| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
४. तुलाकूटसुत्तवण्णना
4. Tulākūṭasuttavaṇṇanā
११६४. रूपकूटं सरूपेन सदिसेन छलवोहारो। अङ्गकूटं अत्तनो हत्थादिना अङ्गानं छलकरणं । गहणकूटं मानेसु गहणवसेन। पटिच्छन्नकूटं अयचुण्णादिना पटिच्छन्नेन छलकरणं। महतिया तुलाय। पच्छाभागेति तुलाय पच्छिमभागे। हत्थेनाति हत्थपदेसेन। अक्कमतीति उट्ठातुं अदेन्तो गण्हाति। ददन्तो पुब्बभागेति परेसं ददन्तो पुब्बभागे हत्थेन तुलं अक्कमति। तन्ति अयचुण्णं।
1164.Rūpakūṭaṃ sarūpena sadisena chalavohāro. Aṅgakūṭaṃ attano hatthādinā aṅgānaṃ chalakaraṇaṃ . Gahaṇakūṭaṃ mānesu gahaṇavasena. Paṭicchannakūṭaṃ ayacuṇṇādinā paṭicchannena chalakaraṇaṃ. Mahatiyā tulāya. Pacchābhāgeti tulāya pacchimabhāge. Hatthenāti hatthapadesena. Akkamatīti uṭṭhātuṃ adento gaṇhāti. Dadanto pubbabhāgeti paresaṃ dadanto pubbabhāge hatthena tulaṃ akkamati. Tanti ayacuṇṇaṃ.
लोहपातियोति तम्बलोहपातियो। सुवण्णवण्णा करोन्तीति असनिखादसुवण्णकनकलिम्पिता सुवण्णवण्णा करोन्ति। मानभाजनस्स हदयभूतस्स अब्भन्तरस्स भिन्नं हदयभेदो। निमियमानस्स तिलतण्डुलादिकस्स सिखाय अग्गकोटिया भिन्नं सिखाभेदो। खेत्तादीनं मिननरज्जुया अञ्ञथाकरणं रज्जुभेदो। रज्जुगहणेनेव चेत्थ दण्डकस्स गहणं कतमेवाति दट्ठब्बं।
Lohapātiyoti tambalohapātiyo. Suvaṇṇavaṇṇā karontīti asanikhādasuvaṇṇakanakalimpitā suvaṇṇavaṇṇā karonti. Mānabhājanassa hadayabhūtassa abbhantarassa bhinnaṃ hadayabhedo. Nimiyamānassa tilataṇḍulādikassa sikhāya aggakoṭiyā bhinnaṃ sikhābhedo. Khettādīnaṃ minanarajjuyā aññathākaraṇaṃ rajjubhedo. Rajjugahaṇeneva cettha daṇḍakassa gahaṇaṃ katamevāti daṭṭhabbaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ४. तुलाकूटसुत्तं • 4. Tulākūṭasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ४. तुलाकूटसुत्तवण्णना • 4. Tulākūṭasuttavaṇṇanā
