave, tayo salākaggāhā’’ti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / তিৰিধসলাকগ্গাহকথা • Tividhasalākaggāhakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণৰূপসমনসমথকথাদিৰণ্ণনা • Adhikaraṇavūpasamanasamathakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / তিৰিধসলাকগ্গাহকথা • Tividhasalākaggāhakathā
