| Library / Tipiṭaka / තිපිටක • Tipiṭaka / චූළනිද්‌දෙස-අට්‌ඨකථා • Cūḷaniddesa-aṭṭhakathā |
9. තොදෙය්‍යමාණවසුත්‌තනිද්‌දෙසවණ්‌ණනා
9. Todeyyamāṇavasuttaniddesavaṇṇanā
57. නවමෙ තොදෙය්‍යසුත්‌තෙ – විමොක්‌ඛො තස්‌ස කීදිසොති තස්‌ස කීදිසො විමොක්‌ඛො ඉච්‌ඡිතබ්‌බොති පුච්‌ඡති.
57. Navame todeyyasutte – vimokkho tassa kīdisoti tassa kīdiso vimokkho icchitabboti pucchati.
58. ඉදානිස්‌ස අඤ්‌ඤවිමොක්‌ඛාභාවං දස්‌සෙන්‌තො භගවා දුතියං ගාථමාහ. තත්‌ථ විමොක්‌ඛො තස්‌ස නාපරොති තස්‌ස අඤ්‌ඤො විමොක්‌ඛො නත්‌ථි.
58. Idānissa aññavimokkhābhāvaṃ dassento bhagavā dutiyaṃ gāthamāha. Tattha vimokkho tassa nāparoti tassa añño vimokkho natthi.
59. එවං ‘‘තණ්‌හක්‌ඛයො එව විමොක්‌ඛො’’ති වුත්‌තෙපි තමත්‌ථං අසල්‌ලක්‌ඛෙන්‌තො ‘‘නිරාසසො සො උද ආසසානො’’ති පුන පුච්‌ඡති. තත්‌ථ උද පඤ්‌ඤකප්‌පීති උදාහු සමාපත්‌තිඤාණාදිනා ඤාණෙන තණ්‌හාකප්‌පං වා දිට්‌ඨිකප්‌පං වා කප්‌පයති.
59. Evaṃ ‘‘taṇhakkhayo eva vimokkho’’ti vuttepi tamatthaṃ asallakkhento ‘‘nirāsaso so uda āsasāno’’ti puna pucchati. Tattha uda paññakappīti udāhu samāpattiñāṇādinā ñāṇena taṇhākappaṃ vā diṭṭhikappaṃ vā kappayati.
60. අථස්‌ස භගවා තං ආචික්‌ඛන්‌තො චතුත්‌ථං ගාථමාහ. තත්‌ථ කාමභවෙති කාමෙ ච භවෙ ච.
60. Athassa bhagavā taṃ ācikkhanto catutthaṃ gāthamāha. Tattha kāmabhaveti kāme ca bhave ca.
රූපෙ නාසීසතීති චතුසමුට්‌ඨානිකෙ රූපාරම්‌මණෙ ඡන්‌දරාගවසෙන න පත්‌ථෙති. සද්‌ධාදීසුපි එසෙව නයො. පලිබොධට්‌ඨෙන රාගො එව කිඤ්‌චනං රාගකිඤ්‌චනං මදනට්‌ඨෙන වා. දොසකිඤ්‌චනාදීසුපි එසෙව නයො. සෙසං සබ්‌බත්‌ථ පාකටමෙව.
Rūpe nāsīsatīti catusamuṭṭhānike rūpārammaṇe chandarāgavasena na pattheti. Saddhādīsupi eseva nayo. Palibodhaṭṭhena rāgo eva kiñcanaṃ rāgakiñcanaṃ madanaṭṭhena vā. Dosakiñcanādīsupi eseva nayo. Sesaṃ sabbattha pākaṭameva.
එවං භගවා ඉදම්‌පි සුත්‌තං අරහත්‌තනිකූටෙනෙව දෙසෙසි, දෙසනාපරියොසානෙ ච පුබ්‌බසදිසො එව ධම්‌මාභිසමයො අහොසීති.
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
සද්‌ධම්‌මප්‌පජ්‌ජොතිකාය චූළනිද්‌දෙස-අට්‌ඨකථාය
Saddhammappajjotikāya cūḷaniddesa-aṭṭhakathāya
තොදෙය්‍යමාණවසුත්‌තනිද්‌දෙසවණ්‌ණනා නිට්‌ඨිතා.
Todeyyamāṇavasuttaniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / චූළනිද්‌දෙසපාළි • Cūḷaniddesapāḷi
9. තොදෙය්‍යමාණවපුච්‌ඡා • 9. Todeyyamāṇavapucchā
9. තොදෙය්‍යමාණවපුච්‌ඡානිද්‌දෙසො • 9. Todeyyamāṇavapucchāniddeso
